1, 2. a) ¿Mbaʼéichapa oñeñandu sapyʼánte umi sy ha túa ifamília heʼi jave chupekuéra ojevautisaseha? b) ¿Mbaʼérepa oñeporandu umi ojevautisasévape oñemeʼẽmapa raʼe Jehovápe? (Ehecha pe taʼanga oĩva iñepyrũme).

MARÍA oñemboʼy umi ojevautisátava apytépe, ha ituakuéra omaña hese. Pe diskursánte ojapóvo umi mokõi porandu, María hatã porã ombohovái. Upe riremínte haʼe ojevautisáma.

² María tuakuéra ningo ovyʼaiterei ifamília oñemeʼẽ haguére Jehovápe ha ojevautisa. Péro upe mboyve, María sy ojepyʼapy kuri oikóvo. Haʼe oñeporandu: “¿Noiméi piko che memby imitãiterei gueteri? ¿Ontendépa tuichaitereiha upe rresponsavilida? ¿Noiméi piko ohaʼarõve vaʼerã ojevautisa hag̃ua? Hetaiterei sy ha túa ningo oñeporandu jepi koʼã mbaʼe ifamiliakuéra omombeʼu jave chupekuéra ojevautisaseha (Ecl. 5:5). Ndahasýi ningo ñantende hag̃ua mbaʼérepa tuakuéra oñeporandu koʼã mbaʼe. Peteĩ persóna oñemeʼẽ jave Jehovápe ha ojevautisa, odesidi hína pe  mbaʼe iñimportantevéva kristianokuérape g̃uarã (ehecha pe rrekuádro “¿ Eñemeʼẽmapa Jehovápe ejapo hag̃ua hembipota?”).

3, 4. a) ¿Mbaʼéichapa apóstol Pedro ohechauka vaʼekue iñimportanteha pe vautísmo? b) ¿Mbaʼéicha rupípa ñakomparakuaa pe vautísmo Noé ojapórõ guarére pe árka?

³ Apóstol Pedro ombojoja vaʼekue pe vautísmo pe traváho Noé ojapóvare okonstruírõ guare pe árka. Haʼe heʼi: “Pe oiko vaʼekue orrepresenta pe vautísmo, ha upéva rupive koʼág̃a peẽ pejesalva hína” (elee 1 Pedro 3:20, 21). Pe árka ohechauka porã enterovévape Noé añetehápe ojaposeha Ñandejára rembipota. Haʼe ningo ifiél vaʼekue Jehovápe ha ojapo la omandáva chupe. Noé ojerovia rupi, Jehová osalva chupe ha hogayguakuérape oúrõ guare pe dilúvio. ¿Mbaʼépa ñanemboʼe Pedro heʼi vaʼekue?

⁴ Umi hénte ohechárõ guare pe árka, oikuaáma kuri Noé ojeroviaha Ñandejárare. Upéicha avei, umi hénte ohecha jave peteĩ persóna ojevautisaha, haʼekuéra oikuaa pe persóna oñemeʼẽma hague Ñandejárape ojeroviágui Jesúsre. Umi ojevautisáva iñeʼẽrendu Ñandejárape ha ojapo pe tembiapo haʼe omandáva chupekuéra, Noé avei ojapo haguéicha. Jehová ningo osalva vaʼekue Noépe oúrõ guare pe dilúvio, upéicha avei haʼe ohundi vove ko múndo aña osalváta isiervokuéra ifiélvape ha ojevautisámavape (Mar. 13:10; Apoc. 7:9, 10). Jahechaháicha, iñimportanteterei ñañemeʼẽ Jehovápe ha jajevautisa. Oimérõ oĩ ombotapykue reínteva pe vautísmo, ikatu hína operde pe oportunida oiko hag̃ua opa árare.

5. ¿Mbaʼépa jahecháta ko artíkulope?

⁵ Jahechaháicha, pe vautísmo haʼe peteĩ mbaʼe iñimportantetereíva, upévare tekotevẽ ñarresponde mbohapy porandu:  1) ¿Mbaʼépa heʼi la Biblia pe vautísmore? 2) ¿Mbaʼe mbaʼépa ojapo vaʼerã pe persóna ojevautisaséva? Ha, 3) ¿mbaʼérepa iporã siémpre ñanemanduʼa iñimportanteha pe vautísmo ñamboʼe jave ñane família térã ñane estudiántepe?

