1, 2. ¿Mbaʼépa hína umi téma iñimportantetéva testígo de Jehovápe g̃uarã?

KOʼÁG̃ARUPI ñande ñambohovái vaʼerã koʼã téma iñimportantetéva: Jehová orekoha derécho ogovernávo ha oñesantifika vaʼerãha héra. Ñande testígo de Jehová ñañeʼẽseterei voi koʼã téma iñinteresantetévare. Péro, ¿heʼisépa upéva koʼã mokõi téma idiferenteha ojuehegui? Nahániri.

² Enterove ñande ñaaprendéma Ñandejára réra oñesantifika vaʼerãha. Ñaaprende avei ojehechauka vaʼerãha Ñandejára goviérno siémpre iporãveha. Koʼã mokõi téma ningo iñimportanteterei ñandéve g̃uarã.

3. ¿Mbaʼépa oike avei Jehová réra signifikádope?

³ Jehová réra signifikádope oike entéro mbaʼe ikatúva jaʼe Ñandejárare, umíva apytépe mbaʼéichapa haʼe ogoverna. Upévare jaʼéramo Ñandejára réra oñemopotĩ vaʼerãha entéro mbaʼe vaígui, upéva heʼise avei ojehechauka vaʼerãha Jehová goviérno siémpre iporãveha. Ñañeʼẽvo Jehová rérare, ñañeʼẽ hína avei mbaʼéichapa haʼe ogoverna pórke haʼe hína pe governánte Todopoderóso (ehecha pe rrekuádro “ ¿Mbaʼe mbaʼépa oike pe téma iñimportantetévape?”).

4. a) ¿Mbaʼépa Salmo 135:13 heʼi Ñandejára rérare? b) ¿Mbaʼe porandúpa ñambohováita ko artíkulope?

⁴ Jehová réra ningo ndaijojahái (elee Salmo 135:13). ¿Mbaʼérepa iñimportantete Ñandejára réra? ¿Mbaʼéichapa oñeñepyrũ rakaʼe oñemongyʼa héra? ¿Mbaʼépa Jehová ojapo osantifika hag̃ua héra? ¿Ha mbaʼépa ñande ikatu jajapo ñadefende hag̃ua héra? Ñambohovaimína koʼã porandu.

5. ¿Mbaʼépa algúno ikatu oñeporandu ohendúvo Ñandejára réra oñesantifika vaʼerãha?

⁵ “Toñesantifika nde réra” (Mat. 6:9, nóta). Jesús ohechauka  vaʼekue upéva haʼe vaʼerãha peteĩva umi mbaʼe iñimportantevéva jajerure vaʼerã ñañemboʼe jave. Péro, ¿mbaʼépa heʼise upe Jesús heʼi vaʼekue? Peteĩ mbaʼe oñesantifika hag̃ua ojehecha vaʼerã upe mbaʼe sagrádoramo térã ipotĩvaramo. Upévare ikatu oĩ algúno opensáva: “Péro Ñandejára réra ningo ipotĩ ha sagrádoma voi, ¿mbaʼére piko upéicharõ oñesantifika vaʼerã?”. Ñambohovái hag̃ua ko porandu, jahecha vaʼerã mbaʼérepa iñimportánte peteĩ téra.

6. ¿Mbaʼérepa iñimportantete peteĩ téra?

⁶ Peteĩ téra ningo ndahaʼéi peteĩ palávra ojeskrivínteva peteĩ kuatiáre térã peteĩ mbaʼe ojeʼénteva. La Biblia heʼi: “Ikuentave ningo peteĩ téra, ereko rangue aséite iporãitereíva” (Ecl. 7:1, nóta). ¿Mbaʼérepa iñimportantete peteĩ téra? Pórke upévape oike mbaʼépa umi hénte opensa pe persónare ha mbaʼéichapa ohecha chupe. Upévare la iñimportánteva ndahaʼéi hína mbaʼéichapa ojeskrivi térã ojeʼe peteĩ téra, síno mbaʼépa opensa umi hénte ohecha térã ohendu jave upe persóna réra.

7. ¿Mbaʼéichapa umi hénte omongyʼa Ñandejára réra?

⁷ Umi hénte ijapu jave Jehová kóntrape, añetehápe oheja vaise hína chupe ha oipota oñepensa vai hese. Ojapo jave upéva, haʼekuéra omongyʼase hína Ñandejára réra. Pe hardín de Edénpe oñeñepyrũ vaʼekue ojeataka Ñandejára réra oñepensa vai hag̃ua hese. Jahechamína mbaʼépa ikatu ñaaprende upe oiko vaʼekuégui.

8. ¿Mbaʼépa oikuaa vaʼekue Adán ha Eva, ha mbaʼe mbaʼépa ikatu ñañeporandu?

