1. ¿Mbaʼérepa jaʼekuaa Jehová haʼeha pe Alfaréro Ikatupyryvéva?

NOVIEMBRE de 2010-pe, Inglatérrape oñemoĩ en vénta peteĩ harrón chíno ymaiterei guare, ha ojejerure hese amo 70 millones de dólares rupi. Ajépa jahecharamoite mbaʼéichapa peteĩ alfaréro ikatu oipuru ñaiʼũnte ojapo hag̃ua peteĩ mbaʼe neporãva ha hepyetereíva. Jehová ningo haʼete avei peteĩ alfaréro, péro haʼe ikatupyryve enterovégui. La Biblia heʼi haʼe oipuru hague ‘yvy’ ojapo hag̃ua peteĩ yvypóra perféktope (Gén. 2:7, TNM). Adán haʼe vaʼekue “Ñandejára raʼy”, ha Jehová okrea chupe ijoguaháramo (Luc. 3:38).

2, 3. ¿Mbaʼéichapa ikatu jasegi umi isrraelíta oñarrepenti vaʼekue ehémplo?

² Adán opuʼã rire Ijapohare rehe, ndahaʼevéima Ñandejára raʼy. Péro heta idesendiénte odesidi oñemoĩ Jehová poguýpe (Heb. 12:1). Koʼãva iñumílde ha iñeʼẽrendu Ijapoharépe. Péicha oñemoĩ hikuái Satanás kóntrape ha ohechauka oipotaha Jehovápe Ituarã ha Ijalfarerorã (Juan 8:44). Koʼã persóna iñeʼẽrendúva ñanemomanduʼa umi isrraelíta oñarrepenti vaʼekuére. Haʼekuéra heʼi kuri: “Jehová, nde ningo ore Ru. Ore katu ñaiʼũ, ha nde ore Apohare; ha entéro ore nde po rembiapokue” (Is. 64:8, TNM).

 ³ Ñande jaservíva Jehovápe ñañehaʼãmbaite avei jasegi umi isrraelíta ehémplo. Upévare ñaneumílde ha ñaneñeʼẽrendu ñande Apoharépe. ¡Ajépa tuichaite mbaʼe Jehová haʼe haguére ñande Túa! Ñande ningo jaipota voi haʼe ñanemoldea, upévare iporã ñañeporandu: “¿Ajoguápa peteĩ ñaiʼũ huʼũ porãvape Ñandejára ikatúva oipuru ojapo hag̃ua peteĩ mbaʼyru iporãitereíva? ¿Ha mbaʼépa apensa che ermanokuérare? ¿Ahechakuaápa Jehová osegiha omoldea chupekuéra?”. Ko artíkulope ñarrespondéta mbohapy porandu ñanepytyvõtava hesakã porãve hag̃ua ñandéve koʼã mbaʼe: 1) ¿Mbaʼéichapa Jehová oiporavo umi omoldeátavape? 2) ¿Mbaʼérepa omoldea chupekuéra? Ha, 3) ¿mbaʼéichapa ojapo upéva?

4. ¿Mbaʼéichapa Jehová oiporavo umi omoldeátavape? Emoĩ ehémplo.

⁴ Jehová ohecha mbaʼépa yvyporakuéra oreko ipyʼapýpe, ha oikuaa porã káda únope (elee 1 Samuel 16:7b). Haʼe oformárõ guare pe kongregasión kristiána, omoag̃ui ijehe ha Itaʼýrare umi persóna haʼetévaicha naipohãvéimava (Juan 6:44). Por ehémplo oiporavo peteĩ fariséo héravape Sáulo. Haʼe ‘otaky vaʼekue Ñandejárare, opersegi ipuévlope ha okopi hesekuéra’ (1 Tim. 1:13). Péro Jehová ohecha Saulo pyʼapy ha nopensái haʼeha peteĩ ñaiʼũ ndaikatumoʼãiva omoldea (Prov. 17:3). Ñandejára ohechakuaa ikatuha ‘oiporavo chupe oikuaauka hag̃ua’ pe marandu porã oñeʼẽva Jesúsre “umi tetãnguérape, umi mburuvicha guasúpe, ha Israel raʼykuérape” (Hech. 9:15). Ñandejára oiporavo avei heta persónape ha omoldea umívape, ikatu hag̃uáicha oiko chuguikuéra “kambuchi ojepuru porãtava”. Umi oiporavóva apytépe oĩ vaʼekue ikaʼúva, hekovaíva ha imondáva (Rom. 9:21; 1 Cor. 6:9-11). Péro oikuaa rire hikuái Jehovápe, ojerovia hese ha oheja haʼe omoldea chupekuéra.