6, 7. a) ¿Maʼerãpa Juan oporovautisa vaʼekue? b) ¿Máva vautísmopa idiferénte vaʼekue ha mbaʼérepa?

⁶ La Biblia oñeʼẽ primera ves pe vautísmore Juan el Bautista oporovautisárõ guare (Mat. 3:1-6). Umi hénte oho vaʼekue hendápe ojevautisa hag̃ua pórke ohechaukase oñarrepentiha ipekadokuéragui. Upéva heʼise haʼekuéra orrekonoseha nokumpliporãi hague pe Léi Mosáika, ha oñembyasyetereiha upe haguére. Péro pe vautísmo iñimportantevéva ojapo vaʼekue Juan oreko vaʼekue ótro signifikádo. Haʼe ovautisa kuri Jesúspe, ha upéva peteĩ mbaʼe tuichaitereíva pórke ovautisa Ñandejára raʼýpe haʼéva perfékto (Mat. 3:13-17). Jesús ndopekái vaʼekue arakaʼeve, upévare natekotevẽi oñarrepenti mbaʼevére (1 Ped. 2:22). Upéicharõ, ¿maʼerãpa ojevautisa kuri Jesús? Ohechauka hag̃ua oĩmaha preparádo ojapo hag̃uáicha Ñandejára rembipota (Heb. 10:7).

⁷ Jesús oñepyrũ rire opredika, idisipulokuéra ovautisáma avei umi héntepe (Juan 3:22; 4:1, 2). Umi persóna ojevautisa ikatu hag̃uáicha ohechauka ombyasyha ndojapói haguére pe Léi Mosáika omandáva. Péro Jesús omano ha oikove jey rire, pe vautísmo orekóma ótro signifikádo.

8. a) Jesús orresusita rire, ¿mbaʼépa omanda vaʼekue idisipulokuérape? b) ¿Mbaʼérepa tekotevẽ jajevautisa?

⁸ Áño 33-pe, Jesús orresusita riremi, haʼe oñeʼẽ kuri mas de 500 persónape. Umíva apytépe oĩ vaʼekue kuña, kuimbaʼe ha ikatu voi mitã jepe. Amalisia upérõ omanda kuri chupekuéra: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa Túva, Taʼýra ha espíritu sánto rérape. Ha pemboʼe chupekuéra ojapo hag̃ua opa mbaʼe amanda vaʼekue peẽme” (Mat. 28:19, 20; 1 Cor. 15:6). Jesús omanda umi omoirũvape chupe ojapo hag̃ua disípulo. Haʼe heʼi enterovéva umi oikoséva idisípuloramo, térã oñemoĩséva ijúgo guýpe, ojevautisa vaʼerãha (Mat. 11:29, 30). Ñandejára ñandeguerohory hag̃ua jahechakuaa vaʼerã haʼe oipuruha Jesúspe okumpli hag̃ua hembipota. Upépe ae ikatu jajevautisa. Péva hína pe úniko vautísmo Ñandejára oaseptáva. La Biblia ohechauka porã umi kristiáno ypykue ontende hague mbaʼeichaite pevépa iñimportánte pe vautísmo. Haʼekuéra nopensaiete vaʼekue ikatuha ohaʼarõnte, ha upéinte ág̃a ojevautisa (Hech. 2:41; 9:18; 16:14, 15, 32, 33).

9, 10. ¿Mbaʼépa ikatu ñaaprende pe etíope ha Saulo vautísmogui?

⁹ (Elee Hechos 8:35, 36). Peteĩ karai Etiopiagua ogueroviáva umi judío omboʼéva, ou hína kuri Jerusalén témplogui. Haʼe oho upépe oadora hag̃ua Ñandejárape. Upéi, peteĩ ánhel heʼi Felípepe opredika hag̃ua upe karaípe, ha Felipe “omombeʼu chupe pe marandu porã oñeʼẽva Jesús rehe”. ¿Mbaʼépa ojapo pe karai Etiopiagua? Ontende iñimportantetereiha oasepta Jesúspe Imburuvicháramo, ha ojapose umi mbaʼe Jehová omandáva kristianokuérape. Upévare haʼe ensegídama voi ojevautisase.

