1, 2. ¿Mbaʼéichapa apóstol Pablo ehémplo ikatu oipytyvõ koʼág̃arupi umi ansiánope?

 APÓSTOL Pablo ningo ohayhueterei vaʼekue iñermanokuérape, ha oñemeʼẽmbaite voi oipytyvõ hag̃ua chupekuéra (Hech. 20:31). Upéicha rupi, umi ermanokuéra ohayhueterei vaʼekue avei chupe. Upévare peteĩ vuéltape umi ansianokuéra oĩva Éfesope oikuaárõ guare núnka mas ndohechamoʼãveimaha chupe, “hasẽ soro” voi hikuái (Hech. 20:37). Koʼág̃arupi, umi ansianokuéra oĩva ñane kongregasiónpe ñanderayhueterei avei, ha oĩ ojapo hag̃uáicha oimeraẽ mbaʼe ñanderehehápe ñanepytyvõ hag̃ua (Filip. 2:16, 17). Péro sapyʼánte ningo ijetuʼu avei hendivekuéra, ¿mbaʼépa ikatu oipytyvõ chupekuéra upéicha jave?

² Tuichaiterei ningo oipytyvõta umi ansiánope oanalisáramo apóstol Pablo ehémplo (1 Cor. 11:1). ¿Mbaʼérepa? Pórke haʼe ningo ndahaʼéi vaʼekue peteĩ súper ómbre. Haʼe iñimperféktonte vaʼekue avei ñandéicha, ha sapyʼánte oñehaʼãmbaitémante vaʼerã kuri ojapo hag̃ua la iporãva (Rom. 7:18-20). Avése hendy vaʼekue avei hendive oreko rupi heta provléma, péro haʼe noñentregái ha osegi vaʼekue ovyʼa Jehová servísiope. Ha umi ansiáno osegíramo apóstol Pablo ehémplo ikatúta avei ombohovái porã umi provléma orekóva ha osegíta ovyʼa Jehová servísiope. Jahechamína mbaʼéichapa ikatu ojapo hikuái upéva.

3. ¿Mbaʼépa jahecháta ko artíkulope, ha mbaʼéichapa upéva ñanepytyvõta?

³ Ko artíkulope jahecháta 4 kósa ikatúva hína ijetuʼu umi ansiánope ojapo: 1) Oipuru porã itiémpo ikatu hag̃uáicha opredika, ha avei okumpli porã hag̃ua umi ótra asignasión orekóva, 2) okuida porã ermanokuérare, 3) oñehaʼã ani hag̃ua omboguapy ijehe umi idefektokuéra, ha 4) oaguanta umi ermanokuéra imperfeksión. Jahecháta mbaʼéichapa apóstol Pablo ombohovái porã vaʼekue káda uno koʼã mbaʼe, ha mbaʼéichapa ansianokuéra ikatu osegi iñehémplo.

4. ¿Mbaʼérepa ikatu hína ijetuʼu umi ansiánope osẽ pyʼỹi predikasiónpe?

⁴ ¿Mbaʼérepa upéva ikatu hína ijetuʼu? Umi ansianokuéra ningo pyʼỹinte osẽ predikasiónpe omoĩ hag̃ua peteĩ ehémplo porã ermanokuérape. Péro en rrealidáko ndahaʼéi upévante la ojapo vaʼerã hikuái. Por ehémplo, haʼekuéra omoakã vaʼerã avei pe rreunión éntre semanagua, odirihi vaʼerã pe Estúdio bíblico kongregasionpegua, ojapo vaʼerã diskúrso, ontrena vaʼerã umi siérvo ministeriálpe, ha omokyreʼỹ vaʼerã enterove ermanokuérape (1 Ped. 5:2). Oĩ avei umi ansiáno ombaʼapóva konstruksiónpe, tahaʼe oñemopuʼã térã oñemantene hag̃ua umi Salón del Reino, Salón de Asambléa, ha umícha. Péro orekóramo jepe hikuái entéro koʼã asignasión, chupekuéra g̃uarã pe traváho iñimportantevéva haʼe hína pe predikasión (Mat. 28:19, 20).

5. ¿Mbaʼérepa ikatu jaʼe Pablo iguapoiterei hague predikasiónpe?

