1. ¿Mbaʼépa enterove jajapo vaʼerã?

¿NDÉPA reñanima rehaʼã peteĩ karréra reikuaáva ijetuʼuha, ha hiʼarive nderasykatu térã nekaneʼõma? Katuete nereñanimamoʼãi. Upéicharõ jepe, apóstol Pablo heʼi vaʼekue enterove kristiáno tee ohaʼãha hína peteĩ karréra (Heb. 12:1). Ha enterove ñande, tahaʼe ñandeeda térã ñanemitãva, ñanderetiaʼe térã ñanekaneʼõva, ñaaguanta vaʼerã ipahaite peve jahupytyséramo pe prémio Jehová oofreséva ñandéve (Mat. 24:13).

2. ¿Mbaʼérepa apóstol Pablo ikatu vaʼekue omeʼẽ pe konsého jatopáva 2 Timoteo 4:7, 8-pe?

² Apóstol Pablo ikatu vaʼekue omeʼẽ upe konsého pórke haʼe voi ‘odipara vaʼekue pe karréra omohuʼã meve’ (elee 2 Timoteo 4:7, 8). Péro, ¿mbaʼeichagua karrérarepa oñeʼẽ hína ápe apóstol Pablo?

3. ¿Mbaʼépa hína pe karréra Pablo oñeʼẽ hague?

³ Pablo sapyʼánte oñeʼẽ vaʼekue umi depórte yma ojejapo vaʼekuére Gréciape, ha oipuru umíva omboʼe hag̃ua heta mbaʼe iñimportánteva (1 Cor. 9:25-27; 2 Tim. 2:5). Por ehémplo, haʼe heta vése okompara peteĩ kristiáno rekove peteĩ karrérare (1 Cor. 9:24; Filip. 2:16). Peteĩ persóna oñepyrũ ko karréra oñemeʼẽ vove Jehovápe ha ojevautisa (1 Ped. 3:21). Ha otermina pe karréra Jehová omeʼẽ vove chupe pe prémio, haʼéva hína pe vída etérna (Mat. 25:31-34, 46; 2 Tim. 4:8).

4. ¿Mbaʼépa jahecháta ko artíkulope?

⁴ Peteĩ kristiáno rekove ha peteĩ karréra puku ojojogua heta mbaʼépe. Jahechamína koʼág̃a mbohapy. Primero, jaha vaʼerã pe tape iporãvare. Segundo, ñañekonsentra vaʼerã ñamohuʼã hag̃ua pe karréra. Ha tercero, jasegi vaʼerã jadipara ñambohováiramo jepe heta mbaʼe ijetuʼúva.

5. ¿Mbaʼe tapérupipa ñande jaha vaʼerã, ha mbaʼérepa?

⁵ Oñeorganisa jave peteĩ karréra, oñemoĩma jepi mbaʼe tapérupipa oho vaʼerã umi odiparátava. Ha haʼekuéra oganaséramo pe prémio osegímante vaʼerã upe tape. Upéicha avei, ñande ñaganaséramo pe prémio, térã pe vída etérna, jasegi vaʼerã pe tape Jesús oheja vaʼekue ñandéve (Hech. 20:24; 1 Ped. 2:21). Péro Satanás ha umi osegíva iñehémplo ndoipotái jaiko kristiánoicha, haʼekuéra oipota jajapo hendivekuéra umi mbaʼe vaiete (1 Ped. 4:4). Haʼekuéra oñembohory ñanderehe jasegi haguére pe tape Jesús oheja vaʼekue, ha heʼi guaʼu haʼekuéra oiko lája iporãveha pórke ojapo hikuái ojaposéva. Péro upéva japu (2 Ped. 2:19).

6. ¿Mbaʼépa ñaaprende Brian ehémplogui?