¹⁰ Jahechamína koʼág̃a ótro ehémplo. Peteĩ judío hérava Saulo opersegi mbarete  vaʼekue umi kristiánope. ¿Mbaʼérepa haʼe ojapo upéva? Umi judío ningo kómo nasión oñemeʼẽma vaʼekue voi Ñandejárape, péro Jehová orrechasa kuri chupekuéra naiñeʼẽrendúi haguére. Saulo katu oguerovia gueteri umi judío oservi porãha Ñandejárape, ha upévare opersegi umi kristiánope. Peteĩ jey, Jesús orresusita rire oñeʼẽ chupe yvága guive ha omeʼẽ chupe peteĩ mensáhe. ¿Mbaʼépa ojapo Saulo upe rire? Haʼe oheja oipytyvõ chupe peteĩ kristiáno hérava Ananías. La Biblia heʼi upe rire Saulo ojevautisa hague (Hech. 9:17, 18; Gál. 1:14). Upe guive ojekuaa chupe kómo apóstol Pablo. Jahechaháicha, haʼe ontende rire Ñandejára oipuruha Jesúspe okumpli hag̃ua hembipota, ensegída ojevautisa (elee Hechos 22:12-16).

11. a) ¿Mbaʼérepa heta persóna ostudiáva la Biblia ojevautisase? b) ¿Mbaʼéichapa ñañeñandu jahecha jave ojevautisa umi oñemeʼẽma vaʼekue Jehovápe?

¹¹ Koʼág̃arupi avei, heta persóna ostudia la Biblia, tahaʼe imitãva térã ijedáva. Haʼekuéra omombaʼeterei umi mbaʼe oaprendéva la Bíbliagui, upévare oñemeʼẽsetereíma voi Jehovápe ha ojevautisase. Umi asambleahápe, pe diskúrso de vautísmo haʼe hína peteĩ párte iporãitereíva. Entéro testígo de Jehová javyʼa umi estudiánte oasepta jave umi enseñánsa bíblica ha odesidi ojevautisa. Tuakuéra katu ovyʼavéntema ifamiliakuéra ojapo jave upéva. Pe áño de servísio 2017-pe, mas de 284.000 persóna ojevautisa ohechauka hag̃ua oñemeʼẽma hague Jehovápe (Hech. 13:48). Koʼã persóna ontende porã entéro kristiáno ojevautisa vaʼerãha. Péro, ¿mbaʼépa ojapo raẽ vaʼerã kuri hikuái ojevautisa mboyve?

12. ¿Mbaʼépa ojapo vaʼerã umi estudiánte ikatu hag̃uáicha ojevautisa?

¹² Peteĩ persóna ojevautisa mboyve, oaprende vaʼerã pe añetegua Ñandejáragui, mbaʼépa hembipota yvyporakuérape g̃uarã ha ko yvýpe g̃uarã, ha mbaʼépa haʼe ojapo ñandesalva hag̃ua (1 Tim. 2:3-6). Amedída oikuaa Ñandejárape, haʼekuéra ojeroviavéta ohóvo, ha upéva omomýita chupekuéra iñeʼẽrendu hag̃ua chupe ha oheja hag̃ua umi mbaʼe vai ojapóva (Hech. 3:19). Koʼã mbaʼe iñimportanteterei, pórke Jehová ndoaseptamoʼãi peteĩ persóna oñemeʼẽvape chupe ha osegíva hembiapo vai (1 Cor. 6:9, 10). Oĩ hetave mbaʼe tekotevẽva ojapo pe ojevautisaséva. Por ehémplo, oho vaʼerã rreunionhápe, opredika meme vaʼerã umi marandu porã ha omboʼe hapichápe. Jesús heʼi vaʼekue voi idisipulokuéra opredikataha ko yvy tuichakuére (Hech. 1:8). Jahechaháicha, peteĩ estudiánte tekotevẽ ojapopaite koʼã mbaʼe ojevautisa mboyve. Upéi ikatúma oñemboʼe Jehovápe haʼeñoháme oñemeʼẽ hag̃ua chupe ha ojevautisa.

13. Ñamboʼe jave ótrope, ¿mbaʼérepa iporã ñanemanduʼa umi persóna ojevautisa vaʼerãha oiko hag̃ua chuguikuéra kristiáno?

¹³ Ñaipytyvõseterei ningo ñane familiakuérape ha umi estudiántepe ikatu hag̃uáicha okumpli umi mbaʼe Ñandejára ojeruréva. Péro nañanderesaráiri vaʼerã tekotevẽha ojevautisa oiko hag̃ua chuguikuéra Jesús disípulo. Upévare jaaprovechákena kualkiér oportunida jahechauka hag̃ua chupekuéra mbaʼérepa iñimportánte ñañemeʼẽ Ñandejárape ha jajevautisa. Jaipotaiterei ningo ñane familiakuéra ha umi estudiánte oprogresa ha ojevautisa.

