1. ¿Mbaʼéichapa Jehová oñeñandu oñemoag̃ui jey jave hese peteĩ isiérvo?

JAHECHA haguéicha pe artíkulo ohasa vaʼekuépe, Jehová oñekompara peteĩ pastór ivuénovare mborayhúpe oñangarekóva káda uno ijovecháre, ha oheka umi okañy vaʼekuépe. Jehová heʼi umi israelita oheja vaʼekuépe chupe: “Peñemoag̃ui jeýna cherehe, ha che añemoag̃ui jeýta penderehe”. Ha ñande jaikuaa Jehová koʼag̃aite peve oñeñanduha péicha pórke haʼe voi heʼi: “Che nakambiái” (Mal. 3:6, 7). Jesús heʼi vaʼekue Jehová ha umi ánhel ovyʼaitereiha oĩ jave peteĩ jepe umi isiervokuéra oñemoag̃ui jeýva hese (Luc. 15:10, 32).

2. ¿Mbaʼépa jahecháta ko artíkulope?

² Jahechamína koʼág̃a mbohapy ehémplo Jesús omoĩ vaʼekue ohechaukáva mbaʼéichapa ikatu ñaipytyvõ umi oñemomombyry vaʼekuépe Jehovágui. Jahecháta avei mbaʼeichaguápa hína umi kualida ñaikotevẽva ñaipytyvõ hag̃ua chupekuéra oñemoag̃ui jey hag̃ua Jehováre. Ha ñaaprendéta avei javyʼaitereitaha ñaipytyvõramo umi inaktívope.

3, 4. ¿Mbaʼérepa pe kuña oñeñeʼẽha Lucas 15:8-10-pe hetaite oheka pe monéda okañy vaʼekue chugui?

³ Ñande ningo ñañehaʼãmbaitémante vaʼerã jajuhu hag̃ua umi oñemoag̃uise jeývape Jehováre. Lívro de Lúcaspe jatopa peteĩ ehémplo Jesús oipuru vaʼekue, ha upépe haʼe omombeʼu peteĩ kuñágui okañy hague peteĩ monéda de pláta ovaletereíva. Ko ehémplo ohechauka mbaʼeichaitépa ko kuña heta oheka otopa jey hag̃ua imonéda (elee Lucas 15:8-10).

⁴ Jesús omombeʼu mbaʼéichapa oñeñandu pe kuña otopa jey vaʼekue pe monéda de pláta okañy vaʼekue chugui. Yma Jesús tiémpope, peteĩ kuña israelita omenda jave, sapyʼánte isy orregala chupe 10 monéda de pláta. Ha ikatu oime peteĩva umi monéda la okañy vaʼekue chugui, ha upéicha rupi ko kuña ombyasyeterei upéva. Haʼe opensa pe monéda hoʼa hague yvýpe, upémarõ omyendy peteĩ lámpara ha oñepyrũ oheka. Péro haʼe ndohechaporãi, pórke pe lámpara oipurúva ndohesapeporãi chupe otopa hag̃ua  pe monéda de pláta michĩetéva. Ha amo ipahápe haʼe ojagarra oitypei porã pe hóga kompletoite. Upépe pe yvykuʼi ombyaty vaʼekue apytépe ohecha pe imonéda de pláta omimbi asy hína ohesapévo hese ilámpara. Haʼe ningo ipyʼajera otopávo pe imonéda, ha ovyʼaitereígui ohenói iñamíga ha ivesinakuérape omombeʼu hag̃ua chupekuéra pe notísia porãite.

5. ¿Mbaʼérepa ñañehaʼãmbaitémante vaʼerã jatopa jey hag̃ua umi inaktívore?