⁵ Pablo ehémplo. ¿Mbaʼépa oipytyvõ vaʼekue Páblope iguápo hag̃ua predikasiónpe? Haʼe voi omeʼẽ ñandéve la rrespuésta Filipenses 1:10-pe. Upépe haʼe oakonseha vaʼekue: “Pehechakuaa mbaʼépa hína umi mbaʼe iñimportantevéva”. Jehová ningo onkarga vaʼekue chupe opredika hag̃ua umi ndahaʼéivape judío, ha upéva haʼe vaʼekue pe traváho iñimportantevéva chupe g̃uarã. Upévare opredika vaʼekue “umi hénte renondépe ha ogahárupi” (Hech. 20:20). Haʼe ndopredikái vaʼekue unas kuánta órante al día, o ndahaʼéi oaparta vaʼekue un día a la semánante opredika hag̃ua. Haʼe oaprovechapaite vaʼekue entéro oportunida orekóva, ha opredika oimeraẽvape ha oimehápe. Por ehémplo haʼe ohaʼarõrõ guare iñamigokuérape Aténaspe, oñemoĩ opredika peteĩ grúpo de persóna oĩháme umi poguasukuéra, ha umíva apytégui oĩ vaʼekue heta ohendu porãva chupe (Hech. 17:16, 17, 34). Ha oĩrõ guare préso jepe haʼe opredika vaʼekue ikatúvape guive (Filip. 1:13, 14; Hech. 28:16-24).

6. ¿Mbaʼéichapa Pablo ontrena vaʼekue umi ermánope?

⁶ Pablo ningo oipuru porãiterei vaʼekue pe tiémpo ohasáva predikasiónpe, pórke ndahaʼéi opredikánteva, síno avei oaprovecha upe tiémpo ontrena hag̃ua umi ermánope. Upévare haʼe pyʼỹinte oinvita vaʼekue ótrope omoirũ hag̃ua chupe ojapo jave umi iviáhe de predikasión. Por ehémplo pe primer viáhepe oinvita vaʼekue Juan Márcospe, ha pe segundo viáhepe oinvita Timotéope (Hech. 12:25; 16:1-4). Jahechaháicha Pablo oñehaʼãmbaite vaʼekue ontrena porã koʼã ermánope, ikatu hag̃uáicha upéi haʼekuéra ogia porã pe kongregasión, okuida porã ermanokuérare, ha omboʼe porãve umi héntepe (1 Cor. 4:17).

7. ¿Mbaʼéichapa ansianokuéra ikatu osegi pe konsého Pablo omeʼẽ vaʼekue Efesios 6:14, 15-pe?

⁷ ¿Mbaʼépa ikatu oaprende umi ansiáno? Umi ansiáno osegíva Pablo ehémplo ndopredikái ogahárupinte, síno siémpre oĩ preparádo opredika hag̃ua oimehápe (elee Efesios 6:14, 15). Por ehémplo ikatu opredika hikuái oho jave  oñemu térã itravahohápe. Térã ombaʼapóramo konstruksiónpe omopuʼã hag̃ua umi Salón del Reino, ikatu opredika umi vesinokuérape, umi oguerúvape materiál de konstruksión, ha umícha. Umi ansiáno ikatu voi ojapo apóstol Pábloicha, oaprovecha pe tiémpo ohasáva predikasiónpe ontrena hag̃ua umi ermánope, por ehémplo umi siérvo ministeriálpe.

8. ¿Mbaʼépa sapyʼánte ojapómante vaʼerã peteĩ ansiáno?

⁸ Jahecháma haguéicha, umi ansiáno hetaiterei hembiapo kongregasiónpe, ha sapyʼánte pe sirkuítope voi. Péro oñatende vaʼerã hikuái ani hag̃ua umíva hoʼupa chugui itiémpo ha upéicha rupi ndaikatuvéima osẽ predikasiónpe. Upévare sapyʼánte oñeasigna jave chupekuéra peteĩ mbaʼe heʼímante vaʼerã hikuái ke no. Haʼekuéra opensa porã vaʼerã upe témare ha oñemboʼe Jehovápe. Upéicha ikatu hína ohechakuaa oaseptáramo entéro umi asignasión oñemeʼẽva chupe, ndaikatumoʼãveimaha ojapo ijestúdio de família, osẽ pyʼỹi predikasiónpe, ni omboʼe ifamiliakuérape opredikakuaa hag̃ua. Algúno ermánope ikatu hína ijetuʼu orrechasa hag̃ua peteĩ asignasión. Péro ikatu oĩ hikuái segúro Jehová ontende porãitereiha haʼekuéra oñehaʼãnteha okumplipa porã entéro umi rresponsavilida orekóva, ha oforsatamaha chupekuéra oasepta jeýrõ ótra asignasión.

