1. ¿Mbaʼépa heʼise jarrespeta Ñandejárape, ha mbaʼérepa ojapo vaʼerã upéva umi ohayhúva chupe?

ÑANDE kristianokuéra ningo jahayhu Ñandejárape ha avei jarrespetaiterei chupe. Ko artíkulope jahecháta mbaʼérepa iñimportánte jarrespeta Ñandejárape. Péro, ¿mbaʼépa heʼise upéva? Umi persóna orrespetáva Ñandejárape ha omombaʼéva chupe ipyʼaite guive ndojaposéi mbaʼeve ndogustamoʼãiva Itúa yvagapeguápe, pórke haʼekuéra nombyaiséi pe amista orekóva hendive (Sal. 111:10; Prov. 8:13).

2. Jarekóvo enkuénta David heʼi vaʼekue Salmo 86:11-pe, ¿mbaʼe mbaʼépa jahecháta ko artíkulope?

² (Elee Salmo 86:11). Jajepyʼamongetávo David heʼi vaʼekuére ko téxtope jahechakuaáta haʼe ontende hague mbaʼérepa iñimportánte jarrespeta Jehovápe ñande pyʼaite guive. Koʼág̃a jahecháta mbaʼéichapa ñande ikatu jajapo upe David heʼi vaʼekue iñemboʼépe. Primero, jahecháta mbaʼérepa jarrespeta vaʼerã Ñandejára réra ñande pyʼaite guive. Segundo, jahecháta mbaʼéichapa umi mbaʼe jajapóva rupive káda día ikatu jahechauka ñamombaʼeha Ñandejára réra.

3. ¿Mbaʼépa oipytyvõ vaʼekue Moiséspe osegi hag̃ua orrespeta ipyʼaite guive Ñandejára réra?

³ Ñapensamína mbaʼéichapa Moisés oñeñandu vaʼekue haʼe oñemboapuʼárõ guare pe itakuápe, ha ohecha ohasaha ijypýrupi Jehová presénsia omimbipáva. Kóva oiméne la tuichave mbaʼe ohasa vaʼekue peteĩ persóna Jesús ou mboyve ko yvy ape ári. Katuete oiméne peteĩ ánhel heʼi rakaʼe Moiséspe koʼã mbaʼe: “Jehová, Jehová, che hína peteĩ Dios oporoporiahuverekóva ha  oporombyasýva, ndaipochyreíriva, oporohayhuetereíva ha nopyrũiva iñeʼẽre, ohayhu añetéva hetaitereípe, operdonáva umi ojavývape, hembiapo vaíva ha opekávape” (Éx. 33:17-23; 34:5-7). Moisés oiméne imanduʼa rakaʼe upe ohasa vaʼekuére oipuru jave Jehová réra. Ndareíri Moisés oakonseha vaʼekue umi israelítape ‘okyhyje ha orrespeta vaʼerãha Jehová réra tuichaitéva ha oporomongyhyjéva’ (Deut. 28:58).

4. ¿Mbaʼeichagua kualida Jehová orekóva rehepa jajepyʼamongeta vaʼerã jarrespetave hag̃ua chupe?

⁴ Jaipuru jave pe téra Jehová, iporãta jajepyʼamongetáramo mbaʼeichagua persónapa hína Jehová. Ñanemanduʼa vaʼerã umi kualida porã haʼe orekóvare, por ehémplo haʼe ipoderóso, iñarandu, ihústo ha oporohayhuha. Jajepyʼamongetáramo koʼã ha hetave kualida haʼe orekóvare, ñanemomýita koʼýte jarrespetave hag̃ua chupe (Sal. 77:11-15).

5, 6. a) ¿Mbaʼépa heʼise Ñandejára réra? b) Heʼiháicha Éxodo 3:13, 14 ha Isaías 64:8, ¿mbaʼépa Jehová ojapo okumpli hag̃ua hembipota?

⁵ ¿Mbaʼépa ñande jaikuaáma Ñandejára réra signifikádogui? Heta expérto opensa avei Jehová réra heʼiseha: “Haʼe ojapo upe oipotáva oiko”. Jehová réra heʼiséva ñanemomanduʼa ndaiporiha mbaʼeve ojoko vaʼerã chupe ojapo hag̃ua upe haʼe ojaposéva. ¿Ha mbaʼéichapa ikatu ojapo upéva?

