1. ¿Mbaʼépa ikatu oiko ñanderehe ñañedesanimáramo?

KÁDA día ñambohovái heta provléma ha jajapo opa ikatúva jagueropuʼaka hag̃ua umíva. Péro ijetuʼuve ñambohovái hag̃ua ñane provlemakuéra ñañedesanima jave. ¿Mbaʼérepa? Pórke pe desánimo haʼete peteĩ mondaha oipeʼáva ñandehegui pe vyʼa, ha ñanemoñeñandu ku ndajavaleirõguáicha mbaʼeverã. Proverbios 24:10 heʼi voi: “Rejúramo reñedesanima neprovléma heta jave, ndereguerekomoʼãi fuérsa”. Ha upéva upeichaite hína. Ñañedesanima jave ñanekangy ha ijetuʼuve ñandéve ñaaguanta hag̃ua umi provléma.

2. a) ¿Mbaʼe mbaʼépa ikatu hína ñanedesanima? b) ¿Mbaʼépa jahecháta ko artíkulope?

² Oĩ heta mbaʼe ikatúva ñanedesanima, por ehémplo umi mbaʼe vai ñapensáva ñandejehe voi, umi ñande fallakuéra, térã ñanderasykatu jave. Ikatu avei ñañedesanima noñemeʼẽi jave ñandéve peteĩ asignasión ñande jaipotáva Jehová servísiope, térã japredikáramo peteĩ território umi hénte nohenduseihápe pe mensáhe jagueraháva. Ko artíkulope jahecháta mbaʼe mbaʼépa ikatu jajapo jagueropuʼaka hag̃ua pe desánimo.

3. ¿Mbaʼépa ikatu ñanepytyvõ ñañeñandu vai jave ñaneimperfékto rupi ha jafalla haguére?

³ Ñapensa jave ñaneimperfektoha ha umi ñande fallakuérare, ndahasyiete ñandéve ñañeñandu vai hag̃ua. Upévare ikatu ñapensa Jehová arakaʼeve ndoipotamoʼãiha ñaime pe múndo pyahúpe. Péro ipeligrosoiterei hína ñapensáramo upéicha. ¿Mbaʼéichapa upéicharõ jahecha vaʼerã umi ñande defektokuéra? Enterove yvypóra ningo pekadór, ha Jesúspe añoite ndohupytýi upéva (Rom. 3:23). Péro Jehová ndoikói ojesareko umi ñande fállare, ha nohaʼarõi ñandehegui ñandeperfékto. Upéva rangue, haʼe hína ñande Túa ñanderayhúva ha ñanepytyvõséva. Jehová ipasiénsia  avei ñanderehe. Haʼe oikuaa mbaʼéichapa ñañehaʼãmbaite jajapo hag̃ua iporãva ha ani hag̃ua ñapensa vai ñandejehe. Haʼe ningo oĩ voi ñanepytyvõ hag̃uáicha (Rom. 7:18, 19).

4, 5. ¿Mbaʼépa oipytyvõ mokõi ermánape ogueropuʼaka hag̃ua pe desánimo, ohechaukaháicha 1 Juan 3:19, 20?

⁴ Jahechamína ermána Débora ha María * ehémplo. Déborape imitãme ifamília oapoʼi ha otrata vai vaʼekue. Chupe ningo ndojeguerohoryguasúi vaʼekue. Upéicha rupi okakuaa rire haʼe opensa vaieterei ijehe. Débora ojavyʼimi jave jepe opensa ndojapoporãiha mbaʼevete voi. María ningo ohasa vaʼekue avei peichagua situasión. Umi ihentekuéra oapoʼieterei vaʼekue chupe, ha upévare haʼe opensa ndovaleiha mbaʼeverã. Ojevautisa rire jepe haʼe opensa vaʼekue nomereseiha oñehenói chupe testígo de Jehová.

⁵ Upéicharõ jepe, koʼã mokõi ñane ermána osegi oservi Jehovápe. ¿Mbaʼépa oipytyvõ vaʼekue chupekuéra? Haʼekuéra oñemboʼe Jehovápe ipyʼaite guive, ha oheja ipópe umi mbaʼe oipyʼapýva chupekuéra (Sal. 55:22). Haʼekuéra ohechakuaa ñande Ru ñanderayhuetéva oikuaaha mbaʼeichaitépa ñandeafekta ha ojapo vai ñanderehe umi mbaʼe vai jahasa vaʼekue, ha avei Ñandejára ohechaha umi kualida porã ni ñande jepe ndajahechakuaáiva jarekoha (elee 1 Juan 3:19, 20).

