1, 2. a) ¿Mbaʼépa heʼi vaʼekue Jehová oikotaha ñane tiémpope? b) ¿Mbaʼe mbaʼépa ñambohováita ko artíkulope? (Ehecha pe taʼanga oĩva iñepyrũme.)

JEHOVÁ heʼi vaʼekue “diez kuimbaʼe” oúva opaichagua tetãgui ha oñeʼẽva opaichagua idióma ipojaitaha “peteĩ hudío” ao ruguáire ha heʼitaha: “Ore rohóta penendive, rohendúgui Ñandejára oĩha penendive” (Zac. 8:23, NM). Pe “hudío” orrepresenta umi kristiáno Ñandejára oiporavo vaʼekuépe ijespíritu sánto rupive. La Biblia ohenói avei chupekuéra “Israel Ñandejára mbaʼéva” (Gál. 6:16). Ha umi “diez kuimbaʼe” katu orrepresenta umi orekóvape esperánsa oikove hag̃ua ko yvy ape ári. Péro, ¿mbaʼérepa koʼã kristiáno heʼi ‘ohoseha’ umi unhídondi? Pórke Jehová ovendesi umi unhídope, ha avei chupekuéra g̃uarã peteĩ priviléhio omombaʼeguasu Ñandejárape hendivekuéra.

² Zacarías oprofetisa haguéicha, Jesús heʼi vaʼekue avei Ñandejára siervokuéra oĩtaha unído. Haʼe ohenói “ovechakuéra mbovymi” umi orekóvape esperánsa oho hag̃ua yvágape. Ha umi orekóvape esperánsa oikove hag̃ua ko yvy ape ári katu ohenói “ambue ovechakuéra”. Péro Jesús heʼi mokõive grúpo haʼeha “peteĩ ovecha aty”, ha ogiataha chupekuéra “peteĩ ovecharerekua” (Luc. 12:32; Juan 10:16). Jahechaháicha enterovéva ñande  peteĩ grúponte. Péro ikatu oĩ oñeporandúva: ¿Tekotevẽpa umi ambue ovechakuéra oikuaa mbaʼéichapa héra entéro umi unhído oikóva ñane tiémpope? ¿Mbaʼéichapa umi unhído ohecha vaʼerã ipriviléhio? ¿Mbaʼéichapa jatrata vaʼerã umi ermáno hoʼúvape pe pan ha pe víno Konmemorasionhápe? ¿Mbaʼérepa ndajajepyʼapýi vaʼerã heta hetavéramo hikuái? Ko artíkulope oñembohováita koʼã cuatro porandu.

3. ¿Mbaʼérepa ndaikatúi jaikuaa mávapa ohóta yvágape ha oĩta pe grúpo de 144.000 apytépe?

³ ¿Tekotevẽpa umi ambue ovechakuéra oikuaa mbaʼéichapa héra entéro umi unhído oikóva ñane tiémpope? Nahániri, ha añetehápe ndaikatúi voi ojekuaapa, pórke ni umi unhído oĩva ko yvy ape ári ndaikatúi gueteri oasegura ohotaha yvágape. [1] (Elee pe nóta oĩva opakuévo ko artíkulo.) Haʼekuéra orresivi peteĩ invitasión Ñandejáragui, péro iñeʼẽrendu vaʼerã hikuái ipahaite peve ikatu hag̃uáicha oho yvágape. Satanás oikuaa upéva, ha oñehaʼãmbaite oity chupekuéra umi “proféta japu” rupive (Mat. 24:24). Umi unhído ikatúta oikuaa ohótapa yvágape Jehová okonfirma vove chupekuéra. ¿Mbaʼe moméntopepa oiko upéva? Jehová okonfirma chupekuéra omano mboyve hikuái, térã oñepyrũ mboyvemi pe “jehasa asy guasu” (Apoc. 2:10; 7:3, 14).

