1. ¿Mbaʼépa ikatu ñanepytyvõ ñandegusta hag̃ua umi profesía oĩva la Bíbliape?

 PETEĨ ermáno imitãva hérava Ben heʼi: “Che ningo astudiaseterei voi umi profesía bíblica”. ¿Ndépa reñeñandu avei upéicha? ¿Térãpa ijetuʼu ndéve rentende hag̃ua umi profesía bíblica? Ikatu voi ñapensa ijavurridoha jastudia umi profesía, péro amáske jaikuaa mbaʼérepa Jehová oskrivika vaʼekue umíva la Bíbliape ikatu ñandegustáma avei umi profesía.

2. ¿Mbaʼépa jahecháta ko artíkulope?

² Ko artíkulope jahecháta mbaʼérepa jaikuaa vaʼerã umi profesía oĩva la Bíbliape ha avei mbaʼéichapa jastudia vaʼerã umíva. Upéi ñaanalisáta mokõi profesía oĩva lívro de Daniélpe jahecha hag̃ua mbaʼéichapa ikatu ñanepytyvõ koʼág̃a.

3. ¿Mbaʼépa tekotevẽ jajapo ñantende porãséramo umi profesía bíblica?

³ Ñantendeséramo umi profesía bíblica tekotevẽ jajerure ajúda. Ñamoĩmi peteĩ ehémplo: Epensami reviahaha primera ves peteĩ lugár nde ndereikuaaihápe, péro haʼetépe oho nendive peteĩ ne amígo si oikuaa porãitereíva. Haʼe opillapaite voi moõitépa peime ha moõpa oporogueraha káda tape oĩva. Oiméne revyʼaite ne amígo nemoirũ haguére ko viáhepe. Péicha avei Jehová ojogua pe ñane amígope. Haʼe oikuaa porã mbaʼépa ñaneraʼarõ amo gotyove. Upéicharõ ñantende porãséramo umi profesía bíblica tekotevẽ ñaneumílde ha jajerure Jehovápe tañanepytyvõ (Dan. 2:28; 2 Ped. 1:19, 20).

4. ¿Mbaʼérepa Jehová oskrivika vaʼekue umi profesía? (Jeremías 29:11). (Ehecha pe taʼanga).

⁴ Peteĩ túa imbaʼeporãva oipota ifamília ovyʼa, péicha avei Jehová oipota la iporãvéva ñandéve g̃uarã (elee Jeremías 29:11). Péro Jehová idiferénte peteĩ túa imperféktogui, pórke haʼe ikatu oprofetisa mbaʼépa oikóta amo gotyove ha siémpre  ojaserta. Jehová oskrivika umi profesía oĩva la Bíbliape ikatu hag̃uáicha ñande jaikuaa umi mbaʼe iñimportánteva oiko mboyve jepe (Is. 46:10). Upéicharõ umi profesía oĩva la Bíbliape haʼe peteĩ rregálo oúva ñande Ru yvagapeguágui. ¿Péro mbaʼéichapa ikatu ñaĩ segúro oñekumplitaha katuete umi mbaʼe la Biblia oprofetisáva?

5. ¿Mbaʼépa ikatu oaprende mitãrusukuéra Max ehémplogui?

⁵ Koléhiope umi Testígo imitãva otrata vaʼerã umi nomombaʼéiva ndive la Biblia térã ndorrespetaietéva voi. La ojejapóva ha ojeʼéva upépe ikatu omboduda umi Testígope. Jahechamína la oiko vaʼekue peteĩ ermáno héravare Max. Haʼe heʼi: “Aĩrõ guare koléhiope añepyrũ aduda kuri che tuakuéra chemboʼépa hína la rrelihión verdadéra ha oúpa añete la Biblia Ñandejáragui”. ¿Mbaʼépa ojapo Max tuakuéra? Haʼe heʼi: “Aikuaa aipyʼapy hague chupekuéra péro haʼekuéra orreaksiona trankílo porãnte”. Ituakuéra oipuru la Biblia okontesta hag̃ua Max preguntakuéra ha haʼe avei ojapo ipárte. Max heʼi: “Añepyrũ astudia umi profesía ha añeʼẽ umívare umi ótro mitãrusukuéra kongregasionpeguándi”. ¿Mbaʼépa oiko upe rire? Ko ermáno heʼi: “Ajapopa rire koʼã mbaʼe añekonvense la Biblia ouha Ñandejáragui”.