6. ¿Mbaʼéichapa ikatu oñeñandu peteĩ persóna oñehaʼãva hína oheja peteĩ mbaʼe vai, péro hoʼa jeýva upévape?

⁶ Oiméramo peteĩ persóna oñehaʼãmbaite hína oheja peteĩ kostúmbre vai, térã peteĩ vísio oreko vaʼekue, péro hoʼa jey upévape ikatu oñedesanimaiterei. Katuete ningo ñañeñandu vaítante voi japeka jave (2 Cor. 7:10). Péro ndovaléi avei jahasa la rrája ha ñañekondena ñapensávo: “Che ningo desastrete voi. Chéverõ g̃uarã Jehová ni núnka nacheperdonamoʼãi”. Péro jajavy ñapensáramo upéicha, ha upevakuére ikatu hína jaheja Jehovápe. Ñanemanduʼa vaʼerã Proverbios 24:10 heʼiha ‘ñañedesanimáramo ndajaguerekomoʼãiha fuérsa’. Upéva rangue, iporãvéta ñañemboʼéramo Jehovápe, ha jajerure chupe ñaneperdonamínte hag̃ua (Is. 1:18). Jehová ohecha jave ñande ñañembyasyetereiha ha ñañehaʼãha ñakambia, haʼe katuete ñaneperdonáta. Avei iporãta ñañeʼẽramo ansianokuérandi, haʼekuéra ningo ipasiénsia ñanderehe ha ñanepytyvõta ñaime porã jey hag̃ua Jehová renondépe (Sant. 5:14, 15).

7. ¿Mbaʼérepa nañañedesanimái vaʼerã ijetuʼúramo ñandéve jajapo hag̃ua pe iporãva?

⁷ Jean-Luc, peteĩ ansiáno oĩva Fránciape heʼi umi oñeñandu vaívape opensa jave ifallakuérare: “Peteĩ persóna ihústova Ñandejárape g̃uarã ndahaʼéi hína peteĩ ndojavýiva voi. Síno haʼe peteĩ oñembyasýva ofalla haguére ha oñehaʼãmbaitéva okambia” (Rom. 7:21-25).  Upévare, jafalla jave aníkena ñapensa ndajavaleiha mbaʼeverã. Ñanemanduʼa vaʼerã enterove jajavyha jepi ha ñaikotevẽha Ñandejára imbaʼeporã ñanendive, ha haʼe ohechauka ñandéve upéva Jesús sakrifísio rupive (Efes. 1:7; 1 Juan 4:10).

8. ¿Mávapepa ikatu jajerure ñanepytyvõ hag̃ua ñañedesanima jave?

⁸ Ñane ermáno ha ermanakuéra kongregasionpegua ikatu ñanemokyreʼỹ. Haʼekuéra ikatu ñanerendu ñaikotevẽ jave ñañeʼẽ, ha heʼi ñandéve umi mbaʼe ñanemokyreʼỹ vaʼerã (Prov. 12:25; 1 Tes. 5:14). Joy, peteĩ ermána Nigeriagua heta ohasa asy vaʼekue oñedesanima rupi. Haʼe heʼi: “¿Mbaʼéiko oiko vaʼerãmoʼã chehegui umi ermanokuéra reheʼỹ? Umi ermáno ha ermanakuéra chemokyreʼỹ jave, ohechauka hikuái Jehová ohenduha umi che ñemboʼe. Ha aaprende avei chuguikuéra mbaʼéichapa ikatu amokyreʼỹ ótro oñedesanimávape”. Péro ñanemanduʼa vaʼerã avei ñane ermanokuéra ndahaʼemoʼãiha siémpre opillátava ñande ñañeñandu vaiha. Upévare ñande ñañemoag̃ui vaʼerã peteĩ ermáno térã ermána ijerovia mbaretévare ha jajerure chupe ñanepytyvõ hag̃ua.

9. ¿Mbaʼéichapa ñanemokyreʼỹ umi mbaʼe heʼíva Salmo 41:3 ha 94:19?