4. Ambue ovechakuéra ndoikuaáiramo jepe entéro umi unhído réra, ¿mbaʼérepa ikatu heʼi “rohóta penendive”?

⁴ Umi ambue ovechakuéra ndoikuaáiramo entéro umi unhído réra, ¿mbaʼéichapa okumplíta hikuái pe profesía heʼíva “rohóta penendive”? ¿Mávapepa osegíta hikuái? La Biblia heʼi “diez kuimbaʼe” ipojaitaha “peteĩ hudío” ao ruguáire ha heʼitaha hikuái: “Ore rohóta penendive, rohendúgui Ñandejára oĩha penendive”. Jahechaháicha, pe “hudío” norrepresentái peteĩ persónapente, síno entéro umi unhídope. Umi ambue ovechakuéra oikuaa upéva, upéicha rupi heʼi hikuái ohoha umi unhídondi, térã oserviha hikuái Jehovápe hendivekuéra. Añetehápe natekotevẽi oikuaa hikuái entéro umi unhído réra, oikuaánte vaʼerã mávapa pe grúpo de unhído ikatu hag̃uáicha omoirũ chupekuéra. La Biblia ndeʼíri voi jasegi vaʼerãha peteĩ umánope. Jesúspe añoite jasegi vaʼerã, pórke haʼe la ñande líder (Mat. 23:10).

5. a) ¿Mbaʼe adverténsiapa oñemeʼẽ umi kristiáno unhídope 1 Corintios 11:27-29-pe? b) ¿Mbaʼérepa oñatende porã vaʼerã umi unhído ko adverténsiare?

⁵ Umi hoʼúva pe pan ha víno Konmemorasionhápe, oñatende porã vaʼerã heʼívare 1 Corintios 11:27-29 (elee). ¿Mbaʼérepa apóstol Pablo omeʼẽ ko adverténsia umi kristiáno unhídope? Pórke noĩporãiramo hikuái Jehová renondépe, ha upéicharõ jepe hoʼu pe pan ha pe víno, ohechaukáta ndorrespetaiha Jesús sakrifísio (Heb. 6:4-6; 10:26-29). Umi mbaʼe Pablo heʼi vaʼekue omomanduʼa umi unhídope neʼĩraha gueteri orresivi irrekompénsa. Upévare osegi vaʼerã hikuái oñehaʼã “ohupyty hag̃ua pe prémio Ñandejára omeʼẽva” (Filip. 3:13-16).

6. ¿Mbaʼéichapa umi unhído ‘ohechaukáta omereseha Ñandejára ohenói chupekuéra’?

⁶ Apóstol Pablo heʼi vaʼekue umi kristiáno unhídope: “Ajerure jey jey peẽme penderekoporã hag̃ua, ikatu hag̃uáicha pehechauka pemereseha Ñandejára penerenói”. ¿Mbaʼéichapa umi unhído ikatu osegi ko konsého? Pablo heʼi: “Akóintekena peñemomirĩ, ha ani pendepochy rei, penepasiénsiakena, ha mborayhúpe peñoaguanta  oñoermánoicha”. Avei heʼi chupekuéra oñehaʼã vaʼerãha oiko pyʼaguapýpe ha peteĩ ñeʼẽme kongregasiónpe (Efes. 4:1-3). Pe espíritu sánto oipytyvõ Ñandejára siervokuérape ani hag̃ua oñemombaʼeguasu, síno iñumílde hag̃ua (Col. 3:12). Upévare umi unhído nopensái iñimportanteveha ótrogui, térã orekoveha espíritu sánto ha ontende porãveha la Biblia umi ótro kristiánogui. Avei nomokyreʼỹi avavépe hoʼu hag̃ua pe pan ha pe víno openságui peteĩ persóna haʼeha unhído. Haʼekuéra iñumílde rupi, orrekonose Jehová añoite ikatuha oinvita peteĩ persónape oho hag̃ua yvágape.

7, 8. a) ¿Mbaʼéichapa umi unhído ohechauka ndoipotaiha oñemeʼẽ chupekuéra preferénsia? b) ¿Mbaʼéichapa ikatu oafekta kongregasiónpe umi mbaʼe ojapóva umi unhído?