6. ¿Mbaʼépa ejapo vaʼerã edudáramo ha mbaʼérepa?

⁶ Ikatu ningo ehasa hína la ohasa vaʼekue Max ha eñepyrũ eduda siértopa hína la omboʼéva la Biblia. Oimérõ oiko nderehe upéva ndovaléi reñeñandu vai ha retĩ. Péro oĩ álgo iñimportantetereíva tekotevẽva rejapo ensegída. Umi dúda ningo ikatu ñakompara álgo ojeoxidávare. Nañapenáiramo hese, mbeguekatúpe ikatu oñehundiete álgo iporãva. Upévare ani hag̃ua oñehundi nde jerovia reju haguére reduda, iporãta eñeporandu: “¿Agueroviápa la Biblia heʼíva oikotaha amo gotyove?”. Ha oimérõ reduda hína, tekotevẽterei restudia umi profesía oñekumplíma vaʼekue. ¿Mbaʼéichapa ikatu jajapo upéva?

7. ¿Mbaʼe mbaʼépa oipytyvõ vaʼekue proféta Daniélpe ostudia hag̃ua umi profesía? (Daniel 12:10). (Ehecha pe taʼanga).

⁷ Proféta Daniel ohechauka porã vaʼekue ñandéve mbaʼéichapa jastudia vaʼerã umi profesía. Haʼe ojasegura porã vaʼekue mbaʼérepa ostudia. Haʼe isinséro ha oikuaase vaʼekue la verda. Avei Daniel iñumílde vaʼekue, haʼe oikuaa Jehová oipytyvõta hague chupe ontende hag̃ua umi profesía siémpre oñemoag̃uírõ Ñandejárare ha oikórõ haʼe oipotaháicha (Dan. 2:27, 28; elee Daniel 12:10). Daniel ohechauka vaʼekue iñumildeha ojerurévo Jehovápe ajúda (Dan. 2:18). ¿Mbaʼe ótra kósapa ojapo? Haʼe ningo ostudia porã. Daniel oinvestiga porã vaʼekue umi párte de la Biblia oĩma vaʼekue upe tiémpope (Jer. 25:11, 12; Dan. 9:2). ¿Mbaʼéichapa ikatu jasegi Daniel ehémplo?

8. ¿Mbaʼérepa oĩ ndogueroviaséiva umi profesía ouha Ñandejáragui, ha mbaʼépa jajapo vaʼerã?

⁸ Jajasegura mbaʼérepa jastudia. ¿Jastudiápa umi profesía jaikuaaségui sinséramente la verda? Oimérõ upéicha Jehová ñanepytyvõta  katuete ñantende hag̃ua umi profesía (Juan 4:23, 24; 14:16, 17). ¿Mbaʼérepa la hénte ostudiase jepi umi profesía? Oĩ ostudiaséva otopaséguinte pruéva heʼi hag̃ua la Biblia ndouiha Ñandejáragui. Haʼekuéra oimoʼã péicha ikatutaha odesidi ijeheguíntema mbaʼépa iporã ha ivai. Upévare tekotevẽterei jajasegura mbaʼérepa ñantendese umi profesía. Avei oĩ ótra kualida ñaikotevẽva ñantende hag̃ua umi profesía.

9. ¿Mbaʼe kualidápa ñaikotevẽ ñantende hag̃ua umi profesía? Emyesakã.

