1, 2. ¿Mbaʼérepa ko múndo añáme siémpre oĩta imboriahúva?

KO MÚNDOPE ningo oñemombaʼeterei pe pláta, ha oñemboliga voi umi héntepe ojogua hag̃ua heta mbaʼe ni noikotevẽiva. Avei ndojepuruporãi pe pláta oĩva ko múndope. Upévare hetápe ijetuʼueterei okonsegi hag̃ua itravahorã. Oĩ voi oapeligráva hekove ova hag̃ua ótro país iporãvehápe la situasión. Péro umi tetã irríkovape jepe oĩ heta imboriahúva. Opárupi umi ipláta hetáva amás día irrikove, péro umi imboriahúva katu imboriahuve. Ko múndope oĩ unas kuánta persóna iplataitereíva. Asegún ojekalkula, umi rrikésa orekóva koʼã mbovymi persóna ikatúta ojehupyty oñembyatypárõ umi pláta orekóva entéro umi hénte oĩva ko yvy ape ári. Jahechaháicha, oĩ oreko rasapáva la pláta, ha ikatúta voi omantene porã ifamiliakuérape, ha avei umi ifamiliakuéra familiarépe ha hetavépe hetaiterei áñore. Péro hetaitereive oĩ la imboriahúva ko múndope. Jesús orrekonose vaʼekue ko situasión heʼírõ guare: “Umi imboriahúva akóinte oĩ penendive” (Mar. 14:7). ¿Mbaʼérepa oiko koʼã mbaʼe?

² Jesús oikuaa vaʼekue Ñandejára Rréino añoite ikatutaha  osolusiona ko provléma. La Biblia heʼi “umi komersiánte” térã umi komérsio ha negósio, avei pe polítika ha umi rrelihión japu oĩha Satanás poguýpe (Apoc. 18:3). Ñandejára puévlo ningo noñentremetéi polítikare ni umi rrelihión japúre. Péro la majoría ndaikatúi oñemomombyryete umi komérsio ha negósio oĩvagui ko múndope.

3. ¿Mbaʼe porandúpa ñambohováita ko artíkulope?

³ Ñande haʼéva kristiáno ningo jahecha vaʼerã mbaʼeichaite pevépa jajeheʼa hína umi komérsio ha negósio oĩvare ko múndope. Ñañeporandumína: “¿Mbaʼéichapa aipuru vaʼerã umi mbaʼerepy arekóva ahechauka hag̃ua chefielha Jehovápe? ¿Mbaʼépa ajapo vaʼerã ani hag̃ua añentremeteterei umi negósio ha komérsiope oĩva ko múndope? ¿Mbaʼéichapa Ñandejára puévlo koʼag̃agua ohechauka ojeroviaha hese ipyʼaite guive?”.

4, 5. a) ¿Mbaʼépa oiko pe tembiguáire? b) ¿Mbaʼe konséhopa omeʼẽ Jesús idisipulokuérape?

⁴ (Elee Lucas 16:1-9). Añetehápe ñanemopensa pe istória Jesús omombeʼu vaʼekue oñeʼẽva pe tembiguái iletrádovare. Ko tembiguái operdéta kuri itraváho pórke oñemboja hese ndoipuruporãiha ipatrón mbaʼerepy. * (Elee pe nóta). Péro pe tembiguái “iletrádo”, pórke oñemoĩ porã umi persóna ikatútavandi oipytyvõ chupe ág̃a opyta vove travahoʼỹre. ¿Mbaʼépa omboʼese raʼe Jesús? Ko istória rupive haʼe ndeʼiséi idisipulokuéra oletradea vaʼerãha hapichakuérare ikatu hag̃uáicha oñemantene. Ko múndope heta oĩ ojapóva upéva, péro Jesús ningo omombeʼu ko istória omboʼe hag̃ua peteĩ mbaʼe iñimportantetereíva.

⁵ Jahechaháicha, ijetuʼu kuri pe tembiguái situasión. Jesús oikuaa vaʼekue avei heta idisipulokuérape ijetuʼutaha ohupyty hag̃ua hemikotevẽ. Upévare omeʼẽ ko konsého: “Peiporu umi mbaʼerepy oĩva ko múndope pekonsegi hag̃ua pene amigorã. Upéicharõ, opa vove umi mbaʼerepy, pene amigokuéra penderresivíta umi óga arakaʼeve noñehundimoʼãivape”. ¿Mbaʼépa ikatu ñaaprende ko konséhogui?