5, 6. Ñarrekonosérõ Jehová haʼeha ñande Alfaréro, ¿mbaʼépa ñapensáta: a) umi hénte oĩvare ñande territóriope? b) ñane ermanokuérare?

⁵ Jehová ningo la omoag̃uíva ijehe umi persóna ipyʼaporãvape. Upévare ndovaléi jahusga avavépe, tahaʼe ñane ermanokuérape térã umi hénte oĩvape ñande territóriope. Jahechamína peteĩ kuimbaʼe hérava Michael ehémplo. Haʼe omombeʼu: “Káda ves ke umi Testígo og̃uahẽ ógape amboty la okẽ hovarekuéra, ha atrata voi chupekuéra ku ndahaʼeirõguáicha mbaʼeve. Chemaledukadoʼimi vaʼekue hendivekuéra. Tiémpo rire, aikuaa ótro lugárpe peteĩ família ikondúkta porãitereívape. Peteĩ díape añentera haʼekuéra haʼeha testígo de Jehová. Apyta chejurujái. Upéi añeporandu mbaʼérepa peichaite peve ndachaʼéi umi Testígore. Añemeʼẽ enkuénta apensa vaiha hesekuéra chetavyeterei rupi, ha ahendúgui oñeñeʼẽ vaiha jepi hesekuéra”. Michael ojedesidi ostudia la Biblia ikatu hag̃uáicha oikuaa porã mbaʼeichagua persónapa umi Testígo. Tiémpo rire, ojevautisa ha oñepyrũ oservi de tiémpo kompléto.

⁶ Ñarrekonoséramo Jehová haʼeha ñande Alfaréro, arakaʼeve nañapensavaimoʼãi ñane ermanokuérare, síno jahechakuaáta Ñandejára osegiha omoldea chupekuéra. Jehová oikuaa mbaʼépa haʼekuéra oreko ipyʼapýpe ha iñimperfektoha gueteri hikuái. Avei oikuaa mbaʼeichaite pevépa káda persóna ikatu okambia (Sal. 130:3). ¿Mbaʼéichapa jasegikuaa Jehová ehémplo? Ani ñapensa vai ñane ermanokuérare. Ikatu voi ñambaʼapo Ñandejárandi ha ñaipytyvõ chupekuéra ikatu hag̃uáicha osegi okambia tekotevẽhápe (1 Tes. 5:14, 15). Umi ansiáno koʼytevéntema omoĩ vaʼerã ehémplo koʼã mbaʼépe (Efes. 4:8, 11-13).

7. ¿Mbaʼérepa jaagradese vaʼerã Jehovápe ñandekorrehi haguére?

⁷ Sapyʼánte oĩ heʼíva: “Chefamília riréma avalorave pe disiplína omeʼẽ vaʼekue chéve che tuakuéra”. ¿Mbaʼérepa oĩ opensáva upéicha? Pórke jakakuaapa riréma ñamombaʼeve pe disiplína, ha upépe ae ñañemeʼẽ enkuénta ñande tuakuéra ñandekorrehi hague ñanderayhu rupínte (elee Hebreos 12:5, 6, 11). Jehová ningo ñanderayhu pórke ñande ifamília. Upéicha rupi ipasiénsia ñandekorrehi ha ñanemoldea hag̃ua. Haʼe oipota jadesidi porã, javyʼa ha jahayhu chupe haʼe ñanderayhuháicha (Prov. 23:15). Jehová ndoipotái jasufri ni ñamano nañañarrepetíri haguére ñande pekádogui (Efes. 2:2, 3).