⁹ Ñaneumíldekena. Jehová opromete oipytyvõtaha umi iñumíldevape (Sant. 4:6). Upévare jajerure vaʼerã chupe ajúda ñantende hag̃ua umi profesía. Ñaneumílderamo ñarrekonoséta avei ñaikotevẽha pe ajúda omeʼẽva pe esklávo de konfiánsa ha iñarandúva. Jehová ningo ojevale ko esklávore omeʼẽ hag̃ua ñandéve la ñaikotevẽva hiʼoraitépe (Luc. 12:42). Ñandejára ningo ndojapói mbaʼevete sarambikuépe. Upévare isentído ñandéve omoĩ mávapa la oñenkargátava ontendeka hag̃ua ñandéve umi mbaʼe la Biblia heʼíva (1 Cor. 14:33; Efes. 4:4-6).

10. ¿Mbaʼépa ñaaprende Ester ehémplogui?

¹⁰ Jastudia porã. Jaelehi peteĩ profesía ñaneinteresáva ha jastudia upéva. Péicha ojapo vaʼekue peteĩ ermána hérava Ester. Ko ermána ontende porãseve vaʼekue umi profesía oñeʼẽva pe Mesías rehe. Haʼe heʼi: “Arekórõ guare 15 áño aheka umi pruéva ohechaukáva koʼã profesía ojeskrivi hague pe Mesías ou mboyve”. Pe informasión oñeʼẽva umi Rróllo del Mar Muértore okonvense chupe. Haʼe heʼive: “Oĩ umi ojeskrivi vaʼekue Cristo tiémpo mboyve, upévare umi profesía oĩva pype oúmante vaʼerã Ñandejáragui”. Ester omombeʼu oĩ hague umi informasión olee vaʼekue heta vése ontende hag̃ua, péro haʼe ovyʼa ojapo haguére upéva. Haʼe ostudia porã rire heta profesía heʼi: “Koʼág̃a chete akomprova la Biblia heʼíva siertoha”.

11. ¿Mbaʼérepa iporã jajasegura la Biblia heʼíva siertoha?

¹¹ Jahechávo oĩha umi profesía oñekumplímava, jajeroviave Jehováre ha ñakonfia pe gía omeʼẽvare ñandéve. Umi profesía omombeʼu avei mbaʼe esperánsapa jareko ñane renonderãme g̃uarã, ha upéva ñanepytyvõ jasegi hag̃ua ñandepositívo ñaneprovlémarõ jepe. Jahechamína koʼág̃a mokõi profesía Daniel oskrivi vaʼekue ha oñekumplíva hína ñane tiémpope. Iñimportánte ñantende koʼã profesía pórke péicha ikatúta jadesidi porã la jajapótava.

12. ¿Mbaʼépa orrepresenta pe estátua py ojejapóva ‘iérrogui ha ojeheʼáva ñaiʼũre’? (Daniel 2:41-43).

¹² (Elee Daniel 2:41-43). Rréi Nabucodonosor osoñárõ guare pe estátua tuichaitéva ohecha kuri ipy ojejapoha ‘iérrogui ha ojeheʼaha pe ñaiʼũre’. Ñakomparáramo ko profesía umi ótra profesía oĩvare Daniélpe ha umi oĩvare avei Apocalípsispe, ikatu jaʼe pe estátua py orrepresentaha Estados Unidos ha Gran Bretáñape. Koʼã país ombaʼapo oñondive ha koʼág̃a haʼe hína pe goviérno omanda guasuvéva ko múndope. Daniel heʼi vaʼekue ko poténsia mundiál térã ‘ko rréino en párte  imbaretetaha ha en párte ikangytaha’. Péro, ¿mbaʼéicha rupípa ko goviérno ikangýta? Pórke umi hénte orrepresentáva pe ñaiʼũme omokangy ko poténsiape ha ndaikatúi imbarete pe iérroicha. b

13. ¿Mbaʼépa hína umi mbaʼe iñimportánteva ñanemboʼéva ko profesía?

