1-3. a) ¿Mbaʼe tiémporupipa ojeskrivíne raʼe Salmo 147? b) ¿Mbaʼépa ikatu ñaaprende Salmo 147-gui?

PYʼỸINTE ningo ñamombaʼe jahecháramo peteĩ persóna iñeʼẽkuaaha térã ojapo porãitereiha algúna kósa. Péro Jehová hína pe persóna ñamombaʼeve vaʼerã. ¿Mbaʼérepa? Pórke ipoderosoiterei ha upéva ojekuaa porã opa mbaʼe ojapo vaʼekuére. Avei ñambotuicha chupe ñanderayhueterei rupi, ha upéva ojekuaa omeʼẽvo Itaʼýra rekove ñanderehehápe.

² Jaleévo Salmo 147 jahechakuaa pe salmísta omombaʼeguasuseha Jehovápe. Péro ndahaʼéi upévante, haʼe omokyreʼỹ avei hapichakuérape ombotuicha hag̃ua hendive Ñandejárape (elee Salmo 147:1, 7, 12).

³ Ndajaikuaái mávapa oskrivi rakaʼe Salmo 147. Péro amalisia pe oskrivíva ko salmo oiko kuri umi israelita ou jey tiémpope Jerusalénpe, Jehová olivera rire chupekuéra Babilóniagui (Sal. 147:2). Jehová oipytyvõ ipuévlope oadora jey hag̃ua chupe hetãme, ha upéva omomýi pe salmístape omombaʼeguasu hag̃ua chupe. Péro haʼe ombotuicha avei chupe hetave mbaʼére. ¿Mbaʼe mbaʼépa hína umíva? Ha, ¿mbaʼérepa ñande avei ñambotuicha vaʼerã Jehovápe? (Sal. 147:1).

4. Rréi Ciro oliverárõ guare umi israelítape, ¿mbaʼéichapa oñeñandúne raʼe hikuái, ha mbaʼérepa?

⁴ Ñapensamíntena mbaʼéichapa oñeñandúne raʼe umi israelita oiko tiémpope Babilóniape. Umi babilonio oñembohory vaʼekue hesekuéra ha heʼi: “Pepurahéi peteĩ músika oñeʼẽva Siónre”. Péro haʼekuéra ndopuraheiséi pórke Jerusalén oñehundi, ha umi mbaʼe ombopyʼaroryete vaʼekue chupekuéra ndaiporivéima (Sal. 137:1-3, 6, TNM). Haʼekuéra opyta kuri oñembyasyeterei ha oikotevẽ oñekonsola chupekuéra. Jehová opromete oipytyvõtaha ipuévlope. La Biblia heʼi rréi Ciro ojagarra hague Babilonia, ha heʼi Jehováre: “Onkarga chéve amopuʼã hag̃ua chupe hogarã Jerusalénpe”. Ciro heʼi avei umi israelítape: “¿Mávapa pende apytépe ko puévlope oadora chupe? Ijára Jehová toĩ hendive, ha umíva toho Jerusalénpe” (2 Crón. 36:23, TNM). Añetehápe ningo koʼã mbaʼe okonsolaiterei kuri umi israelita oĩvape Babilóniape.

5. ¿Mbaʼépa ñanemboʼe Jehovágui Salmo 147:3?

⁵ Jehová ndahaʼéi okonsola vaʼekue pe tetã Israélpente, síno káda israelítape. Ñane tiémpope avei Jehová osegi ojapo upéva. Salmo 147:3 heʼi: “Ñandejára oipytyvõ umi oñembyasy ha osufrívape, haʼete omongueráva ijeridakuéra” (TNM). Ñanderasy térã ñañedeprimi jave, ndajadudái vaʼerã Jehová oñangarekotaha ñanderehe. Jehová ningo ñanekonsola ha ñanepytyvõseterei ñañeñandu porã jey hag̃ua (Sal. 34:18; Is. 57:15). Haʼe ñanemoarandu ha ñanemombarete ñambohovái hag̃ua umi provléma oñepresentáva ñandéve (Sant. 1:5).

6. ¿Mbaʼépa ikatu ñaaprende Salmo 147:4-gui? (Ehecha pe taʼanga oĩva iñepyrũme).