9. ¿Mbaʼépa ikatu hína ijetuʼu umi ansiánope hembiapo heta rupi?

⁹ ¿Mbaʼérepa upéva ikatu hína ijetuʼu? Enterove ermáno ningo oreko heta provléma ha ohasa hetaiterei mbaʼe ijetuʼúva, koʼýte koʼág̃arupi jaiko rupi umi ára pahápe. Upéicha rupi oikotevẽ hikuái peteĩ omokyreʼỹmi, ha oipytyvõmi vaʼerã chupekuéra oaguanta hag̃ua koʼã mbaʼe. Ha sapyʼánte oiméramo oho hína hikuái tape vaíre, oikotevẽ avei peteĩ oñemoñeʼẽmi vaʼerã chupekuéra (1 Tes. 5:14). Umi ansiáno ningo ndaikatúi añete oipeʼapa ñandehegui umi provléma jarekóva, péro Jehová oipota haʼekuéra ñanemokyreʼỹ ha ñanepytyvõ. ¿Mbaʼéichapa umi ansiáno ikatu okumpli porã upe asignasión Jehová omeʼẽva chupekuéra, jepe hembiapo heta hikuái?

10. Ohechaukaháicha 1 Tesalonicenses 2:7, ¿mbaʼépa ojapo vaʼekue Pablo okuida hag̃ua ermanokuérare?

¹⁰ Pablo ehémplo. Pablo ningo oheka vaʼekue voi oportunida ofelisita hag̃ua ermanokuérape ha omokyreʼỹ hag̃ua chupekuéra. Ha iporãta avei umi ansiáno osegíramo iñehémplo, ha otrata avei péicha mborayhúpe la ermanokuérape (elee 1 Tesalonicenses 2:7). Pablo ningo oasegura vaʼekue umi ermánope ohayhuetereiha chupekuéra, ha Jehová avei ohayhuetereiha chupekuéra (2 Cor. 2:4; Efes. 2:4, 5). Haʼe oñamiga vaʼekue avei ermanokuérare ha ohechauka ojeroviaha hesekuéra. Por ehémplo siémpre ohasa vaʼekue tiémpo hendivekuéra, ha ndokyhyjéi vaʼekue avei omombeʼu hag̃ua chupekuéra umi mbaʼe oipyʼapýva chupe ha avei umi defékto haʼe orekóva (2 Cor. 7:5; 1 Tim. 1:15). Péro haʼe iprovléma hetáramo jepe, ndoikói vaʼekue opensa ijehénte, síno ojepyʼapy ermanokuérare ha oipytyvõse chupekuéra.

11. ¿Mbaʼérepa Pablo oñemoñeʼẽ vaʼekue umi ermáno ha ermanakuérape?

¹¹ Sapyʼánte Pablo tekotevẽ vaʼekue avei oñemoñeʼẽ umi ermanokuérape, péro ndahaʼéi vaʼekue  ojapóva upéva orremata hag̃ua hesekuéra. Haʼe oñemoñeʼẽ vaʼekue chupekuéra ojepyʼapýgui hesekuéra, ha ndoipotáigui oiko hesekuéra mbaʼeve ivaíva. Haʼe oñehaʼã vaʼekue ikatu hag̃uáicha pe ikonsého isensíllo ha oñentende porã, ha oñatende vaʼekue avei ani hag̃ua peichahágui ojejagarra vai upéva. Por ehémplo oskrivírõ guare peteĩ kárta umi coríntiope, haʼe oñemoñeʼẽ mbarete vaʼekue chupekuéra. Péro upéi omondo Títope oikuaaségui mbaʼéichapa ojagarra raʼe hikuái upe konsého. ¡Ajéiko ovyʼaiténe raʼe Pablo oikuaárõ guare ojagarra porã hague hikuái upe konsého! (2 Cor. 7:6, 7).

12. ¿Mbaʼe mbaʼépa ikatu ojapo umi ansiáno omokyreʼỹ hag̃ua ermanokuérape?