¹³ Daniel oexplika vaʼekue la heʼiséva pe estátua tuichaitereíva osoña vaʼekue pe rréi. Ha ñande ikatu ñaaprende heta mbaʼe la haʼe heʼi vaʼekuégui, espesiálmente la orrepresentávagui pe estátua py. ¿Mbaʼe mbaʼépa ikatu jahecha? Primero, pe poténsia mundiál Estados Unidos ha Gran Bretaña ohechaukáma ipoderosoitereiha heta hendáicha. Por ehémplo koʼã país oĩ umi ogana vaʼekue apytépe pe primera ha segunda gérra mundiál. Péro ko poténsia mundiál ikangýma ha ikangyvéta ohóvo, pórke umi hénte oikóva ipoguýpe oñorairõ oñondive ha opuʼã pe goviérno kóntrape. Segundo, ko poténsia Estados Unidos ha Gran Bretaña haʼéta hína pe último goviérno omandátava ko múndope, ha upéi Ñandejára Rréino ohundítama entéro umi goviérno oĩva ko yvy ape ári. Oĩramo jepe heta ótro país odesafiáva ko poténsia mundiálpe, ndojupimoʼãi hikuái hekovia. Jaʼekuaa upéva pórke “pe ita” orrepresentáva Ñandejára Rréinope ombetíta pe estátua pýre, pe párte orrepresentáva pe poténsia mundiál oĩháme Estados Unidos ha Gran Bretaña (Dan. 2:34, 35, 44, 45).

14. Ñantende porãramo pe profesía oñeʼẽva pe estátua pýre, ¿mbaʼéichapa upéva ñanepytyvõta jadesidi porã hag̃ua?

¹⁴ ¿Ndépa reĩ segúro siertoha Daniel profesía oñeʼẽva pe estátua pýre? Oimérõ upéicha ojekuaáta umi mbaʼe redesidívare. Por ehémplo ndereikomoʼãi pláta rapykuéri ni nerembyatymoʼãi heta mbaʼe ndejupe g̃uarã reikuaágui ko múndo aña oñehundi potaitemaha (Luc. 12:16-21; 1 Juan 2:15-17). Rentende porãramo ko profesía nepytyvõta avei rehechakuaa hag̃ua iñimportanteha japredika ha ñamboʼe la héntepe (Mat. 6:33; 28:18-20). Restudia rire ko profesía ikatu eñeporandu: “¿Ojekuaápa la adesidívare ndadudaiha koʼẽrõitéma Ñandejára Rréino ohundipaitetaha umi goviérno ko mundopegua?”.

15. ¿Mávapepa orrepresenta pe “rréi del nórte” ha pe “rréi del sur” koʼág̃arupi? (Daniel 11:40).

¹⁵ (Elee Daniel 11:40). Proféta Daniel oñeʼẽ mokõi rréi térã goviérnore oñokontráriova, pórke mokõivévante omandase ko múndope. Ñakomparáramo ko profesía umi ótra profesía oĩvare la Bíbliape ikatu jahechakuaa pe “rréi del nórte” orrepresentaha Rusia ha iñirũnguérape ha pe “rréi del sur” katu pe poténsia mundiál oĩháme Estados Unidos ha Gran Bretaña. c

16. ¿Mbaʼéichapa pe “rréi del nórte” otrata Ñandejára siervokuérape?

¹⁶ Jehová siervokuéra oikóva pe “rréi del nórte” omandahápe ojepersegi hína. Oĩ voi umi oñemaltratáva ha ojegueraháva kárselpe oadora haguére Jehovápe. Umi ermáno oikóva koʼã lugárpe ni michĩmi naikangýi. Upéva rangue ojerovia mbareteve hikuái Jehováre ha Iñeʼẽre. ¿Mbaʼéicha rupípa ojeroviave hikuái? Pórke ohechakuaa pe persekusión okumpliha ohóvo pe profesía Daniel oskrivi vaʼekue (Dan. 11:41). d Ñande avei jahecha rupi oñekumpliha ko profesía ñane esperánsa imbareteve ha jasegi ñandefiél Jehovápe.

17. ¿Mbaʼépa ohasa umi ermáno oikóva pe “rréi del sur” omandahápe?