⁹ Jajerure Jehovápe tañanepytyvõ. Ñañeñandu vai jave, ha koʼýte are guivéma jaikóramo ñanderasykatu, ikatu hína ijetuʼu ñandéve ñandepositívo hag̃ua. Koʼág̃a Jehová nañanemongueráiramo jepe peteĩ milágro rupive, haʼe ñanekonsola ha omeʼẽ ñandéve pe fuérsa ñaikotevẽva ñaaguanta hag̃ua (elee Salmo 41:3; 94:19). Por ehémplo, haʼe ikatu omomýi peteĩ ermánope ou hag̃ua ñanepytyvõ umi traváho jarekóvape ogapýpe, térã ojogua hag̃ua ñandéve umi mbaʼe ñaikotevẽva. Ikatu avei omomýi ñane ermanokuérape oñemboʼe hag̃ua ñanendive, térã ikatu ñanepytyvõ ñanemanduʼa hag̃ua peteĩ téxto bíblico ñanekonsolátavare. Por ehémplo umi téxto oñeʼẽva pe esperánsa porãite jarekóvare, ñandeperfektotamaha pe múndo pyahúpe ha ndaiporimoʼãveimaha hasykatúva ni osufríva (Rom. 15:4).

10. ¿Mbaʼépa oipytyvõ vaʼekue ermáno Isángpe anivéma hag̃ua oñeñandu yvýre pe iñaksidénte rire?

¹⁰ Isang, peteĩ ermáno oikóva Nigériape, oreko vaʼekue peteĩ aksidénte ivaietereíva ha opyta paralítiko. Ha idoktór heʼi chupe ndoguatamoʼãveimaha. Isang heʼi: “Chéngo añeñandu vaieterei ha apyta yvýre”. ¿Péro haʼépa osegínte raʼe oñeñandu péicha? Nahániri. ¿Mbaʼépa oipytyvõ raʼe chupe? Haʼe omombeʼu: “Che ha che rembireko siémpre roñemboʼe Jehovápe ha rosegi rostudia la Biblia. Avei rodesidi oreagradesidotaha umi mbaʼe porã rorekóvare, umíva apytépe pe esperánsa jaikotaha Ñandejára múndo pyahúpe”.

11. ¿Mbaʼépa oipytyvõ vaʼekue Cíndype ovyʼa hag̃ua hasykatuetérõ guare?

¹¹ Peteĩ ermána héravape Cindy oikóva Méxicope, ojeʼe vaʼekue orekoha peteĩ mbaʼasy ikatúva ojuka chupe. ¿Mbaʼépa haʼe ojapo vaʼekue ogueropuʼaka hag̃ua upe situasión? Haʼe odesidi opredikataha káda día orresivi aja pe tratamiénto. Cindy omombeʼu: “Upéva chepytyvõ ajepyʼapy hag̃ua ótrore, aikónte rangue apensa pe operasiónre ha mbaʼeichaitépa cherasykatu. Che ajapo vaʼekue koʼã mbaʼe: Añemongeta jave umi doktór ha enfermerokuérandi, aporandu chupekuéra ifamíliare. Upéi aporandu chupekuéra mbaʼérepa oelehi ko traváho ijetuʼuetéva. Upe rire ifasilvéma chéve aikuaa hag̃ua mbaʼe rehepa oñemongetaséta hikuái. Heta ijapyteguikuéra heʼi ipasientekuéra noporandúi jepiha chupekuéra mbaʼéichapa oĩ hikuái. Ha heta oĩ oagradeséva chéve ajepyʼapy haguére hesekuéra. Ha oĩ voi umi omeʼẽ vaʼekue chéve hóga direksión térã inúmero de teléfono. Che aikuaa kuri Jehová chepytyvõtaha ko situasión ijetuʼuetéva ahasávape, péro Jehová tuichaiterei  chesorprende peichaite peve chembovyʼávo” (Prov. 15:15).

12, 13. ¿Mbaʼéichapa umi ermáno hasykatúva térã ijedámava ikatu osegi opredika, ha mbaʼépa ohupyty hikuái?

¹² Umi ermanokuéra hasykatúva térã ijedámava ikatu hína oñedesanima ndaikatuvéi rupi opredika ojaposeháicha. Upéicharõ jepe, haʼekuéra otopa la fórma osegi hag̃ua opredika. Estados Unídospe oĩ vaʼekue peteĩ ermána hérava Laurel, opyta vaʼekue oñenoháme 37 áñore peteĩ mákina ryepýpe oipytyvõva chupe orrespira hag̃ua. Haʼe oreko vaʼekue avei kánser, heta operasión, ha ojagarra chupe unos kuánto mbaʼasy ipirére. Péro ko situasión ijetuʼuetéva ndojokói chupe opredika hag̃ua. Haʼe opredika umi enfermerokuérape ha umi ohóvape oñatende hese hógape. ¿Ha mbaʼépa ohupyty raʼe? Ermána Laurel oipytyvõ vaʼekue 17 persónaperupi oikuaa hag̃ua Jehovápe. *

