1, 2. Ohechaukaháicha Salmo 34:8, ¿mbaʼépa jajapo vaʼerã jaikuaa hag̃ua Jehová ivuenoha?

ÑAMOĨ chupe ojeofreseha ñandéve peteĩ tembiʼu núnka nañatanteái vaʼekue. Ñande ningo ikatu japilla heta mbaʼe ñamañávo ipíntare, ñahetũvo hyakuã ha jaikuaávo mbaʼe mbaʼépa oreko, térã ñaporandúramo ótrope hépa upe tembiʼu. Péro ñatantea rire ae jaikuaáta ñandegustátapa upe tembiʼu.

² Péicha avei ñande ikatu jaikuaa Jehová ivuenoha jaleéramo la Biblia ha ñane puvlikasionkuéra, ha ñahendúramo umi ótrope omombeʼuha umi mbaʼe porã Jehová ojapo vaʼekue hesehapekuéra. Péro ñande ikatúta ñantende porãve mbaʼeichaitépa Jehová ivuéno, ñandete voi ‘ñatantea ha jahecháramo haʼe ivuenoha’ ñanendive (elee Salmo 34:8). Ñamoĩmína peteĩ ehémplo jahecha hag̃ua mbaʼéichapa ikatu jajapo upéva. Ñamoĩ chupe jaserviseha Jehovápe de tiémpo kompléto. Péro upearã tekotevẽta ñamosensillove ñande rekove. Oiméne jaleéma heta vése Jesús opromete hague ñamotenondéramo Ñandejára Rréino, Jehová omeʼẽtaha ñandéve umi mbaʼe añetehápe ñaikotevẽva. Péro ñande núnka ndajahecháiva gueteri Jehová ojapoha upéva ñanderehehápe (Mat. 6:33). Upéicharõ jepe, jajerovia rupi Jesús promésare, ñañehaʼã saʼive jagasta, saʼive ñambaʼapo, ha ñañepyrũ ñamotenondeve pe predikasión. Jajapóvo upéva, ñandete voi jahechakuaa Jehová añetehápe oñangarekoha ñanderehe ha nombofaltaiha ñandéve umi mbaʼe ñaikotevẽva. Péicha ñandete ‘ñatantea’ Jehová ivuenoha.

3. Ohechaukaháicha Salmo 16:1, 2, ¿mávandipa Jehová ivuéno?

³ Jehová ningo ‘ivuenoiterei enterovéndi’, umi ndoikuaáivandi jepe chupe (Sal. 145:9; Mat. 5:45). Péro haʼe koʼýte ovendesi umi ohayhu ha oservívape chupe ipyʼaite guive (elee Salmo  16:1, 2). Jahechamína koʼág̃a umi mbaʼe porã Jehová ojapóma vaʼekue ñanderehehápe.

4. ¿Mbaʼéichapa Jehová ohechauka ivuenoha umi oñepyrũvandi oñemoag̃ui hese?

⁴ Jajapo jave umi mbaʼe Jehová ñanemboʼéva, jahechakuaa mbaʼeichaitépa ideprovécho ñandéve umíva ha tuicha omehora ñande rekove. Por ehémplo, ñañepyrũrõ guare jaikuaa Jehovápe ha jahayhu chupe, haʼe ñanepytyvõ vaʼekue anivéma hag̃ua ñapensa ha jajapo umi mbaʼe ndogustáiva chupe (Col. 1:21). Ha ñañemeʼẽ rire Jehovápe ha jajevautisa, koʼytevéntema jahechakuaa kuri mbaʼeichaitépa haʼe ivuéno, pórke ñanepytyvõ ñanekonsiénsia potĩ hag̃ua, ha jareko hag̃ua peteĩ amista iporãva hendive (1 Ped. 3:21).

5. ¿Mbaʼéichapa jahechakuaa Jehová ivuenoha japredika jave?