8, 9. a) ¿Mbaʼéichapa koʼág̃a ñanevenefisia pe paraíso espirituál? b) ¿Mbaʼéichapa Jehová osegíta ñanemoldea pe múndo pyahúpe?

⁸ Jaikuaa mboyve Jehovápe, ikatu oime ñande karákter naiporãmbái raʼe. Péro Ñandejára ñanepytyvõ ñakambia hag̃ua ha koʼág̃a tuicha ñamehora (Is. 11:6-8; Col. 3:9, 10). Ñane tiémpope, Jehová ojevale peteĩ paraíso espirituál rehe ikatu hag̃uáicha ñanerekomboʼe ha ñanemoldea. Ko paraísope ñañeñandu segúro, jaikóramo jepe peteĩ múndo añáme. Oĩ heta ermáno okakuaa vaʼekue peteĩ ogapy ndaiporihápe mborayhu. Upéicharõ jepe, koʼág̃a ovyʼaiterei hikuái pórke ohechakuaa mbaʼeichaitépa umi ermáno ha ermána ohayhu chupekuéra (Juan 13:35). Avei enterove ñaaprende mbaʼéichapa jahechauka vaʼerã japorohayhuha. Ha iñimportanteveha katu, jaikuaa Jehovápe ha ñañandu haʼe ñanderayhuha (Sant. 4:8).

⁹ Pe múndo pyahúpe ñañevenefisia porãvéta pe paraíso espirituálgui. Avei jadisfrutáta peteĩ yvy iporãitereívape Ñandejára Rréino poguýpe. Upe tiémpope, Jehová osegíta ñanemoldea ha ñanerekomboʼe ñaimoʼãʼỹháicha (Is. 11:9). Upépe ñandeperféktotama, ha ifasilvétama ñandéve ñaaprende Ñandejáragui ha ñaneñeʼẽrendu chupe opa mbaʼépe. Opa umívare, jahejákena Jehová tañanemoldea. Jahechaukákena chupe jaagradeseha ñanderayhu haguére peichaite peve (Prov. 3:11, 12).

10. ¿Mbaʼéichapa Jesús ohechauka ipasiénsia ha ikatupyryha Jehováicha?

¹⁰ Jehová hína pe Alfaréro Ikatupyryvéva, ha haʼe ñandekuaa porãiterei. Upévare ñanemoldea jave oreko enkuénta ñande defektokuéra, ohecha mbaʼépa ndaikatumoʼãi jajapo, ha oikuaa mbaʼe mbaʼépepa ñamehoráma jahávo (elee Salmo 103:10-14). Ñantende porã hag̃ua mbaʼéichapa Jehová ñanderecha, ñapensami mbaʼéichapa Jesús orreaksiona vaʼekue ijapostolkuéra ofalla mimírõ guare. Sapyʼánte haʼekuéra ojodiskutími oimoʼãgui oĩha iñimportantevéva ijapytepekuéra. Ñande ñaimérire upépe, ¿mbaʼépa ñapensa vaʼerãmoʼã umi apóstolre? Ikatu ñapensa ojoguaha hikuái peteĩ ñaiʼũ hasývape oñemoldea hag̃ua. Péro Jesús nopensái vaʼekue upéicha. Haʼe oikuaa ikatuha oipytyvõ umi apóstolpe okambia hag̃ua. Upévare ipasiénsia, ipyʼaporã, ha ohechauka chupekuéra mbaʼéichapa iñumílde vaʼerã (Mar. 9:33-37; 10:37, 41-45; Luc. 22:24-27). Upéi, Jesús oikove jey rire, umi apóstol orresivi espíritu sánto, ha upe guive ndoipyʼapyvéima chupekuéra mávapa iñimportanteve. Upéva rangue, oñehaʼãmbaite hikuái ojapo porã pe tembiapo Jesús onkarga vaʼekue chupekuéra (Hech. 5:42).

11. a) ¿Mbaʼéichapa David ohechauka ojoguaha peteĩ ñaiʼũ huʼũ asývape? b) ¿Mbaʼéichapa ikatu jasegi David ehémplo?

