1. ¿Mbaʼérepa Jehová oñepyrũ vaʼekue okrea opa mbaʼe?

PETEĨ tiémpore Jehová oĩ vaʼekue haʼeñoite, péro noñeñandúi vaʼekue haʼeño, pórke haʼe noikotevẽi avavére ovyʼa hag̃ua. Upéicharõ jepe, Jehová oipota vaʼekue oĩ ótro oikovéva ha ovyʼáva avei haʼéicha. Upéicharõ, Jehová oporohayhu rupi, oñepyrũ ojapo opa mbaʼe (Sal. 36:9; 1 Juan 4:19).

2. ¿Mbaʼéichapa oñeñandu vaʼekue Jesús ha umi ánhel, Jehová okreárõ guare hetave mbaʼe?

² Ñepyrũrã Jehová ojapo vaʼekue iñajudanterã, Itaʼýra Jesúspe. Ha upéi “ojevale hese ojapo hag̃ua entéro mbaʼe”, umíva apytépe kompletoite umi ánhel (Col. 1:16). Jesús ovyʼaiterei vaʼekue ikatu haguére ombaʼapo Itúandi (Prov. 8:30). Ha umi ánhel ovyʼa vaʼekue avei. Haʼekuéra ohechapaite vaʼekue Jehová ha pe ikonstruktór ivaletereíva Jesús ojapórõ guare yvága ha yvy. ¿Mbaʼéichapa umi ánhel oñeñandu vaʼekue? Haʼekuéra osapukaipa vyʼágui ojejapórõ guare ko yvy, ha katuete osegíne raʼe oguerohory káda uno umi mbaʼe Jehová okrea vaʼekue ohóvo, ha koʼýte ojapórõ guare yvyporakuérape (Job 38:7; Prov. 8:31). Káda uno umi mbaʼe Jehová okrea vaʼekue ohechauka haʼe oporohayhu ha iñaranduha (Sal. 104:24; Rom. 1:20).

3. Heʼiháicha 1 Corintios 15:21, 22-pe, ¿mbaʼépa ikatu ojehupyty Jesús sakrifísio rupive?

³ Jehová oipota vaʼekue yvyporakuéra oiko pára siémpre ko yvy ape ári, pe lugár porãite haʼe okrea vaʼekuépe. Péro Adán ha Eva opekárõ guare Jehová renondépe, ndaikatuvéima vaʼekue oiko pára siémpre. Tiémpo rire, haʼekuéra ha enterove ifamiliare  omanóta kuri (Rom. 5:12). ¿Mbaʼépa Jehová ojapo rakaʼe? Upepete haʼe heʼíma mbaʼéichapa orreskatáta yvyporakuérape (Gén. 3:15). Jehová odesidi omeʼẽtaha Itaʼýra Jesúspe sakrifísioramo, oguenohẽ hag̃ua pekádo ha ñemano poguýgui Adán ha Eva familiarépe. Péicha káda persóna ikatúma odesidi oservítapa chupe ha orresivi vída etérna (Juan 3:16; Rom. 6:23; elee 1 Corintios 15:21, 22).

4. ¿Mbaʼe porandúpa ñambohováita ko artíkulope?

⁴ Jaikuaávo Ñandejára oprometeha omoingove jeytaha umi omano vaʼekuépe, ikatu ñañeporandu heta mbaʼe. Por ehémplo, ¿mbaʼéichapa oiméne oikóta pe rresurreksión? ¿Jaikuaátapa umi ñane hénte ha amigokuéra oñemoingove jeývape? ¿Mbaʼéichapa ñanembovyʼaitereíta pe rresurreksión? ¿Ha mbaʼéichapa jajepyʼamongetáramo pe rresurreksión rehe ñamombaʼevéta Jehová oporohayhu, iñarandu ha ipasiénsia haguére? Ñambohovaimína koʼã porandu.

5. ¿Mbaʼérepa ikatu jaʼe ndahaʼemoʼãiha ojojapa oñemoingove jeýtava umi omano vaʼekuépe?

