DIANA orekóma 80 áño rasa. Iména oreko vaʼekue peteĩ mbaʼasy hérava Alzheimer, ha heta áñore oĩ kuri peteĩ asílo de ansiánope omano meve. Diana avei hetaiterei kuri osufri omano haguére chugui mokõi imemby, ha haʼe voi oreko haguére kánser de máma. Upéicharõ jepe, umi ermanokuéra oĩva Diana kongregasiónpe ohecha jave chupe rreunionhápe ha predikasiónpe, ohechakuaa hese haʼe siémpre ovyʼaha.

John oservi vaʼekue kómo superintendénte de sirkuíto 43 áño rasa. Haʼe ohayhueterei vaʼekue upe asignasión, péro ohejámante upe iservísio okuida hag̃ua peteĩ ihénte hasývare. Tiémpo rire, unos kuánto ikonosído ohecha jeýrõ guare chupe peteĩ asambleahápe, ohechakuaa hikuái haʼe nokambiái hague, lomímonte osegiha ovyʼa.

¿Mbaʼéicha rupípa Diana ha John lomímonte osegi ovyʼa? ¿Mbaʼéichapa ikatu peteĩ persóna ovyʼa ohasa asýramo jepe? ¿Mbaʼéicha ikatu ovyʼa tekotevẽramo jepe oheja peteĩ asignasión ohayhuetereíva? La Biblia ombohovái koʼã porandu heʼívo: “Umi ivuénova ovyʼaitereíta umi mbaʼe Jehová ojapóvare” (Sal. 64:10). Ñantende porã hag̃ua ko téxto, tekotevẽ jahecha mbaʼépa la añetehápe ñanembovyʼáva ha mbaʼépa nahániri.

Oĩ ningo heta mbaʼe ñanembovyʼáva jepi. Por ehémplo, epensamína mbaʼeichaitépa ovyʼa peteĩ paréha ojoayhuetereíva omenda jave, avei mbaʼéichapa ovyʼa umi tuakuéra onasévo ifamília, térã peteĩ ermáno orresivi jave peteĩ asignasión Jehová organisasiónpe. Koʼãichagua mbaʼe ningo katuete ñanembovyʼa pórke koʼãva haʼe voi rregálo oúva Jehovágui. Haʼe voi omoñepyrũ vaʼekue pe matrimónio, avei ñandeapo ikatu hag̃uáicha ñanefamília, ha haʼe voi omeʼẽ ñandéve umi priviléhio jahupytýva iservísiope (Gén. 2:18, 22; Sal. 127:3; 1 Tim. 3:1).

Péro oĩ heta mbaʼe ikatúva sapyʼaiténte ñanembovyʼa. Ñambyasýramo jepe, peteĩ ména térã tembireko ikatu ou omano, térã omoakãratĩ hembiayhúpe (Ezeq. 24:18; Os. 3:1). Umi familiakuéra ikatu ou naiñeʼẽrenduvéi ituakuérape ha Ñandejárape, ha ikatu voi oñemosẽ  kongregasióngui. Por ehémplo, proféta Samuel raʼykuéra oñepyrũ vaʼekue ojapo umi mbaʼe Jehová ndoguerohorýiva, ha avei David ou kuri hetaiterei iprovléma hogapýpe umi mbaʼe vai ojapo vaʼekuére (1 Sam. 8:1-3; 2 Sam. 12:11). Oikóramo péicha ñanderehe, jaju ndajavyʼavéi ha japyta jasufri ha ñañembyasy.

Sapyʼánte tekotevẽta avei jaheja peteĩ asignasión jarekóva Jehová servísiope, tahaʼe ñanderasy rupi, jakuida vaʼerãgui peteĩ ñane hénte hasývare térã oĩgui kámbio Jehová organisasiónpe. Heta ermáno ha ermána ohasámava koʼã situasión omombeʼu mbaʼeichaitépa ovyʼa kuri iñasignasiónpe, ha heʼi hikuái koʼág̃a peve ohechagaʼuha upéva.