⁵ Japredika jave jahecha avei mbaʼeichaitépa Jehová ivuéno. ¿Ñandépa ñaneotĩ ha ijetuʼu ñandéve ñañeʼẽ hag̃ua extráñondi? Heta oĩ ñande apytépe hiʼotĩva. Oiko mboyve ñandehegui testígo de Jehová oiméne ñapensa raʼe: “Che ningo ni núnka ndahamoʼãi óga ahénope ha añeʼẽ la Bíbliare peteĩ extráñondi”. Péro koʼág̃a pyʼỹinte jajapo upéva. Hiʼarive Jehová ñanepytyvõ voi igústo hag̃ua ñandéve la predikasión. Avei japredika aja ñañandu Jehová ñanepytyvõha heta hendáicha. Por ehémplo, ñanepytyvõ ñaime hag̃ua trankílo peteĩ ogajára ijarhél jave ñandéve. Jatopa jave peteĩ ohendu porãva, Jehová ñanepytyvõ avei ñanemanduʼa hag̃ua pe téxto ñaikotevẽvare jalee hag̃ua chupe. Ha ñande territóriope oĩramo jepe heta ndoikuaaséiva mbaʼeve, Jehová omeʼẽ ñandéve pe kyreʼỹ jasegi hag̃ua japredika (Jer. 20:7-9).

6. ¿Mbaʼéichapa avei Jehová ohechauka ivuenoha?

⁶ Jehová avei ohechauka ivuenoha ñanendive ñanemboʼévo mbaʼéichapa japredika vaʼerã (Juan 6:45). Por ehémplo, pe rreunión éntre semanaguápe ñaaprende mbaʼéichapa ñañemongeta vaʼerã umi héntendi, ha ñanemokyreʼỹ hikuái jaipuru hag̃ua umi suherénsia predikasiónpe. Ñepyrũrã ikatu jakyhyje lénto ñatantea hag̃ua peteĩ mbaʼe pyahu, péro upéi jahechakuaa umi suherénsia oikoiteha ñande territóriope g̃uarã. Umi ñane rreunión ha aty guasu ñanemokyreʼỹ jepi avei ñatantea hag̃ua japredika diferénte hendáicha. Ikatu oime núnka ndajajapóiva gueteri umíva, ha ñatanteávo oiméne ñanenerviosoʼimi ha jakyhyje. Péro jajapóvo péicha, ñameʼẽ hína Jehovápe peteĩ oportunida ñanevendesi hag̃ua. Koʼág̃a jahechami mbaʼéichapa Jehová ñanevendesíta jajeroviáramo hese, ha ñañehaʼãmbaitéramo ñatantea umi mbaʼe pyahu iservísiope, tahaʼe haʼéva la ñane situasión. Upéi jahecháta mbaʼe mbaʼépa ikatu jajapo ñambaʼapove hag̃ua Jehová servísiope ha jahupyty umi méta jarekóva.

7. ¿Mbaʼe vendisiónpa jahupyty ñañehaʼã jave jajapo hetave mbaʼe Jehová servísiope?

⁷ Ñañemoag̃uive Jehováre. Jahechamína ermáno Samuel * ehémplo. Haʼe ningo peteĩ ansiáno oservíva hembirekóndi Colómbiape. Mokõivéva haʼéma vaʼekue prekursór ikongregasión ypykuépe, péro ojapose kuri hikuái hetave mbaʼe Jehová servísiope. Upémarõ odesidi ova hikuái peteĩ kongregasión oĩvehápe nesesida. Péro ohupyty hag̃ua upe méta tekotevẽta kuri ojesakrifikaʼimi hikuái. Samuel heʼi: “Rojapo la heʼíva Mateo 6:33 ha ndorojoguavéi umi mbaʼe noroikotevẽiva. Péro la ijetuʼuve vaʼekue oréve ningo roheja pe apartaménto rorekóva. Upéva ningo ojejapo vaʼekue oréve oregustahaichaite, ha ndorodevéi hese ni un guarani”. Haʼekuéra ovárõ guare pe kongregasión pyahúpe, ohechakuaa ikatuha saʼietereive ogasta yma guarégui oñemantene hag̃ua. Samuel heʼive: “Rohecha mbaʼéichapa  Jehová ogia káda kósa rojapóva, ha ombohovaiha ore ñemboʼe. Roñandu roĩ porãha hendive ha orerayhuetereiha, arakaʼeve roñanduʼỹ haguéicha”. ¿Ikatúpa ñande avei jajapo hetave mbaʼe Jehová servísiope? Oiméramo upéicha, ñaimekuaa segúro ñañemoag̃uivetaha Jehováre, ha haʼe oñangareko porãtaha ñanderehe (Sal. 18:25).