⁶ Umi oñepyrũva oiko Satanás múndope ojeikoháicha, pyaʼe ohechakuaa upe tape nomeʼẽiha chupekuéra liverta. Upéva rangue, oiko chuguikuéra esklávo (Rom. 6:16). Jahechamína ermáno Brian ehémplo. Ituakuéra ningo omokyreʼỹ vaʼekue chupe osegi hag̃ua pe tape Jesús ohechauka vaʼekue. Péro imitãrusúrõ guare, haʼe oduda upe tape osegíva ombovyʼataha chupe. Upémarõ Brian odesidi oiko Satanás múndope ojeikoháicha. Haʼe heʼi: “Nañemeʼẽi kuri enkuénta pe liverta che aipota vaʼekue chereitytaha umi vísio vaietépe”. Upéi heʼive: “Un tiémpo haguépente che aikóma ajedroga, akaʼu ha cherekovai. Upéi ohasávo umi áño aipurúma umi dróga imbaretevéva ha ipeligrosovéva, ha péicha umíva cheesklavisaitéma. [...] Avei añepyrũma avende umi dróga amantene hag̃ua che vísio”. Tiémpo rire Brian odesidi oikotaha Jehová ojerureháicha. Upépe haʼe ojevy pe hape vaígui ha ojevautisa 2001-pe. Koʼág̃a haʼe añetehápe oiko vyʼápe osegi haguére pe tape Jesús ohechauka vaʼekue. *

7. Heʼiháicha Mateo 7:13, 14, ¿mbaʼe mokõi tapépa oñemoĩ ñane renonderãme?

⁷ ¡Ajépa iñimportantete jaiporavo porã mbaʼe tapérupipa jaháta! Satanás ningo ndoipotái jasegi pe tape ipoʼívarupi, upe “oporogueraháva jeikove opaveʼỹvape”, upéva rangue haʼe oipota jaha pe tape tuichávarupi, upe ohohápe la majória la hénte oĩva ko múndope. Upe tape ningo ifasilve voi ojesegi hag̃ua, péro ‘oporogueraha hína ñehundípe’ (elee Mateo 7:13, 14). Upévare jasegi hag̃ua pe tape iporãvarupi ha ani hag̃ua japia chugui, jajerovia vaʼerã Jehováre ha ñaneñeʼẽrendu chupe.

8. ¿Mbaʼépa ojapo jepi umi ohaʼãva karréra oñepysanga ha hoʼáramo?

⁸ Umi ohaʼãva karréra puku oñatende porã vaʼerã moõitérupipa ohóta ani hag̃ua oñepysanga.  Upéicharõ jepe, haʼekuéra ikatu hína oñepysanga reiete ótro hapicháre térã ipyho peteĩ posoʼípe. Ha hoʼáramo hikuái, pyaʼe opuʼã jey ha osegi odipara. Chupekuéra g̃uarã naiñimportántei mbaʼe rehepa oñepysanga, síno oñekonsentra hikuái omohuʼã hag̃ua pe karréra ha pe prémio oganasévare.

9. ¿Mbaʼépa jajapo vaʼerã oiméramo ñañepysanga raʼe?

⁹ Pe karréra ñahaʼãvape ningo ikatu ñañepysanga heta vése, por ehémplo jajavýta umi mbaʼe jaʼe térã jajapóvape. Térã umi ermáno odiparáva ñanendive ikatu avei ojavy ha ñanelastima. Upéva ningo oikótante voi, pórke enterove ñaneimperfékto ha jaha hína el mísmo tape poʼírupi, upe oporogueraháva jeikove opaveʼỹvape. Upévare sapyʼánte ikatu ñañolastimaʼi mimi jepi. Apóstol Pablo ohechakuaa vaʼekue sapyʼánte ‘ñañombopochytaha’ (Col. 3:13). Péro jajesareko rangue upe mbaʼe ñanemoñepysanga vaʼekuére, ñañekonsentra vaʼerã pe prémio oĩvare ñane renonderãme. Ha jaʼáramo, pyaʼe ñapuʼã jey vaʼerã ha jasegi jadipara. Ha oiméramo ndajaservisevéi Jehovápe ñandepyʼaro térã ñandepochy rupi, upéicharõ ñande nañamohuʼãmoʼãi pe karréra ha nañaganamoʼãi pe prémio. Hiʼarive ñande ikatu jastorva umi ótro oñehaʼãvape odipara pe tape poʼírupi ha ohupytyséva avei pe vída etérna.

10. ¿Mbaʼépa jajapo vaʼerã ani hag̃ua jastorva umi ótro ohaʼãvape ko karréra?

