1. ¿Mbaʼérepa Jehová oñekompara peteĩ sýre?

PROFÉTA Isaías tiémpope, Jehová oporandu vaʼekue ipuévlope: “¿Ikatu piko peteĩ sy hesarái imembyraʼýgui?”. Ha upéi heʼi avei chupekuéra: “Oĩramo jepe kuña hesaráiva imembýgui, che arakaʼeve ndacheresaraimoʼãi ndehegui” (Is. 49:15). Jehová ningo nameméi oñekompara peteĩ sýre, péro koʼápe haʼe ojapo upéva. Jehová ningo okompara umi mbaʼe oñandúva isiervokuérare peteĩ sy oñandúvare imembyʼíre, pórke Ñandejára oipota jaikuaa haʼe ñanderayhuetereiha. Katuete heta sy oñeñandu avei peteĩ ermána hérava Jazmín * oñeñanduháicha. Haʼe heʼi jaguereko jave peteĩ mitãraʼy “oñepyrũha peteĩ sentimiénto iporãitereíva ñañandútava ñamano meve”.

2. ¿Mbaʼéichapa Jehová oñeñandu peteĩ isiérvo oñemomombyrýramo chugui?

² Jehová ningo oikuaa oĩ jave peteĩ isiérvo ndopredikavéiva ha ndohovéiva rreunionhápe. Upévare oiméne Jehová ombyasyeterei ohechávo káda áño hetaiterei isiervokuéragui oikoha inaktívo. *

3. ¿Mbaʼépa Jehová oipota ojapo umi inaktívo?

³ Heta koʼã ñane ermáno ha ermána oĩ vaʼekue inaktívo ou jey kongregasiónpe, ha ñande vyʼápe jarresivi chupekuéra. Jehová ningo oipota haʼekuéra ou jey ha ñande upéichante avei (1 Ped. 2:25). ¿Mbaʼéichapa ikatu ñaipytyvõ chupekuéra ou jey hag̃ua? Ñambohovái mboyve upe porandu, iporãta jaikuaa mbaʼérepa sapyʼánte oĩ algúno ndopredikavéiva ha ndohovéiva rreunionhápe.

4. ¿Mbaʼépa oiko algúnore itraváho káusare?

⁴ Oĩ umi opermiti vaʼekue itraváho iñimportanteve hekovépe. Peteĩ ermáno hérava Hung oikóva Ásiape heʼi: “Añepyrũ kuri ambaʼapo jejopy heta óra che travahohápe”. Ha upéi heʼive: “Che añembotavy chejupe apensávo chepláta hetáramo aservi porãvetaha Jehovápe. Upévare ambaʼapo hetave óra, mbeguekatúpe añepyrũ kuri afalta heta hetave rreuniónpe, ha amo ipahápe ndahaveietéma voi rreunionhápe. Satanás ningo oipuru ko múndo ikatu hag̃uáicha mbeguekatúpe ñanemomombyry Ñandejáragui”.

5. ¿Mbaʼéichapa oafekta peteĩ ermánape umi provléma orekóva?

⁵ Oĩ umi ermáno ha ermána ojahoʼipáva chupe umi provléma, ha upéva omokangy chupekuéra. Peteĩ ermána Inglaterragua hérava Anne 5 imemby, haʼe heʼi: “Peteĩva umi che membykuimbaʼe ningo onase kuri diskapasitádo”. Ha heʼive: “Tiémpo rire, peteĩva umi che membykuña oñemosẽ kongregasióngui, ha ótro che membykuimbaʼe katu ou hasy iñakãme. Upéicha rupi añedeprimiete ha ndahavéi rreunionhápe ni predikasiónpe. Ha mbeguekatúpe oiko chehegui inaktíva”. Ñambyasyeterei ningo Anne ha ifamíliape, ha avei umi ótro ermáno ohasávape koʼãichagua provléma.

6. ¿Mbaʼérepa ikatu oĩ algúno oñemomombyrýva kongregasióngui ndosegíri rupi pe konsého oĩva Colosenses 3:13-pe?

⁶ (Elee Colosenses 3:13). Oĩ umi ombopochýva chupe peteĩ ermáno térã ermána ojapo vaʼekue. Apóstol Pablo ohechakuaa vaʼekue sapyʼánte ñandepochytanteha voi peteĩ ermáno térã ermánandi. Ha sapyʼánte ikatu voi nañamereséi kuri ñandetrata hikuái upéicha, ha nañañatendéiramo ikatu voi japyta ñandepyʼaro. Peteĩ persóna ipochýramo, ikatu hína mbeguekatúpe oñemomombyry Jehová puévlogui. Ñañeʼẽmína peteĩ ermáno hérava Pablo ohasa vaʼekuére ha oikóva Sudaméricape. Hese ningo reiete oñemboja kuri ojapo hague álgo ivaíva ha upéicha rupi operde ipriviléhio kongregasiónpe. ¿Mbaʼépa haʼe ojapo upe haguére? Pablo heʼi: “Chepochyeterei kuri ha mbeguekatúpe añemomombyry kongregasióngui”.