⁷ Umi unhído ningo oikuaa orekoha tuicha priviléhio ohóta haguére yvágape. Upéicharõ jepe, haʼekuéra nohaʼarõi umi ótro kristiáno otrata chupekuéra de fórma espesiál (Efes. 1:18, 19; elee Filipenses 2:2, 3). Jehová oiporavórõ guare chupekuéra, ndoikuaaukái kuri entéro umi ótra persónape haʼekuéra haʼeha unhído. Upévare, pe kristiáno ojeporavóva espíritu sánto rupive noñesorprendéi oĩramo ndogueroviapáiva haʼeha unhído. Haʼe oikuaa la Biblia voi heʼiha ani hag̃ua jaroviánte peteĩ persóna heʼíramo orresiviha Jehovágui peteĩ rresponsavilida espesiál (Apoc. 2:2). Peteĩ unhído oikuaa jave ótra persónape ndeʼíri chupe haʼeha unhído, pórke nollamaséi la atensión. Ikatu voi nomombeʼúi avavépe, ni ndoikói oñeʼẽ umi mbaʼe tuicháva ojapótavare yvágape (1 Cor. 1:28, 29; elee 1 Corintios 4:6-8).

⁸ Umi kristiáno unhído nopensái ohasave vaʼerãha tiémpo umi ótro unhídondi, ku haʼerõguáicha hikuái peteĩ grúpo iñimportantevéva. Ndoikói oheka ótro unhídope oñemongeta hag̃ua hikuái umi mbaʼe ohasávare, térã oforma hag̃ua peteĩ grúpo espesiál ikatu hag̃uáicha ostudia la Biblia (Gál. 1:15-17). Ojapóramo hikuái koʼã mbaʼe, ndaiporimoʼãi unida kongregasiónpe. Upéva rangue oñemoĩta hikuái pe espíritu sántore, oipytyvõva hína oĩ hag̃ua pyʼaguapy ha unida Ñandejára puévlope (elee Romanos 16:17, 18).

9. ¿Mbaʼérepa ñañatende vaʼerã jatrata lájare umi hoʼúvape pan ha víno Konmemorasionhápe? (Ehecha pe rrekuádro “ Pe mborayhu ningo ndojapói mbaʼeve hekopeʼỹ”.)

⁹ Jesús heʼi vaʼekue idisipulokuérape: “Peẽ enterovéva oñoermáno”. Ha upéi heʼi chupekuéra: “Pe oñembotuichávape, ojeapoʼíta, ha pe oñemomirĩvape katu oñembotuicháta” (Mat. 23:8-12). ¿Mbaʼépa ñanemboʼe koʼã mbaʼe? Naiporãiha ñambotuicha ñande rapichápe, térã jatrata porãve chupe unhído haguérente. Por ehémplo, la Biblia heʼi jajerovia vaʼerãha Ñandejárare umi ansiáno ojapoháicha. Péro ndeʼíri oiko vaʼerãha ñandehegui peteĩ umáno segidór (Heb. 13:7). La Biblia heʼi avei oĩha kristiáno tekotevẽva “ojerrespetave”, péro ndahaʼéi unhído haguére, síno ombaʼapo jejopy rupi “oñeʼẽ ha oporomboʼe hag̃ua” (1 Tim. 5:17). Ñameʼẽramo preferénsia umi unhídope, ikatu otĩ hikuái, térã ivaiveha, ikatu voi oñepyrũ oñemombaʼeguasu (Rom. 12:3). ¡Ajépa ndajaipotaiete oiko upéva! Ñañatendékena ani hag̃ua ñambotropesa Cristo ermanokuérape (Luc. 17:2).

10. ¿Mbaʼéichapa jahechauka jarrespetaha umi unhídope?