¹⁰ ¿Mbaʼépa avei ikatu jajapo ani hag̃ua jastorva umi ótro ohaʼãvape ko karréra? Ikatúma guive, jaheja vaʼerã ñane ermanokuérape ojapo hag̃ua chupekuéra ogustáva, jaovliga rangue chupekuéra siémpre ojapo hag̃ua ñande jaipotáva ha ñandegustaháichante (Rom. 14:13, 19-21; 1 Cor. 8:9, 13). Umi mbaʼe oikóva pe karréra ñande ñahaʼãvape idiferentete umi ótro karréragui. Umi karreraitépe ningo umi ohaʼãva oñoganase, ha káda uno okompeti ogana hag̃ua imbaʼerãnte pe prémio. Umi ohaʼãva pe karréra opensa ijehénte ohecha hag̃ua mbaʼépa oipytyvõta chupekuéra ogana hag̃ua. Haʼekuéra ikatu voi omyaña hína hapichápe ojei hag̃ua henonderãgui ikatu hag̃uáicha haʼekuéra opuntea. Péro ñande nañakompetíri oñondive (Gál. 5:26; 6:4). Ñande ningo ñaipytyvõse opa ikatúvape omohuʼã hag̃ua ñanendive pe karréra, ha oikove hag̃ua pára siémpre Ñandejára múndo pyahúpe. Upévare ñañehaʼã ñamoĩ en práktika pe konsého apóstol Pablo omeʼẽ vaʼekue espíritu sánto rupive heʼírõ guare: “Ani  pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filip. 2:4).

11. ¿Mbaʼe rehepa oñekonsentra peteĩ ohaʼãva karréra, ha mbaʼérepa?

¹¹ Umi ohaʼãva pe karréra ningo ndahaʼéi oñatendénteva haperãre, síno oñekonsentra omohuʼã hag̃ua pe karréra. Ha ndohecháiramo jepe moõitépa opa pe tape, haʼekuéra oñeimahina oterminamaha pe karréra ha oganaha pe prémio. Haʼekuéra osegi ikyreʼỹ opensa meme rupi pe prémio orresivítavare.

12. ¿Mbaʼépa Jehová imbaʼeporã rupi ogarantisa ñandéve?

¹² Pe karréra ñande ñahaʼãvape, Jehová imbaʼeporã rupi ogarantisa omeʼẽtaha pe prémio umi okompletávape pe karréra, upéva hína vída etérna tahaʼe yvágape térã ko yvy ape ári peteĩ paraísope. La Bíbliape oñeñeʼẽ ko prémio rehe ikatu hag̃uáicha ñande ñañeimahina mbaʼeichaitépa jaiko porãta. Ñande jasegíramo ñapensa pe futúro Jehová oprometévare ñandéve, ñaimevéta desidído ñaaguatataha ko karrérape ñañepysangáramo jepe.

13. ¿Mbaʼe iporãvapa ñande jareko umi ohaʼãva karréra ndorekóiva?

¹³ Umi yma ohaʼã vaʼekue karréra Gréciape ombohovái vaʼerã heta mbaʼe ijetuʼúva, por ehémplo ikaneʼõ térã hasy chupekuéra álgo. Péro haʼekuéra ojerovia vaʼerã pe entrenamiénto ha fuérsa orekóvare. Ñande ningo jajogua umi ohaʼãvape karréra pórke jareko avei entrenamiénto jadipara hag̃ua ko karrérape. Péro ñande jareko peteĩ mbaʼe iporãvéva haʼekuéra ndorekóiva. Jehová ikatu omeʼẽ ñandéve podér, ha upe ipodér núnka ndopamoʼãi, osegíta ñanepytyvõ ñande ñaimoʼãʼỹháicha. Ha ñande jajeroviáramo Jehováre, haʼe ndahaʼéi omeʼẽtanteva ñandéve entrenamiénto, síno omeʼẽta avei ñandéve pe fuérsa ñaikotevẽva (1 Ped. 5:10).

14. ¿Mbaʼéichapa 2 Corintios 12:9, 10 ñanepytyvõ ñambohovái hag̃ua umi mbaʼe ijetuʼúva?