8. ¿Mbaʼépa ñaaprende Iván ha Viktoria heʼi vaʼekuégui?

⁸ Javyʼaitereive. Jahechamína la heʼi vaʼekue Iván ha Viktoria, peteĩ matrimónio oservíva de prekursór Kirguistánpe. Haʼekuéra odesidi kuri oiko sensillovetaha ikatu hag̃uáicha ojeofrese oimeraẽ asignasiónpe g̃uarã, umíva apytépe ombaʼapo hag̃ua umi projékto de konstruksiónpe. Iván heʼi: “Ore ningo rombaʼapo jejopy káda projéktope. Kaʼaruetérõ g̃uarã ningo ropytáma ore reʼongue ore apére, péro lomímonte rovyʼa ha roĩ trankílo roikuaágui roipuru hague ore fuérsa pe Rréino rehehápe. Rovyʼaiterei avei rotopa haguére heta ore amigorã, ha roreko haguére heta rrekuérdo porã” (Mar. 10:29, 30).

9. ¿Mbaʼépa ojapo peteĩ ermána Jehová servísiope ijetuʼúramo jepe chupe, ha mbaʼépa ohupyty upe haguére?

⁹ Ñande avei ikatu javyʼa Jehová servísiope ijetuʼúramo jepe ñane situasión. Por ehémplo, jahechamína ermána Mirreh ehémplo. Haʼe ningo viúda ha oiko oéste gotyo Áfricape. Haʼe doktóra vaʼekue, péro ojehuvilárõ guare oñepyrũ iprekursorádo. Mirreh ningo oreko artrítis ombohasyetéva jepi chupe, upévare ndaikatúi oguata puku ha una órante osẽ jepi opredika ogahárupi, péro ikatu opredika areve karríto reheve. Haʼe ningo oreko heta rrevisíta ha estúdio, ha unos kuánto umíva ojapo por teléfono. ¿Mbaʼépa omomýi raʼe Mirréhpe ojapove hag̃ua Jehovápe g̃uarã? Haʼe heʼi: “Che ningo che korasõite guive ahayhu Jehovápe ha Jesucrístope. Ha pyʼỹinte ajerure Jehovápe tachepytyvõmi ajapo hag̃ua opa ikatúva iservísiope” (Mat. 22:36, 37).

10. Ohechaukaháicha 1 Pedro 5:10, ¿mbaʼépa Jehová omeʼẽ umi oñehaʼãvape ojapove iservísiope?

¹⁰ Jehová omeʼẽ ñandéve hetave entrenamiénto. Kenny, peteĩ prekursór oservíva pe país héravape Mauricio, ohechakuaa siertoiteha upéva. Haʼe oikuaárõ guare Jehovápe oheja pe universida, ojevautisa ha oñepyrũ iprekursorádo rregulár. Haʼe heʼi: “Che añehaʼãmbaite asegi proféta Isaías ehémplo. Haʼe heʼi vaʼekue: ‘¡Ápe ningo aĩ che! ¡Chemondóna chéve!’” (Is. 6:8). Kenny ombaʼapo jepéma heta projékto de konstruksiónpe, ha avei oipytyvõma ojetradusi hag̃ua umi puvlikasión bíblica iñidiómape. Haʼe heʼive: “Oñemeʼẽ kuri chéve pe entrenamiénto aikotevẽva akumpli porã hag̃ua umi che asignasionkuéra”. Péro Kenny ndahaʼéi oaprendénteva mbaʼéichapa ojapo vaʼerã itraváho. Haʼe heʼi voi: “Aaprende mbaʼépepa amehora vaʼerã, ha mbaʼe kualidápa aikotevẽ chedeprovechove hag̃ua Jehovápe ha che ermanokuérape” (elee 1 Pedro 5:10). ¿Ikatúpa ñande avei jajapo umi kámbio tekotevẽva Jehová omeʼẽ hag̃ua ñandéve hetave entrenamiénto?

