1. ¿Mbaʼépa ikatu ñañeporandu ñapensávo opa mbaʼe Jehová ojapo vaʼekuére?

ÑAPENSÁVO ko univérso tuichaite Jehová ojapo vaʼekuére, ikatu ñañeñandu David oñeñandu haguéicha. Haʼe oñemboʼe vaʼekue Jehovápe ha heʼi chupe: “Amañávo umi ne rembiapokuére, pe yvága hovy asývare, pe jasy ha estrellakuéra ojajaipávare, apensa: peteĩ yvypóra ningo ndahaʼéi mbaʼevete nemanduʼa hag̃ua hese, ¿máva piko omereséta nde reñangareko hese?” (Sal. 8:3, 4). Ojapo haguéicha David, ñande avei ikatu ñapensa ñanemichĩetereiha ñañekomparávo umi estrellakuéra Jehová ojapo vaʼekuére, ha jahecharamoiterei la Jehová ñandereko haguére enkuénta. Péro jahecháta Jehová ndahaʼéi hague oñangarekónteva umi primer yvyporakuérare, Adán ha Évare, síno oreko voi chupekuéra ifamíliape.

2. ¿Mbaʼépa Jehová oipota vaʼekue ojapo Adán ha Eva?

² Adán ha Eva haʼe vaʼekue umi primer yvypóra oĩva Jehová famíliape ko yvy ape ári, ha Jehová haʼe vaʼekue Ituakuéra yvagapegua ohayhuetéva chupekuéra. Haʼe ohaʼarõ vaʼekue Adán ha Eva okumpli porã hembiapo ifamíliape. Jehová heʼi chupekuéra la ojapo vaʼerã: “Penefamília retákena ha peñemboheta hetave ha pemyenyhẽ ko yvy ha peipuru” (Gén. 1:28). Upéicharõ Ñandejára oipota vaʼekue Adán ha Eva ifamília ha oñangareko porã ko yvýre. Haʼekuéra ojapórire la Jehová ojeruréva chupekuéra, Adán ha Eva ha avei umi ifamiliare ikatúta kuri oĩ Ñandejára famíliape para siémpre.

3. ¿Mbaʼérepa ikatu jaʼe Adán ha Évape oñemeʼẽ hague peteĩ lugár iñimportánteva Jehová famíliape?

³ Adán ha Eva ningo oreko vaʼekue peteĩ lugár iñimportánteva Jehová famíliape. Oñeʼẽvo umi yvyporakuérare, David heʼi vaʼekue Jehovápe: “Nde remeʼẽ vaʼekue chupe peteĩ puésto michĩvéva  umi ánhelgui, ha remombaʼe ha rembotuicha chupe” (Sal. 8:5). Jaikuaaháicha, Jehová nomeʼẽi vaʼekue yvyporakuérape pe podér, arandu ha avilida orekóva umi ánhel (Sal. 103:20). Péro añetehápe ndahaʼéi la tuichaitereíva la diferénsia, pórke koʼã ánhel ipoderosoitéva michĩmínte tuichave ñandehegui. ¡Ajépa jahecharamoite upéva! Jahechaháicha, Jehová ojapórõ guare ñande túa ha ñande sy ypykuépe, ndaijojahái vaʼekue la oiko lája hikuái.

4. a) ¿Mbaʼépa oiko vaʼekue Adán ha Évare naiñeʼẽrendúi haguére Jehovápe? b) ¿Mbaʼe mbaʼépa jahecháta ko artíkulope?

 ⁴ Ñambyasýramo jepe, Adán ha Eva naiñeʼẽrendúi rupi operde vaʼekue pe lugár orekóva Jehová famíliape. Upéicha rupi ohupyty hetaiterei mbaʼe vai umi ifamiliarépe, ha upéva jahecháta upe rire ko artíkulope. Péro Jehová propósito nokambiái. Haʼe koʼag̃aite peve oipota umi yvypóra iñeʼẽrendúva oĩ ifamíliape pára siémpre. Primero jahechami mbaʼéichapa Jehová ohechaukáma ñanemombaʼe ha ñanembotuichaha. Upéi jahecháta mbaʼépa koʼág̃ama voi ikatu jajapo jahechauka hag̃ua ñaimeseha Ñandejára famíliape. Ha ultimoitépe ñaanalisáta mbaʼe vendisiónpa Jehová omeʼẽta umi ifamília oĩtavape ko yvy ape ári pára siémpre.

5. ¿Mbaʼéichapa ikatu ñambotuicha Jehovápe ñandeapo rupi ijoguaháramo?