⁵ Jehová omoingove jey vove hetaiterei héntepe Itaʼýra rupive, ikatu jaʼe ndahaʼemoʼãiha ojojapa oñemoingove jeýtava chupekuéra. ¿Mbaʼérepa? Pórke derrepentete oĩramo hetaitereive hénte ko yvy ape ári, ikatu oiko sarambi. Ha Jehová ningo ndojapói mbaʼeve sarambikuépe. Haʼe oikuaa oñeorganisa porã vaʼerãha entéro mbaʼe ikatu hag̃uáicha ojeiko pyʼaguapýpe (1 Cor. 14:33). Ñandejára Jehová iñarandu ha ipasiénsia vaʼekue ombaʼapórõ guare Jesús ndive oprepara hag̃ua ko yvy. Haʼekuéra oprepara vaʼekue ohóvo entéro mbaʼe párte por párte ikatu hag̃uáicha yvyporakuéra oiko ko yvy ape ári. Jesús avei ohechaukáta iñarandu ha ipasiensiaha ogoverna aja umi 1.000 áñore. Upe tiémpope haʼe ombaʼapóta umi ohasa vaʼekuéndi Armagedón oprepara  hag̃ua ko yvy, ikatu hag̃uáicha orresivi umi oñemoingove jeývape.

6. Heʼiháicha Hechos 24:15, ¿mávapepa avei Jehová omoingove jeýta?

⁶ Péro oĩ peteĩ mbaʼe iñimportanteve jeýva ojapo vaʼerã umi ohasáva Armagedón: Omboʼe vaʼerã umi oñemoingove jeývape mbaʼépa Ñandejára Rréino ha umi mbaʼe Jehová ohaʼarõva chuguikuéra. ¿Mbaʼérepa? Pórke la majoría umi oñemoingove jeýva oĩta pe grúpo la Biblia ohenóivape ‘umi iñinhústova’ (elee Hechos 24:15). Haʼekuéra okambia vaʼerã heta mbaʼépe ikatu hag̃uáicha oñevenefisia Jesús sakrifísiogui ha oiko pára siémpre. ¡Ñapensamíntena mbaʼeichaitépa oñembaʼapóta oñemboʼe hag̃ua hetaite hénte oñemoingove jeývape, ndoikuaáivape mbaʼevete Jehovágui! ¿Orekóta piko káda persóna peteĩ omboʼéva chupe la Biblia koʼág̃arupi ojejapoháicha? ¿Oñeasignáta piko chupekuéra peteĩ kongregasiónpe, ha oñemeʼẽta chupekuéra entrenamiénto omboʼe hag̃ua umi ótro oñemoingove jeývape upe rire? Ñahaʼarõtamante jahecha hag̃ua mbaʼépa la oikótava. Péro si jaikuaa Jesucristo ogoverna vove 1.000 áñore, ‘ko yvy henyhẽtaha Jehová konosimiéntogui’ (Is. 11:9). Heta traváho ningo jarekóta umi 1.000 áño aja, péro umíva katuete ñanembovyʼáta.

7. ¿Mbaʼérepa Ñandejára siervokuéra ontende porãta umi oñemoingove jeývape omboʼe jave chupekuéra?

⁷ Jesucristo ogoverna vove umi 1.000 áño aja, enterove Jehová siervokuéra osegi vaʼerã okambia ikatu hag̃uáicha haʼe oguerohory chupekuéra. Upévare ñande ñantende porãitereíta umi oñemoingove jeývape, ág̃a ñaipytyvõ vove chupekuéra okambia hag̃ua umi mbaʼe vai ojaposéva ha opensáva, ha oiko hag̃ua Jehová oipotaháicha (1 Ped. 3:8). Umi oñemoingove jeýva ningo ohecháta Jehová puévlo iñumildeha ha ojapoha gueteri umi kámbio Jehová oguerohory hag̃ua chupekuéra, ha oñehaʼãha hína avei ‘ohupyty hag̃ua pe salvasión’, upévare umi orresusitáva oadoraséta avei Jehovápe hendivekuéra (Filip. 2:12).

8. ¿Mbaʼérepa ikatu jaʼe umi orresivítava umi ihénte ha iñamigokuéra oñemoingove jeývape oikuaataha chupekuéra?

⁸ Ikatu jaʼe umi orresivítava umi ihénte térã iñamigokuéra oñemoingove jeývape oikuaataha chupekuéra. ¿Mbaʼérepa ikatu jaʼe upéva? Por ehémplo, ñapensávo mbaʼéichapa Jehová oporomoingove jey vaʼekue yma, ñahaʼarõkuaa Jehová ojapo jeytaha chupekuéra ikatu hag̃uáicha ipínta, oñeʼẽ ha opensa omano mboyvemi guareichaite jey. Ñanemanduʼa vaʼerã Jesús heʼi hague peteĩ omanóva haʼeteha okénteva hína, ha pe rresurreksión katu haʼeteha oñemombáyva pe persónape (Mat. 9:18, 24; Juan 11:11-13). Peteĩ persóna opáy jave nokambiái síno osegi elmimoite, tahaʼe ipínta, oñeʼẽ lája ha umi mbaʼe orekóva imemóriape. Ñapensami Lázaro ehémplore. Ojapóma kuri 4 día omano hague, ha hetekue oñepyrũma kuri oñembyai. Péro Jesús omoingove jeýrõ guare chupe, upepete iñermanakuéra oikuaa vaʼekue chupe, ha Lázaro avei imanduʼa hesekuéra (Juan 11:38-44; 12:1, 2).