11. ¿Mbaʼépa oñehaʼã vaʼekue ojapo umi ermána oĩva Corea del Súrpe opredikave hag̃ua, ha mbaʼépa ohupyty hikuái? (Ehecha pe taʼanga oĩva ko rrevísta apére).

¹¹ Umi ermáno iñexperiénsiava jepe oikotevẽ entrenamiénto otanteáta jave peteĩ mbaʼe pyahu Jehová servísiope. Por ehémplo, pe pandémia de COVID-19 aja, umi ansiáno oĩva peteĩ kongregasión Corea del Súrpe oskrivi: “Anteve oĩ vaʼekue umi ermáno ndaikatúiva osẽ guasu opredika hasykatu rupi. Péro koʼág̃a haʼekuéra ojapóma upéva por videokonferénsia. Mbohapy ermána orekóva mas de 80 áño oaprende oipurukuaa hag̃ua pe teknolohía, ha upéicha rupi koʼág̃a opredikáma hikuái haimete tódo lo día” (Sal. 92:14, 15). ¿Ñandépa japredikaseve ha ñatantea porãseve mbaʼeichaitépa Jehová ivuéno? Jahechamína mbaʼépa ikatu jajapo  ñambaʼapove hag̃ua Jehová servísiope ha jahupyty upe méta.

12. ¿Mbaʼépa Jehová opromete umi ojeroviávape hese?

¹² Ñaaprende vaʼerã jajerovia Jehováre. Jajeroviáramo hese ha jajapóramo pe iporãvéva chupe g̃uarã, haʼe opromete voi ohykuavotaha ñande ári hetaiterei vendisión (Mal. 3:10). Fabiola, peteĩ ermána colombiana ohecha mbaʼéichapa oñekumpli upe promésa. Haʼe ojapose vaʼekue iprekursorádo rregulár ojevautisa riremínte, péro haʼe ombaʼapo vaʼerã, pórke iména ha umi mbohapy imemby odepende avei isuéldore. Upévare haʼe ikatúrõ guare ojehuvila, ojerure asy Jehovápe oipytyvõmi hag̃ua chupe. Haʼe heʼi: “Umi hénte ningo heta oiko vaʼerã jepi otramita hag̃ua ihuvilasión, péro che akonsegi upéva un mes haguépente. ¡Upéva ningo haʼete voi peteĩ milágro!”. Dos mése haguépe Fabiólagui oikóma prekursóra. Koʼág̃a haʼe oreko mas de 70 áño, ha oservíma de prekursóra mas de 20 áñore. Upe tiémpope haʼe oipytyvõma 8 persónape ojevautisa hag̃ua. Haʼe heʼi: “Sapyʼánte chekangýramo jepe, Jehová chepytyvõ káda día asegi hag̃ua ajapo che prekursorádo”.

13, 14. ¿Mbaʼe ehémplopa ikatu ñanepytyvõ jajerovia hag̃ua Jehováre ha ñambaʼapove hag̃ua iservísiope?

¹³ Jasegi pe ehémplo oheja vaʼekue umi ojeroviáva Jehováre. La Bíbliape oñemombeʼu oĩ hague hetaiterei persóna ombaʼapo jejopy vaʼekue Ñandejára servísiope, ha ñande ikatu jasegi iñehemplokuéra. Heta vése haʼekuéra  ohechauka raẽ vaʼerã kuri ojeroviaha Jehováre, haʼe ovendesi hag̃ua chupekuéra. Por ehémplo, Ñandejára ovendesi vaʼekue Abrahánpe haʼe oheja rire ae hóga, “ndoikuaáiramo jepe moõpa oho hína” (Heb. 11:8). Jacob katu orresivi vaʼekue peteĩ vendisión espesiál oñorairõ rire ae peteĩ ánhel ndive (Gén. 32:24-30). Ha umi israelita oike potaitérõ guare pe Tiérra Prometídape, umi hénte ikatu vaʼekue okrusa pe Rrío Jordán umi saserdóte opyrũ rire ae pe rrío oríllape, pe y osyry hatãitereíramo jepe (Jos. 3:14-16).