⁸ Adán ha Eva ningo oikuaa vaʼekue Jehová réra ha avei heta mbaʼe iñimportánteva chugui. Por ehémplo, oikuaa vaʼekue hikuái Jehová haʼe hague entéro mbaʼe Apohare, haʼe omeʼẽ hague chupekuéra la vída, peteĩ paraíso oiko hag̃ua ha avei peteĩ iñirũrã perféktova (Gén. 1:26-28; 2:18). Péro, ¿osegínepa hikuái ojepyʼamongeta entéro mbaʼe porã Jehová ojapo vaʼekuére hesehapekuéra? ¿Osegínepa hikuái ohechauka ohayhu ha oagradeseha Jehovápe? Koʼã mbaʼe hesakã porãiterei vaʼekue Ñandejára enemígo omoñuhãrõ guare chupekuéra.

9. Heʼiháicha Génesis 2:16, 17 ha 3:1-5, ¿mbaʼépa Jehová heʼi rakaʼe Adán ha Évape, ha mbaʼéichapa Satanás omopensa vai chupekuéra Jehováre?

 ⁹ (Elee Génesis 2:16, 17 ha 3:1-5). Ojevalévo peteĩ mbóire, Satanás heʼi Évape: “¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?”. Oporandúrõ guare upéva, Satanás ñemihaitépe heʼi peteĩ japu Jehováre, ha upévare Eva oñepyrũma opensa vai hese. Añetehápe ningo Ñandejára heʼi kuri chupekuéra ikatuha hoʼu entéro yvyramáta hiʼávagui, péro peteĩvagui añoiténte ndaikatumoʼãi. Ha pe hardín de Edénpe ningo haʼekuéra oreko vaʼekue opaichagua yvyramáta hiʼa porãva (Gén. 2:9). Jehová ningo añetehápe ipojeraiterei, péro haʼe heʼi vaʼekue Adán ha Évape peteĩ yvyramátagui añoite oproiviha chuguikuéra hoʼu hiʼa. Upévare upe Satanás oporandu vaʼekue omopensa chupekuéra Ñandejára ndaipojeraiha. Upéicha rupi, oiméne Eva oñeporandu raʼe: “¿Hakateʼỹpa Ñandejára peteĩ mbaʼe iporãvare ha nomeʼẽséi chéve?”.

10. ¿Mbaʼéichapa Satanás derechoite otaky vaʼekue Ñandejára rérare, ha mbaʼépa oiko upe haguére?

¹⁰ Upe peve Eva oñemoĩ gueteri Jehová poguýpe. Haʼe okontesta Satanáspe mbaʼépa Jehová heʼi porã vaʼekue chupekuéra, ha heʼi avei chupe haʼekuéra ni ndopokói vaʼerãha upe yvyramátare. Eva oikuaa porã vaʼekue Ñandejára oavisa hague chupekuéra naiñeʼẽrendúiramo omanotaha. Péro Satanás osẽ heʼi: “Peẽ ningo ni mbaʼevéicharõ napemanomoʼãi” (Gén. 3:2-4). Koʼág̃a Satanás ndahaʼevéima ontendekánteva Évape Jehová ijapuha, síno derechoitéma voi heʼi hese ijapuha. Péicha Satanásgui oiko peteĩ Diablo pórke haʼe otaky térã oñeʼẽ vai Ñandejára rérare. Ha Évape tuichaiterei ombotavy vaʼekue, pórke haʼe oguerovia chupe (1 Tim. 2:14). Haʼe okonfiave hese Jehová rehe rangue. Upéicha rupi Eva odesidi ojapo pe mbaʼe ivaivéva ikatúva ojapo: Naiñeʼẽrendúi Jehovápe ha hoʼu pe yva ojeproivi vaʼekue chuguikuéra, ha upéi omeʼẽ avei Adánpe (Gén. 3:6).

11. ¿Mbaʼépa ojapo vaʼerãmoʼã kuri Adán ha Eva?

¹¹ Ñapensamíntena mbaʼépa Eva ikatu vaʼerãmoʼã heʼi kuri Satanáspe. Ñañeimahinami Eva heʼiha chupe kóicha: “Che ndaikuaái mávapa nde, péro aikuaa che Túa Jehovápe ha ahayhu chupe, ha akonfia hese. Haʼe omeʼẽ oréve opa mbaʼe rorekóva. ¿Mbaʼe mbaʼéiko nde rejekree reñeʼẽ vai hag̃ua hese? ¡Tereho chéve koʼágui!”. Ajépa Jehová ovyʼaite vaʼerãmoʼã kuri itajýra péicha ohayhu ha odefendérire chupe (Prov. 27:11). Péro Eva noñandúi vaʼekue mborayhu ifiélva Jehováre, ha Adán upéichante vaʼekue avei. Péicha ndohayhúi rupi Itúape, nodefendéi vaʼekue chupe oñeñeʼẽ vaírõ guare hese.