7. ¿Mbaʼéichapa ikatu oafekta peteĩ persónape ikonsiénsia osegíramo omolesta chupe?

⁷ Oiméramo peteĩ persóna opeka vai raʼe yma, ikonsiénsia ikatu voi osegi omolesta chupe heta tiémpore, ha oñandu Ñandejára ndohayhumoʼãveimaha chupe. Ha oiméramo jepe haʼe oñarrepentíma ha ojeporiahuvereko chupe, haʼe lomímonte ikatu oñandu nomereseiha oĩ Ñandejára puévlope. Peteĩ ermáno hérava Francisco oñeñandu vaʼekue upéicha. Haʼe heʼi: “Che ningo ajekorrehi vaʼekue cherekovai haguére. Ha ñepyrũrã asegíramo jepe aha rreunionhápe, upéi añedeprimiete ha añandu namereseiha aĩ Ñandejára puévlope. Che konsiénsia osegi kuri chemolesta ha aĩ vaʼekue segúro Jehová nacheperdonái hague. Tiémpo rire ndahavéi rreunionhápe ni predikasiónpe”. ¿Mbaʼépa ñande ñapensa umi ermáno ha ermána ombohováivare umi situasión ñañeʼẽma hague? ¿Ñañemoĩpa ilugarpekuéra? Ha iñimportanteveha katu, ¿mbaʼépa Jehová oñandu hesekuéra?

8. ¿Hesaráipa Jehová umi anteve oservi vaʼekuégui chupe? Emyesakã.

⁸ Jehová ningo ndahesaráiri umi oservi vaʼekuégui chupe péro peteĩ tiémpore oúva oñemomombyry ipuévlogui. Ha ndahesaráiri avei umi mbaʼe haʼekuéra ojapo vaʼekuégui iservísiope (Heb. 6:10). Proféta Isaías oipuru vaʼekue peteĩ ehémplo iporãitereíva ohechauka hag̃ua mbaʼeichaitépa Jehová ojepyʼapy ipuévlore. Haʼe heʼi: “Peteĩ pastór ojapoháicha, haʼe oñangarekóta ijovechakuérare, ombyatýta  umi ovecha raʼýpe ha ogueraháta chupekuéra ijyva ári” (Is. 40:11). ¿Mbaʼéichapa Jehová, pe Pastór iñimportantevéva, oñeñandu peteĩ isiérvo ndoservivéiramo chupe? Jesús ohechauka vaʼekue mbaʼéichapa Jehová oñeñandu oporandúrõ guare idisipulokuérape: “¿Mbaʼépa peẽ peje? Peteĩ kuimbaʼe oguerekórõ 100 ovecha, ha upéi okañy chugui peteĩ, ¿ndohejamoʼãipa umi 99 pe montáñape ha oñepyrũ oheka upe okañy vaʼekuépe? Ha otopáramo pe ovechami, katuete ovyʼavéta pe peteĩmíre, ovyʼa rangue umi 99 ovecha nokañýi vaʼekuére” (Mat. 18:12, 13).

9. ¿Mbaʼéichapa umi pastór ivuénova otrata ijovechakuérape? (Ehecha pe taʼanga oĩva ko rrevísta apére).

⁹ ¿Mbaʼérepa ikatu ñakompara Jehovápe peteĩ pastór rehe? Pórke peteĩ pastór ivuénova ojepyʼapy ipyʼaite guive ijovechakuérare. Por ehémplo, David oñorairõ vaʼekue peteĩ león ha peteĩ ósondi oprotehe hag̃ua ijovechakuérape (1 Sam. 17:34, 35). Peteĩ pastór ivuénova katuete ohechakuaáta peteĩ jepe ijovecha ofaltáramo (Juan 10:3, 14). Haʼe ohejáta umi 99 ijovechakuéra peteĩ korápe térã ojeruréta ótro pastórpe oñangareko hag̃ua hesekuéra, ha péicha ojasegura ndojehumoʼãiha chupekuéra mbaʼeve, ha upéi ohóta oheka pe okañy vaʼekuépe. Jesús oipuru vaʼekue ko ehémplo ñanemboʼe hag̃ua ko mbaʼe iñimportánteva: “Che Ru oĩva yvágape ndoipotái oñehundi ni peteĩ koʼã che disípulo iñumíldeva mitãicha jepe” (Mat. 18:14).