⁶ Pe oskrivi vaʼekue Salmo 147 omaña yvágare ha heʼi: “Ñandejára okonta ha oikuaa mboy estréllapa oĩ, ha káda únope ohenói hérarupi” (Sal. 147:4, TNM). Pe salmísta ohecha vaʼekue umi estrélla, péro añetehápe ndoikuaái mboýpa oĩ. Koʼág̃arupi, umi sientífiko ikatu ohecha hetaitereive estrélla ñande galáxiape. Upéicharõ jepe ndaikatúi oipapa mboy galáxiapa oĩ ko univérso tuichakuére. Yvyporakuéra ndaikatúi oikuaa mboy estréllapa oĩ, péro ñande Apohare ikatu. Ndahaʼéi voi upévante, haʼe ningo ohenói káda estrélla hérarupi. Upéva heʼise oikuaa porãha peteĩteĩme ha káda uno iñimportanteha chupe g̃uarã (1 Cor. 15:41). Jahechaháicha, Ñandejára oikuaa moõpa oĩ káda estrélla, péicha avei haʼe ñandekuaa porã káda únope. Oikuaa porã moõpa ñaĩ, mbaʼéichapa ñañeñandu ha mbaʼépa ñaikotevẽ.

7, 8. a) ¿Mbaʼeichaite pevépa Jehová ñanentende? b) ¿Mbaʼe ehémplopa ohechauka Jehová ñanentende porãha?

⁷ Jehová ningo ontende porã umi mbaʼe jahasáva, ha oreko podér ñanepytyvõ hag̃ua ñane provléma jave (elee Salmo 147:5). Sapyʼánte ikatu jahasa umi situasión ijetuʼuetereíva ha ñapensa ndaikatumoʼãiha jagueropuʼaka. Péro Jehová oikuaa porã oĩha heta mbaʼe ndaikatúiva jajapo. Haʼe “ndahesaráiri ñande yvynteha” (Sal. 103:14, TNM). Ñaneimperfékto rupi jajavy jepi heta vése la mísma kósape, ha upéva ñanemoñeñandu vai. Oime vaʼerã sapyʼánte ñambyasy peteĩ mbaʼe jaʼéva, algún deséo vai jarekóva térã jaipota haguére ótro orekóva. Jaikuaaháicha Jehová ndorekói koʼã provléma, upéicharõ jepe ñanentende porãiterei (Is. 40:28).

⁸ Oiméne jahechakuaáma mbaʼéichapa Jehová ñanepytyvõ ipodér rupive ñambohovái hag̃ua umi mbaʼe ijetuʼúva (Is. 41:10, 13). Jahechamína mbaʼéichapa oñeñandu peteĩ prekursóra hérava Kyoko. Haʼe  oho rire oservi ótro lugárpe, tuicha oñedesanima. ¿Mbaʼéichapa oñemeʼẽ enkuénta Jehová ontendeha chupe? Kyoko kongregasión pyahúpe oĩ heta ermáno ontendéva isituasión. Haʼe oñeñandu ku Jehová heʼirõguáicha chupe: “Rohayhueterei, ha ndahaʼéi nde prekursóra haguérente, síno pórke nde hína che rajy ha reñemeʼẽ kuri chéve. Aipota revyʼa umi ótro che siervokuéraicha”. Añetehápe ningo “avave ndaikatúi oikuaapa mbaʼeichaite pevépa [Jehová] iñarandu”. ¿Mbaʼéichapa nde reñemeʼẽ enkuénta siertoha upéva?

9, 10. ¿Mbaʼépa hína pe iñimportantevéva Jehová omeʼẽva ñandéve? Emombeʼu peteĩ ehémplo.

⁹ Enterovéva ningo ñaikotevẽ tembiʼu, ao ha peteĩ lugár jaiko hag̃ua. Upévare ikatu jajepyʼapy hína ofaltárõ g̃uarã ñandéve hiʼupy. Epensamína, Jehová ojapo vaʼekue ko yvy ikatu hag̃uáicha oprodusi heta aliménto ñanepytyvõva jaikove hag̃ua. La Biblia heʼi voi omongaruha “umi yryvúpe ojeruréva oikóvo hoʼu vaʼerã” (elee Salmo 147:8, 9). Jehová omongarúramo koʼã guyrápe, katuete omeʼẽta avei ñandéve opa mbaʼe ñaikotevẽva (Sal. 37:25).