¹⁴ Apóstol Pablo ombohovái vaʼekue heta mbaʼe ijetuʼúva. Chupe oñemaltrata ha ojepersegi vaʼekue, ha hiʼarive haʼe sapyʼánte ikangy ha tekotevẽ vaʼekue oaguanta peteĩ mbaʼe oikutúva chupe ñuatĩcha (2 Cor. 12:7). Péro haʼe noñentregái ombohovái haguére umi mbaʼe vai, upéva rangue oaprovecha umíva ohechauka hag̃ua Jehovápe ojeroviaha hese (elee 2 Corintios 12:9, 10). Pablo opensa haguére upéicha, Jehová siémpre oipytyvõ chupe ohasárõ guare umi mbaʼe ijetuʼúva.

15. ¿Mbaʼépa ñañandúta jasegíramo Pablo ehémplo?

¹⁵ Apóstol Pábloicha avei ñande ikatu hína ñañemaltrata térã jajepersegi jajerovia rupi Jehováre. Ikatu avei nañameʼẽvéima ñanderasykatu térã ñanekaneʼõitereígui. Péro jasegíramo Pablo ehémplo, káda situasión ijetuʼúva jahasávape jarekóta la oportunida ñañandu hag̃ua mbaʼeichaitépa Jehová mborayhúpe ñanepytyvõ.

16. ¿Mbaʼépa ikatu jajapo ñanderasykatúramo jepe?

¹⁶ ¿Ndépa repytáma tupápe térã reime sílla de rruédape? ¿Nderrodíllapa ikangýma ndehegui térãpa nderehechaporãvéima? Oiméramo upéicha, nde lomímonte ikatu gueteri redipara ko karrérape umi imitãva ha hesãivandi. Heta ijedáva ha hasykatúva odipara hína ko karréra oporogueraháva jeikove opaveʼỹvape. Haʼekuéra ningo ndaikatúi ojapo upéva ijehegui reínte, síno Jehová omeʼẽ chupekuéra pe fuérsa oikotevẽva. Upéva orresivi hikuái ohendúvo umi rreunionkuéra por teléfono térã ohecha umi rreunión oñemboguejy vaʼekue oĩva JW Stréamingpe. Avei haʼekuéra opredika umi doktór, enferméra ha ihentekuérape.

17. ¿Mbaʼépa Jehová oñandu umi hasykatúvare?

¹⁷ Oiméramo nde ndaikatuvéima rejapo entéro mbaʼe rejaposéva Jehová servísiope, aníkena reñedesanima ha repensa ndaikatumoʼãiha  reaguanta oñehundi peve ko múndo aña. Jehová ningo nderayhu rejerovia haguére hese, ha omombaʼe entéro mbaʼe rejapo vaʼekue hesehápe umi áño ohasa vaʼekuépe. Koʼág̃a ningo nde koʼýte reikotevẽ hese, ha haʼe núnka nanderejamoʼãi (Sal. 9:10). Upéva rangue, Jehová koʼýte oñemoag̃uivéta nderehe. Jahechamína mbaʼépa peteĩ ermána hasykatúva heʼi: “Amás día ningo cherasyve, ha ahechakuaa saʼive oportunida arekoha apredika hag̃ua. Péro aikuaa umi mbaʼe ajapóva michĩramo jepe ombovyʼaha Jehovápe, ha upéva chembovyʼaiterei”. Upévare ág̃a reñedesanimáramo, nemanduʼákena Jehová oĩha nde ykére. Ejepyʼamongetánte apóstol Pablo ehémplore, ha nemanduʼa koʼã mbaʼe heʼi vaʼekuére: “Che avyʼa chekangy jave, [...] pórke chekangy jave, chepoderóso hína” (2 Cor. 12:10).

18. ¿Mbaʼe situasión ijetuʼuetévapa ombohovái vaʼerã algúno?

¹⁸ Oĩ avei umi ohaʼãva pe karréra oporogueraháva jeikove opaveʼỹvape ha ombohováiva ótra kláse provléma. Haʼekuéra ombohovái vaʼerã hekovépe umi situasión ótro ndaikatúiva ohecha ni ontende. Por ehémplo, ikatu oreko hikuái depresión, oñekevrantaiterei rasa térã oreko ansieda. ¿Mbaʼérepa ijetuʼuete umi situasión ombohováiva koʼã Jehová siervokuéra? Pórke peteĩ persónagui opẽramo ijyva térã opytáramo sílla de rruédape, enterove ikatu ohecha mbaʼe provlémapa oreko, ha upéva omomýi chupekuéra oipytyvõ hag̃ua pe persónape. Péro umi orekóva provléma emosionál térã iprovlémava iñakãme ikatu ndojekuaái hesekuéra ohasa asyha hína, ha upévare ikatu ndojeporiahuverekói ni noñepytyvõi chupekuéra. Péro haʼekuéra ningo osufrínte avei osufriháicha peteĩ persóna opẽva chugui ijyva térã hetyma.

