1, 2. a) ¿Mbaʼérepa umi héntepe ijetuʼu ojerovia hag̃ua umi orekóvare autorida? b) ¿Mbaʼépa jahecháta ko artíkulope?

 KOʼÁG̃ARUPI ningo umi héntepe ijetuʼu ojerovia hag̃ua umi orekóvare autorida. Por ehémplo, haʼekuéra ohecha mbaʼéichapa umi goviérno ha pe léi ombojeroviave umi irríko ha ipoderósovape, péro ndofavoreséi umi imboriahúvape. La Biblia heʼi porã voi ñandéve: “Yvypóra omanda hapicháre operhudika hag̃uánte chupe” (Ecl. 8:9). Avei umi líder rrelihióso koʼág̃arupi ojapo heta mbaʼe vai, ha upévare ijetuʼu umi héntepe ojerovia hag̃ua Ñandejárare. Upéicha rupi, peteĩ persóna oñepyrũramo ostudia ñanendive la Biblia, ñande ñaipytyvõ vaʼerã chupe ojerovia hag̃ua Jehováre ha avei umi kuimbaʼe haʼe onombra vaʼekuére ñandegia hag̃ua.

² Péro ndahaʼéi ningo umi estudiánte añónte la tekotevẽva ojerovia Jehováre ha iñorganisasiónre, ñande jaservíva Jehovápe are guivéma lomímonte jajapo vaʼerã upéva. Ha iñimportánte siémpre ñanemanduʼa ko mbaʼére: La Jehová ojapo lája entéro mbaʼe, siémpre iporãve. Péro sapyʼánte ikatu hína jahasa umi situasión ijetuʼuhápe ñandéve jajerovia Jehováre. Upévare, ko artíkulope jahecháta mbohapy situasión ikatuhápe oñemoĩ a pruéva la ñande jerovia: 1) Nañantendéi jave peteĩ rreláto oĩva la Bíbliape, 2) jarresivi jave instruksión, ha 3) amo gotyove ñambohovái vove umi situasión ijetuʼúva oñepresentátava ñandéve.

3. ¿Mbaʼérepa ikatu jaʼe oĩha umi rreláto bíblico ikatúva omoĩ a pruéva ñande jerovia Jehováre?

 ³ Jalee jave la Biblia ikatu nañantendeporãi mbaʼérepa Jehová odesidi ojapo peteĩ mbaʼe. Por ehémplo, lívro de Númerospe ikatu jalee Jehová omanda hague ojejuka hag̃ua peteĩ kuimbaʼépe ombyaty haguére jepeʼa sabadokue. Péro upéi, 2 Samuélpe jahecha mbaʼéichapa haʼe operdona vaʼekue rréi Davídpe, jepe haʼe hekovai ha oporojuka vaʼekue (Núm. 15:32, 35; 2 Sam. 12:9, 13). Jalee jave koʼã mbaʼe ikatu ñañeporandu: “¿Mbaʼéreiko Jehová operdona raʼe Davídpe hekovai ha oporojukáramo jepe, péro heʼi pe kuimbaʼe ombyaty vaʼekue jepeʼa omano vaʼerãha voi?”. Ñambohovái hag̃ua koʼã porandu, iporãta jareko enkuénta mbohapy mbaʼe jalee jave la Biblia.

4. ¿Mbaʼéichapa Génesis 18:20, 21 ha Deuteronomio 10:17 ñanepytyvõ ñaĩ hag̃ua segúro Jehová siémpre odesidi porãha?

⁴ La Biblia nomeʼẽi jepi entéro umi detálle. Por ehémplo, ñande jaikuaa rréi David ombyasy hague ipyʼaite guive la ojapóva (Sal. 51:2-4). ¿Péro mbaʼépa ikatu jaʼe pe kuimbaʼe ombyaty vaʼekuére jepeʼa sabadokue? ¿Ombyasýpa raʼe la ojapo vaʼekue? ¿Haʼépa idesovediéntema vaʼekue voi Jehovápe anteve? ¿Ojeavisáma voípa raʼe chupe ha lomímonte ojapo? La Biblia ningo ndeʼíri koʼã mbaʼe. Péro si ikatu ñaĩ segúro peteĩ mbaʼére: Jehová “arakaʼeve naiñinhústoiva” (Deut. 32:4). Haʼe ningo odesidíta jave peteĩ mbaʼe, ndorekói enkuénta umi chísme, pe persóna pínta, térã oimeraẽ mbaʼe ikatúva ñanemopensa vai ótrore (elee Génesis 18:20, 21; Deuteronomio 10:17). Upévare amáske jaikuaa porãve Jehovápe, jajeroviavéta hese ha ñaĩta segúro umi mbaʼe haʼe odesidíva siémpre iporãveha. Koʼag̃aite ikatu jatopa la Bíbliape algúna kósa nañantendeporãiva o ndaikatúiva ñakontesta. Péro ñande jaikuaa porã Jehovápe, ha ñaime segúro haʼe ‘siémpre ojapoha iporãva’ (Sal. 145:17).