12. a) ¿Mbaʼéichapa Satanás oñepyrũ vaʼekue omboduda Évape? b) ¿Mbaʼépa ndojapói vaʼekue Adán ha Eva?

¹² Jahechaháicha Satanás oñepyrũ vaʼekue oataka Jehová réra. Ha upearã oñehaʼã omboduda Évape oimépa Jehová haʼe peteĩ Túa  ivuénova. Adán ha Eva nodefendéi vaʼekue Jehová réra Satanás ijapu vaietereírõ guare ikóntrape. Péicha Satanáspe ifasilvéma ombotavy hag̃ua chupekuéra opuʼã hag̃ua Itúa kóntrape. Koʼág̃arupi Satanás oñehaʼã avei ojapo péicha lénto, haʼe omongyʼa Jehová réra oñeʼẽ vaívo hese. Ha umi hénte ogueroviávo umi japu Satanás heʼíva, ifasilvétama chupekuéra orrechasa hag̃ua Jehová goviérno ihústova.

13. ¿Mbaʼéichapa Ezequiel 36:23 ohechauka porã mbaʼépa hína pe mensáhe iñimportantevéva orekóva la Biblia?

¹³ ¿Jehová piko ndojapoiete voi mbaʼeve péicha oñeñeʼẽ vaírõ guare hese? La Biblia kompletoite ningo omombeʼu mbaʼépa Jehová ojapo vaʼekue ohechauka hag̃ua japuha umi mbaʼe vaiete ojeʼe vaʼekue hese pe hardín de Edénpe (Gén. 3:15). Añetehápe ikatu voi jaʼe pe mensáhe iñimportantevéva orekóva la Biblia haʼeha kóva: Jehová osantifikáta héra, ha omoĩ jeýta hustísia ha pyʼaguapy ko yvy ape ári pe Rréino rupive ogovernáva hína Itaʼýra. La Bíbliape jatopa informasión ñanepytyvõva ñantende hag̃ua mbaʼéichapa Jehová osantifika héra (elee Ezequiel 36:23).

14. ¿Mbaʼéichapa Jehová osantifika héra ombohovái lája umi opuʼãvape hese Edénpe?

¹⁴ Satanás ojapo opa ikatúva ojoko hag̃ua Jehovápe pono okumpli ivolunta. Péro Satanás osẽ vai jey jey. La Biblia omombeʼu mbaʼépa Jehová ojapóma, ha upéva ohechauka ndaiporiha ótro haʼeichagua. Añetehápe ningo Jehová oñeñandu vaieterei ohechávo Satanás opuʼãha hese, ha mbaʼéichapa heta oĩ oapojáva chupe (Sal. 78:40). Upéicharõ jepe, Haʼe ohechauka iñaranduha, ipasiénsia ha ihustoha ombohováivo ko situasión. Avei haʼe ohechaukáma heta hendáicha ipoderosoitereiha, ha iñimportanteveha ikatu jahecha haʼe oporohayhuha entéro mbaʼe ojapóva rupive (1 Juan 4:8). Jehová ningo núnka noñentregái, síno osegi ombaʼapo osantifika hag̃ua héra.

15. ¿Mbaʼéichapa Satanás koʼag̃aite peve osegi ijapu Ñandejára kóntrape, ha mbaʼépa oiko upe haguére?

¹⁵ Satanás ningo koʼag̃aite peve osegi ijapu  Ñandejára kóntrape. Haʼe ombotavy umi héntepe oipotágui oduda Ñandejára ipoderóso, ihústo, iñarandu ha oporohayhuha. Por ehémplo, Satanás oñehaʼã ogueroviaka la héntepe Jehová ndahaʼeiha opa mbaʼe Apohare. Ha oiméramo oasepta hikuái Ñandejára oexistiha, Satanás oñehaʼã ogueroviaka chupekuéra Ñandejára iñinhustoha ha ojopyetereimaha ñanendive. Hiʼarive haʼe omboʼe la héntepe Jehová haʼeha peteĩ Dios ipyʼahatã ha iñañáva, oporohapýva peteĩ infiérnope. Haʼekuéra ogueroviáramo koʼã japu, ifasilvétama chupekuéra orrechasa hag̃ua Jehová goviérno ihustoitéva. Satanás ningo oñehundiete peve osegíta heʼi japu Jehováre ha oñehaʼãta avei nde remboyke hag̃ua Jehovápe. ¿Okonsegítapa upéva?

16. ¿Mbaʼépa ñande ikatu jajapo Adán ha Eva ndojapói vaʼekue?