¹² ¿Mbaʼépa ikatu oaprende umi ansiáno? Umi ansiáno ikatu osegi Pablo ehémplo ohasávo tiémpo ermanokuérandi. Por ehémplo ikatu ojapo upéva og̃uahẽramo voi porã rreunionhápe, ha oñemongeta kyreʼỹ enterovéndi. Sapyʼánte ningo unos kuánto minutítonte ifálta tuicha oñemokyreʼỹ hag̃ua ermanokuérape (Rom. 1:12; Efes. 5:16). Umi ansiáno ikatu avei osegi Pablo ehémplo oipurúvo Ñandejára Ñeʼẽ omokyreʼỹ hag̃ua ermanokuérape, ha omomanduʼa hag̃ua chupekuéra mbaʼeichaitépa Jehová ohayhu káda únope. Avei haʼe voi ohechauka ohayhuha umi ermanokuérape siémpre oñemantenévo en kontákto hendivekuéra, ha ofelisitáramo chupekuéra káda ke ija chupe. Ha sapyʼánte tekotevẽtaramo oñemoñeʼẽ algún ermánope, haʼe oipuru Ñandejára Ñeʼẽ ojapo hag̃ua upéva. Upéicha jave, haʼe heʼi porãnte pe ermáno térã ermánape mbaʼépepa ikatu omehora. Péro ojapo upéva mborayhúpe ndoipotáigui haʼe ojagarra vai upéva (Gál. 6:1).

13. ¿Mbaʼéichapa ikatu hína oñeñandu peteĩ ansiáno opensáramo umi idefektokuérare?

¹³ ¿Mbaʼérepa upéva ikatu hína ijetuʼu? Enterove ansiáno ningo iñimperfékto, ha ñandéicha avei pyʼỹinte ojavy (Rom. 3:23). Upéicha rupi algúno ansiáno opensaiterei umi defékto orekóvare, omboguapyʼi umíva ijehe, ha upéicha rupi ou oñedesanima. Ha oĩ avei ótro opilláramo jepe umi defékto orekóva, haʼekuéra opensa: “No, chéngo péichante voi”. Ha upévare noñehaʼãi voi okambia.

14. Ohechaukaháicha Filipenses 4:13, ¿mbaʼépa oipytyvõ vaʼekue Páblope ani hag̃ua omboguapy ijehe idefektokuéra?

¹⁴ Pablo ehémplo. Pablo ningo opilla vaʼekue haʼe ijehegui reínte ndaikatumoʼãiha ipuʼaka umi idefektokuérare. Haʼe iñumílde vaʼekue ha orrekonose Jehová añoite ikatutaha oipytyvõ chupe. Pablo ningo ymave opersegi mbarete vaʼekue kristianokuérape, péro tiémpo rire ohechakuaa upéva oĩ vaiha ha okambia (1 Tim. 1:12-16). Jehová oipytyvõ vaʼekue chupe ikatu hag̃uáicha okambia la ilája. Upéicha rupi, tiémpo rire oiko chugui peteĩ ansiáno imbaʼerechakuaáva, iñumíldeva, ha ombyasýva iñermanokuérape. Pablo ningo oikuaa porãiterei vaʼekue umi idefektokuéra, péro  haʼe oñehaʼãmbaite vaʼekue ani hag̃ua omboguapy umíva ijehe. Haʼe ojerovia Jehová ikatuha ombohasa reínte chugui umi mbaʼe, ha operdona chupe (Rom. 7:21-25). Pablo orrekonose vaʼekue umi ilimitasión ha ndoikói ohaʼarõ perfeksión ijehegui. Upéva rangue haʼe oñehaʼãnte okambia ohóvo saʼi saʼípe, ha ojerovia Jehová oipytyvõtaha chupe ojapo porã hag̃ua hembiapo (1 Cor. 9:27; elee Filipenses 4:13).

15. ¿Mbaʼépa oipytyvõta umi ansiánope ohechakuaa hag̃ua mbaʼépepa ikatu omehora?

¹⁵ ¿Mbaʼépa ikatu oaprende umi ansiáno? Umi ermánope ningo noñenombrái ansiáno perfékto haguére. Péro Jehová oipota haʼekuéra orrekonose umi ifallakuéra, ha oñehaʼã okambia oreko hag̃ua umi kualida iporãva (Efes. 4:23, 24). Upévare iporã vaʼerã umi ansiáno oanalisáramo la Biblia ha ohecha mbaʼépepa ikatu omehora. Upéicharõ Jehová katuete oipytyvõta chupekuéra ojapo hag̃ua upéva (Sant. 1:25).