⁵ ¿Mbaʼépa ñanemboʼe pe ehémplo Jesús omombeʼu vaʼekue? Okañýramo ñandehegui peteĩ mbaʼe tekotevẽtaha ñañehaʼãmbaite jatopa jey hag̃ua. Ha upeichaite avei ñañehaʼãmbaite vaʼerã jatopa jey hag̃ua umi inaktívore. Ikatu oime ohasáma heta áño haʼekuéra oñemomombyry hague kongregasióngui, térã ikatu voi oime ova rakaʼe hikuái peteĩ lugár umi ermanokuéra ndoikuaaihápe chupekuéra. Péro ikatu ñaime segúro koʼag̃aite oĩha hína umi inaktívo hiʼãitereíva chupe oñemoag̃ui jey Jehováre. Haʼekuéra oservise jey Jehovápe iñermáno ha iñermanakuérandi, péro oikotevẽ hikuái oñepytyvõmi chupekuéra.

6. ¿Mbaʼéichapa enterove oĩva kongregasiónpe ikatu oipytyvõ ojetopa hag̃ua umi inaktívore?

⁶ ¿Mávapa ikatu oipytyvõ ojetopa hag̃ua umi inaktívore? Enterove ikatu ñaipytyvõ upearã, tahaʼe umi ansiáno, prekursór, umi orekóva ipariénte inaktívo, ha umi puvlikadór oĩva guive kongregasiónpe ikatu ñaipytyvõ jatopa hag̃ua hesekuéra. ¿Ñandépa ndajarekói hína peteĩ ñane amígo térã pariénte haʼéva inaktívo? ¿Jatopámavapa peteĩ inaktívore japredika jave ogahárupi térã karríto reheve? ¿Ha mbaʼépa jajapo vaʼerã upéicha jave? Pe persóna oipotáramo ojevisita jey chupe, ñamombeʼu vaʼerã chupe ñambohasaseha hóga direksión ha iteléfono número umi ansiáno oĩvape ñane kongregasiónpe.

7. ¿Mbaʼépa ñaaprende peteĩ ansiáno hérava Tomás heʼi vaʼekuégui?

⁷ Prinsipálmente umi ansiáno oreko hína pe rresponsavilida ohekávo umi inaktívo oñemoag̃uise jeývape Jehováre. Jahechamína mbaʼépa heʼi vaʼekue peteĩ ansiáno hérava Tomás * oikóva Espáñape. Haʼe ningo oipytyvõma mas de 40 ermáno ha ermánape ou jey hag̃ua kongregasiónpe. Tomás heʼi: “Primero aporandu umi ermáno ha ermanakuérape oimépa oikuaa hikuái moõpa oiko koʼág̃a umi inaktívo. Térã aporandu umi puvlikadórpe naimanduʼáipa hikuái algúno ndouvéivare rreunionhápe. La majoría umi ermanokuéra ovyʼaiterei ikatu haguére oipytyvõ ojetopa hag̃ua hesekuéra. Upéi ahávo avisita umi ermáno térã ermána inaktívope aporandu chupekuéra ifamília ha iparientekuérare. Oĩ umi inaktívo oguerúmi vaʼekue ifamiliakuéra rreunionhápe, ha koʼã mitãgui oiko jepe vaʼekue puvlikadór peteĩ tiémpore. Chupekuéra ningo ikatu avei oñepytyvõ oñemoag̃ui jey hag̃ua Jehováre”.

8. Ohechaukaháicha pe ehémplo oĩva Lucas 15:17-24-pe, ¿mbaʼéichapa pe túa otrata pe itaʼýra oñarrepenti vaʼekuépe?

⁸ ¿Mbaʼeichaguápa hína umi kualida ñaikotevẽva ñaipytyvõ hag̃ua umi oñemoag̃uise jeývape Jehováre? Jahechami mbaʼépa ikatu ñaaprende pe ehémplo Jesús omombeʼu vaʼekuégui, oñeʼẽva pe taʼýra oho vaʼekuére hógagui (elee Lucas 15:17-24). Jesús omombeʼu mbaʼéichapa pe taʼýra ipahápe ohechakuaa ivyroiterei hague, ha odesidi oho jey hógape. Pe túa ningo odipara ohug̃uaitĩ itaʼýrape ha hatã oañuã chupe, ha péicha ohechauka itaʼýrape ohayhuha chupe. Pe taʼýra oñeñandu vaieterei upe ojapo vaʼekuére, ha opensa nomereseveimaha voi otrata chupe itaʼýraicha. Pe túa katu oñemoĩ itaʼýra lugárpe omombeʼúrõ guare chupe mbaʼéichapa oñeñandu. Ha upéi ojapo álgo ohechauka hag̃ua itaʼýrape ojerresivi porã jeyha chupe hógape. Upearã haʼe ojapo peteĩ karuguasu ha omeʼẽ umi ao iporãva pe itaʼýra oñarrepenti vaʼekuépe. Péicha  pe túa ohechauka ndotrataiha chupe peteĩ isiérvoicha, síno itaʼýra teéicha.