5. ¿Mbaʼérepa ñande ndaikatúi jahusga porã ñande rapichápe? (Ehecha avei pe rrekuádro “ Ñaneimperfékto rupi ndaikatúi japorohusga porã”).

⁵ Ñande ñaneimperfékto rupi ndaikatúi jahusga porã entéro mbaʼe. Jehová ningo ñandekrea vaʼekue ikatu hag̃uáicha jahechauka umi kualida haʼe orekóva, upévare ñandéve  nañandegustái umi inhustísia (Gén. 1:26). Péro ñaneimperfékto rupi, ikatu hína jahusga vai ñande rapichápe ñapensáramo jepe jaikuaapaha la oiko vaʼekue. Ñapensamíntena por ehémplo la oiko vaʼekue Jonás rehe. Haʼe ningo ipochyeterei vaʼekue oikuaárõ guare Jehová operdonataha umi ninivítape (Jon. 3:10–4:1). ¿Péro mbaʼépa ojehupyty upe haguére? ¡Mas de 120.000 ninivita oñarrepenti ha ojesalva! Amo ipahápe Jonás la oikotevẽ vaʼekue ojekorrehi, pórke haʼe la ohusga vai vaʼekue umi héntepe, ndahaʼéi Jehová.

6. ¿Jehovápa oĩ ovligádo oexplikávo ñandéve mbaʼérepa odesidi peteĩ mbaʼe?

⁶ Jehová natekotevẽi oexplika ñandéve mbaʼérepa odesidi peteĩ mbaʼe. Yma ningo Jehová odesidi mboyve térã odesidi rire álgo, oporandu vaʼekue isiervokuérape mbaʼépa haʼekuéra opensa (Gén. 18:25; Jon. 4:2, 3). Ha sapyʼánte oexplika voi chupekuéra mbaʼérepa odesidi upéicha (Jon. 4:10, 11). Péro en rrealida Jehová ndorekói la ovligasión oexplikávo ñandéve mbaʼérepa odesidi peteĩ mbaʼe. Haʼe ningo ñande Apohare, upévare noikotevẽi ñande ñameʼẽ chupe permíso ojapo hag̃ua peteĩ mbaʼe (Is. 40:13, 14; 55:9).

7. ¿Mbaʼépa ikatu hína ijetuʼu ñandéve, ha mbaʼérepa?

⁷ Ñande ningo jajeroviaiterei Jehová siémpre odesidi porãtaha entéro mbaʼe. Péro sapyʼánte ikatu ijetuʼuʼimi ñandéve jajerovia hag̃ua umi ansianokuérare, pórke ikatu hína jaduda oimépa haʼekuéra ojapo hína umi mbaʼe Jehovápe ogustaháicha térã ojapóntepa hína ojaposéva. Upéva ningo ikatu vaʼekue avei oiko yma. Por ehémplo, ñanemanduʼamína la ñamensiona vaʼekuére  párrafo 3-pe. ¿Nemanduʼápa pe kuimbaʼe ombyaty vaʼekuére jepeʼa sabadokue? Ikatu oime ipariénte oikuaase raʼe Moiséspa oporandu raẽ Jehovápe mbaʼépa haʼe opensa odesidi mboyve ojejuka vaʼerãha chupe. Térã peteĩ Urías amígo ikatúne raʼe opensa rréi Davídpe ojejuka vaʼerãha katuete hekovai haguére, péro oñembohasa reínte hague chugui upéva haʼe haguére rréi. Péro ñanemanduʼákena ko mbaʼére: Ndaikatúi jaʼe jajeroviaha Jehováre, ndajajeroviáiramo umi haʼe omoĩvare odirihi hag̃ua ipuévlope.

8. Ohechaukaháicha Hechos 16:4, 5, ¿mbaʼéichapa oñeorganisa vaʼekue yma Jehová puévlo, ha mbaʼéichapa ñande jasegi hína iñehémplo koʼág̃arupi?