⁵ Jehová ñandeapo vaʼekue ijoguahárõ (Gén. 1:26, 27). Haʼe ñandeapo rupi upéicha, ñande ikatu jahechauka umi kualida porãite haʼe orekóva. Por ehémplo, ikatu japorohayhu, japoroporiahuvereko, jahechauka ñandefielha ha jajapo iporãva (Sal. 86:15; 145:17). Ñañehaʼã jave jahechauka koʼã kualida, ñambotuicha hína Jehovápe, ha jahechauka jaagradeseha chupe ñandeapo haguére ijoguaháramo (1 Ped. 1:14-16). Ñande ningo javyʼa ha ñañeñandu porã jajapo jave umi mbaʼe ogustáva ñande Ru yvagapeguápe. Ha haʼe ñandeapo rupi ijoguaháramo, omeʼẽ ñandéve pe avilida jahechauka hag̃ua umi kualida porã haʼe ohaʼarõva oreko umi oĩtava ifamíliape.

6. ¿Mbaʼéichapa Jehová ohechauka vaʼekue omombaʼeha yvyporakuérape opreparárõ guare ko yvy?

⁶ Jehová ojapo ñandéve g̃uarã peteĩ lugár iporãitereíva jaiko hag̃ua. Heta tiémpo ojapo mboyve Adánpe, Jehová opreparáma vaʼekue ko yvy yvyporakuérape g̃uarã (Job 38:4-6; Jer. 10:12). Jehová ivuéno ha ipojeraiterei rupi, ojapo hetaiterei mbaʼe ikatu hag̃uáicha jadisfruta (Sal. 104:14, 15, 24). Sapyʼánte haʼe oñemotiémpo vaʼekue opensa hag̃ua umi mbaʼe okrea vaʼekuére, ha “ohecha iporãha upéva” (Gén. 1:10, 12, 31). Jehová ñanemombaʼe avei ‘omoĩvo ñande poguýpe’ entéro umi mbaʼe porãite haʼe ojapo vaʼekue ko yvy ape ári (Sal. 8:6). Ñandejára ningo oipota umi yvypóra perfékto vyʼápe oñangareko pára siémpre koʼã mbaʼe porãite ojapo vaʼekuére. ¿Ñandépa jajepokuaa jaagradese Jehovápe upe esperánsa porãitére?

7. ¿Mbaʼéichapa Josué 24:15 ohechauka yvyporakuéra orekoha liverta odesidi hag̃ua?

⁷ Jehová omeʼẽ vaʼekue ñandéve pe liverta jadesidi hag̃ua. Ñande ningo ikatu jadesidi mbaʼépa jajapóta ñande rekovépe (elee Josué 24:15). Ñande Ru ñanderayhuetéva ningo ovyʼaiterei ñande jadesidi jave jaservitaha chupe (Sal. 84:11; Prov. 27:11). Ñande ikatu jaipuru upe liverta jarekóva jadesidi porã hag̃ua hetave mbaʼépe. Jahechamína pe ehémplo Jesús oheja vaʼekue oipurúvo pe liverta haʼe orekóva odesidi porã hag̃ua.

8. ¿Mbaʼéichapa Jesús oipuru vaʼekue pe liverta orekóva odesidi hag̃ua?

⁸ Ñande ikatu jasegi Jesús ehémplo jadesidi jave ñamotenonde ñande rapichakuéra oikotevẽva. Peteĩ díape, Jesús ha ijapostolkuéra ikaneʼõiterei vaʼekue ha oho hikuái peteĩ lugár itrankilohápe opytuʼuʼimi hag̃ua. Péro ndaikatúi jey opytuʼu hikuái, pórke peteĩ hénte aty oho  hapykuerikuéra ha oipotaiterei Jesús omboʼe chupekuéra. Jesúspe katu nombopochýi upéva, síno ombyasyeterei umi héntepe ha “oñepyrũ omboʼe chupekuéra heta mbaʼe” (Mar. 6:30-34). Ñande jasegi jave Jesús ehémplo, ha jaipuru ñane tiémpo ha ñane mbaretekue ñaipytyvõ hag̃ua ótrope, ñambotuicha hína ñande Ru yvagapeguápe (Mat. 5:14-16). Péicha jahechauka avei ñaimeseha Jehová famíliape.

9. ¿Mbaʼépa oreko vaʼerã enkuénta tuakuéra?