19. ¿Mbaʼépa ñaaprende Mefibóset ehémplogui?

¹⁹ Oiméramo nde nderasykatu ha reñandu avave nontendeiha ne situasión, ikatu nemokyreʼỹ hína Mefibóset ehémplo (2 Sam. 4:4). Haʼe ningo heta osufri vaʼekue ndaikatúi rupi oguata porã, ha hiʼarive rréi David opensa vai hese ha ndaihústoi hendive. Koʼã mbaʼe ningo ndahaʼéi ikáusare la oikóva. Upéicharõ jepe, haʼe ndohejái umi mbaʼe vai oamarga chupe, síno ohechakuaa ha oagradese umi mbaʼe porã oikóva hese. Por ehémplo, haʼe omombaʼeterei vaʼekue David ymave imbaʼeporã haguére hendive (2 Sam. 9:6-10). Upévare David opensa vaírõ guare hese, Mefibóset odesidi ndaipochymoʼãiha ni ndopytamoʼãiha ipyʼaro. David ojavýramo jepe, Mefibóset ndohejái upéva oamarga chupe, ha ndokulpái avei Jehovápe umi mbaʼe vai David ojapo vaʼekuére. Mefibóset ojesareko umi mbaʼe ikatúvare ojapo oapoja hag̃ua pe rréi Jehová oiporavo vaʼekuépe (2 Sam. 16:1-4; 19:24-30). Jehová oheja ñandéve la Bíbliape Mefibóset ehémplo porãite  ikatu hag̃uáicha ñaaprende chugui (Rom. 15:4).

20. a) ¿Mbaʼéichapa pe ansieda ikatu oporombohasa asy? b) ¿Mbaʼe rehepa ikatu oĩ segúro umi ogueropuʼakáva ko situasión?

²⁰ Oĩ ningo umi ermáno térã ermána oñekevrantaiterei rasáva térã orekóva ansieda, ha upévare inervióso ha noñeñanduporãi otrata térã oñeʼẽ jave ótro héntendi. Ikatu ijetuʼu chupekuéra oĩ hag̃ua heta hénte apytépe, upéicharõ jepe haʼekuéra osegi oho rreunionhápe ha asambleahápe. Chupekuéra g̃uarã ijetuʼueterei oñeʼẽ hag̃ua umi extráñope, péro lomímonte osẽ opredika. Oiméramo nde rehasa hína upeichagua situasión, ani repensa nderehénte oikoha upéva, heta hénte ningo ohasa avei umi mbaʼe. Nemanduʼákena Jehová oguerohoryha umi mbaʼe rejapóva iservísiope nde pyʼaite guive. Nde ningo koʼag̃aite peve nereñentregái ha upéva ohechauka Jehová nevendesi ha omeʼẽha ndéve pe fuérsa reikotevẽva * (Filip. 4:6, 7; 1 Ped. 5:7). Ha oiméramo reservi hína Jehovápe nderasykatu térã erekóramo jepe provléma emosionál, ikatu reime segúro Jehová ovyʼaitereiha ndereheve rejapo haguére upéva.

21. ¿Mbaʼépa ikatúta enterove jajapo Jehová ñanepytyvõ rupi?

²¹ Javyʼaiterei ningo jaikuaávo pe karréra Pablo oñeʼẽ hague idiferenteha peteĩ karreraitégui. Yma guare karrérape, peteĩnte la oganáva pe prémio, péro pe karréra ohaʼãvape umi kristianokuéra, enterove ifiélva ha oaguantáva orresivíta pe prémio oikove hag̃ua pára siémpre (Juan 3:16). Peteĩ karreraitépe enterove ijestádo porã vaʼerã, ndahaʼéiramo upéicha saʼieterei posivilida orekóta ogana hag̃ua pe karréra. Péro heta oĩ ñande apytépe hasykatúva, ha upéicharõ jepe osegíva oaguanta (2 Cor. 4:16). Jehová ñanepytyvõ rupi enterove ikatúta ñamohuʼã ko karréra.