9. ¿Mbaʼérepa umi oñemoingove jeýva ndahaʼemoʼãi gueteri perfékto?

⁹ Jehová opromete Jesucristo goviérno poguýpe avave ndeʼimoʼãiha: “Cherasy hína” (Is. 33:24; Rom. 6:7). Upéicharõ, umi oñemoingove jeývape ojejapo jeýta heterã hesãiva. Péro haʼekuéra ndahaʼemoʼãi gueteri perfékto, pórke upeichaʼỹrõ umi ihénte ha iñamigokuéra ikatu hína ndoikuaái chupekuéra. Amalisia entéro persónagui oikóta perfékto mbeguekatúpe, ág̃a Jesucristo ogoverna vove 1.000 áño aja, ha Jesús omeʼẽ jeýta Itúape pe Rréino opa rire ae umi 1.000 áño. Upe tiémpope, pe Rréino okumplítama entéro mbaʼe Jehová oipota vaʼekue ojapo,  umíva apytépe oipytyvõtama yvyporakuérape oiko hag̃ua chuguikuéra perfékto (1 Cor. 15:24-28; Apoc. 20:1-3).

10. ¿Mbaʼéichapa ñanemoñeñandúta pe rresurreksión?

¹⁰ Ñañeimahinamína mbaʼéichatapa ág̃a jarresivi vove umi ñane hénte ha amigokuéra oikove jeývape. ¿Japuka térã ñanerasẽtapa ág̃a vyʼágui? ¿Japurahéitapa Jehovápe javyʼaitereígui? Peteĩ mbaʼe la isegúrova: Jahayhuetereíta ñande Ru Jehovápe oñeinteresáva ñanderehe, ha Itaʼýra ñanderayhuetévape omeʼẽ haguére pe esperánsa oĩtaha rresurreksión.

11. Heʼi haguéicha Jesús Juan 5:28, 29-pe, ¿mbaʼépa oikóta umi iñeʼẽrendúvagui Ñandejárape?

¹¹ Ñañeimahinami mbaʼeichaitépa ovyʼáta umi orresusitáva oipeʼaite vove ijehegui peteĩ aóicha ikondúkta yma guare, ha oiko Ñandejára oipotaháicha. Umi ojapóva koʼã kámbio “orresusitáta oikove hag̃ua”, upéva heʼise ikatutaha oikove pára siémpre pe paraísope. Péro Jehová nopermitimoʼãi umi nokambiaséivape osegi oikove pe paraísope, ha ombyai pe pyʼaguapy oĩva upépe (Is. 65:20; elee Juan 5:28, 29).

12. ¿Mbaʼéichapa Jehová ovendesíta enterove oikóvape ko yvy ape ári?

¹² Pe Rréino poguýpe Ñandejára siervokuéra ohechakuaáta siertoha Proverbios 10:22-pe heʼíva: “Jehová vendisión ningo la añetehápe ñanemborríkova, ha haʼe ni michĩmi nañanembosufríri”. Pe espíritu sánto oipytyvõgui Ñandejára siervokuérape, ikatúta amás día ojoguave Jesucrístope ha osegi porãve iñehémplo, oiko peve chuguikuéra perfékto (Juan 13:15-17; Efes. 4:23, 24). Koʼẽ koʼẽre hesãivéta hikuái ha oikóta chuguikuéra mehór persóna. ¡Ajépa javyʼaitéta upe tiémpope! (Job 33:25). ¿Péro mbaʼéichapa koʼág̃ama voi ñanepytyvõta jajepyʼamongetáramo pe rresurreksión rehe?

13. ¿Mbaʼéichapa Salmo 139:1-4 ohechauka Jehová ñandekuaa porãitereiha, ha mbaʼéichapa pe rresurreksión ohechaukáta upéva?