6. ¿Mbaʼérepa jaʼekuaa “umi mbaʼerepy oĩva ko múndope” ndouiha Ñandejáragui?

⁶ La Biblia ohechauka porã “umi mbaʼerepy oĩva ko múndope”, térã umi negósio ha komérsio, ndouiha Ñandejáragui. ¿Mbaʼérepa jaʼe upéva? Pórke hardín de Edénpe Jehová omeʼẽ rasapa vaʼekue Adán ha Évape la oikotevẽva (Gén. 2:15, 16). Avei síglo primérope, Ñandejára omeʼẽrõ guare espíritu sánto umi kristiáno unhídope, haʼekuéra “ndoikói oñemoakateʼỹ umi mbaʼe orekóvare, síno okomparti oñondivepa opa mbaʼe” (Hech. 4:32). Proféta Isaías katu heʼi og̃uahẽtaha pe día entéro umi persóna hoʼu ha oipurutahápe igustoitépe umi mbaʼe oprodusíva ko yvy (Is. 25:6-9; 65:21, 22). Péro og̃uahẽ mboyve upe tiémpo, entéro Jesús disipulokuéra tekotevẽta iñarandu ohupyty hag̃ua hemikotevẽ ko múndope, ha avei ombovyʼa hag̃ua Ñandejárape.

7. ¿Mbaʼépa ñanemboʼe Lucas 16:10-13?

⁷ (Elee Lucas 16:10-13). Pe istória Jesús omombeʼu vaʼekuépe, pe tembiguái oñemoĩ porã hapichakuérandi okonveni rupi chupe. Péro Jesús omokyreʼỹ idisipulokuérape ojapo hag̃ua iñamigorã yvágape, péro ndahaʼéi okonveníguinte chupekuéra. Jesús omboʼese kuri jaipuru lájare umi mbaʼerepy oĩva ko múndope, jahechaukataha jajeroviápa añetehápe Ñandejárare térãpa nahániri.

8, 9. ¿Mbaʼéichapa heta ermáno oipuru “umi mbaʼerepy ko mundopegua”?

 ⁸ ¿Mbaʼéichapa ikatu jahechauka ñandefielha? Jaipurúvo umi mbaʼe jarekóva jaapoja hag̃ua pe predikasión ojejapóva ko yvy tuichakuére (Mat. 24:14). Índiape, peteĩ mitãkuñaʼi ombyaty monéda peteĩ kahaʼípe. Hiʼarive ni ihugeterã ndojoguavéi ombyatyve hag̃ua. Henyhẽ rire ikahaʼi, haʼe odona pe pláta ombyaty vaʼekue oapoja hag̃ua pe predikasión. Ko paíspe avei peteĩ ermáno orekóva mbokajaty ohechauka iñaranduha. Haʼe odona hetaiterei mbokaja pe ofisína de traduksión idióma malayálampe. Heʼi upépe oikotevẽha hikuái upe frútare, upévare ikuentaveha orahántema chupekuéra omeʼẽ rangue la hepyrã. Gréciape katu oĩ ermáno pyʼỹinte odonáva aséite de olíva, kesu ha ambue hiʼupy Betélpe.

⁹ Jahechamína mbaʼépa ojapo peteĩ ermáno Sri Lankagua oikóva ótro paíspe. Hetãme haʼe oreko peteĩ óga ha peteĩ terréno, ha oipuruka umi ermánope ojapo hag̃ua rreunión ha asambléa. Avei oipuruka jepi opyta hag̃ua upépe umi oĩva servísio de tiémpo komplétope. Ko ermáno ogastáramo jepe upearã, oipytyvõ heta ermáno imboriahúvape. Peteĩ lugár ojeproivihápe ojepredika katu, umi ermáno oipuru hogakuéra kómo Salón del Reino. Péicha rupi heta prekursór ha ambue ermáno imboriahúva ikatu oñerreuni opagaʼỹre alkilér.

10. ¿Mbaʼéichapa ñanepytyvõ ñandepojeráramo?