⁹ Jehová omeʼẽ yvyporakuérape pe kapasida ifamília hag̃ua, ha avei pe rresponsavilida omboʼévo ifamíliape ohayhu ha oservi hag̃ua chupe. Oiméramo nde nefamília, ¿remombaʼépa ko rregálo espesiál oñemeʼẽ vaʼekue ndéve? Jehová ningo omeʼẽ vaʼekue umi ánhelpe heta avilida ndaijojaháiva, péro nomeʼẽi chupekuéra pe kapasida ifamília hag̃ua. Orekóvo upéva enkuénta, tuakuéra omombaʼe vaʼerã pe priviléhio porãite orekóva omongakuaa hag̃ua ifamiliakuérape. Chupekuéra ningo oñemeʼẽ vaʼekue tuichaiterei rresponsavilida: Oipytyvõ ifamíliape, ha ‘okorrehi ha oñemoñeʼẽ chupekuéra Jehová heʼiháicha’ (Efes. 6:4; Deut. 6:5-7; Sal. 127:3). Ñandejára organisasión oipytyvõ umi tuakuérape omeʼẽvo hetaiterei informasión bíblica. Por ehémplo, lívro, rrevísta, vidéo, músika ha umi artíkulo osẽva ñane páhina de Internétpe. Upéva ohechauka porã mbaʼeichaitépa Jehová ha Jesús ohayhu umi mitã mimíme (Luc. 18:15-17). Jehová ningo ovyʼaiterei umi tuakuéra ojerovia jave hese, ha ojapo opa ikatúva oñangareko porã hag̃ua ifamiliakuérare. Péicha haʼekuéra oipytyvõ hína umi mitãme oreko hag̃ua la esperánsa oĩvo Jehová famíliape pára siémpre.

10, 11. ¿Mbaʼe oportunidápa Jehová omeʼẽ ñandéve Jesús sakrifísio rupive?

¹⁰ Jehová omeʼẽ vaʼekue Itaʼýra ohayhuvéva ñanderehehápe ikatu hag̃uáicha ñaime jey ifamíliape. Jahecháma haguéicha  párrafo 4-pe, Adán ha Eva operde vaʼekue pe lugár orekóva Jehová famíliape, ha upéicha rupi umi ifamiliare operde avei upe oportunida (Rom. 5:12). Adán ha Eva odesidi vaʼekue naiñeʼẽrendumoʼãiha Ñandejárape, upévare haʼekuéra omerese voi oñemosẽ Jehová famíliagui. ¿Péro mbaʼépa oikóta umi ifamiliarégui? Jehová ningo ohayhueterei yvyporakuérape, upévare ojapo la tekotevẽva ikatu hag̃uáicha umi iñeʼẽrendúva oĩ jey ifamíliape. ¿Mbaʼéichapa ojapo raʼe upéva? Ohejávo Itaʼýra peteĩete Jesucristo omano ñanderehehápe (Juan 3:16; Rom. 5:19). Jesús sakrifísio rupive, Jehová ikatu vaʼekue oadopta itaʼýraramo 144.000 yvypóra ifiélvape (Rom. 8:15-17; Apoc. 14:1).

¹¹ Avei oĩ umi millones de persóna ifiélva Ñandejárape ha okumplíva umi mbaʼe haʼe ojeruréva. Haʼekuéra oreko avei la esperánsa oĩvo Jehová famíliape ohasa rire pe pruéva finál, ág̃a oñemohuʼãvo umi 1.000 áño (Sal. 25:14; Rom. 8:20, 21). Ha oreko rupi upe esperánsa, haʼekuéra koʼág̃ama voi ikatu heʼi Ijapohare Jehováre: ‘Che ru’ (Mat. 6:9). Avei umi oñemoingove jeýva ikatúta oaprende mbaʼépa Jehová ohaʼarõ chuguikuéra. Ha umi odesidíva iñeʼẽrendutaha chupe, ikatúta oĩ ifamíliape pára siémpre.

12. ¿Mbaʼe porandúpa ñambohováita koʼág̃a?

¹² Jahecháma haguéicha, Jehová voi ojapóma vaʼekue heta mbaʼe ohechauka hag̃ua omombaʼeha yvyporakuérape. Haʼe oadoptáma umi unhídope itaʼýraramo, ha omeʼẽma avei umi oĩvape pe ‘aty guasúpe’ la esperánsa oikóvo chuguikuéra itaʼýra ha itajyrakuéra pe múndo pyahúpe (Apoc. 7:9). ¿Mbaʼépa ikatu jajapo koʼág̃ama voi jahechauka hag̃ua Jehovápe ñaimeseha ifamíliape pára siémpre?