¹³ Jahecháma haguéicha, Jehová omoingove jey vove umi omano vaʼekuépe, haʼekuéra imanduʼa jeýta umi mbaʼe ohasa vaʼekuére ha nokambiamoʼãi mbaʼeichagua persónapa hikuái. Ñapensamíntena mbaʼépa upéva ohechaukáta. Jehová ñanderayhueterei rupi ohecha ha imanduʼa entéro mbaʼe ñande ñapensa, ñañandu, jaʼe ha jajapóvare. Upévare, tekotevẽramo ñanemoingove jey, ifásilta chupe omeʼẽ jey hag̃ua ñandéve umi rrekuérdo jareko vaʼekue, ñande lája, ha ñanemopuʼã ñamano mboyve guareichaite jey. Rréi David ohechakuaa vaʼekue mbaʼeichaite pevépa Jehová ñandekuaa porã (elee Salmo 139:1-4). ¿Mbaʼéichapa ñañeñandu ñantendévo mbaʼeichaitépa Jehová ñandekuaa?

14. ¿Mbaʼéichapa ñañeñandu vaʼerã jajepyʼamongetávo mbaʼeichaitépa Jehová ñandekuaa porã?

¹⁴ Jajepyʼamongetávo mbaʼeichaitépa Jehová ñandekuaa, natekotevẽi jakyhyje, síno ñanemanduʼa vaʼerã mbaʼeichaitépa haʼe oñeinteresa ñanderehe. Káda únore ningo haʼe hakateʼỹ ha ñanemombaʼeterei. Imanduʼa entéro mbaʼe jahasávare ñande rekovépe ha ñanediferensiáva ótrogui. ¡Ajépa tuichaite ñanembopyʼaguapy upéva! Núnka nañapensái vaʼerã ñaimeha ñaneaño. Jehová ningo siémpre oĩ ñande ykére, ha ohecha hína mbaʼéichapa ikatu ñanepytyvõ (2 Crón. 16:9).

15. ¿Mbaʼéichapa pe rresurreksión ohechauka Jehová iñaranduha?

¹⁵ La hénte okyhyje jave omanórõ g̃uarã, umi iñenemígo ikatu ojopy chupekuéra ojapo hag̃ua umi mbaʼe ndojapomoʼãiva jepi, péro amo ipahápe ojapo oñeamenasa rupi chupekuéra  ojejukataha. Umi hénte oĩva Satanás poguýpe oipuru upéva ojapoka hag̃ua la héntepe umi mbaʼe oikuaáva noĩporãiha, térã otraisiona hag̃ua iñamigokuérape. Péro ñane kóntrape ndaikatúi oipuru hikuái upéva. Ñande jaikuaa umi ñane enemígo ñandejukáramo, Jehová ñanemoingove jeytaha (Apoc. 2:10). Ikatu ñaime segúro mbaʼeve ojapóva hikuái ndaikatumoʼãiha ñandejoko jasegi hag̃ua jaiko Jehová amígoramo (Rom. 8:35-39). ¡Ajépa Jehová iñaranduete omeʼẽvo ñandéve pe esperánsa oĩtaha rresurreksión! Upévare ndajakyhyjéi umi oapojáva Satanáspe ñaneamenasáramo ñandejukataha, ndajajapói haguére haʼekuéra oipotáva. Avei ñanembopyʼaguasuve jasegi hag̃ua ñandefiél Jehovápe.

16. a) ¿Mbaʼépa iporã ñañeporandu? b) ¿Mbaʼéichapa umi mbaʼe ñambohováiva ñanepytyvõta jaikuaa hag̃ua jajeroviápa hína Jehováre?

¹⁶ Jehová enemigokuéra ñaneamenasáramo ñandejukataha, ¿jajeroviátapa haʼe ñanemoingove jeytaha? ¿Mbaʼéichapa ikatu jaikuaa jajeroviataha Jehováre upe moméntope? Upearã ikatu ñañeporandu: “¿Ohechaukápa ajeroviaha Jehováre umi mbaʼe michĩva adesidíva káda día?” (Luc. 16:10). Ikatu avei ñañeporandu: “¿Ohechaukápa aipuru lája che tiémpo ha che pláta ajeroviaha Jehová promésare, omeʼẽtaha chéve aikotevẽva amotenondéramo Irréino?” (Mat. 6:31-33). Ñambohováiramo si koʼã porandúpe, jahechauka hína jajeroviaha Jehováre, ha ñaimeha preparádo ñambohovái hag̃ua oimehaichagua pruéva amo gotyove (Prov. 3:5, 6).

17. a) ¿Mbaʼéichapa pe rresurreksión ohechauka Jehová ipasiensiaha? b) ¿Mbaʼéichapa ikatu jahechauka jaagradeseha Jehovápe ipasiénsia haguére?