¹¹ Koʼág̃arupi Jehová oipuru la Biblia, ijespíritu sánto ha pe kongregasión ñanemoldea hag̃ua. Jaipotáramo la Biblia ñanemoldea,  jalee ha jajepyʼamongeta vaʼerã hese. Avei jajerure vaʼerã Ñandejárape tañanepytyvõ ñaneñeʼẽrendu hag̃ua chupe. Rréi David heʼi vaʼekue Jehovápe: “Pyharepyte apensa nderehe” (Sal. 63:6, TNM). Avei haʼe oskrivi kuri: “Jehová ningo omeʼẽ chéve heta konsého, ha amombaʼeguasúta chupe upévare. Sapyʼánte pyharekue jepe apensa ha ahechakuaa mbaʼépepa tekotevẽ amehora” (Sal. 16:7, TNM). Jahechaháicha, David ojogua vaʼekue peteĩ ñaiʼũ huʼũ asývape. Haʼe ojepyʼamongeta Jehová konsehokuérare, ha oheja umíva omoldea umi mbaʼe opensáva ha oñandúva. Ha sapyʼánte ijetuʼúramo jepe chupe osegi hag̃ua peteĩ konsého, lomímonte oasepta (2 Sam. 12:1-13). ¿Mbaʼéichapa ikatu ñaneumílde ha ñaneñeʼẽrendu Jehovápe ojapo haguéicha David? Iporã ñañeporandumi: “Alee jave la Biblia, ¿ajepyʼamongetápa Jehová konsehokuérare ha aheja umíva omoldea apensáva ha añandúva? ¿Tekotevẽpa amehorave ahávo?” (Sal. 1:2, 3).

12, 13. ¿Mbaʼéichapa Jehová oipuru ijespíritu sánto ha ansianokuérape ñanemoldea hag̃ua?

¹² Pe espíritu sánto ikatu avei ñanemoldea heta hendáicha. Por ehémplo, ñanepytyvõkuaa jareko hag̃ua umi kualida porãite Jesús oreko vaʼekue ha oúva Ñandejára espíritugui (Gál. 5:22, 23). Peteĩva umi kualida haʼe hína pe mborayhu. Ñande jahayhu rupi Jehovápe, ñaneñeʼẽrenduse voi chupe, ha jaipota haʼe ñanemoldea, pórke jaikuaa imandamientokuéra katuete ñanevenefisiataha. Avei pe espíritu sánto ñanemombarete ani hag̃ua ko múndo aña ipuʼaka ñanderehe (Efes. 2:2). Ñapensamíntena apóstol Páblore. Haʼe imitãrusúrõ guare, ojapo meme vaʼekue umi mbaʼe omboʼéva umi líder rrelihióso hudío oñemombaʼeguasuetéva. Péro upéi pe espíritu sánto oipytyvõ chupe okambia hag̃ua. Upévare, tiémpo rire Pablo oskrivi: “Opa mbaʼerã chembarete Ñandejára omeʼẽgui chéve podér” (Filip. 4:13). Ñande avei  jajerure vaʼerã Jehovápe ñande pyʼaite guive tomeʼẽ ñandéve ijespíritu sánto, ha haʼe katuete ñanerendúta (Sal. 10:17).

¹³ Jehová avei ojevale pe kongregasión ha ansianokuérare ñanemoldea hag̃ua. Por ehémplo, umi ansiáno ohecháramo jarekoha algúna devilida, oñehaʼãmbaite ñanepytyvõ. Péro haʼekuéra nomeʼẽi ñandéve umi konsého ijehegui reínte (Gál. 6:1). Upéva rangue, iñumílde ha ojerure Jehovápe tomoarandu chupekuéra. Upéi oheka hikuái informasión ñande puvlikasionkuérape, ha avei umi téxto bíblico ou porãtava ñandéve. Upéicharõ, umi ansiáno mborayhúpe oñemoñeʼẽ jave ñandéve, por ehémplo ñañemonde lájare, ñanemanduʼa vaʼerã péicha jave Jehová ohechaukaha ñanderayhuha. Jasegíramo umi konsého, jajoguáta peteĩ ñaiʼũ huʼũ porãvape Jehová ikatúva omoldea, ha upéva ñanevenefisiaitereíta.