9. ¿Mbaʼeichaguápa hína umi kualida jareko vaʼerã ñaipytyvõ hag̃ua umi inaktívope oñemoag̃ui jey hag̃ua Jehováre? (Ehecha pe rrekuádro “ ¿Mbaʼéichapa ikatu ñaipytyvõ umi oñemoag̃uise jeývape Jehováre?”).

⁹ Jehová ningo ojogua pe túape oñeñeʼẽvare ko ehémplope. Haʼe ohayhu umi ñane ermáno ha ermanakuéra inaktívope, ha oipota oñemoag̃ui jey hese hikuái. Jasegíramo Jehová ehémplo ikatúta ñaipytyvõ chupekuéra ou jey hag̃ua kongregasiónpe. Upearã tekotevẽta ñanepasiénsia, ñañemoĩ ilugarpekuéra, ha jahayhu chupekuéra. ¿Mbaʼérepa tekotevẽ jareko koʼã kualida, ha mbaʼéichapa ikatu jahechauka umíva?

10. ¿Mbaʼérepa tekotevẽ ñanepasiénsia ñaipytyvõ hag̃ua peteĩ persónape oñemoag̃ui jey hag̃ua Jehováre?

¹⁰ Tekotevẽ ningo ñanepasiénsia pórke ndahaʼéi hína ensegidaite peteĩ persóna oñemoag̃ui jeýtava Jehováre. Heta ermáno oĩ vaʼekue inaktívo heʼi umi ansianokuéra ha umi ótro ermáno kongregasionpegua ovisita hague chupekuéra heta vése, ha upe rire ae oñemoag̃ui jey hague hikuái Jehováre. Peteĩ ermána hérava Nancy oikóva Ásiape oskrivi: “Peteĩ che amíga kongregasionpegua tuichaiterei chepytyvõ vaʼekue. Haʼe cherayhu che haʼeramoguáicha iñermána majór, ha chemomanduʼa umi mbaʼe porã rohasa vaʼekuére yma. Avei ipasiénsia cherendu hag̃ua amombeʼu aja mbaʼéichapa añeñandu, ha ndodudái omeʼẽ hag̃ua chéve konsého. Haʼe ohechauka vaʼekue haʼeha che amíga teete oĩva chepytyvõ hag̃uáicha oimeha órape”.

11. ¿Mbaʼérepa tekotevẽ ñañemoĩ peteĩ persóna ipochy vaʼekue lugárpe?

¹¹ Peteĩ persóna ipochy jave, ikatu hasy chupe upéva peteĩ erídaicha. Péro ñañemoĩramo ilugárpe haʼetévaicha ñamoĩva hína pe persónare peteĩ pohã iporãitereíva oipytyvõtava chupe  oñeñandu porãve hag̃ua. Oĩ umi opytáva inaktívo pórke peteĩ ermáno ombopochy vaʼekue chupe, ha ohasámaramo jepe heta áño, haʼe oñeñandu vai ha ipochy gueteri upe oiko vaʼekuére. Péicha oñeñandu haguére, ojoko chupekuéra oñemoag̃ui jey hag̃ua Jehováre. Ikatu voi algúno opensa ojejapo hague hesekuéra inhustísia. Upévare ikatu oikotevẽ hikuái peteĩ ohendúva chupekuéra ha ontendéva mbaʼéichapa oñeñandu (Sant. 1:19). María ningo peteĩ ermána opyta vaʼekue inaktíva peteĩ tiémpore. Haʼe heʼi: “Aikotevẽ kuri peteĩ cherendumi vaʼerã, chekonsola, omeʼẽ chéve konsého iporãva ha chepytyvõmi vaʼerã”.