Jahechaháicha, oĩ hína umi mbaʼe sapyʼaiténte ñanembovyʼáva. ¿Péro ikatúnepa jasegi javyʼa ijetuʼúramo jepe la situasión? Si ikatu, ha jaʼekuaa upeichaha pórke Samuel, David ha hetave Jehová siérvo lomímonte osegi kuri ovyʼa ijetuʼúramo jepe hendivekuéra.

Jesús oikuaa porã vaʼekue mbaʼépa heʼise javyʼa añeteha. Ou mboyve ko yvy ape ári, haʼe oiko vaʼekue yvágape, ha upépe ‘tódo el tiémpo ovyʼa’ pórke oĩ Jehová ykére (Prov. 8:30). Péro oĩrõ guare ko yvy ape ári, ohasa kuri heta situasión ijetuʼuetereíva. Upéicharõ jepe Jesús ovyʼaiterei vaʼekue ikatu haguére okumpli Itúa rembipota (Juan 4:34). ¿Mbaʼépa oipytyvõ raʼe chupe ogueropuʼaka hag̃ua umi mbaʼe ohasa vaʼekue omano mbotávo? La Biblia heʼi: “Oñemoĩgui henondépe peteĩ mbaʼe ombovyʼaitereítava chupe, haʼe oaguanta pe jehasa asy oñemosaingóvo chupe pe yvyra pohýire” (Heb. 12:2). Upévare iporãitereíta jahecháramo mokõi mbaʼe Jesús heʼi vaʼekue añetehápe ñanembovyʼaha.

Peteĩ vuéltape, Jesús omondo kuri 70 disípulope oho hag̃ua opredika, ha upéi vyʼapópe ou jey hikuái Jesús rendápe. Haʼekuéra ovyʼaiterei kuri opa mbaʼe ojapo vaʼekuére, umi demóniope jepe omosẽ haguére. Péro Jesús heʼi chupekuéra: “Ani pevyʼa umi demónio opyta haguére pende poguýpe, pevyʼa guei pende réra ojehai haguére yvágape” (Luc. 10:1-9, 17, 20). Jahechakuaa upéicharõ ikatuha javyʼa jareko haguére peteĩ asignasión espesiál, péro iñimportanteve jey hína Jehová ñandeguerohory. Upéva katuete ñanembovyʼaitevéta.

Ótra vuéltape, Jesús oñeʼẽ hína kuri peteĩ hénte atýpe. Upérõ, peteĩ kuñakarai judía osẽ  heʼi chupe mbaʼeichaitépa oiméne isy ovyʼa heseve omboʼekuaaiterei haguére. Péro Jesús heʼi chupe: “Nahániri, ovyʼa guei umi ohendúva Ñandejára Ñeʼẽ ha ojapóva” (Luc. 11:27, 28). Kóva ñanemboʼe ikatuha javyʼa ha ñandeaguara ñane família reheve, péro katuete javyʼaitevéta ñañemoag̃uivéramo Jehováre.

Upéicharõ, ñañandúramo Jehová ñandeguerohoryha, upéva la añetehápe ñanembovyʼaitereíva. Oúramo jepe ijetuʼu ñanendive, lomímonte jasegíta javyʼa. Ha jasegíramo ñandefiél Jehovápe katu, koʼytevéntema javyʼáta (Rom. 5:3-5). Hiʼarive Jehová omeʼẽ ijespíritu sánto umi ojeroviávape hese, ha pe vyʼa haʼe hína peteĩ mbaʼe porã oúva pe espíritu sántogui (Gál. 5:22). Upéva ñanepytyvõ ñantende hag̃ua mbaʼérepa Salmo 64:10 heʼi: “Umi ivuénova ovyʼaitereíta umi mbaʼe Jehová ojapóvare”.