¹⁰ ¿Mbaʼéichapa jahechauka jarrespetaha umi ermáno Ñandejára oiporavo vaʼekuépe oho hag̃ua yvágape? Upéva ikatu jajapo heta hendáicha. Por ehémplo, ndajaikói ñaporandu pe ermáno térã ermánape  mbaʼéichapa haʼe oñemeʼẽ enkuénta haʼeha unhído. Upéva natekotevẽi ñande jaikuaa (1 Tes. 4:11; 2 Tes. 3:11). Avei nañaporandúi iména térã hembirekópe, isy térã itúvape, térã ambue ihentekuérape haʼekuérapa haʼe avei unhído, pórke upe priviléhio ndahaʼéi peteĩ mbaʼe ojeeredáva (1 Tes. 2:12). Ñañatende vaʼerã ani hag̃ua jajapo umi pregúnta oporomoñeñandu vaíva. Por ehémplo, naiporãi ñaporandu pe kristiánope mbaʼéichapa oñeñandu iména térã hembireko noĩmoʼãi haguére hendive paraísope. Ñande ningo jaikuaa porã ág̃a pe paraísope Jehová omeʼẽtaha “entérope opa mbaʼe oipotáva” (Sal. 145:16, NM).

11. ¿Mbaʼe pelígroguipa jajehekýita jatratáramo umi unhídope jatrataháicha umi ótro ermánope?

¹¹ ¿Mbaʼérepa iporã jatrata umi unhídope jatrataháicha umi ótro ermánope? Pórke upéva haʼe peteĩ proteksión ñandéve g̃uarã. La Biblia heʼi kongregasiónpe ikatuha oĩ “ermáno guaʼu”, heʼínteva haʼeha unhído (Gál. 2:4, 5; 1 Juan 2:19). Avei, ikatu algún unhído ou naiñeʼẽrenduvéi Jehovápe (Mat. 25:10-12; 2 Ped. 2:20, 21). Disípulo Judas heʼi naiporãiha ‘ñambojuruheʼẽ ñande rapichakuérape’. Ndoikói vaʼerã ñandehegui peteĩ ermáno segidór, tahaʼe heta tiémporema oservi rupi Jehovápe, ikonosidoiterei haguére térã haʼégui unhído. Upéva ningo ipeligróso, pórke ohejáramo Jehovápe, ikatu ñandeafekta ha ñande avei ñañemomombyry Jehovágui (Jud. 16).

12, 13. ¿Mbaʼérepa ndajajepyʼapýi vaʼerã heta hetavéramo umi kristiáno hoʼúva pe pan ha víno Konmemorasionhápe?

¹² Heta tiémpore, umi kristiáno hoʼúva pe pan ha pe víno Konmemorasionhápe saʼive vaʼekue oúvo. Péro umi áño ohasa ramóvape heta hetave. ¿Jajepyʼapy vaʼerãpa upe haguére? Nahániri. Jahechamína cuatro mbaʼe ñanepytyvõtava ñantende hag̃ua mbaʼérepa naiporãi jajepyʼapy.

¹³ “Jehová oikuaa umi imbaʼévape.” (2 Tim. 2:19.) Jehová oikuaa mávapa haʼe unhído ha mávapa ndahaʼéi. Konmemorasionhápe siémpre oñekonta mboýpa oĩ hoʼúva pe pan ha pe víno, péro upéva ndeʼiséi ojekuaatamaha mboy unhídopa hemby ko yvy ape ári. ¿Mbaʼérepa jaʼe upéva? Pórke pe kantida totál oñekontávape, oike avei umi oimoʼãva haʼeha unhído. Por ehémplo, oĩ orekóva depresión, oñekevrantaitereíva,  térã opensaitereíva pe esperánsa selestiálre ha oimoʼãma haʼeha unhído. Ótro katu hoʼúmi vaʼekue pe pan ha pe víno, péro upe rire ndojapovéi upéva. Opa umívare, ndajaikuaái mboy unhídopa hemby ko yvy ape ári.

14. ¿Heʼípa la Biblia mboy unhídopa hembýta ko yvy ape ári oñepyrũ vove pe jehasa asy guasu?