13. ¿Mbaʼépa ikatu jajapo ñaime hag̃ua Jehová famíliape? (Marcos 12:30).

¹³ Jahechauka jahayhuha Jehovápe jaservívo chupe ñande pyʼaite guive (elee Marcos 12:30). Jehová imbaʼeporãiterei rupi omeʼẽma  ñandéve heta rregálo, péro umíva apytégui pe iñimportantevéva hína kóva: Pe kapasida jarekóva jaadora hag̃ua chupe. Ha ñande jahechauka hína jahayhuha Jehovápe ‘ñakumplívo imandamientokuéra’ (1 Juan 5:3). Peteĩva umi mandamiénto Jehová oipotáva ñakumpli haʼe hína pe omeʼẽ vaʼekue Jesús rupive: Jajapo disípulo ha javautisa chupekuéra (Mat. 28:19). Jesús omanda vaʼekue avei ñandéve jajoayhu hag̃ua (Juan 13:35). Jehová ningo vyʼápe orresivíta umi okumplívape imandamientokuéra oĩ hag̃ua ifamília tuichaitévape (Sal. 15:1, 2).

14. ¿Mbaʼéichapa ikatu jahechauka jahayhuha ñande rapichakuérape? (Mateo 9:36-38; Romanos 12:10).

¹⁴ Jahayhu ñande rapichakuérape. Pe kualida iñimportantevéva Jehová orekóva ningo haʼe hína pe mborayhu (1 Juan 4:8). Jehová ohechaukáma vaʼekue ñanderayhuha jaikuaa mboyve jepe chupe (1 Juan 4:9, 10). Ñande ningo jasegi hína iñehémplo jahayhu jave ñande rapichakuérape (Efes. 5:1). Ñaipytyvõ jave umi héntepe oikuaa hag̃ua Jehovápe oĩ aja gueteri tiémpo, jajapo hína pe iporãvéva jahechauka hag̃ua jahayhuha chupekuéra (elee Mateo 9:36-38). Upéicha, ñameʼẽ chupekuéra la oportunida oĩ hag̃ua Ñandejára famíliape. Ha peteĩ persóna ojevautisa rire jepe, jasegi vaʼerã jahayhu ha jarrespeta chupe (1 Juan 4:20, 21). ¿Mbaʼéichapa ikatu jajapo upéva? Por ehémplo, ñane ermáno ojapóramo peteĩ mbaʼe ñande nañantendéiva, ndajaikomoʼãi ñapensa vai hese ni ñaimoʼã ojapoha upéva openságui ijehénte. Upéva rangue, ñakonfiáta hese, ñamombaʼéta chupe ha ñapensáta tuichaveha ñandehegui (elee Romanos 12:10; Filip. 2:3).

15. ¿Máva mávapepa ñambyasy vaʼerã ha jahechauka ñanembaʼeporãha hendivekuéra?

¹⁵ Jahechauka ñambyasyha opaichagua héntepe ha ñanembaʼeporã hendivekuéra. Ñande ñaimeséramo Jehová famíliape pára siémpre, jaiko vaʼerã Ñandejára Ñeʼẽ heʼiháicha. Por ehémplo, Jesús omboʼe vaʼekue ñande jahechauka vaʼerãha ñambyasyha opaichagua héntepe, ha ñanembaʼeporã hendivekuéra, umi ñane enemígondi jepe (Luc. 6:32-36). Sapyʼánte ningo ikatu ijetuʼu ñandéve jajapo hag̃ua upéva. Oiméramo upéicha, ñaaprende vaʼerã ñapensa Jesús opensaháicha, ha jajapo umi mbaʼe haʼe ojapo vaʼekue. Ñañehaʼãmbaite jave ñaneñeʼẽrendu Jehovápe ha jasegi Jesús ehémplo, jahechauka hína ñande Ru yvagapeguápe ñaimeseha ifamíliape pára siémpre.

16. ¿Mbaʼépa jajapo vaʼerã ani hag̃ua oñeñeʼẽ vai Jehová famíliare?