⁸ Koʼág̃arupi Jehová ojevale ‘pe esklávo de konfiánsa ha iñarandúvare’ ogia hag̃ua iñorganisasión (Mat. 24:45). Ojapo haguéicha pe kuérpo governánte oĩ vaʼekue síglo primérope, koʼág̃arupi pe esklávo de konfiánsa oorganisa Jehová puévlo ha omeʼẽ instruksión umi ansianokuérape (elee Hechos 16:4, 5). Upéi umi ansiáno ojasegura umi kongregasión osegitaha koʼã instruksión, ha ñande jahechaukáta jajeroviaha Jehováre jasegíramo umi instruksión omeʼẽva iñorganisasión ha umi ansianokuéra.

9. ¿Mbaʼéicha javépa ikatu hína ijetuʼu ñandéve jasegi umi instruksión omeʼẽva umi ansiáno, ha mbaʼérepa?

⁹ Sapyʼánte ningo ikatu ijetuʼu ñandéve jasegi umi instruksión omeʼẽva umi ansiáno. Por ehémplo umi áño ohasa vaʼekuépe oĩ kuri heta kámbio umi kongregasión ha sirkuítope, pórke algúno oñefusiona ha ótro katu ojedisolve voi. Koʼã kásope umi ansiáno ojerure umi ermánope ova hag̃ua de kongregasión ikatu hag̃uáicha ojepuru porãve umi Salón ojeguerekóva. Oiméramo ñande jajecha raʼe upe situasiónpe, katuete ijetuʼúne raʼe ñandéve jaheja hag̃ua umi ñane hénte térã ñane amigokuérape ha jaha ótro kongregasiónpe. ¿Péro serápa Jehová la heʼíva koʼã ansiánope moõpa oasigna vaʼerã káda ermánope? Nahániri. Ha upévare hústamente ikatu ijetuʼu hína  ñandéve jasegi umi instruksión omeʼẽva umi ansiáno. Péro Jehová ningo ojeroviaiterei hesekuéra, ha ñande upéicha vaʼerã avei. *

10. Ohechaukaháicha Hebreos 13:17, ¿mbaʼérepa jaapoja vaʼerã umi ansiánope?

¹⁰ ¿Mbaʼérepa ñañehaʼã vaʼerã jaapoja umi mbaʼe odesidíva umi ansiáno, sapyʼánte nañandegustapáiramo jepe la odesidíva hikuái? Pórke péicha ñaipytyvõ hína oĩ hag̃ua unida Jehová puévlope (Efes. 4:2, 3). Umi kongregasión ningo oñakãrapuʼã porã enterove umi ermáno iñumílderamo ha osegi umi instruksión omeʼẽva umi ansiáno (elee Hebreos 13:17). Ha iñimportanteveha, jaapojáramo umi ansiánope jahechauka hína jajeroviaha Jehováre (Hech. 20:28).

11. ¿Mbaʼépa ñanepytyvõta jaapoja hag̃ua la odesidíva umi ansiáno?

¹¹ ¿Mbaʼépa ikatu jajapo ifasilve hag̃ua ñandéve jasegi umi instruksión omeʼẽva ñandéve umi ansiáno? Ñanemanduʼa vaʼerã haʼekuéra ojerureha Jehovápe ijespíritu sánto ogiami hag̃ua chupekuéra odesidíta jave peteĩ mbaʼe. Avei oheka la Bíbliape umi konsého oipytyvõtava chupekuéra, ha omaña umi instruksión omeʼẽva Jehová organisasión ikatu hag̃uáicha odesidi porã hikuái. Umi ansiáno ningo ojapose entéro mbaʼe Jehovápe ogustahaichaite, ha oipytyvõseterei avei umi ermánope ikatu hag̃uáicha siémpre ijerovia mbarete. Haʼekuéra oikuaa porã ojechataha Jehovándi asegún mbaʼéichapa okumpli hína pe rresponsavilida orekóva (1 Ped. 5:2, 3). Ñapensamíntena ko mbaʼére: Ko múndope ningo la hénte noñontendéi ha oiko vaipa tahaʼe ikultúra, irrelihión térã polítika káusare, péro Jehová puévlo siémpre oĩ unído. ¿Mbaʼéicha rupípa ikatu ojehupyty upéva? Sólamente Jehová ovendesi rupi iñorganisasión.

12. ¿Mbaʼe mbaʼépa oreko vaʼerã enkuénta umi ansiáno ohecha hag̃ua peteĩ ermánopa oñarrepenti hína ipyʼaite guive?