14. ¿Mbaʼérepa ndovaléi jajopy avavépe ojevautisa hag̃ua?

¹⁴ Avave ndojopýi vaʼerã peteĩ estudiántepe ojevautisa hag̃ua, tahaʼe ituakuéra, iñinstruktór térã ótro ermáno. Ni Jehová ndojapói upéva (1 Juan 4:8). Ñaporomboʼe  jave, ñaipytyvõ vaʼerã umi estudiántepe ontende hag̃ua iñimportantetereiha oñemoag̃uive ohóvo Jehováre. Upéi, pe estudiánte omombaʼéramo ipyʼaite guive la oaprendéva, ojaposéta opa mbaʼe Ñandejára ojeruréva peteĩ kristiánogui, ha ojevautisaséta (2 Cor. 5:14, 15).

15, 16. a) ¿Mboy áñopa oreko vaʼerã peteĩ persóna ojevautisa hag̃ua? Emyesakã. b) ¿Mbaʼérepa peteĩ persóna ojevautisáma vaʼekue ótra rrelihiónpe tekotevẽ ojevautisa jey kómo testígo de Jehová?

¹⁵ ¿Mboy áñopa oreko vaʼerã peteĩ persóna ojevautisa hag̃ua? Ndaipóri ningo peteĩ eda upearã. Káda uno ningo idiferénte, oĩ estudiánte oprogresa pyaʼéva ha ótro katu imbeguemie. Heta oĩ ojevautisa vaʼekue imitã reheve, ha osegi ifiél Jehovápe okakuaapa rire. Oĩ avei umi oaprendéva pe añetegua ijeda riréma, sapyʼánte okumpli riréma 100 áño, ha upéi ojevautisa.

¹⁶ Peteĩ kuñakarai ojevautisa jepémava kuri diferénte rrelihiónpe, oporandu iñinstruktórape tekotevẽpa ojevautisa jey. Pe ermána ohesaʼỹijo hendive ko téma la Biblia rupive. Upéi pe kuñakarai ontende la Biblia omboʼéva ha ensegidamíntema voi ojevautisa, orekóramo jepe haimete 80 áño. ¿Mbaʼépa ñanemboʼe ko ehémplo? Jehová oaseptaha ñande vautísmo sólo jaikuaa porãramo hembipota. Oimérõ jepe jajevautisáma kuri ótra rrelihiónpe, tekotevẽ gueteri jajevautisa oiko hag̃ua ñandehegui testígo de Jehová (elee Hechos 19:3-5).

17. ¿Mbaʼérehepa iñimportánte jajepyʼamongeta jajevautisaha díape?

¹⁷ Entéro kristiáno ningo ovyʼaiterei pe ojevautisaha díape. Péro iporã avei ojepyʼamongeta mbaʼépa oñehaʼarõ chuguikuéra oñemeʼẽ rire Ñandejárape. Añetehápe ñañehaʼã meme vaʼerã jajapo hag̃ua opa mbaʼe Ñandejára ojeruréva. Jaikuaaháicha, opavave haʼéva Jesús disípulo “ndojapovéima haʼekuéra oipotávante”, síno “Cristo oipotáva” (2 Cor. 5:15; Mat. 16:24).

18. ¿Mbaʼépa jahecháta pe artíkulo oúvape?

¹⁸ Ñaaprende haguéicha ko artíkulope, ndahaʼeiete vyrorei jadesidíramo oikotaha ñandehegui peteĩ kristiáno verdadéro. Upévare María sy, ñañeʼẽ hague iñepyrũme, ojepyʼapy kuri imemby ojevautisátarõ guare. Oimérõ nde peteĩ túa térã sy, ikatu avei eñeporandu: “¿Añetehápepa che família oĩma preparádo ojevautisa hag̃ua? ¿Oikuaáma piko la tekotevẽva Jehovágui ikatu hag̃uáicha oñemeʼẽ chupe? ¿Iporãtapa ostudia raẽ fakultápe ha ombaʼapo ojevautisa mboyve? ¿Mbaʼe piko oikóta oúramo opeka vaieterei ág̃a ojevautisa riréma?”. Koʼã porandu ñambohováita pe artíkulo oúvape, ha jahecháta avei mbaʼépa ojapo vaʼerã tuakuéra ohecha hag̃ua hekópe porã pe vautísmo.