10. Heʼiháicha Ezequiel 34:11-16, ¿mbaʼépa Jehová opromete ojapotaha umi ijovecha okañy vaʼekue rehehápe?

¹⁰ Jehová ningo ñanderayhu káda únope, umíva apytépe umi isiervokuéra iñumíldeva oñemomombyry vaʼekuépe ijovecha atýgui. Proféta Ezequiel rupive, Ñandejára opromete vaʼekue haʼe ohekataha umi ijovecha okañy vaʼekuépe, ha oipytyvõtaha chupekuéra oreko jey hag̃ua hendive peteĩ amista iporãva. Jehová omombeʼu mbaʼe mbaʼépa haʼe ojapóta osalva hag̃ua chupekuéra, ha umíva ningo yma umi pastór israelita ojapóma vaʼekue voi (elee Ezequiel 34:11-16). Primeroite pe pastór ohekáta ijovechápe, ha upearã oñemotiémpo ha heta oñehaʼã vaʼerã. Otopa rire pe ovecha okañy  vaʼekuépe, pe pastór ogueru jeýta chupe pe ovecha atýpe. Ha oiméramo pe ovecha oñelastima raʼe térã iñembyahyieterei, pe pastór mborayhúpe oipytyvõta pe ovecha ikangymívape, ovendáta umi oñelastima hague, avei ohupi ha omongarúta chupe. Umi ansiáno hína umi pastór oñangarekóva “Ñandejára ovechakuérare”, ha haʼekuéra tekotevẽ avei ojapo koʼã mbaʼe oipytyvõ hag̃ua umi oñemomombyry vaʼekuépe kongregasióngui (1 Ped. 5:2, 3). Umi ansiáno oho oheka chupekuéra, oipytyvõ ou jey hag̃ua kongregasiónpe, ha mborayhúpe oipytyvõ chupekuéra oiko jey hag̃ua chuguikuéra Jehová amígo. *

11. ¿Mbaʼépa oikuaa peteĩ pastór ivuénova?

¹¹ Peteĩ pastór ivuénova oikuaa peteĩ ovecha ikatunteha voi okañy. Upévare, peteĩ ovecha oñemomombyrýramo pe ovecha atýgui, ndotratavaimoʼãi chupe. Jahechamína koʼág̃a pe ehémplo porãite Jehová oheja vaʼekue ñandéve oipytyvõrõ guare umi isiervokuéra yma guarépe, ndojapói vaʼekue haʼe ojeruréva peteĩ tiémpore.

12. ¿Mbaʼéichapa Jehová otrata vaʼekue Jonáspe?

¹² Proféta Jonás naiñeʼẽrendúi vaʼekue Jehovápe ha odipara iñasignasióngui. Upéicharõ jepe, Jehová nopensái vaʼekue Jonás rehe naipohãveimaha. Peteĩ pastór ivuénova ojapoháicha, Jehová ogueru jey Jonáspe ha oipytyvõ chupe imbarete jey hag̃ua ikatu hag̃uáicha okumpli iñasignasión (Jon. 2:7; 3:1, 2). Upéi Jehová oipuru peteĩ enrramáda máta ikatu hag̃uáicha Jonás ontende mbaʼeichaitépa haʼe omombaʼe káda persóna rekove (Jon. 4:10, 11). ¿Mbaʼépa ñanemboʼe upéva? Ansianokuéra ndojapurái vaʼerã opensa hag̃ua umi inaktívo naipohãveimaha. Upéva rangue, oñehaʼã vaʼerã ontende mbaʼérepa oñemomombyry raʼe kongregasióngui. Ha upe ermáno oñepyrũ jeýramo oservi Jehovápe, umi ansiáno osegíta ohechauka ohayhuha chupe ha oñeinteresaha hese.

13. ¿Mbaʼéichapa Jehová otrata vaʼekue upe oskrivi vaʼekuépe pe Salmo 73?

¹³ Pe oskrivi vaʼekue Salmo 73 oñedesanima  vaʼekue ohechárõ guare umi iñañáva haʼetévaicha la osẽ porãva entéro mbaʼépe. Haʼe oñeporandu noiméipa oñehaʼã rei hína ojapo Ñandejára rembipota (Sal. 73:12, 13, 16). ¿Mbaʼépa Jehová ojapo raʼe? Haʼe nokondenái chupe, upéva rangue Ñandejára oskrivika voi la Bíbliape umi mbaʼe heʼi vaʼekue upe salmísta. Upe rire ko kuimbaʼe ohechakuaa iñimportanteveha opa mbaʼégui jareko Jehovápe ñane amígoramo (Sal. 73:23, 24, 26, 28). ¿Mbaʼépa ñanemboʼe upéva? Ansianokuéra ndojapurái vaʼerã ohusga hag̃ua umi oñepyrũvape opensa noiméipa oñehaʼã rei hína oservi Jehovápe. Okondena rangue chupekuéra, umi ansiáno oñehaʼã vaʼerã ontende mbaʼérepa haʼekuéra heʼi térã ojapo peteĩ mbaʼe. Upéicha añoite haʼekuéra ikatúta oipuru porã la Biblia omokyreʼỹ hag̃ua chupekuéra.