¹³ Peteĩ ansiáno oikóva Fránciape hérava Richard, oreko peteĩ idéa iporãitereíva umi ndaikatúivape g̃uarã osẽ hógagui, térã oikóva umi lugár oñeñangarekohápe umi hasývare. Haʼe heʼi: “Iporãta ningo orekóramo hikuái peteĩ lugár omoĩ hag̃ua umi lívro ha puvlikasión, ikatu hag̃uáicha umi hénte ohasakuévo ohecha ha oporandu umívare. Péicha orekóta oportunida oñemongeta hag̃ua umi héntendi. Upéva tuichaiterei omokyreʼỹta umi ñane ermáno ha ermanakuéra jahayhuetévape, ha ndaikatuvéimavape osẽ hógagui”. Koʼãichagua ermáno ikatu avei opredika por teléfono térã kárta rupive.

14. ¿Mbaʼe ehémplo iporãvapa oheja vaʼekue ñandéve rréi David?

¹⁴ Ikatu oime jaipota asy oñemeʼẽ ñandéve peteĩ priviléhio Jehová servísiope. Péro noñemeʼẽi ñandéve ñandeedaitereíma rupi, ñanderasykatu, térã ñane situasión nopermitíri haguére ñandéve. Péicha jave ikatu ñanepytyvõ rréi David ehémplo. Haʼe ningo omopuʼãseterei vaʼekue Ñandejára témplo, ha ohaʼarõiterei oñemeʼẽ chupe upe priviléhio, péro ndojeporavói chupe ojapo hag̃ua upéva. Upéicharõ jepe, David oapoja vaʼekue ipyʼaite guive upe Ñandejára oiporavo vaʼekuépe ojapo hag̃ua upe traváho. Upearã haʼe omeʼẽ voi hetaiterei óro ha pláta. ¡Ajépa iporãite la iñehémplo ñandéve g̃uarã! (2 Sam. 7:12, 13; 1 Crón. 29:1, 3-5).

15. ¿Mbaʼéichapa peteĩ ermáno ikatu vaʼekue ogueropuʼaka pe desánimo?

¹⁵ Peteĩ ermáno Franciapegua hérava Hugues ndaikatuvéi vaʼekue oservi de ansiáno hasykatu rupi, ha ndaikatuvéi ojapo umi tembiapo isensillovéva jepe hógape. Haʼe omombeʼu: “Ñepyrũrã añandu ndavaleveimaha mbaʼeverã ha apyta yvýre. Péro un tiémpo haguépe ahechakuaa iñimportanteha aasepta ndaikatuveimaha ajapo heta mbaʼe. Upe rire ikatúma avyʼa jey umi  mbaʼe si ikatúvare ajapo Jehová servísiope, ha ajedesidíma nañentregamoʼãiha. Che ajogua voi Gedeón ha umi 300 isoldádope: Chekaneʼõramo jepe asegíta alucha” (Juec. 8:4).

16. ¿Mbaʼépa ikatu ñaaprende umi anhelkuéra ehémplogui?

¹⁶ Umi anhelkuéra ifiélva ningo oheja ñandéve peteĩ ehémplo iporãitereíva. Por ehémplo, rréi Acab ogovernaha tiémpope, Jehová oporandu vaʼekue umi ánhelpe mbaʼéichapa ikatu oñembotavy ko rréi iñañaitévape. Ha unos kuánto ánhel heʼi vaʼekue mbaʼéichapa ikatu ojejapo upéva. Péro Ñandejára oiporavo peteĩ ánhelpente ha heʼi osẽ porãtaha la ijidéa (1 Rey. 22:19-22). ¿Oñedesanimápa raʼe umi ótro ánhel ifiélva ha opensa: “Maʼerã rei piko aperde che tiémpo ha ameʼẽ la che suherénsia”? Nahániri. La Biblia ndohechaukái haʼekuéra opensa hague upéicha. Umi anhelkuéra iñumildeterei ha oipota oñemombaʼeguasu Jehovápe añoiténte (Juec. 13:16-18; Apoc. 19:10).

17. ¿Mbaʼépa jajapo vaʼerã ñañedesanimáramo noñemeʼẽi rupi ñandéve peteĩ priviléhio Jehová servísiope?