Upéva ohechauka mbaʼérepa Diana ha John, ñañeʼẽ vaʼekuére iñepyrũme, ikatu kuri osegi ovyʼa ijetuʼúramo jepe hendivekuéra. Diana omombeʼu: “Peteĩ mitã oñemoag̃uiháicha itúare, che añemoag̃ui Jehováre okuida hag̃ua cherehe”. Haʼe heʼi avei: “Añandu Jehová chevendesiha chepytyvõ rupi asegi hag̃ua apredika vyʼapópe”. ¿Ha mbaʼépa oipytyvõ raʼe Jóhnpe osegi hag̃ua ikyreʼỹ ha ovyʼa Jehová servísiope, ndaikatuvéiramo jepe oservi kómo superintendénte? Haʼe heʼi: “Áño 1998-pe añeasigna kuri aĩ hag̃ua de instruktór pe Eskuéla de Entrenamiénto Ministeriálpe, ha upéva koʼýte chemomýi ajapo porãve hag̃ua che estúdio personál”. John omombeʼu avei mbaʼépa oipytyvõ kuri chupe ha hembirekópe ifasilmie hag̃ua pe kámbio ohasáva hikuái. Haʼe heʼi: “Ore ningo siémpre roĩ rojapo hag̃uáicha oimeraẽ mbaʼe Jehová ojeruréva oréve, ha ni michĩmi norombyasýi rojapo haguére upéva”.

Oĩ heta ermáno ha ermána ohechakuaáva avei siertoha la heʼíva Salmo 64:10. Por ehémplo, ñapensamína peteĩ matrimónio oñeasigna vaʼekuére kómo prekursór espesiál, oservi rire mas de 30 áño Betel de Estados Unídospe. Haʼekuéra heʼi: “Hasýnte voi ñandéve japerde jave peteĩ mbaʼe jahayhúva”. Péro heʼi avei hikuái: “Ndaikatúi ningo jaiko ñañembyasyháre tóda la vída”. Upévare pyaʼe voi oñepyrũma opredika hikuái pe ikongregasión pyahúndi. Ko matrimónio omombeʼu avei: “Roñemboʼévo Jehovápe, rojerurémi chupe espesífikamente umi mbaʼe roikotevẽva, ha rohechávo mbaʼéichapa haʼe ombohovái umíva, upéva oremokyreʼỹ ha orembovyʼaiterei. Rog̃uahẽ riremínte la ore kongregasión pyahúpe, heta ermáno oñepyrũ avei ojapo iprekursorádo. Avei roñandu Jehová orevendesiha pórke omeʼẽ oréve mokõi estudiánte oprogresa porãva ohóvo”.

Añetehápe ijetuʼu javyʼa hag̃ua tódo el tiémpo. Sapyʼánte jajútante voi ndajavyʼaguasúi. Péro Jehová ñanembopyʼaguapy Salmo 64:10 rupive, pórke jaikuaa lomímonte ikatuha javyʼa jasegíramo ñandefiél Jehovápe tahaʼe haʼéva pe situasión jahasáva. Hiʼarive ndajadudái ni michĩmi Jehová oguerutaha pe “yvága ha yvy pyahu”. Upe tiémpope, entéro oservíva Jehovápe iperféktotama, ha ikatútama ovyʼa pára siémpre opa mbaʼe Jehová ojapótavare (Is. 65:17, 18).

¡Epensamíntena! Upe tiémpope entéronte ñaneresãita, káda día japáyta ñanekyreʼỹ ha ñanderetiaʼeve rei. Umi rrekuérdo vai heta tiémporema ñanembosufríva opytátama tesaráipe. Jaikuaa upeichataha pórke Jehová opromete ‘avave naimanduʼamoʼãiha umi mbaʼe oiko vaʼekuére yma, ha umíva ojeietetamaha ñane korasõgui’. Ikatúta avei jahecha jey umi jahayhúva omano vaʼekuépe, ha og̃uahẽvo upe moménto katuete javyʼaitereíta. Upéva oiko vove, entéro ñañeñandúta oñeñandu haguéicha pe mitãkuñaʼi de 12 áño tuakuéra, Jesús omoingove jeýrõ guare chupe (Mar 5:42). Ha péicha, og̃uahẽta pe tiémpo umi ivuénova añoite oikotaha ko yvy ape ári, ha ‘ovyʼaitereíta hikuái umi mbaʼe Jehová ojapóvare’.