¹² Jehová ningo omeʼẽ umi ansiánope tuichaiterei rresponsavilida, pórke ikargopekuéra opyta la kongregasión osegi hag̃ua ipotĩ. Oiméramo peteĩ ermáno opeka raʼe, umi ansiáno ohecha vaʼerã oimépa haʼe ikatu osegi hína pe kongregasiónpe térã nahániri. Haʼekuéra ohecha vaʼerã avei oimépa pe ermáno oñarrepenti hína rreálmente ipyʼaite guive. Por ehémplo, haʼe ikatu heʼi ombyasyetereiha la ojapo vaʼekue, ¿péro ombojeguarúpa hína chupe la ojapo vaʼekue? ¿Oĩpa desidído ndojapomoʼãveitamaha upéva? Térã oiméramo opeka raʼe oreko rupi júnta vai, ¿ojekuaápa hese ohejaseha umi iñamigokuérape? Umi ansiáno ningo oñemboʼe Jehovápe, oinvestiga porã la oiko vaʼekue, oanalisa mbaʼépa heʼi la Biblia upe témare, ha avei ohecha mbaʼe aktitúpa oreko hína koʼág̃a pe pekadór. Oreko rire enkuénta entéro koʼã mbaʼe, haʼekuéra odesidi oimépa pe ermáno ikatu osegi pe kongregasiónpe, ha sapyʼánte tekotevẽtamante oñemosẽ chupe (1 Cor. 5:11-13).

13. ¿Mbaʼe mbaʼépa ikatu hína ñapensa oiméramo oñemosẽ raʼe peteĩ ñane hénte o ñane amígo?

¹³ ¿Péro mbaʼéicha javépa ikatu hína ijetuʼu ñandéve jaapoja hag̃ua la odesidi vaʼekue umi ansiáno? Oiméramo pe persóna oñemosẽ vaʼekue ndahaʼéi peteĩ ñane amígo térã ñane pariénte, ikatu trankiloite jaapoja upéva. Péro oiméramo la oñemosẽ vaʼekue haʼe peteĩ jahayhúva, pépe si ikatúma hína ijetuʼuve ñandéve jaapoja hag̃ua upe desisión. ¿Mbaʼérepa? Pórke ikatu ñapensa umi ansiáno ndorekói hague enkuénta entéro mbaʼe, ha ndohusgái hague upe persónape Jehová ojapotaháicha. ¿Péro mbaʼépa ñanepytyvõta  lomímonte jarrespeta hag̃ua la odesidi vaʼekue umi ansiáno?

14. ¿Mbaʼépa ikatu ñanepytyvõ oiméramo oñemosẽ raʼe peteĩ ñane hénte térã ñane amígo?

¹⁴ Ñanemanduʼa vaʼerã Jehová voi heʼiha oñemosẽ vaʼerãha umi pekadór noñarrepentírivape. Upéva ningo oipytyvõta upe persónape voi, ha avei pe kongregasión kompletoitépe. ¿Mbaʼérepa jaʼe upéva? Pórke peteĩ ermáno opekáramo ha noñarrepentíri, ha lomímonte opyta pe kongregasiónpe, ikatu hína oraha vai umi ótrope (Gál. 5:9). Avei noñemosẽiramo chupe, haʼe ndohechakuaamoʼãi ivaieterei hague la ojapóva, ha noñehaʼãmoʼãi okambia ha oñemoĩ porã jey Jehovándi (Ecl. 8:11). Ikatu ñaĩ segúro umi ansiáno odesidíramo omosẽtaha peteĩ ermánope, haʼekuéra ojagarraha ensério pe rresponsavilida orekóva. Haʼekuéra imanduʼa porã ndohusgaiha hína “kuimbaʼekuérape g̃uarã, síno Jehovápe g̃uarã”, ojapo haguéicha ymave umi ansiáno oĩva Israélpe (2 Crón. 19:6, 7).

15. ¿Mbaʼérepa koʼág̃a mas ke núnka iñimportánte jasegi umi instruksión Jehová omeʼẽva ñandéve?

¹⁵ Koʼág̃a ningo hiʼag̃uimbaitéma pe fin, upévare mas ke núnka jajerovia vaʼerã Jehováre. ¿Mbaʼérepa? Pórke pe jehasa asy guasu aja, ikatu hína jarresivi umi instruksión haʼetévaicha naisentidopáiva o nañantendéiva. Péro upe tiémpope Jehová noñeʼẽmoʼãi ñandéve diréktamente, síno ke ojevaléta hína iñorganisasiónre ha umi ansianokuérare. Ág̃a oiko vove upéva nokonvenimoʼãi ñandéve jadudáramo ha ñañemoĩ ñapensa: “¿Kóva ko instruksión piko ou hína rreálmente Jehovágui? ¿Térã umi ansiánonte odesidi hína upéva oñantohágui reínte chupekuéra?”. ¿Mbaʼépa nepytyvõta ejerovia hag̃ua Jehováre ha iñorganisasiónre upe tiémpo iñimportantetévape? Ñande koʼág̃ama voi jajeroviáramo Jehováre, ha pyaʼe jasegi umi instruksión haʼe omeʼẽva ñandéve, jajapóta la mísma kósa pe jehasa asy guasu aja (Luc. 16:10).