¹⁰ Jehová omeʼẽ ñandéve entéro mbaʼe ñaikotevẽva ñamombarete hag̃ua ñande jerovia, ha upéva la iñimportantevéva. Avei omeʼẽ ñandéve ipyʼaguapy tuichavéva opa mbaʼe ikatúvagui ñantende (Filip. 4:6, 7). Jahechamína mbaʼépa ohasa vaʼekue peteĩ ermáno hérava Mutsuo ha hembireko. Haʼekuéra ohechakuaa mbaʼéichapa Jehová oipytyvõ chupekuéra oikórõ guare pe tsunami Japónpe áño 2011-pe. Ko matrimónio operdepa lénto la orekomíva, péro ojesalva hikuái ojupi rupi hóga técho ári. Pe pyhare hoʼysã kuri, ha haʼekuéra ikoʼẽ segundo pisohápe hógape. Koʼẽ rire oheka algúna kósa omokyreʼỹ vaʼerã chupekuéra. Upéi otopa hikuái pe Anuario de los testigos de Jehová áño 2006-pegua. Mutsuo oavrimírente pe lívro ohecha peteĩ título heʼíva “Los tsunamis más mortíferos de la historia”. Upépe oñeʼẽ pe terremóto oiko vaʼekuére áño 2004-pe, Sumátrape. Ko terremóto káusare upe rire oiko heta tsunami, ha umíva hína la ivaivéva ojekuaáva koʼag̃aite peve. Mutsuo ha hembireko hasẽ oleévo umi ermáno ha ermána rembiasakue. Haʼekuéra oñandu Ñandejára okonsola ha omokyreʼỹha chupekuéra hiʼoraitépe ha oikotevẽhaichaite. Jehová avei oñangareko hesekuéra heta hendáicha. Por ehémplo, umi ermáno oikóva Japónpe ogueraha chupekuéra ao ha tembiʼu. Péro la omombaʼevéva hikuái ningo ovisitárõ guare chupekuéra umi ermáno Jehová organisasión omondóva hendapekuéra. Mutsuo heʼi: “Añandu ningo Jehová oĩramoguáicha ore ykére oñangareko hag̃ua orerehe”. Jahechaháicha, Ñandejára primeroite omeʼẽ ñandéve umi mbaʼe omombaretétava ñande jerovia, ha upe rire umi mbaʼe ñaikotevẽva jaikove hag̃ua.

11. ¿Mbaʼépa jajapo vaʼerã Jehová ñanepytyvõ hag̃ua?

¹¹ Jehová ñanderayhu ha siémpre oĩ dispuésto ñanepytyvõvo. La Biblia heʼi voi mbaʼépa haʼe ojapo: “Omopuʼã umi hénte ivuénovape” (Sal. 147:6b, TNM). Péro, ¿mbaʼépa jajapo vaʼerã Jehová ñanepytyvõ hag̃ua? Ñamombarete vaʼerã ñane amista hendive, ha upearã tekotevẽ ñanevuéno (Sof. 2:3). Umi ivuénova ojerovia Jehová oipeʼaitetaha opaichagua inhustísia ha entéro mbaʼe ombosufríva chupekuéra. Jehová oguerohory koʼãichagua persónape.

12, 13. a) ¿Mbaʼépa ñamboykete vaʼerã ikatu hag̃uáicha Jehová ñanepytyvõ? b) ¿Mbaʼeichagua persónapepa Ñandejára oguerohory?

 ¹² La Biblia heʼi avei: “Jehová oheja oñemotĩ umi iñañáva ha omona chupekuéra yvýre” (Sal. 147:6a, TNM). ¡Ñande ningo ndajaipotái arakaʼeve oiko ñanderehe upéva! ¿Mbaʼépa jajapo vaʼerã ikatu hag̃uáicha Jehová siémpre ñanderayhu? Ñanembojeguaru vaʼerã umi mbaʼe chupe ombojeguarúva (Sal. 97:10). Por ehémplo, tekotevẽ ñamboykete pe tekovai. Upéva heʼise ñamboyke vaʼerãha opa mbaʼe ñanemoakãrakútava ñanderekovai hag̃ua, umíva apytépe pe pornografía (Sal. 119:37; Mat. 5:28). Ikatu ningo ijetuʼu ñamboyke hag̃ua koʼã mbaʼe, péro ñañehaʼãramo Jehová ñanevendesíta.

¹³ Jaikuaaháicha, ndaikatumoʼãi jagueropuʼaka umi deséo vai ñandejeheguínte. Upévare jajerovia vaʼerã Jehováre. La Biblia heʼi haʼe ndoguerohoryieteha umi ojeroviávape “umi kavaju” imbaretévare térã “peteĩ kuimbaʼe” iñakuãvare. Upéva heʼise ndogustaiha chupe jajeroviaitereíramo ñandejehe térã ótra persónare (Sal. 147:10, TNM). Upéva rangue tekotevẽ ñañemboʼe Jehovápe ha jajerure asy chupe tañanepytyvõ ñamboykete hag̃ua umi devilida jarekóva. Ñandejára ningo arakaʼeve naikaneʼõi ohendu hag̃ua ñane ñemboʼe. La Biblia heʼi: “Jehová ovyʼa ohechávo umi orrespetávape chupe. Haʼekuéra oikuaa haʼe oporohayhu ha ndofallaiha avavéndi, upévare oreko esperánsa hese” (Sal. 147:11, TNM). Jehová siémpre oĩ ñanendive ha ñanderayhueterei, upévare katuete ñanepytyvõta jaipeʼa hag̃ua ñandejehegui umi deséo vai.