⁶ Primero, Jehovágui oiko oimeraẽ mbaʼe tekotevẽva ikatu hag̃uáicha okumpli hembipota (elee Éxodo 3:13, 14). Ko mbaʼe Ñandejára ikatúva ojapo ningo ndaijojahái, ha ñane puvlikasionkuéra pyʼỹinte ñanemomanduʼa jajepyʼamongeta hag̃ua upévare. Segundo, Jehová ikatu oipytyvõ isiervokuéra imperféktope oiko hag̃ua chuguikuéra oimeraẽ mbaʼe tekotevẽva oservi hag̃ua chupe ha okumpli hembipota (elee Isaías 64:8). Koʼã mbaʼe rupive Jehová okumpli ivolunta. Ndaipóri mbaʼeve ojoko vaʼerã chupe ojapo hag̃ua umi mbaʼe ojaposéva (Is. 46:10, 11).

7. ¿Mbaʼépa ikatu jajapo ñamombaʼe ha jarrespetave hag̃ua ñande Túa yvagapeguápe?

⁷ ¿Mbaʼépa ikatu jajapo ñamombaʼe ha jarrespetave hag̃ua ñande Túa yvagapeguápe? Upearã jajepyʼamongeta vaʼerã umi mbaʼe  haʼe ojapo vaʼekuére, ha umi mbaʼe jajapóvare haʼe rupive. Por ehémplo, ñanemopirĩmba voi jajepyʼamongetávo Jehová kreasiónre, ha jahechávo umi mbaʼe ijojahaʼỹva haʼe ojapo vaʼekue (Sal. 8:3, 4). Ñande ningo koʼýte jarrespetave Jehovápe jajepyʼamongetáramo mbaʼéichapa haʼe ñanepytyvõ raʼe jajapo hag̃ua hembipota. Añetehápe ningo tuichaiterei mbaʼe Jehová réra. Upéva orrepresenta hína mbaʼeichagua persónapa Jehová, entéro mbaʼe haʼe ojapo vaʼekue ha opa mbaʼe haʼe ojapótava (Sal. 89:7, 8).

8. Heʼiháicha Deuteronomio 32:2, 3, ¿mbaʼépa Jehová oipota ojejapo héragui?

⁸ Umi israelita oike mboyvemi pe Tiérra Prometídape, Jehová omeʼẽ vaʼekue Moiséspe peteĩ purahéi (Deut. 31:19). Ha Moisés omboʼe jey vaʼerã kuri umi israelítape upe purahéi (elee Deuteronomio 32:2, 3). Jajepyʼamongetáramo umi versíkulo 2 ha 3 heʼívare, hesakã porãiterei Jehová ndoipotaiha oñeñomi héra ni oñepensa sagradoitereimaha ojepuru hag̃ua. Haʼe oipota voi enterove oikuaa héra. Ajépa tuichaite priviléhio oreko rakaʼe umi israelita Moisés omboʼe haguére chupekuéra heta mbaʼe Jehovágui, ha avei pe héra ijojahaʼỹva. Umi mbaʼe Moisés omboʼe vaʼekue umi israelítape omombarete ijerovia ha omokyreʼỹ chupekuéra, pe amarayvi ojapo porãháicha umi plántare. ¿Mbaʼépa ñande ikatu jajapo ñamoñeñandu hag̃ua avei péicha umi hénte ñamboʼévape hína?

9. ¿Mbaʼéichapa ikatu ñaipytyvõ oñesantifika hag̃ua Jehová réra?