16. ¿Mbaʼérepa ikatu jaʼe koʼẽrõitéma oñemoĩtaha a pruéva ñande jerovia Jehováre?

¹⁶ Jareko vaʼerã avei enkuénta mbaʼéichapa ñarreaksionáta ág̃a Jehová ohusga vove entéro umi héntepe. Koʼag̃aite ningo ñande jareko la esperánsa umi ñane hénte ha ñane amígo ndahaʼéiva Testígo, okambiataha ha oñepyrũtaha oservi Jehovápe. Péro Armagedónpe Jehová ojevaléta Jesúsre odesidi hag̃ua mbaʼépa oikóta chuguikuéra (Mat. 25:31-33; 2 Tes. 1:7-9). Ndahaʼemoʼãi ñande la jadesidíva mávapa omerese ojesalva (Mat. 25:34, 41, 46). ¿Jajeroviátapa Jehováre upe moméntope? ¿Térãpa ñañemomombyrýta chugui nañandegustái  rupi la haʼe odesidíva? Jahechaháicha iñimportánte hína jajerovia Jehováre koʼág̃ama voi, pórke upéicharõ añoite jajeroviáta hese amo gotyove.

17. ¿Mbaʼe iporãvapa jahupytýta Jehová ohusga rire ko múndo añáme?

¹⁷ Jehová ohusga rire ko múndo añáme, jahupytýta hetaiterei mbaʼe iporãva. Epensamíntena, umi rrelihión fálsa ningo opátama, ndaiporimoʼãvéima avei pe komérsio ha pe polítika hetaitéma ñandereko asýva, enterovetéva hesãita, imitã jeýta, ha umi persóna jahayhúva nomanomoʼãvéima. Satanás ha idemoniokuérape ojejagarráta ha ndaikatumoʼãvéima ñandeperhudika 1.000 áño pukukuére. Umi mbaʼe vaiete oiko vaʼekue haʼekuéra opuʼã rupi Jehováre opátama (Apoc. 20:2, 3). ¡Ajépa javyʼaitéta upe moméntope jajerovia haguére Jehováre!

18. Ohechaukaháicha Números 11:4-6 ha 21:5, ¿mbaʼépa ikatu ñaaprende umi israelítagui?

¹⁸ ¿Mbaʼérepa ikatu jaʼe pe múndo pyahúpe tekotevẽtaha avei jahechauka jajeroviaha Jehováre? Ñanemanduʼamíntena umi israelítare. Haʼekuéra ningo osẽ riremínte Egíptogui, ohechagaʼúma kuri umi mbaʼe oheja vaʼekue, ha heʼi voi pe maná Jehová omeʼẽ vaʼekue chupekuéra haʼeha puerkésa (elee Números 11:4-6; 21:5). ¿Ñandépa ñapensáta avei haʼekuéraicha ág̃a opa rire pe jehasa asy guasu? Upe tiémpope ningo posívlemente heta ñambaʼapóta ñamopotĩmba hag̃ua ko yvy, ha ikatu voi ijetuʼu hína primerorã. ¿Ndépa reñanimáne rejeplagea umi mbaʼe Jehová omeʼẽvare ñandéve? Pono oiko upéva ñanderehe koʼág̃ama voi ñandeagradesído vaʼerã, upéicha jasegíta jaagradese umi mbaʼe Jehová omeʼẽva ñandéve amo gotyove.

19. ¿Mbaʼe mbaʼépa nde reaprende raʼe ko artíkulope?

¹⁹ Ñande ñaĩ vaʼerã segúro Jehová siémpre odesidi porãha entéro mbaʼe. Jajerovia vaʼerã avei iñorganisasiónre ha umi ansiánore, pórke Jehová ojevale hína hesekuéra omeʼẽ hag̃ua ñandéve instruksión. Siémprekena ñanemanduʼa la Jehová heʼi vaʼekuére ñandéve proféta Isaías rupive: “Tuicha penembaretevéta pepytáramo pyʼaguapýpente ha pejerovia” (Is. 30:15).