14. ¿Mbaʼépa ombopyʼaguapy pe salmístape?

¹⁴ Jehová oasegura isiervokuérape oipytyvõtaha chupekuéra iprovléma jave. Umi israelita oho jeýrõ guare Jerusalénpe, pe salmísta imanduʼa mbaʼéichapa Jehová oipytyvõ kuri chupekuéra. Haʼe heʼi peteĩ purahéi rupive: “Haʼe ovendesi ne membykuérape, ha omoĩ pe siuda rokẽre tránka tuicháva ha imbarete porãva. Ñandejára rupive oĩ pyʼaguapy pe siudápe” (Sal. 147:13, 14, TNM). Añetehápe pe salmísta ipyʼaguapy oikuaávo Ñandejára oasegura porãha Jerusalén rokẽ oprotehe hag̃ua isiervokuérape.

15-17. a) ¿Mbaʼéichapa sapyʼánte ikatu ñañeñandu, péro mbaʼéichapa Jehová oipuru Iñeʼẽ ñanepytyvõ hag̃ua? b) Emombeʼu peteĩ ehémplo ohechaukáva Ñandejára pyaʼe ñanepytyvõha Iñeʼẽ rupive.

¹⁵ Sapyʼánte ningo jajepyʼapyeterei jepi ñane provlemakuérare, péro Jehová ñanemoarandu ñambohovái porã hag̃ua umíva. Pe salmísta heʼi: “Ñandejára omanda pe yvýpe mbaʼépa oipota oiko, ha sapyʼaitépe oikóma la haʼe heʼíva”. Upéi pe salmísta oñeʼẽ niéve, eláda ha amandáure, ha oporandu: “¿Máva piko oaguantáta la ára roʼy?”. Upéi heʼi avei: “Ñandejára omanda ha pe iélo hykupa” (Sal. 147:15-18, TNM). Jehová ningo oikuaa entéro mbaʼe ha ndaipóri ikatuʼỹva ojapo. Haʼe oreko ipoguýpe pe niéve ha pe amandáu, upéicharõ katuete ñanepytyvõkuaa ñambohovái hag̃ua oimehaichagua situasión ijetuʼúva.

¹⁶ Ñane tiémpope Jehová ñandegia Iñeʼẽ rupive. Pe salmísta ohechauka Jehová pyaʼe ñanepytyvõha heʼívo: “Sapyʼaitépe oikóma la haʼe heʼíva”. Ñandejára ñandegia hiʼoraitépe ha iporãveháicha. Epensamíntena mbaʼeichaitépa ñanepytyvõ la Biblia, umi puvlikasión oúva pe tembiguái jeroviaha ha iñarandúvagui, JW Broadcasting, pe sítio jw.org, umi ansiáno ha umi ótro ermáno (Mat. 24:45). Ha nde, ¿rehechakuaápa mbaʼéichapa Jehová pyaʼe ndegia?

¹⁷ Peteĩ ermána hérava Simone omombeʼu Ñandejára Ñeʼẽ oipytyvõiterei hague chupe. Haʼe opensa vaʼekue ndovaleiha mbaʼeverã  ha Ñandejára ndoguerohoryiha chupe. Upéicharõ jepe oñeñandu vai jave ojerure meme Ñandejárape oipytyvõmínte hag̃ua chupe. Simone osegi avei ostudia la Biblia. Haʼe heʼi: “Tahaʼe haʼéva situasiónpe Jehová siémpre oĩ chendive chegia ha chemombarete hag̃ua”. Ñandejára oipytyvõ rupi Simónepe, haʼe opensa hekoitépe ha ikyreʼỹvéma.

18. ¿Mbaʼérepa ikatu ere Jehová oĩha nde ykére, ha mbaʼéicha rupípa ikatu remombaʼeguasu chupe?

¹⁸ Pe salmísta oikuaa Jehová oiporavo hague tetã Israélpe ipuevlorã entéro umi ótro tetã apytégui. Haʼe omombeʼu ipuévlope añoite la ojapótava ha omeʼẽ chupekuéra “iléi” (elee Salmo 147:19, 20). Koʼág̃a avei ñande jareko pe priviléhio jarahávo Jehová réra. Jaagradeseterei jaikuaa haguére chupe, Iñeʼẽ ñandegia rupi ha ikatúgui jaiko iñamígoramo. Pe oskrivi vaʼekue Salmo 147 omombaʼeguasu vaʼekue Jehovápe. Ñande avei ikatu ñambotuicha Jehovápe hetaiterei mbaʼére, ha ñamokyreʼỹkuaa avei ñande rapichápe ojapo hag̃ua upéva.