Pe artíkulope ñaaprende kuri oĩha peteĩ téma iñimportánteva entéro yvypóra ha anhelkuérape g̃uarã: Jehová réra oñesantifika vaʼerãha. Ha ñañeʼẽvo ko témare oike avei ótra kósa: ojehechauka vaʼerãha Jehová goviérno siémpre iporãveha ha yvyporakuéra ohechauka vaʼerãha osegítapa ifiél Ñandejárape.

¿Mbaʼérepa koʼág̃a jaʼe pe téma iñimportantevéva haʼeha Jehová réra ha oñesantifika vaʼerãha? Jahechamína mbohapy mbaʼe omyesakãva upéva.

Primero, Satanás oataka vaʼekue Jehová réra térã oñeʼẽ vai hese pe hardín de Edénpe. Satanás ombaʼeporandúrõ guare Évape ontendeka Jehová ndaipojeraiha ha ojopyetereimaha hendive ha Adán ndive. Upéi Satanás derechoite okontradesi la Jehová heʼi vaʼekue ha heʼi hese ijapuha. Péicha Satanás otaky térã oñeʼẽ vai Jehová rérare ha oiko chugui “pe Diablo” heʼiséva oñeʼẽ vaíva ótrore (Juan 8:44). Eva oguerovia rupi Satanás heʼíva ou naiñeʼẽrendúi Jehovápe ha péicha ohechauka ndoipotaiha haʼe ogoverna chupe (Gén. 3:1-6). Koʼag̃aite peve Satanás osegi oñeʼẽ vai Ñandejára rérare ha omosarambi hetaiterei japu oheja vai hag̃ua Jehovápe. Umi persóna ogueroviáva umi japu Satanás heʼíva naiñeʼẽrendúi jepi Jehovápe. Upévare Ñandejára puévlope g̃uarã pe inhustísia ivaivéva haʼe hína la oñeñeʼẽ vai Jehová rérare. Ko situasión káusare oñepyrũ oĩ hetaite sufrimiénto ha ojejapo hetaiterei mbaʼe vai ko múndope.

Segundo, Jehová ojedesidíma omopotĩtaha héra ha upéva ou porãitereíta entéro ikreasiónpe. Upéva ningo iñimportanteterei Jehovápe g̃uarã. Haʼe heʼi voi: “Che asantifikáta katuete upe che réra tuichaitéva” (Ezeq. 36:23). Avei Jesús omyesakã porã vaʼekue mbaʼépa hína pe iñimportantevéva jajerure vaʼerã ñañemboʼe jave. Haʼe heʼi: “Toñembotuicha nde réra” (Mat. 6:9). La Biblia heta vése voi heʼi oñemombaʼeguasu vaʼerãha Jehová réra. Por ehémplo heʼi: “Pemombaʼeguasu vaʼerã Jehová réra” (1 Crón. 16:29; Sal. 96:8). “Pepurahéi pemombaʼeguasu hag̃ua héra porãite” (Sal. 66:2). “Siémpre ambotuicháta nde réra” (Sal. 86:12). Peteĩ jey pe témplo de Jerusalénpe oñehendu Jehová oñeʼẽ hague pe yvágagui ha upérõ Jesús heʼi: “Che Ru, embotuichána nde réra”. Ha Jehová ombohovái chupe: “Ambotuicháma ha ambotuicha jeýta” (Juan 12:28). a

Tercero, Jehová voluntápe oike oñemopotĩ vaʼerãha héra. Ñapensamíntena la oikótavare opávo Jesús goviérno de mil áño ha pe pruéva finál rire. ¿Mbaʼépa ojapóta  upe tiémpope entéro umi ánhel ha yvyporakuéra Jehová réra rehehápe? Upe tiémpope yvyporakuéra ndohasamoʼãvéima umi pruéva tekotevẽhápe ohechauka ifiéltapa Jehovápe. Haʼekuéra perféktotama ha pe pruéva finálpe ohechaukátama hikuái iñeʼẽrenduha Jehovápe. Avei ikatútama oiko hikuái pára siémpre. Upe tiémpope g̃uarã natekotevẽmoʼãvéima ojehechauka Jehová ogoverna lája iporãveha, pórke entéro ikreasión oĩva yvágape ha ko yvy ape ári oĩta unído ha oapojáta igoviérno. Péro upe tiémpope g̃uarã, ¿mbaʼépa osegíta ojapo Jehová puévlo héra rehehápe?

Upérõ g̃uarã entéro oikuaa porãta Jehovápe ha oñesantifikáta la héra. Péro Jehová réra osegíta iñimportanteterei isiervokuérape g̃uarã yvágape ha ko yvy ape ári. ¿Mbaʼérepa? Pórke ohechakuaáta hikuái Jehová osegiha ojapo heta mbaʼe ijojahaʼỹva. Ñapensamíntena: Jesús umíldemente ontregáta pe goviérno Jehovápe ha upéicha ‘Ñandejára añoite ogovernáta entéro mbaʼe ári’ (1 Cor. 15:28). Upe rire entéro persóna oikóva ko yvy ape ári haʼétama “Ñandejára raʼy ha oguerekóta hikuái pe liverta ijojahaʼỹva” (Rom. 8:21). Upérõ Jehová okumplítama ivolunta ha entéro oikóva yvágape ha ko yvy ape ári oĩta peteĩ família unídape (Efes. 1:10).

¿Mbaʼéichapa oñeñandúta Jehová família oĩva yvágape ha ko yvy ape ári oikopa rire entéro koʼã mbaʼe? Katuete enterove osegiséta omombaʼeguasu Jehová réra porãite ipyʼaite guive. Pe salmísta David oskrivi vaʼekue: ‘Toñemombaʼeguasu Jehovápe. Toñemombaʼeguasu héra porãite opa ára g̃uarã’ (Sal. 72:18, 19). Añetehápe káda día jahasáta heta mbaʼe ijojahaʼỹva ñanemomýitava ñambotuicha hag̃ua Jehová réra pára siémpre.

Jehová réra ohechauka mbaʼeichaguápa haʼe. Ñapensa jave hérare ñanemanduʼa mbaʼeichaitépa haʼe ñanderayhu (1 Juan 4:8). Siémpre ñanemanduʼáta Jehová ñandekrea hague ñanderayhúgui, omeʼẽ hague itaʼýrape ñanderehehápe ha haʼe ogoverna lájare ohechaukaha ihústo ha ñanderayhuetereiha. Péro avei jasegíta ñañandu mbaʼéichapa Jehová ñanderayhu. Káda día ñañemoag̃uisevéta hese ha ñambotuichaséta héra porãite pára siémpre (Sal. 73:28).