12. ¿Mbaʼérepa ikatu jaʼe Jehová mborayhu ojoguaha peteĩ piólape?

¹² La Biblia ningo ombojoja Jehová mborayhu peteĩ piólare. ¿Mbaʼérepa ojapo upéva? Ñapensami ko ehémplore: Ñañeimahinamína jaʼa hague ýpe pe márpe, umi oláda tuichaicha ha pe y hoʼysãiterei, ha jajahoga potaitéma. Upéi umi oĩva peteĩ kanóape ag̃ui ñandehegui omombo ñandéve peteĩ salvavída. Katuete ningo jaagradesetereíta ojapo haguére upéicha, péro ndahaʼéi upévante la ñaikotevẽtava jajesalva hag̃ua. Tekotevẽta voi ñasẽ pe ýgui. Upévare ñaikotevẽ umi oĩva pe kanóape omombo ñandéve peteĩ pióla ha ñanepytyvõ jajupi hag̃ua pe kanóape. Jehová heʼi umi israelita oñemomombyry vaʼekuére chugui: “Pe mborayhu aipuru [...] peteĩ piólaicha pogueru hag̃ua che rendápe” (Os. 11:4). Koʼág̃arupi Ñandejára ojapose avei upéicha umi opytávare inaktívo, ha umi ojahoʼipávare chupe provléma ha kevránto. Haʼe oipota oikuaa hikuái ohayhuha chupekuéra ha oipytyvõseha chupekuéra oñemoag̃ui jey hag̃ua hese. Jehová ningo ikatu hína ojevale ñanderehe ohechauka hag̃ua pe mborayhu haʼe oñandúva hesekuéra.

13. ¿Mbaʼéichapa Pablo ehémplo ohechauka japorohayhúramo ikatuha ñaipytyvõ ótrope oñemoag̃ui jey hag̃ua Jehováre?

 ¹³ Iñimportánte ningo siémpre ñamomanduʼa umi inaktívope Jehová ohayhuha chupekuéra, ha ñande avei jahechauka jahayhuha chupekuéra. Pablo, pe ermáno ñañeʼẽma hague pe artíkulo ohasa vaʼekuépe, oĩ jepe inaktívo mas de 30 áño. Haʼe heʼi: “Peteĩ pyharevépe asẽrõ guare che rógagui, peteĩ ermána avuelíta ijukyetereíva otopa cherehe ha mborayhúpe oñeʼẽ chéve. Upépe mitãicha añepyrũ cherasẽ, ha haʼe chupe haʼeteha voi Jehová la ombou vaʼekue chupe oñeʼẽ hag̃ua chendive. Ha upe moméntope adesidi añemoag̃ui jeytaha Jehováre”.

14. Ohechaukaháicha Lucas 15:4, 5, ¿mbaʼépa ojapo pe pastór otopa rire ijovecha okañy vaʼekuére?

¹⁴ Jatopa rire umi inaktívore, tekotevẽ jasegi ñaipytyvõ ha ñamokyreʼỹ chupekuéra. Pe iñehémplope ningo Jesús omombeʼu vaʼekue mbaʼéichapa oñeñandu pe taʼýra, ha upéicha avei umi inaktívo ikatu oñeñandu vaieterei ha oikotevẽta heta tiémpo oñeñandu porã jey hag̃ua. Umi inaktívo ningo oĩ kuri Satanás múndope, ha upévare oiméne ndorekói hikuái Jehovápe iñamigoitéramo ymave guaréicha. Upévare tekotevẽta ñaipytyvõ chupekuéra omombarete jey hag̃ua ijerovia Jehováre. Pe ehémplo oñeʼẽvape pe ovecha okañy vaʼekuére, Jesús omombeʼu mbaʼéichapa pe pastór ohupi pe ovechápe ijatiʼy ári, ha ogueraha jey chupe pe ovecha atýpe. Pe pastór ningo oñemotiémpoma kuri ha hetáma oiko otopa hag̃ua ijovecha okañy vaʼekuére. Péro haʼe ohechakuaa tekotevẽtaha ohupi ijovechápe ogueraha hag̃ua chupe pe ovecha atýpe, pórke ikangy rupi ijehegui reínte ndaikatumoʼãi ojapo upéva (elee Lucas 15:4, 5).