¹⁴ Jesús ou vove oraha hag̃ua umi unhídope yvágape, haʼekuéra oĩta diferénte lugárpe ko yvy ape ári. La Biblia heʼi mbaʼépa ojapóta Jesús: “Omondóta hiʼanhelkuérape, ha trompéta pu reheve ombyatýta hikuái umi ojeporavo vaʼekuépe, nórte, sur, kuarahyreike ha kuarahyresẽguio, peteĩ yvága púnta guive ótro púnta peve” (Mat. 24:31). Avei, la Biblia heʼi umi ára pahápe oĩtaha gueteri mbovymi unhído ko yvy ape ári (Apoc. 12:17). Péro ndeʼíri mboýpa hembýta oñepyrũ vove pe jehasa asy guasu.

15, 16. ¿Mbaʼépa jareko vaʼerã enkuénta ñapensávo mbaʼéichapa Jehová oiporavo umi 144.000-pe?

¹⁵ Jehová odesidi arakaʼépa oiporavóta umi unhídope (Rom. 8:28-30). Jesús orresusita rire, Jehová oñepyrũ oiporavo ijespíritu sánto rupive umi kristiánope oho hag̃ua yvágape. Amalisia síglo primérope entéro umi kristiáno haʼe vaʼekue unhído. Péro upéi, amáske ohasa pe tiémpo heta hetave oĩ umi heʼínteva ijehe kristianoha, péro añetehápe ndahaʼéi. Upéicharõ jepe, oĩ avei umi kristiáno verdadéro ha Jehová oiporavo chupekuéra ijespíritu sánto rupive, ha oiko chuguikuéra unhído. Koʼãvape Jesús okompara vaʼekue pe trígore, okakuaátava umi ñana apytépe (Mat. 13:24-30). Koʼã ára pahápe, Jehová osegi ombyaty umi kristiánope okompleta hag̃ua ohóvo pe grúpo de 144.000 unhído. [2] (Elee pe nóta oĩva opakuévo ko artíkulo). Jehová osegíramo oiporavove ko tiémpope unos kuánto unhído, ñande ni mbaʼevéicharõ nañapensamoʼãi upéva oĩ vaiha (Is. 45:9; Dan. 4:35; elee Romanos 9:11, 16). [3] Jesús omoĩ vaʼekue peteĩ ehémplo oñeʼẽva unos kuánto kuimbaʼe ombaʼapóvare, péro ojekeháva ipatrón opaga haguére chupekuéra la mísma kantida opagáva umi ótro saʼive ombaʼapóvape. ¡Aníkena ñande jajogua chupekuéra! (Elee Mateo 20:8-15.)

¹⁶ Naentéroi umi unhído haʼe pe “tembiguái jeroviaha ha iñarandúva” (Mat. 24:45-47). Síglo primérope oiko hag̃uéicha, koʼág̃a Jehová ha Jesús oipuru mbovymi kristiánope omboʼe hag̃ua pe añetegua heta persónape. Ymave mbovymi unhído oskrivi vaʼekue la Biblia, umi Escrituras Griegas. Ñane tiémpope avei mbovymi unhído oreko pe rresponsavilida omeʼẽ hag̃ua Ñandejára puévlope “hiʼupy hiʼoraitépe”.

17. ¿Mbaʼépa reaprende ko artíkulope?

¹⁷ Ko artíkulope ñaaprende Jehová odesidi hague la majoría isiervokuéra oikotaha ko yvy ape ári opa árare, ha umi ogovernátava Jesúsndi oikotaha yvágape. Jehová orrekompensa entéro isiervokuérape, tahaʼe umi orrepresentávape ‘umi diez kuimbaʼépe’ ha pe ‘hudíope’. Haʼe oipota enterovéva ñaneñeʼẽrendu ha jasegi jaservi chupe ñande pyʼaite guive. Mokõive grúpo ñaneumílde ha ñaneunído vaʼerã. Avei ñañehaʼãmbaite vaʼerã ikatu hag̃uáicha osegi oĩ pyʼaguapy kongregasiónpe. Ñahaʼarõ aja og̃uahẽ pe fin, jasegíkena ñaneñeʼẽrendu Jehová ha Jesúspe ‘peteĩ ovecha atýicha’.