¹⁰ Koʼã ehémplo ohechauka porã Ñandejára puévlo ojapoha “hekoitépe umi mbaʼe michĩvéva” jepe (Luc. 16:10). Haʼekuéra oipuru imbaʼerepy oporopytyvõ hag̃ua. ¿Mbaʼépa opensa koʼã ermáno umi sakrifísio ojapóvare? Haʼekuéra ovyʼaiterei pórke oikuaa ipojeráramo ombyatyha hína “mbaʼerepy teetéva” yvágape (Luc. 16:11). Peteĩ ermána ojepokuaa omeʼẽ ikontrivusión oapoja hag̃ua pe predikasión. Haʼe ohecharamoiterei la oikóva hese umi áño ohasávape ipojera haguére. Ko ermána omombeʼu: “Ahechakuaa amáske chepojera, ifasilveha chéve aporoperdona hag̃ua, avei chepasiensiave, ndachepochyreíri ótro ofalla jave ha aasepta porãve umi konsého”. Ambue ermanokuéra ohechakuaa avei ipojeráramo, oipytyvõha chupekuéra oñemoag̃uive hag̃ua Jehováre (Sal. 112:5; Prov. 22:9).

11. a) ¿Mbaʼérepa jaʼekuaa ñandepojeráramo jahechaukaha hína ñanearanduha? b) ¿Mbaʼéichapa umi mbaʼe hembýva peteĩme omyengovia upe ofaltáva ótrope? (Ehecha pe taʼanga oĩva iñepyrũme).

¹¹ Ñande avei ikatu jahechauka ñanearanduha jaipuru jave ñane mbaʼerepy jaapoja hag̃ua pe predikasión. Upéicharõ, ndaikatúirõ jepe jaservi de tiémpo kompléto térã java umi lugár oĩvehápe nesesida, ikatúnte avei ñaipytyvõ ótrope (Prov. 19:17). Ñane kontrivusión oipytyvõ ikatu hag̃uáicha ojepredika ha oñemeʼẽ puvlikasión umi lugár oĩháme heta hénte imboriahúva ha oaseptáva pe marandu porã. Por ehémplo, Congo, Madagascar ha Ruándape umi Biblia hepyeterei jepi. Sapyʼánte oñembaʼapo vaʼerã una semána térã un mes voi oñembyaty hag̃ua peteĩ Biblia repyrã. Upévare heta áñore ñane ermanokuéra pyʼỹinte ohecha vaʼerã kuri ojoguátapa peteĩ Biblia térãpa hiʼupy ifamiliakuérape g̃uarã. Péro heta ermáno omeʼẽ  rupi ikontrivusión oñekumpli la Biblia heʼíva, pórke umi mbaʼe hembýva peteĩme omyengovia upe ofaltáva ótrope. Upéicha rupi, Jehová organisasión otradusi ha omeʼẽ gratiete la Biblia entéro ermánope ha avei umi estudiántepe (elee 2 Corintios 8:13-15). Upéicha umi omeʼẽva ha umi orresivíva ikatu oñemoag̃uive ohóvo Jehováre.

12. ¿Mbaʼéichapa Abrahán ohechauka ojeroviaha Ñandejárare?

¹² ¿Mbaʼéichapa ikatu avei jahechauka jaikoseha Jehová amígoramo? Ñañehaʼãmbaitévo ani hag̃ua ñañentremeteterei umi negósiope, ha jahekávo umi “mbaʼerepy teetéva”. Abrahán ningo ojapo vaʼekue upéva. Haʼe iñeʼẽrendu Jehovápe ha oheja pe siuda irrikoitéva hérava Ur oiko hag̃ua óga kárpape, omombaʼeve rupi iñamista Jehovándi (Heb. 11:8-10). Abrahán ojerovia meme Ñandejárare ojerovia rangue umi mbaʼerepýre (Gén. 14:22, 23). Jesús omokyreʼỹ umi hendive oĩvape osegi hag̃ua koʼãichagua persóna ifiélva ehémplo. Peteĩ jey, haʼe heʼi vaʼekue peteĩ mitãkariaʼy irríkovape: “Rejaposéramo hekopete opa mbaʼe, tereho evende nde kosakuéra ha emeʼẽ umi imboriahúvape. Upéicha reguerekóta mbaʼerepy yvágape, ha eju chemoirũ” (Mat. 19:21). Pe kuimbaʼe ndojeroviái kuri Ñandejárare Abrahán ojapo haguéicha. Oĩ vaʼekue avei heta ótra persóna ojerovia meme vaʼekue Jehováre.