15. ¿Mbaʼéichapa ikatu ñaipytyvõ umi inaktívo oñemoag̃uise jeývape Jehováre? (Ehecha pe rrekuádro “ Peteĩ folléto ijojahaʼỹva”).

¹⁵ Sapyʼánte tekotevẽta jaipuru heta tiémpo ha  ñañehaʼãmbaite ñaipytyvõ hag̃ua umi inaktívope, ha péicha ikatúta ombohovái peteĩ provléma ojokóva hína chupekuéra oservi jey hag̃ua Jehovápe. Péro Jehová espíritu, Iñeʼẽ la Biblia ha umi puvlikasión omeʼẽva ñandéve iñorganisasión rupive ikatu ñaipytyvõ chupekuéra imbarete jey hag̃ua iñamista Jehovándi (Rom. 15:1). ¿Mbaʼéichapa ikatu jajapo upéva? Peteĩ ansiáno ikatupyrýva heʼi: “La majoría umi inaktívo odesidíva oservi jeytaha Jehovápe tekotevẽ ostudia jey la Biblia”. * Ha peteĩ ansiáno ojeruréramo ñandéve jastudia hag̃ua peteĩ inaktívondi, vyʼápe jaasepta vaʼerã upe asignasión. Upe ansiáno ñañeʼẽma hague heʼive: “Umi ermáno térã ermána ostudiáva umi inaktívo ndive oñamigaite vaʼerã hesekuéra. Haʼe vaʼerã peteĩ amígo de konfiánsa ikatu vaʼerãme omombeʼu opa mbaʼe”.

16. ¿Mbaʼéichapa ñande jaikuaa umi ánhel ñanepytyvõtaha?

¹⁶ Heta experiénsia ohechauka umi ánhel ñanepytyvõha hína jatopa hag̃ua umi inaktívo oñemoag̃uise jeývare Jehováre (Apoc. 14:6). Por ehémplo, peteĩ ermáno inaktívo hérava Silvio ha oikóva Ecuadórpe, ojerure asy vaʼekue Jehovápe omondomi hag̃ua peteĩ oipytyvõ vaʼerã chupe. Haʼe oñemboʼe aja gueteri, oĩ og̃uahẽva hógape. Mokõi ansiáno oĩ hína pe hóga renondépe. Upe visíta aja, haʼekuéra vyʼápe oñepyrũma oipytyvõ chupe.

17. ¿Mbaʼéichapa ñañeñandúta ñaipytyvõramo umi inaktívope?

¹⁷ Javyʼaitereíta ningo ñaipytyvõramo umi inaktívope oñemoag̃ui jey hag̃ua Jehováre. Peteĩ prekursór hérava Salvador oñehaʼãmbaite oipytyvõ umi inaktívope. Haʼe heʼi: “Sapyʼánte ndaikatúi ajejoko ha cheresay pororopa vyʼágui. Chepyʼarory ningo apensávo mbaʼéichapa Jehová oipytyvõ peteĩ isiérvo ohayhuetévape osẽ hag̃ua Satanás múndogui, ha tuichaiterei mbaʼe chéve g̃uarã ikatu haguére ambaʼapo hendive upearã” (Hech. 20:35).

18. Oiméramo nde peteĩ inaktívo, ¿mbaʼérepa reimekuaa segúro?

¹⁸ Oiméramo nde repyta raʼe inaktívo, eimékena segúro Jehová nderayhuha gueteri, ha oipotaitereiha reñemoag̃ui jey hese. Iporãta ningo reñehaʼãramo rejapo umi mbaʼe tekotevẽva reñemoag̃ui jey hag̃ua hese. Jehová ningo ojogua pe túa Jesús oñeʼẽ vaʼekuére iñehémplope. Haʼe ohaʼarõ hína reju jey, ha vyʼápe nderresivíta hógape.