⁹ Ñande ñasẽ jave japredika ogahárupi térã karríto reheve, ikatu jaipuru la Biblia jahechauka hag̃ua umi héntepe Ñandejára réra haʼeha Jehová. Jaofresekuaa chupekuéra umi puvlikasión ideprovechoitéva, jahechauka chupekuéra umi vidéo iporãitéva ha umi informasión oĩva ñande sítio de Internétpe omombaʼeguasúva Jehovápe. Ñande ningo jareko la oportunida ñañeʼẽ hag̃ua Ñandejára jahayhuetévare ha ñamombeʼu mbaʼeichaguápa haʼe ñaime jave ñande travahohápe, eskuélape, térã javiaha jave. Ikatu ñamombeʼu chupekuéra umi mbaʼe porãite Jehová ojapótava ko ñande yvy ha ñanderehehápe. Ha ohendúvo hikuái koʼã mbaʼe, ikatu hína primera ves ohechakuaa hikuái mbaʼeichaitépa Jehová ñanderayhu. Ñande ñamombeʼu jave ótrope mbaʼeichagua persónapa añetehápe Jehová, ñaipytyvõ hína oñesantifika hag̃ua héra. Ñaipytyvõ umi héntepe ontende hag̃ua oñemboʼe hague chupekuéra hetaiterei japu Ñandejáragui, ha ñamboʼe chupekuéra la Biblia rupive umi mbaʼe omombaretétava ijerovia ha omokyreʼỹtava chupekuéra (Is. 65:13, 14).

10. Jajapo jave peteĩ estúdio bíblico, ¿mbaʼérepa ndahaʼéi vaʼerã ñamboʼénteva Ñandejára ojeruréva ha imandamientokuéra?

¹⁰ Jajapo jave peteĩ estúdio bíblico, ñaipytyvõse ñane estudiántepe oikuaa ha oipuru hag̃ua Jehová réra, ha ñaipytyvõse chupekuéra oikuaa porã hag̃ua Jehovápe. ¿Jahupytýtapa upéva ñamboʼénteramo chupekuéra Jehová léi, imandamientokuéra ha mbaʼéichapa oiko vaʼerã? Peteĩ estudiánte oho porãva hese ikatu oaprende Ñandejára léi ha omombaʼeterei voi umíva. ¿Péro heʼisépa upéva pe estudiánte iñeʼẽrendutaha Jehovápe ohayhúgui chupe? Ñanemanduʼa vaʼerã Eva oikuaa hague Ñandejára léi, péro haʼe ndohayhuañetéi vaʼekue Ñandejárape, ha Adán upéichante vaʼekue avei (Gén. 3:1-6). Upévare ndahaʼéi vaʼerã ñamboʼénteva ótrope umi mbaʼe Ñandejára ojeruréva ha imandamientokuéra.

11. Ñamboʼe jave Ñandejára mandamientokuéra, ¿mbaʼéichapa ikatu ñaipytyvõ ñane estudiántepe ohayhu hag̃ua Upe omeʼẽ vaʼekuépe umi léi?

¹¹ Umi mbaʼe Jehová ojeruréva ha imandamientokuéra ningo siémpre iporã ñandéve  g̃uarã (Sal. 119:97, 111, 112). Péro ñane estudiantekuéra ndohechakuaamoʼãi upéva nontendéiramo Jehová omeʼẽ hague ñandéve umi léi ñanderayhúgui. Upévare ikatu ñaporandu ñane estudiántepe: “¿Mbaʼérepa nde repensa Ñandejára oipotaha jajapo kóva, térã ndoipotaiha jajapo? ¿Mbaʼépa upéva ñanemboʼe Jehovágui?”. Ñaipytyvõramo ñane estudiántepe ojepyʼamongeta hag̃ua Jehováre ha ohayhu añete hag̃ua pe héra porãite, upéicharõ ifasilvéta ñandéve ñag̃uahẽ hag̃ua ikorasõme. Ñane estudiánte ndahaʼemoʼãi omombaʼétanteva umi léi, síno ohayhúta voi Upe omeʼẽ vaʼekuépe umíva (Sal. 119:68). Upéva omombaretevéta ijerovia ha oipytyvõta chupe oaguanta hag̃ua umi situasión ijetuʼúva ohasátava (1 Cor. 3:12-15).

12. ¿Mbaʼéichapa David ipyʼamokõi vaʼekue peteĩ jey, ha mbaʼépa oiko upe haguére?