¹⁷ Jehová odesidíma pe día ha pe óra ohundi hag̃ua ko múndo aña (Mat. 24:36). Haʼe ndojapomoʼãi upéva itiempopeʼỹ ha noñedespasiensiamoʼãi avei. Chupe hiʼãitereíma omoingove jey umi omano vaʼekuépe, péro haʼe ipasiénsia (Job 14:14, 15). Haʼe ohaʼarõnte hína og̃uahẽ pe tiémpo iporãvéva oiporavo vaʼekue, omopuʼã jey hag̃ua chupekuéra (Juan 5:28). Añetehápe jareko heta mbaʼe jaagradese hag̃ua Jehovápe ipasiénsia haguére. Ñapensamíntena: Jehová ipasiénsia haguére hetaiterei hénte oreko tiémpo oñarrepenti hag̃ua, ha umíva apytépe ñande avei (2 Ped. 3:9). Jehová oipota voi heta hénte oreko pe oportunida oikovévo pára siémpre. Upéicharõ, jahechaukákena jaagradeseha chupe ipasiénsia haguére. ¿Mbaʼéichapa ikatu jajapo upéva? Jajapo opa ikatúva jatopa hag̃ua umi ‘ipyʼaporãvape ohupyty hag̃ua jeikove opaveʼỹva’, ha ñaipytyvõ chupekuéra ohayhu ha oservi  hag̃ua Jehovápe (Hech. 13:48). Upéi ñandéicha avei, haʼekuerahaitéma oñevenefisiáta Jehová ipasiénsia haguére.

18. ¿Mbaʼérepa ñanepasiénsia vaʼerã ñande rapichakuérare?

¹⁸ Jehová ningo ipasiénsia ha ohaʼarõta opa umi 1.000 áño oiko hag̃ua ñandehegui yvypóra perfékto. Ha og̃uahẽ meve upe tiémpo, haʼe osegíta gueteri operdona ñande pekadokuéra. Upévare jasegi vaʼerã iñehémplo ha jahecha umi kualida porã orekóva ñande rapichakuéra, ha ñanepasiénsia hesekuéra. Por ehémplo, peteĩ ermána ménape omeʼẽ vaieterei jepi umi atáke de ansieda ha ndohovéi rreunionhápe. Pe ermána omombeʼu: “Upéva ningo ijetuʼueterei chéve g̃uarã. Derrepentete ore rekove okambiaite, ha ndaikatuvéima rojapo umi mbaʼe roplanea vaʼekue ore famíliandi”. Upéicharõ jepe, ko ermána osegi ipasiénsia iménare, okonfia Jehováre ha núnka noñentregái. Jehová ojapoháicha, haʼe nomañái umi provlémarente, síno oñekonsentra umi kualida porã orekóvare iména. Ko ermána heʼi: “Che ména ningo oreko umi kualida iporãitereíva ha oñehaʼãmbaite hína saʼi saʼípe oĩ porãve hag̃ua”. Ajépa iñimportantete ñanepasiénsia ñane hénte ha ermanokuéra oñehaʼãvare hína ogueropuʼaka umi situasión ijetuʼúva.

19. ¿Mbaʼépa jajedesidi vaʼerã jajapo?

¹⁹ Jesús ha umi ánhel ningo ovyʼaiterei vaʼekue ojejapórõ guare ko yvy. Péro ñañeimahinamína mbaʼeichaitépa ovyʼáta hikuái, ág̃a ko yvy henyhẽ vove yvypóra perféktogui ohayhu ha oservíva Jehovápe. Ñapensamína mbaʼeichaitépa ovyʼáta avei umi ohótava yvágape ogoverna hag̃ua Jesús ndive, ág̃a yvyporakuéra oñevenefisia vove entéro mbaʼe ojapótavagui hikuái (Apoc. 4:4, 9-11; 5:9, 10). Ha ñañeimahinamína mbaʼéichatapa ndaiporivéi vove omanóva, oñelamentáva ni hasýva. Upe vove nañanerasẽmoʼãvéima jahasa asýgui, síno javyʼaitereítagui (Apoc. 21:4). Upéicharõ, jajedesidíkena jasegi ñande Túa oporohayhu, iñarandu ha ipasiensiaitéva ehémplo. Jajapóramo upéicha jasegíta javyʼa, tahaʼe haʼéva umi provléma ñambohováiva (Sant. 1:2-4). ¡Ajépa jaagradesete Jehovápe omeʼẽ haguére pe esperánsa oĩtaha rresurreksión! (Hech. 24:15).