¹⁷ Ñanemanduʼa vaʼerã pe priviléhio tuichavéva ikatúva jaguereko haʼeha jaiko testígo de Jehováramo ha japredika pe Rréino. Umi priviléhio ha asignasión ningo ou ha oho, péro umívare nodependéi Ñandejára ñandevalora hag̃ua. Jehová ha umi ermanokuéra añetehápe ñanderayhúta jahechakuaáramo umi mbaʼe ndaikatúiva jajapo ha ñaneumílderamo. Upévare jajerure asýkena Jehovápe siémpre jahechauka hag̃ua koʼã kualida. Jajepyʼamongeta umi Ñandejára siervokuéra iñumíldeva ehémplore ha jatopávare la Bíbliape. Ha kyreʼỹme jaservi ñane ermanokuérape, tahaʼe haʼéva umi mbaʼe ikatúva jajapo hesehapekuéra (Sal. 138:6; 1 Ped. 5:5).

18, 19. ¿Mbaʼéichapa ikatu javyʼa predikasiónpe umi hénte ñande territoriopegua nañanerenduséiramo jepe?

¹⁸ Sapyʼánte ikatu ñañedesanima umi hénte ñande territoriopegua nohenduséi haguére umi notísia porã, térã saʼieterei hénte jatopa haguére hógape. ¿Mbaʼépa ikatu ñanepytyvõ jasegi hag̃ua javyʼa, térã javyʼave hag̃ua? Pe rrekuádro héravape “ ¿Mbaʼépa ikatu jajapo javyʼave hag̃ua predikasiónpe?”, jatopáta heta konsého porã ñanepytyvõtava. Iñimportánte ningo avei jahecha hendápe porã pe predikasión. ¿Mbaʼépa upéva heʼise?

¹⁹ Ñanemanduʼa vaʼerã ñande japredikaha jaikuaauka hag̃ua Ñandejára réra ha Irréino. Jesús heʼi porã vaʼekue saʼitaha umi hénte omoirũva chupe (Mat. 7:13, 14). Japredika jave ñande jareko pe priviléhio ñambaʼapóvo Jehová, Jesús  ha umi ánhel ndive (Mat. 28:19, 20; 1 Cor. 3:9; Apoc. 14:6, 7). Jehová ningo oheka hína umi hénte oservisévape chupe (Juan 6:44). Upévare aníkena ñañedesanima peteĩ persóna nañanerenduséiramo koʼág̃a, ág̃a ótro japredikávape ikatúma hína ohenduse pe mensáhe jagueraháva.

20. ¿Mbaʼépa ñanepytyvõta ñandepuʼaka hag̃ua pe desánimore ohechaukaháicha Jeremías 20:8, 9?

²⁰ Ñande ikatu ñaaprende heta mbaʼe proféta Jeremíasgui. Haʼe opredika vaʼekue peteĩ território ijetuʼuetereívape, umi hénte nohenduséi rupi chupe. Haʼekuéra otrata vai ha oñembohory vaʼekue hese “tódo el día” (elee Jeremías 20:8, 9). Peteĩ jey haʼe oñedesanimaiterei ha oñandu voi ndaikatumoʼãveimaha opredika. Péro haʼe noñentregái. ¿Mbaʼérepa? Pórke “Jehová ñeʼẽ” ‘haʼete voi tatarendy oĩva Jeremías kangue kuápe’. Upévare haʼe ndaikatuvéima okirirĩ ha osegímante opredika. Ha upeichaite avei oikóta ñanderehe ñamyenyhẽramo ñane akã ha ñane korasõme Jehová ñeʼẽ. Upearã tekotevẽta jastudia la Biblia káda día ha jajepyʼamongeta hese. Upéicha jajapóramo javyʼavéta predikasiónpe ha ikatu hína hetave hénte ñanerenduse (Jer. 15:16).

21. ¿Mbaʼéichapa ikatúta ñandepuʼaka pe desánimore?

²¹ Débora, pe ermána ajeʼi ñañeʼẽ hague, heʼi: “Pe desánimo ningo peteĩ árma ipoderósova Satanás oipurúva ñane kóntrape”. Péro Jehová ipoderosoiteve Satanásgui ha oimeraẽ árma haʼe oipurúvagui ñane kóntrape. Upévare, tahaʼe haʼéva pe ñanedesanimáva, jajerure asýkena Jehovápe tañanepytyvõ. Haʼe ojapóta upéva ha péicha jagueropuʼakáta ñane imperfeksión ha umi ñande fallakuéra. Jehová oĩta ñande ykére ñanderasykatu jave. Avei ñanepytyvõta jahecha hag̃ua hendápe porã umi priviléhio, ha ñandepositívo hag̃ua predikasiónpe. Ñañemboʼékena ñande Ru ñanderayhuetévape ha ñamombeʼupaite chupe mbaʼépa ñanekevranta. Ha haʼe ñanepytyvõ rupi, ikatúta ñandepuʼaka pe desánimore.