14. Jehová orekóramo jepe autorida ñanemoldea hag̃ua, ¿mbaʼéichapa ohechauka orrespetaha káda uno odesidíva?

¹⁴ Ñantende porãramo mbaʼéichapa Jehová ñanemoldea, jajogueraha porãvéta ñane ermanokuérandi. Avei nañapensavaimoʼãi umi hénte oĩvare ñande territóriope, ni ñane estudiantekuérare. Peteĩ alfaréro ningo oipeʼapaite raẽ umi ita kuʼi pe ñaiʼũgui, ha upéi oñepyrũ omoldea. Péro Jehová idiferénte. Haʼe ndojopýi avavépe okambia hag̃ua, síno omoldea umi persóna okambiasévape, ha siémpre orrespeta umi mbaʼe odesidíva hikuái. Avei saʼi saʼípe omboʼe chupekuéra imandamientokuéra, ha oheja káda uno odesidi ijeheguiete iñeʼẽrendútapa chupe.

15, 16. ¿Mbaʼéichapa umi estudiánte de la Biblia ohechauka oipotaha Jehová omoldea chupekuéra? Emoĩ peteĩ ehémplo.

¹⁵ Jahechamína peteĩ ehémplo. Tessie ningo peteĩ ermána oikóva Austráliape. Oñepyrũrõ guare ostudia la Biblia, ndahasýi chupe ontende hag̃ua umi mbaʼe oaprendéva ohóvo. Péro haʼe nokambiái ni ndohói rreunionhápe. Pe ermána omboʼéva Téssiepe oñemboʼe Jehovápe ha odesidi nombostudiamoʼãveimaha chupe. Péro upéi oiko peteĩ mbaʼe osorprendéva pe ermánape. Tessie oexplika chupe mbaʼérepa ndojapói umi kámbio oñehaʼarõva chugui. Omombeʼu porã chupe haʼetévaicha hovamokõiha Jehovándi, pórke ihugadóra. Péro heʼi avei ojedesidimaha okambia ha opoitaha pe vísio vaígui.

¹⁶ Tiémpo riremínte, Tessie oñepyrũ oho rreunionhápe ha okambiáma ohóvo, iñamigokuerakue oñembohorýramo jepe hese. Upéi ojevautisa ha oiko chugui prekursóra rregulár, imembykuéra michĩmbáramo jepe. Añetehápe ningo peteĩ estudiánte de la Biblia oñepyrũvo okambia, Jehová oñemoag̃ui hese ha omoldea chupe. Haʼete ojapóva chugui peteĩ mbaʼyru iporã ha ideprovechoitereíva.

17. a) ¿Mbaʼérepa nde revyʼa Jehová nemoldea haguére? b) ¿Mbaʼépa jahecháta pe artíkulo oúvape?

¹⁷ Ñane tiémpope oĩ gueteri alfaréro ojapóva a máno ñaiʼũgui mbaʼyru iporãitereíva. Upéicha avei Jehová omeʼẽ ñandéve konsého ha ipasiénsia ñanemoldea hag̃ua. Upéi oñatende porã ohecha hag̃ua mbaʼéichapa ñarreaksiona (elee Salmo 32:8). ¿Ñañemeʼẽpa enkuénta Jehová oñeinteresaha ñanderehe? ¿Jahechakuaápa mbaʼéichapa ipasiénsia ñanemoldea hag̃ua? ¿Mbaʼépa ñanepytyvõta jajogua hag̃ua peteĩ ñaiʼũ huʼũvape Jehová ikatúva omoldea? ¿Mbaʼépa ñamboyke vaʼerã ani hag̃ua oiko ñandehegui peteĩ ñaiʼũ ndaikatúiva oñemoldea? Ha, ¿mbaʼéichapa tuakuéra ohechauka oñemoĩha Jehová poguýpe omoldeávo ifamiliakuérape? Koʼã porandu ñarrespondéta pe artíkulo oúvape.