¹² Iñimportanteterei avei umi mbaʼe oskrivi vaʼekue rréi David Salmo 86:11-pe: “Chepytyvõna ani hag̃ua chepyʼamokõi”. Hekovépe David ohechakuaa vaʼekue ndahasyieteha ñandepyʼamokõi hag̃ua. Peteĩ jey haʼe oguata oikóvo kuri iterrásape ha ohecha peteĩ tembireko ahénope ojahu jave. ¿Upe moméntope piko David ipyʼamokõima raʼe térã nahániri? Haʼe oikuaa vaʼekue Jehová mandamiénto heʼíva: ‘Ani reipota nembaʼerã nde rapicha rembireko’ (Éx. 20:17). Péro haʼe oiméne osegi raʼe omaña hese ha péicha ipyʼamokõi, pórke oipota pe tembireko ahéno Bat-Sébape, ha avei oipota Ñandejára oguerohory chupe. Jepe David are guivéma ohayhu ha orrespeta Jehovápe, haʼe opensa umi mbaʼe ojaposévarente. Upéicha rupi haʼe ojapo heta mbaʼe ivaíva. Péicha David omotĩ Jehovápe ha avei operhudika vai heta hénte ndorekóivape la kúlpa upe oiko vaʼekuére, umíva apytépe ifamíliape voi (2 Sam. 11:1-5, 14-17; 12:7-12).

13. ¿Mbaʼéichapa ñande jaikuaa upéi David ndaipyʼamokõivéima hague?

¹³ Jehová okorrehi rire Davídpe, haʼe oĩ porã jey hendive (2 Sam. 12:13; Sal. 51:2-4, 17). David ningo ndahesaráiri vaʼekue umi provléma ha sufrimiénto ogueru vaʼekue ipyʼamokõi haguére. ¿Jehová piko oipytyvõ raʼe Davídpe anive hag̃ua ipyʼamokõi? Si, pórke upéi Ñandejára Ñeʼẽ heʼi David rehe haʼe oservi hague “Ijára Jehovápe ipyʼaite guive” (1 Rey. 11:4; 15:3).

14. ¿Mbaʼépa ñañeporandu vaʼerã, ha mbaʼérepa?

¹⁴ David ehémplo ningo ñanemokyreʼỹ, péro avei ohechauka ñandéve ñañatende vaʼerãha ñandejehe. Upéicha haʼe opeka vai haguére ñanemomanduʼa koʼag̃agua Ñandejára siervokuérape ñañatende vaʼerãha. Oiméramo ramoite guivénte jaservi Jehovápe térã heta tiémporema, lomímonte ñañeporandu vaʼerã:  “¿Añehaʼãmbaitépa hína ani hag̃ua aheja Satanás chembopyʼamokõi?”.

15. ¿Mbaʼéichapa jarrespetáramo Ñandejárape ñandeprotehéta ani hag̃ua jahecha umi taʼanga tieʼỹ?

¹⁵ Por ehémplo, jahecháramo télepe térã Internétpe peteĩ taʼanga ikatúva ñanemoakãraku ñapensa hag̃ua umi mbaʼe tieʼỹre, ¿mbaʼépa jajapo upéicha jave? Ikatu ndahasýi hína jaʼe hag̃ua ñandejupe upe taʼanga térã pelíkula ndahaʼeiha katuete pornografía, ¿péro ikatúnepa Satanás oipuru hína upéva ñanembopyʼamokõi hag̃ua? (2 Cor. 2:11). Pe taʼanga ikatu ñambojoja peteĩ hácha oipurúvare peteĩ kuimbaʼe ombojaʼo hag̃ua peteĩ yvyra. Pe primer ohacheápe ndojapomoʼãi mbaʼeve guasu pe yvyráre, péro upéi osegi oity hese la hiʼácha haimbe asýva ha upépe ombojaʼóma pe yvyra. Upéicha avei umi taʼanga oporomoakãrakúva ojogua pe hácha haimbe asývape. Primerorã haʼetévaicha ndoperhudikamoʼãiva peteĩ persónape, péro umíva ikatu mbeguekatúpe ombopyʼamokõi chupe ha upéicha rupi ou opeka Jehová kóntrape ha naiñeʼẽrenduvéi chupe. Upévare, aníkena jaheja mbaʼeveichagua mbaʼe kyʼa oike ñane korasõme. Jasegíkena jarrespeta ñande pyʼaite guive Jehová réra ha ani ñandepyʼamokõi.

16. ¿Mbaʼe mbaʼépa ñañeporandu vaʼerã jareko jave umi deséo ivaíva?