¹⁶ Ñañatende ani hag̃ua oñeñeʼẽ vai Jehová famíliare. Peteĩ famíliape ningo umi mitã michĩvéva osegi jepi pe iñermáno tuichavéva ehémplo. Pe tuichavéva osegíramo umi konsého oĩva la Bíbliape, omoĩta ehémplo porã umi iñermáno michĩvévape. Péro ojapóramo mbaʼe vai, umi iñermáno michĩvéva osegíta pe iñehémplo vai. Upeichaite avei Jehová famíliape, peteĩ kristiáno ifiélvagui oikóramo apóstata, hekovai térã ojapóramo umi mbaʼe noĩporãietéva, umi ótro oĩva kongregasiónpe ikatu hína osegi iñehémplo ha ojapo avei umi mbaʼe ivaíva. Oĩramo ojapóva upéicha, ikausarekuéra ikatu hína oñeñeʼẽ vai Jehová famíliare (1 Tes. 4:3-8). Ñande ndajasegíri vaʼerã umi ehémplo vai, ha nañapermitíri vaʼerã mbaʼeve ñanemomombyry ñande Ru yvagapegua ñanderayhuetévagui.

17. ¿Mbaʼépa nañapensái vaʼerã, ha mbaʼérepa?

¹⁷ Jajerovia Jehováre ha ani umi mbaʼerepýre. Jehová opromete ñamotenondéramo Irréino ha jaikóramo haʼe heʼiháicha, siémpre omeʼẽtaha ñandéve jaʼumi vaʼerã, ao ha peteĩ lugár jaiko hag̃ua (Sal. 55:22; Mat. 6:33). Ñande jajeroviáramo upe promésare, nañapensamoʼãi umi mbaʼerepy oofreséva ko múndo ñandeprotehe ha ñanembovyʼataha. Ñande jaikuaa jajapóramo añoite Jehová volunta jarekotaha pyʼaguapy añetetéva (Filip. 4:6, 7). Avei ikatúramo jepe jajogua heta mbaʼe, ñapensa vaʼerã jarekótapa pe tiémpo ha pe fuérsa jaipuru ha ñañangareko  hag̃ua umívare. Iporã vaʼerã ñañeporandu: “¿Iñimportantetereípa chéve g̃uarã umi che kosakuéra ha amombaʼeterei voi la arekóva?”. Ñanemanduʼa vaʼerã Jehová omeʼẽ hague ñandéve ñane rembiaporã ifamíliape. Upévare, aníkena jaheja mbaʼeve ñandedistrae. Ñande ningo ndajajoguaseiete pe kariaʼy ipláta hetávape, pe odesidi vaʼekue ndosegimoʼãiha Jesúspe ohayhuetereígui ikosakuéra. Péicha haʼe operde vaʼekue la oportunida oservi hag̃ua Jehovápe ha oiko hag̃ua chugui itaʼýra (Mar. 10:17-22).

18. ¿Mbaʼe priviléhio tuichaitéva ha mbaʼe vendisiónpa ohupytýta pára siémpre umi yvypóra iñeʼẽrendúva?

¹⁸ Umi iñeʼẽrendúva orekóta pe priviléhio tuichavéva ikatúva oreko yvyporakuéra: Ohayhúta ha oadoráta Jehovápe pára siémpre. Umi orekóva la esperánsa oikóvo ko yvy ape ári, ovyʼáta avei oñangarekóvo ko yvy porãite Jehová omeʼẽ vaʼekuére ñandéve jaiko hag̃ua. Koʼẽrõitéma ningo Ñandejára Rréino ombopyahu ha omoporãmbaite jeýta ko yvy, ha opa mbaʼe oĩva pype. Jesús osolusionáta opaichagua provléma jarekóva Adán ha Eva odesidi haguére oheja Ñandejára família. Jehová omoingove jeýta hetaiterei persónape, ha omeʼẽta chupekuéra la oportunida oikove hag̃ua pára siémpre. Haʼekuéra orekóta salu perfékta ha oikóta ko yvy ape ári haʼétamava peteĩ paraíso (Luc. 23:42, 43). Umi yvypóra iñeʼẽrendúva ohupytývo pe perfeksión, káda únope ‘oñemombaʼe ha oñembotuicháta’ David heʼi haguéicha (Sal. 8:5).

19. ¿Mbaʼérepa nemanduʼa vaʼerã?

¹⁹ Oiméramo nde reĩ ‘pe aty guasúpe’, ereko hína peteĩ esperánsa iporãitereíva. Jehová ningo nderayhueterei ha oipota voi reime ifamíliape. Upévare ejapókena opa ikatúva haʼe ndeguerohory hag̃ua. Erekókena káda día ne akãme ha ne korasõme Ñandejára promesakuéra. Emombaʼékena pe priviléhio erekóva eadora hag̃ua nde Ru yvagapeguápe, ha nerakateʼỹ pe esperánsa erekóvare emombaʼeguasu hag̃ua chupe pára siémpre.