13. a) ¿Mbaʼe konséhopa Pablo omeʼẽ Timotéope? b) ¿Mbaʼéichapa ñande avei ikatu jasegi ko konsého?

¹³ Timoteo haʼe avei ótro kuimbaʼe ojerovia meme vaʼekue Jehováre. Pablo ohenói Timotéope “Cristo Jesús soldádo teete”, ha heʼi chupe: “Peteĩ soldádo opyta porãséva huvichándi ndoikói oñentremete negósiope ogana hag̃ua pláta” (2 Tim. 2:3, 4). Ñane tiémpope, umi omoirũva Jesúspe ojapo ikatúva guive osegi hag̃ua Pablo konsého. Por ehémplo, umíva apytépe oĩ mas de 1 millón ermáno oservíva de tiémpo kompléto. Haʼekuéra oñehaʼãmbaite omboyke umi mbaʼe ko múndo oikuaveʼẽva, ha imanduʼa la Biblia heʼívare: “Pe oipurúva pláta hapichágui opytáma ipoguýpe” (Prov. 22:7, TNM). Satanás oipota jaipurupaite ñane tiémpo ha ñane mbaretekue umi komérsio ha negósio oĩvape ko múndope. Oĩ ningo oikéva tuicha kuéntape ojogua hag̃ua hogarã, ikocherã, ostudia hag̃ua fakultápe térã ojapo hag̃ua peteĩ fiésta de lúho ikasamientorã. Nañañatendéiramo ikatu hína jaju tuicha jadeve ha ñane kuénta ñaneñapytĩ heta áñore. Jahechaukákena ñanearanduha jaikóvo sensillomínte, ndajaikéivo déudape ha ñañehaʼãmbaitévo saʼive jagasta. Jajapóramo upéva ñanetiempovéta jaservi hag̃ua Jehovápe, jaiko rangue ko múndo rembiguáirõ (1 Tim. 6:10).

14. ¿Mbaʼépa jajedesidi vaʼerã jajapo? Emombeʼu mbaʼépa ojapo umi ermáno.

¹⁴ ¿Mbaʼépa ñanepytyvõta jaiko hag̃ua sensillomínte? Upearã tekotevẽ ñamotenonde Ñandejára Rréino. Por ehémplo, peteĩ matrimónio oreko vaʼekue peteĩ negósio ogana porãháme hikuái. Péro haʼekuéra oservise jey de tiémpo kompléto, upévare ovende la inegósio, iláncha ha hetave mbaʼe. Upéi ojofrese hikuái kómo voluntário ojejapórõ guare pe sentrál mundiál pyahu opytáva Wárwickpe, Nueva York. Ko ermáno ha hembireko ovyʼaiterei, pórke ombaʼapo avei kuri upépe pe ermáno tuakuéra unas kuánta semánare. Ha ndahaʼéi voi upévante, ombaʼapo avei upépe itajýra ha ijérno. Peteĩ prekursóra oikóva Colorádope, Estados Unidos, ombaʼapo unas kuánta órante vánkope. Ipatronkuérape ogustaiterei la itraváho, upévare oikuaveʼẽ chupe ombaʼapo hag̃ua hetave óra ha heʼi ohupitaha la isuéldo el tríple voi. Pe ermána orrechasa pe ojofreséva chupe, pórke oaseptáramo ndaikatumoʼãi omotenonde pe predikasión.  Koʼã ehémplo ohechauka mbaʼéichapa Jehová siervokuéra ojapo heta sakrifísio. Ñande avei ñamotenonde jave Ñandejára Rréino jahechauka hína ñamombaʼeveha umi mbaʼerepy teete ha ñane amista Jehovándi.

15. ¿Mbaʼeichagua rrikésapa la ñanembovyʼavéva?