¹⁶ Jehová ningo oheja yvypóra imperfékto oipytyvõ oñesantifika hag̃ua héra. Upéicharõ, ñande ikatu hína jajapo pe Adán ha Eva ndojapói vaʼekue. Ko múndope oĩramo jepe hetaiterei hénte ijapúva ha oñeʼẽ vaíva Jehová rérare, ñande ikatu ñadefende chupe ha jaʼe umi héntepe Jehová isánto, ihústo, ivuéno ha oporohayhuha (Is. 29:23). Ñande ikatu jahechauka jaapojaha igoviérno, ha ikatu ñaipytyvõ la héntepe ontende hag̃ua Jehová goviérno añoite ihustoha, ha upéva oguerutaha pyʼaguapy ha vyʼa entéro mbaʼe oikovévape (Sal. 37:9, 37; 146:5, 6, 10).

17. ¿Mbaʼéichapa Jesús oikuaauka vaʼekue Itúa réra?

¹⁷ Ñadefende jave Jehová réra, ñande jasegi hína Jesucristo ehémplo (Juan 17:26). Jesús oikuaauka vaʼekue Itúa réra oipurúvo upe téra, ha avei omboʼévo umi héntepe mbaʼeichaguápa añetehápe Jehová. Por ehémplo umi fariséo oheja vaieterei vaʼekue Jehovápe, pórke ontendeka umi héntepe haʼe ipyʼahatãha, iñexihénte, iñaña ha ndoporoporiahuverekoiha. Jesús oipytyvõ vaʼekue umi héntepe ohechakuaa hag̃ua Itúa oporontendeha, ipasiénsia, oporohayhu ha oporoperdonakuaaha. Avei umi mbaʼe ojapóva rupive káda día, Jesús ohechauka porãiterei vaʼekue umi kualida porã Itúa orekóva. Péicha oipytyvõ umi héntepe oikuaa hag̃ua mbaʼeichagua persónapa Jehová (Juan 14:9).

18. ¿Mbaʼéichapa ikatu jahechauka japuha umi mbaʼe vai ojeʼéva Jehováre?

 ¹⁸ Jesús ojapo haguéicha, ñande ikatu ñamombeʼu umi héntepe umi mbaʼe jaikuaáva Jehovágui, ñamboʼe chupekuéra haʼeha peteĩ Dios oporohayhu ha imbaʼeporãva. Upéicha jahechauka japuha umi mbaʼe vai ojeʼéva Jehováre. Ñande ñasantifika Jehová réra ñaipytyvõvo umi héntepe oreko hag̃ua upe téra sagrádoramo. Ñande avei ikatu jasegi Jehová ehémplo, ha jajapokuaa upéva ñaneimperféktoramo jepe (Efes. 5:1, 2). Umi mbaʼe jaʼéva ha jajapóva ohechaukáramo umi héntepe mbaʼeichagua persónapa añetehápe Jehová, ñaipytyvõ hína oñesantifika hag̃ua héra. Ñande ñamopotĩ Jehová réra, ñaipytyvõvo umi héntepe anivéma hag̃ua oguerovia umi japu ojeʼéva hese. Ha ñasantifika avei héra jasegíramo ñandefiél chupe ñaneimperféktoramo jepe (Job 27:5).

19. ¿Mbaʼéichapa Isaías 63:7 ñanepytyvõ jaikuaa hag̃ua mbaʼépa hína pe iñimportantevéva ñaporomboʼe jave?

¹⁹ Péro oĩ avei ótra kósa ikatúva jajapo ñasantifika hag̃ua Jehová réra. Ñamboʼe jave la Biblia ótrope, pyʼỹinte jarresalta Jehová añoite orekoha derécho ogovernávo ko univérso, ha upéva ningo siertoite. Jaikuaa iñimportanteha ñamboʼe umi héntepe Ñandejára mandamientokuéra, péro iñimportanteve jey hína ñamboʼe chupekuéra ohayhu hag̃ua ñande Túa Jehovápe ha ifiél chupe. Upévare tekotevẽ jarresalta umi kualida porãite orekóva Jehová, ha jahechauka porã mbaʼeichagua persónapa orrepresenta hína upe téra (elee Isaías 63:7). Upéicha jajapóramo ñaipytyvõta ótrope ohayhu ha iñeʼẽrendu hag̃ua Jehovápe, pórke oserviséta chupe ipyʼaite guive.

20. ¿Mbaʼépa jahecháta pe artíkulo oúvape?

²⁰ Péro, ¿mbaʼéichapa ikatu jajasegura umi mbaʼe jajapóva ha ñamboʼéva oipytyvõha ótrope opensa porã hag̃ua ohendu jave Jehová réra, ha oñemoag̃uise hag̃ua hese? Pe artíkulo oúvape ñambohováita ko porandu.