¹⁴ Ñane tiémpope avei oĩ heta ermáno ha ermána ojeroviáva Jehováre ha oñehaʼãva ojapove iservísiope, ha ñande ikatu jasegi iñehemplokuéra. Ñapensamína por ehémplo ermáno Payton ha hembireko Diana rehe. Chupekuéra ningo igustoiterei vaʼekue olee umi ermáno experiénsia, umi ojapove vaʼekue Jehovápe servísiope, umíva apytépe umi artíkulo hérava “Kyreʼỹme oñekuaveʼẽ hikuái oservi hag̃ua”. * Payton heʼi: “Rolee jave iñexperiensiakuéra haʼete voi rohecháva peteĩ hoʼu hetereíva hembiʼu. Amáske romañave hese, oréma avei ‘rotantease ha rohechase Jehová ivuenoha’”. Tiémpo rire Payton ha Diana ova avei oservi hag̃ua oĩvehápe nesesida. ¿Ñandépa jaleéma raʼe koʼã artíkulo, ha jahecháma umi vidéo oĩva jw.org-pe hérava Predicación en lugares apartados: Australia, ha Predicación en lugares apartados: Irlanda? Koʼã informasión ikatu ñanepytyvõ jahecha hag̃ua mbaʼéichapa ikatu ñambaʼapove Jehová servísiope.

15. ¿Mbaʼéichapa ikatu ñanepytyvõ jaiporavo porãramo ñane amigorã?

¹⁵ Jaiporavo porã ñane amigorã. Ifasilvéta ñandéve ñatantea hag̃ua peteĩ tembiʼu núnka ndajaʼúiva, jajeheʼáramo umi persóna ogustávare chupe upe tembiʼu. Péicha avei, jajeheʼáramo umi omotenondévare Jehovápe hekovépe, ñanekyreʼỹvéta jajapose hag̃ua hetave mbaʼe Jehová servísiope. Upéva oiko vaʼekue Kent ha hembireko Verónicare. Kent heʼi: “Ore família ha ore amigokuéra oremokyreʼỹ rotantea hag̃ua umi mbaʼe pyahu Jehová servísiope. Rohechakuaa rojeheʼáramo umi omotenondévare hekovépe pe Rréino, upéva omombareteha ore jerovia rotantea hag̃ua umi mbaʼe pyahu Jehová servísiope”. Koʼág̃a g̃uarã, Kent ha Verónica oservi de prekursór espesiál Sérbiape.

16. Ohechaukaháicha Jesús ehémplo oĩva Lucas 12:16-21-pe, ¿mbaʼérepa ndajakyhyjéi vaʼerã jajesakrifika hag̃ua Jehová rehehápe?

¹⁶ Jajesakrifika Jehová rehehápe. Jehová ñandeguerohory hag̃ua natekotevẽi jaheja entéro umi komodida jarekóva (Ecl. 5:19, 20). Péro ndajajapóiramo hetave mbaʼe Jehová servísiope ndajajesakrifikaséi rupínte, jajoguáta pe karai ipláta hetávape Jesús ehémplope guare. Haʼe tuicha ojavy vaʼekue, pórke ombaʼapo jejopy oiko porã hag̃ua péro hesarái Ñandejáragui (elee Lucas 12:16-21). Peteĩ ermáno hérava Christian oikóva Fránciape heʼi: “Che ningo nameʼẽi hína kuri pe iporãvéva Jehovápe ni che famíliape, tahaʼe che tiémpo térã che mbaretekuégui”. Upémarõ haʼe ha hembireko odesidi ojapotaha iprekursorádo. Péro upearã mokõivéva oheja vaʼerã kuri itravahokuéra. Oñemantene hag̃ua omoñepyrũ hikuái peteĩ negosioʼi de limpiésa, ha oganaʼivéramo jepe, oaprende oñekontenta hag̃ua la orekomívarente. ¿Ovalépa raʼe la péna umi sakrifísio ojapo vaʼekue hikuái? Christian heʼi: “Koʼág̃a ningo rovyʼaiteve predikasiónpe, ha rovyʼa avei rohechávo umi ore estudiantekuéra ha ore rrevisíta oikuaaveha ohóvo Jehovápe”.