¹⁵ Jehová ovendesi hína umi ojapóvape “heta mbaʼe porã”. Péro peteĩ persóna orekóramo heta mbaʼerepy, ndeʼiséi katuete irrikoha Ñandejára ovendesígui chupe (elee 1 Timoteo 6:17-19). Peteĩ ermána hérava Lucia oikuaa kuri umi ermáno Albaniagua oikotevẽha oñepytyvõ chupekuéra ojepredika hag̃ua iterritório. * Haʼe oiko kuri Itáliape, péro ova Albániape áño 1993-pe. Lucia ndaitraváhoi vaʼekue, péro ojerovia Jehová omeʼẽtaha chupe la oikotevẽva. Ko ermána oaprende idióma albanés ha oipytyvõ 60 persóna rasápe ojevautisa hag̃ua. Añetehápe ningo naentéroi ikatu jahupyty koʼã mbaʼe porã japredikávo ñande territóriope. Upéicharõ jepe, jajapóramo ikatúva guive ñaipytyvõ hag̃ua ótrope ikatu hag̃uáicha oikuaa Jehovápe ha oñemoag̃ui hese, ñambyatýta mbaʼerepy teete ndopamoʼãiva arakaʼeve (Mat. 6:20).

16. a) ¿Mbaʼépa oikóta umi komérsio ha negósio oĩvagui ko múndope? b) ¿Mbaʼéichapa upéva ñanepytyvõta jahecha hag̃ua hekoitépe umi mbaʼerepy?

¹⁶ Jesús omyesakã porã kuri “umi mbaʼerepy ko mundopegua” oñehundietetaha. Haʼe ndeʼíri umi mbaʼerepy ikatuha opa, síno heʼi katuete opataha (Luc. 16:9). Koʼã ára pahápe oñemboty heta vánko ha heta paíspe ojehasa asy ijetuʼu rupi pe situasión ekonómika. Péro umi mbaʼe oikóva koʼág̃a vyroreiete hína ñakomparáramo umi mbaʼe oikótavare. Koʼẽrõite pe polítika, umi rrelihión japu ha umi komérsio ha negósio oĩva Satanás múndope oñehundietéta. Proféta Ezequiel ha Sofonías heʼi voi kuri pe óro ha pláta ivaliosoitéva koʼág̃a, ndoservimoʼãveimaha mbaʼeverã (Ezeq. 7:19; Sof. 1:18). Ñapensamína: ñamoĩ chupe ñamano potaitemaha, ha upépe ae ñañemeʼẽ enkuénta ñambotapykue hague “umi mbaʼerepy teetéva” ñakonsegi hag̃ua ko múndo oofreséva. ¿Mbaʼéichapa ñañeñandúne? Ikatu hína ñañeñandu peteĩ persóna ombaʼapo vaʼekuéicha tóda la vída ombyaty hag̃ua heta pláta, péro upéi ou opilla pe pláta ogana vaʼekue falsoha (Prov. 18:11). Umi mbaʼerepy ko mundopegua koʼẽrõite ndovalemoʼãvéima mbaʼeverã. Upévare jaipuru porãkena umi mbaʼerepy jarekóva ñañemoag̃uive hag̃ua Jehová ha Jesúsre. Entéro mbaʼe jajapóva ñamotenonde hag̃ua pe Rréino, añetehápe omombaretéta ñane amista Jehovándi.

17, 18. ¿Mbaʼépa ohupytýta Jehová amigokuéra?

¹⁷ Ñandejára Rréino og̃uahẽ vove, ndaiporimoʼãvéima opagáva alkilér térã préstamo. Avei ndojejoguamoʼãi umi hiʼupy ha ndaiporimoʼãi oikotevẽtava doktór ni pohã. Jehová amigokuéra odisfrutáta umi mbaʼe porã oĩvagui ko yvy ári. Upe tiémpope avave novendemoʼãi óro, pláta, ni umi ita vera iporãitereíva oñemborríko hag̃ua, pórke oimeraẽva ikatúta oreko koʼã mbaʼe. Enterovéva ikatúta oipuru materiál de primera ojogapo hag̃ua, tahaʼe yvyra, ita térã ambue materiál. Ñane amigokuéra ñanepytyvõta vyʼapópe jajogapo hag̃ua, ha nohaʼarõmoʼãi japaga chupekuéra upévare. Entéro yvypóra okompartíta opa mbaʼe oĩva ko yvy ape ári.

¹⁸ Oĩ ningo hetaiteve mbaʼe iporãitereíva jahupytýtava ñañemoag̃ui haguére Jehová ha Jesúsre. Entéro umi oadoráva Jehovápe ko yvy tuichakuére ovyʼaitereíta ohendu vove Jesús heʼiha chupekuéra: “Peju peẽ che Ru ohovasa vaʼekue ha pereko penembaʼerã pe Rréino ojeprepara vaʼekue peẽme g̃uarã, ko múndo oñepyrũ guive” (Mat. 25:34).