JAʼE porãsérõ g̃uarã, umi ostudiáva la Biblia oaprende hag̃uáicha chugui, haʼete avei umi vuskadór de óro. ¿Mbaʼérepa? Pórke oñehaʼã heta ha oheka meme vaʼerã otopa hag̃ua Ñandejára arandu oĩva la Bíbliape. Umi ohekáva óro oipuru 3 método. Ñañeʼẽmína umívare, ha jahechami mbaʼéichapa ñande ikatu avei jajapo upéva jastudia jave la Biblia.

Eñeimahinamína reguataha reikóvo peteĩ rrío kóstare, ha nderesahósapyʼa peteĩ mbaʼe overávare. Rejayvy rehupi hag̃ua, ha reñemeʼẽ enkuénta haʼeha peteĩ óro pedasoʼi. ¡Ajépa revyʼaiténe! Pe óro retopáva michĩve peteĩ arrós reságui, ha hiʼarive ijetuʼueterei ojetopa hag̃ua. Pe diamánte iporãvéva jepe ifasilve ojejuhu chugui. Upéi reñemoĩ rehekave pe óro, jahecha nderejuhuvéipa.

Péicha avei, ikatu peteĩ testígo de Jehová ndevisita raʼe ha oñeʼẽ ndéve umi promésa porãitére oĩva la Bíbliape. Oiméne nemanduʼa porã upe díare, pórke upérõ rejuhu kuri primera ves peteĩ óro pedasoʼi. ¿Mbaʼépa hína upéva? Posívlemente reaprende kuri mbaʼéichapa héra Ñandejára, térã reñemeʼẽ enkuénta ikatuha oiko ndehegui iñamígo (Sal. 83:18; Sant. 2:23). ¡Ajépa upe moméntope rehechakuaa rejuhu hague peteĩ mbaʼe ivaliosovéva pe órogui! Katuete ningo reaprendesevéne raʼe heta mbaʼe.

Sapyʼánte ningo umi rrío térã arrójore oĩ mimi óro, por ehémplo umi itáre térã pe yvykuʼi apytépe. Umi ojededikáva oheka óro umichahárupi, unos mésepe ikatu ojuhu unos kuánto kíloma. Ha umi kantidáre ningo hepyeterei ojepaga.

Reñepyrũrõ guare restudia la Biblia umi testígo de Jehovándi, oiméne reñeñandu raʼe peteĩ vuskadór de óroicha, omboguáva pe yvykuʼi otopa hag̃ua pe óro. ¿Mbaʼérepa? Pórke rejepyʼamongetávo umi téxto bíblico releévare, reikuaave rehóvo Ñandejárape ha rejeroviave hese. Amáske rentende la Biblia, reñemoag̃uive Jehováre ha reñemeʼẽ enkuénta mbaʼeichaitépa nderayhu. Avei reaprende ikatuha reiko opa ára g̃uarã (Sant. 4:8; Jud. 20, 21).

 Umi ohekáva óro ningo heta ojeporeka pe rríore otopa hag̃ua pe óro. Oiméne nde reñehaʼãmbaite avei retopa hag̃ua umi tesóro oĩva la Bíbliape. ¿Mbaʼépa rehupyty upe haguére? Katuete reaprendéma umi mbaʼe iñimportantevéva oĩva la Bíbliape, ha upéva nemomýi reñemeʼẽ hag̃ua Ñandejárape ha rejevautisa (Mat. 28:19, 20).

Sapyʼánte umi vuskadór ojuhu ita orekóva óro. Ha ikatu hag̃uáicha oguenohẽ chugui pe óro, omyanguʼi hikuái pe ita. Heta vése ningo ni ndojekuaaguasúi pe óro. ¿Mbaʼérepa? Pórke una toneládape ikatu oĩ 10 gramomínte. Upéicharõ jepe, pe vuskadór de óro nopensái reiete ombaʼapotaha.

Ñañehaʼãmbaite vaʼerã ani hag̃ua japyta “umi mbaʼe ñaaprende vaʼekuépe ñepyrũrã Crístogui” (Heb. 6:1, 2). Tekotevẽ jastudia meme Ñandejára Ñeʼẽ ikatu hag̃uáicha ñantende umi mbaʼe ipyahúva ha upéi jajapo la ñaaprendéva. ¿Mbaʼépa ikatu rejapo ideprovechove hag̃ua ndéve umi mbaʼe restudiáva, ojapóramo jepe heta áñoma rehesaʼỹijo hague la Biblia?

Ani neateʼỹ reaprende hag̃ua. Ha releévo, eñatende porã umi detállere. Resegíramo reñehaʼã, rehechakuaáta mbaʼéichapa Jehová ndegia ha nemoarandu. Koʼã mbaʼe ivaliosoiterei, haʼete voi umi óro kuʼi (Rom. 11:33). Eipuru memékena opa mbaʼe Jehová organisasión omeʼẽva ndéve ne idiómape reinvestiga hag̃ua. Péicha reikuaáta hetave mbaʼe Ñandejára Ñeʼẽgui. Eheka gía redesidi porã hag̃ua, ha eñehaʼã erresponde opa mbaʼe reikuaaséva la Bíbliagui. Eporandu umi ermánope mbaʼe téxto térã artíkulopa oipytyvõ ha omombarete chupekuéra. Ha ekomparti hendivekuéra umi mbaʼe rejuhu vaʼekue restudiávo la Biblia.

Péro ani restudia reikuaa hag̃uánte hetave mbaʼe. Apóstol Pablo heʼi vaʼekue ipeligrosoha upéva, pórke ikatu jaju ñañembotuichase (1 Cor. 8:1). Upéva rangue, eñehaʼãmbaite neumílde ha emombarete nde fe. Pe estúdio de família ha pe estúdio personál nepytyvõta reiko hag̃ua Jehová oipotaháicha, ha nemokyreʼỹta reajuda hag̃ua nde rapichakuérape. Péro opa mbaʼe ári, revyʼaitereíta pórke rejuhu peteĩ mbaʼe ivaliosovéva pe órogui (Prov. 3:13, 14).