14. ¿Mbaʼérepa Elías oikotevẽ vaʼekue oñepytyvõ chupe, ha mbaʼéichapa Jehová ojapo upéva?

¹⁴ Proféta Elías oho vaʼekue okañy rréina Jezabélgui (1 Rey. 19:1-3). Haʼe oimoʼã vaʼekue ndaiporiveimaha ótro proféta oservíva Jehovápe, ha opensa ndovaleiha mbaʼeverã pe traváho ojapo vaʼekue. Elías oñedeprimiete vaʼekue ha omanose voi (1 Rey. 19:4, 10). Péro Jehová okondena rangue Elíaspe, oasegura chupe haʼe noĩriha haʼeño, ikatuha ojerovia Ñandejára podér rehe ha oĩha gueteri heta traváho chupe g̃uarã. Jehová mborayhúpe ohendu vaʼekue Elíaspe omombeʼúrõ guare mbaʼéichapa oñeñandu, ha upéi omeʼẽ chupe hetave traváho ojapo hag̃ua (1 Rey. 19:11-16, 18). ¿Mbaʼépa ñanemboʼe upéva? Enterove ñande ha koʼýte umi ansianokuéra jatrata vaʼerã mborayhúpe Jehová ovechakuérape. Peteĩ persóna heʼíramo  ipochyha térã opensáramo Jehová núnka noperdonamoʼãiha chupe, ansianokuéra ohendu vaʼerã upe persónape omombeʼu jave chupekuéra mbaʼéichapa oñeñandu. Upéi haʼekuéra oaseguráta upe ovecha okañy vaʼekuépe Jehová ohayhuetereiha chupe.

15. Ohechaukaháicha Juan 6:39, ¿mbaʼéichapa Jesús ohecha vaʼekue Itúa ovechakuérape?

¹⁵ ¿Mbaʼéichapa Jehová oipota ñande jahecha umi ijovechakuéra okañy vaʼekuépe? Ñande ikatu ñaaprende Jesús ehémplogui, haʼe oikuaa vaʼekue Jehovápe g̃uarã entéro ijovechakuéra ivaliosoitereiha. Upévare Jesús ojapo vaʼekue ikatúva guive omoag̃ui jey hag̃ua Jehováre umi ovecha okañy vaʼekue oĩva Israélpe (Mat. 15:24; Luc. 19:9, 10). Jesús haʼe rupi pe pastór imbaʼeporãva ojapo vaʼekue opa ikatúva ani hag̃ua okañy ni peteĩ Jehová ovecha (elee Juan 6:39).

16, 17. ¿Mbaʼépa oñandu vaʼerã umi ansiáno oipytyvõvo umi inaktívope? (Ehecha pe rrekuádro “ ¿Mbaʼéichapa oiméne oñeñandu peteĩ ovecha okañy vaʼekue?”).

¹⁶ Apóstol Pablo omokyreʼỹ vaʼekue kongregasión Efesopegua ansianokuérape osegi hag̃ua Jesús ehémplo. Haʼe heʼi chupekuéra: ‘Peipytyvõ umi ikangývape. Ha avei penemanduʼa vaʼerã ñande Ruvicha Jesús heʼi vaʼekuére: “Javyʼaiteve ñameʼẽvo, ñandéve oñemeʼẽ rangue”’ (Hech. 20:17, 35). Ko téxto ohechauka ansianokuéra orekoha tuicha rresponsavilida oñangarekóvo Jehová puévlore. Peteĩ ansiáno hérava Salvador oikóva Espáñape heʼi: “Apensávo mbaʼeichaitépa Jehová ojepyʼapy umi ijovechakuéra okañy vaʼekuére, upéva chemomýi ajapo hag̃ua ikatúva guive aipytyvõ hag̃ua chupekuéra. Che aikuaa Jehová oipotaha añangareko porã hesekuéra”.

¹⁷ Entéro umi ermáno ñañeʼẽ vaʼekuére ko artíkulope, oñemomombyry vaʼekue Jehovágui peteĩ tiémpore, péro oñepytyvõ rupi chupekuéra ou jey kongregasiónpe. Koʼág̃a voi oĩ hína heta oñemomombyry vaʼekue Jehovágui ha oñemoag̃uise jeýva avei hese. Pe artíkulo oúvape jahecháta hetave mbaʼe ikatúva jajapo ñaipytyvõ hag̃ua chupekuéra oñemoag̃ui jey hag̃ua Jehováre.