17. ¿Mbaʼépa ikatu ñandejoko ñatantea hag̃ua peteĩ mbaʼe pyahu predikasiónpe?

¹⁷ Ñañanima ha ñatantea umi mbaʼe pyahu  Jehová servísiope (Hech. 17:16, 17; 20:20, 21). Shirley, peteĩ prekursóra Estados Unidospegua, ojadapta vaʼerã kuri osegi hag̃ua opredika pe pandémia de COVID-19 aja. Ñepyrũrã haʼe okyhyje vaʼekue opredika hag̃ua por teléfono. Péro pe superintendénte de sirkuíto ovisitárõ guare ikongregasión, haʼe oaprende mbaʼéichapa ojapo vaʼerã upéva. Ha upe rire haʼe pyʼỹima opredika por teléfono. Haʼe heʼi: “Ñepyrũrã akyhyje kuri, péro koʼág̃a igustoitereíma chéve. Ymave japredikárõ guare ogahárupi ndaikatúi vaʼekue ñañeʼẽ heta héntendi, péro koʼág̃a si ikatúma ñañeʼẽ hendivekuéra”.

18. ¿Mbaʼépa ñanepytyvõta ijetuʼúramo ñandéve ñambaʼapove hag̃ua Jehová servísiope?

¹⁸ Jahecha mbaʼépa ikatu jajapo ha ñañehaʼã jahupyty ñane méta. Ñambohovái jave peteĩ provléma, ñande jajerure jepi Jehovápe tañanepytyvõmi, ha ñapensa porã mbaʼépa ikatu jajapo ñasolusiona hag̃ua upéva (Prov. 3:21). Sonia, peteĩ prekursóra rregulár oikóva Európape ha oservíva peteĩ grúpo oñeñeʼẽhápe romaní, heʼi: “Che ajepokuaa jepi askrivi umi méta arekóva, ha aheja pe kuatia peteĩ lugár ikatutahápe pyʼỹi ahecha. Che mesíta ári areko avei peteĩ divúho ohechaukáva peteĩ tape ojedividíva ha ohóva diferénte direksiónpe. Ha adesidíta jave peteĩ mbaʼe, amaña pe divúhore ha añemoĩ apensa moõ gotyopa chegueraháta upe adesidítava”. Sonia oñehaʼã avei siémpre ipositíva ombohovái jave umi situasión ijetuʼúva. Haʼe heʼi: “Káda situasión oñepresentáva chéve ikatu ojogua peteĩ murálla chejokóvape, térã peteĩ puénte chepytyvõvape ahupyty hag̃ua pe méta arekóva. Upéva ningo odependéma cherehe”.

19. ¿Mbaʼéichapa ikatu jaagradese Jehovápe opa mbaʼe porã omeʼẽvare ñandéve?

¹⁹ Jehová ningo ñanevendesi hetaiterei hendáicha. Ñande ikatu jaagradese chupe ñanevendesi haguére péicha, jajapóvo opa ikatúva ñamombaʼeguasu hag̃ua chupe (Heb. 13:15). ¿Mbaʼéichapa ikatu jajapo upéva? Ikatu ñatantea jajapo hag̃ua peteĩ mbaʼe pyahu Jehová servísiope, ha péicha ñameʼẽta hína chupe oportunida hetave ñanevendesi hag̃ua. Káda díakena ñañehaʼã ‘ñatantea ha jahecha mbaʼeichaitépa Jehová ivuéno’. Jajapóvo upéicha jaʼéta avei Jesús heʼi haguéicha: “Che rembiʼu hína kóva: ajapo upe chembou vaʼekue volunta, ha atermina pe traváho haʼe omeʼẽ vaʼekue chéve” (Juan 4:34).