 ¹⁷ Yma pe “rréi del sur” opersegi vaʼekue avei derechoite Ñandejára siervokuérape. Por ehémplo pe primera ha segunda gérra mundiál aja, heta ermánope oñemondo kárselpe ndohói haguére gerrahápe. Avei unos kuánto Testígo imitãvape oñemosẽ eskuélagui nomombaʼeguasúi haguére pe vandéra. Péro ndaʼareguasúi guive Jehová siervokuéra oikóva omandahápe pe “rréi del sur” ombohovái vaʼerã ótra kósa idiferénteva: Ndojeatakái umi ermánope derechoite, péro oĩ umi situasión tekotevẽhápe ohechauka hikuái ifiéltapa Jehovápe. Por ehémplo ojejapo jave umi kampáña polítika ikatu hína peteĩ ermáno oapojase peteĩva umi partído polítiko térã kandidátope. Haʼe ndohomoʼãi ovota péro ikatu ikorasõme oipota peteĩva umi kandidáto ogana. Iñimportánte añete la jajapóva rupive jahechauka nañañentremeteiha polítikare, péro avei ñañatende vaʼerã ani hag̃ua la ñapensáva ha ñañandúvape jaladea hína peteĩ polítikope (Juan 15:18, 19; 18:36).

18. ¿Mbaʼéichapa ñarreaksiona jahechávo oñokontrarioiteha pe “rréi del nórte” ha “rréi del sur”? (Ehecha pe taʼanga).

 ¹⁸ Umi hénte ndojeroviáiva umi profesíare ikatu ojedesespera ohechávo pe “rréi del sur” ha pe “rréi del nórte” opuʼãha oñotĩre ha ojoatakaha (Dan. 11:40). Mokõivévante oreko árma ha vómba ipoderosoitereíva ikatúva ohundiete opa mbaʼe oĩva ko yvy ape ári. Péro ñande jaikuaa Jehová nopermitimoʼãiha oiko upéva (Is. 45:18). Upéicha rupi jaiko rangue jajepyʼapy la ikatúvare oiko amo gotyove, ñande jerovia imbareteve jahechávo oñokontrarioiteha pe “rréi del nórte” ha “rréi del sur”. ¿Mbaʼérepa? Pórke upéva ohechauka pe fin hiʼag̃uimbaitemaha.

19. ¿Mbaʼéichapa jahecha vaʼerã umi profesía oĩva la Bíbliape?

¹⁹ Oĩ ningo profesía ndajaikuaáiva mbaʼeichaitépa oñekumplíta. Daniel jepe nontendepái vaʼekue entéro mbaʼe oskrivíva (Dan. 12:8, 9). Péro ndajaikuaái haguérente mbaʼéichapa oñekumplíta peteĩ profesía ndeʼiséi ndoikomoʼãiha. Ikatu ñaĩ segúro Jehová ñanepytyvõtaha ñantende hag̃ua la tekotevẽva hiʼoraitépe ojapóma haguéicha anteve (Amós 3:7).

20. ¿Mbaʼe profesíapa koʼẽrõitéma oñekumplíta, ha mbaʼépa jasegi vaʼerã jajapo?

²⁰ Ojejapóta hína pe anúnsio heʼíva ‘jaikomaha pyʼaguapýpe ha segúro porã’ (1 Tes. 5:3). Upéi umi goviérno ko mundopegua oatakáta ha ohundíta pe rrelihión fálsa (Apoc. 17:16, 17). Upe rire oatakáta avei hikuái Ñandejára puévlope (Ezeq. 38:18, 19). Ha koʼã mbaʼe oiko rire oñepyrũtama pe gérra de Armagedón (Apoc. 16:14, 16). Ikatu ñaĩ segúro koʼẽrõitéma oikotaha koʼã mbaʼe. Ñahaʼãrõ aja upéva jasegíta jahayhu ñande Ru yvagapeguápe. Jahechaukáta upéva ñañatende porãvo mbaʼéichapa oñekumpli umi profesía ha ñaipytyvõvo la héntepe ojapo hag̃ua avei upéicha.