¹⁶ Satanás oipuru umi taʼanga ñanemoakãrakútava ñapensa hag̃ua mbaʼe tieʼỹre, ha oipuru avei hetave mbaʼe ojapoka hag̃ua ñandéve ivaíva. ¿Mbaʼéichapa ñambohovái jepi koʼã situasión? Ndahasyiete ningo ñapensa hag̃ua koʼã mbaʼe ndahaʼeiha la ivaietereíva. Por ehémplo, ikatu ñapensa: “Nañemosẽmoʼãi ningo kongregasióngui ajapo haguére ko mbaʼe, upéicharõ ndahaʼeichéne hína la ivaietereíva”. Péro tuichaiterei jajavy ñapensáramo upéicha. Upéva rangue, iporãvéta ñañeporandúramo koʼã mbaʼe: “¿Noiméi piko Satanás ojevale hína ko mbaʼére chembopyʼamokõi hag̃ua? ¿Amongyʼátapa  Jehová réra ahejáramo umi deséo vai ipuʼaka cherehe? ¿Añemoag̃uivétapa Ñandejárare, térãpa añemomombyryvéta chugui ajapóramo ko mbaʼe?”. Ñañeporandúkena koʼã mbaʼe ha jajepyʼamongeta hese. Ñañemboʼékena Ñandejárape tañanemoarandu ñanesinséro hag̃ua ñambohováivo koʼã porandu (Sant. 1:5). Jajapóramo upéicha, tuichaiterei ikatu ñandeprotehe. Upéva ñanepytyvõta ñamboykete hag̃ua umi mbaʼe vai Jesús ojapo haguéicha heʼírõ guare: “¡Tereho koʼágui Satanás!” (Mat. 4:10).

17. ¿Mbaʼérepa ikatu jaʼe ñandepyʼamokõiramo ndaideprovechoiha mbaʼeverã? Emoĩ peteĩ ehémplo.

¹⁷ Ñandepyʼamokõiramo, upéva ndaideprovéchoi mbaʼeverã. Ñapensamíntena mbaʼépa oiko peteĩ ekípope umi hugadór ndojoguerahaporãiramo. Oĩramo umi hugadór oipotáva chupekuérante oñemombaʼe, ótro katu ndosegiséi umi rrégla, ha oĩ avei umi ndorrespetaietéva pe téknikope, peichagua ekípo ningo hasy lénto la ogana hag̃ua. Péro pe ekípo iñunídoramo ifasilvéta hína ogana hag̃ua. Ñane korasõ ikatu hína ojogua upe ekípo iñunídovape umi mbaʼe ñapensáva, jaipotáva ha ñañandúva oĩramo peteĩ ñeʼẽme jaservi hag̃ua Jehovápe. Ñanemanduʼa vaʼerã Satanás oipotaitereiha ñandepyʼamokõi. Haʼe oipota umi mbaʼe ñapensáva, jajaposéva ha ñañandúva oĩ vai ha ojoavy Jehová mandamientokuérandi. Péro ñande ñandepyʼapeteĩse jaservi hag̃ua Jehovápe (Mat. 22:36-38). ¡Aníkena arakaʼeve jaheja Satanáspe ñanembopyʼamokõi!

18. ¿Mbaʼépa jajerresolve vaʼerã jajapotaha heʼiháicha Miqueas 4:5?

¹⁸ Ñañemboʼe vaʼerã Jehovápe David ojapo haguéicha: “Chepytyvõna ani hag̃ua chepyʼamokõi, ikatu hag̃uáicha arrespeta nde réra”. Ñañehaʼãmbaitékena jaiko heʼiháicha ko ñemboʼépe. Jajerresolvékena káda día jahechaukataha umi mbaʼe jadesidívare, tahaʼe michĩva térã tuicháva, jarrespetaha Jehová réra ñande pyʼaite guive. Jajapóramo upéicha, ñarrepresenta porãta upe téra ñande haʼégui testígo de Jehová (Prov. 27:11). Ha enterove ikatúta jaʼe avei proféta Miqueas heʼi haguéicha: “Ñande ñaneñeʼẽrendúta Ñandejára Jehovápe opa ára g̃uarã” (Miq. 4:5).