16. ¿Mbaʼépa oikóta peteĩ ansiáno oñekonsentráramo umi ermanokuéra deféktorente?

¹⁶ ¿Mbaʼérepa upéva ikatu hína ijetuʼu? Umi ansiáno ningo pyʼỹinte ombaʼapo umi ermanokuérandi kongregasiónpe, ha upéicha rupi pyaʼetereive opilla hikuái la ermanokuéra defékto. Péro noñatendéiramo hikuái, ikatu hína upéi ojopyetereíma umi ermánondi, orrenega hesekuéra, ojepicha, térã oñeʼẽ vai voi hesekuéra. Pablo oavisa vaʼekue voi umi kristiánope Satanás oipotaitereiha ñapensa upéicha (2 Cor. 2:10, 11).

17. ¿Mbaʼépa Pablo opensa vaʼekue umi ermáno ha ermanakuérare?

¹⁷ Pablo ehémplo. Haʼe ningo siémpre opensa porã vaʼekue umi ermanokuérare. Upéva ndeʼiséi ndohechái hague umi idefektokuéra, en rrealida si ohecha, pórke sapyʼánte oafekta vaʼekue avei chupe umíva. Péro Pablo oikuaa vaʼekue peteĩ ermáno ojavýramo, upéva ndeʼiseiha katuete haʼeha peteĩ mála persóna. Haʼe ningo ohayhu vaʼekue chupekuéra, ha oñekonsentra umi kualida porã haʼekuéra orekóvare. Upévare haʼe ohecháramo peteĩ ermánope ijetuʼu lentoha ojapo iporãva, haʼe nopensavaíri hese, síno ke oñehaʼãmbaite oipytyvõ chupe.

18. ¿Mbaʼépa ojapo vaʼekue Pablo Evodia ha Síntique oiko vaírõ guare, ha mbaʼépa ñanemboʼe upéva? (Filipenses 4:1-3).

¹⁸ Ñapensamíntena por ehémplo mbaʼéichapa Pablo oipytyvõ vaʼekue mokõi ermána oĩvape Filípospe (elee Filipenses 4:1-3). Koʼã ermána ningo héra vaʼekue Evodia ha Síntique, ha haʼekuéra tuicha oiko vai vaʼekue oñondive. ¿Mbaʼépa ojapo vaʼekue Pablo oipytyvõ hag̃ua chupekuéra? Haʼe noñemoĩri ojaʼo chupekuéra upe haguére. Upéva rangue haʼe oikuaa koʼã ermána iguapaitereiha, ha Jehová ohayhuetereiha chupekuéra. Upéicha rupi Pablo opensa porãnte koʼã ermánare, ha omokyreʼỹ chupekuéra ikatu hag̃uáicha osolusiona pe provléma orekóva hikuái. Jahechakuaa upéicharõ Pablo siémpre oñehaʼã hague ohecha umi kualida porã orekóva la ermanokuéra. Ha upéva oipytyvõ vaʼekue chupe ikatu hag̃uáicha ovyʼa kongregasiónpe, ha siémpre ojogueraha porã la ermanokuérandi.

19. a) ¿Mbaʼépa oipytyvõta umi ansiánope siémpre opensa porã hag̃ua ermanokuérare? b) ¿Mbaʼépa ndéve nemboʼe pe fóto ojekuaahápe pe ansiáno omopotĩva hína pe Salón?

 ¹⁹ ¿Mbaʼépa ikatu oaprende umi ansiáno? Ansianokuéra, peñehaʼãkena siémpre pehecha umi kósa iporãva orekóva la ermanokuéra. Siérto, enterove ermáno ningo iñimperfékto, péro upéicha avei káda uno oreko heta kualida iporãitereíva (Filip. 2:3). Peteĩ ansiáno ningo ikatu hína sapyʼánte opensa vai algún ermáno térã ermánare. Péro upéicha jave haʼe osegi vaʼerã Pablo ehémplo, ha oñehaʼã ohecha umi kualida porã orekóva umi ermáno oñekonsentra rangue umi ifallakuérare. Upévare iporãta umi ansiáno siémpre imanduʼáramo mbaʼéichapa umi ermáno iguapoiterei ha ohayhueterei Jehovápe. Upéicha umi ansiáno oipytyvõta ikatu hag̃uáicha kongregasiónpe entéro ojogueraha porã ha ojoayhu.

20. ¿Mbaʼépa ojapo vaʼerã ansianokuéra osegi hag̃ua oñevenefisia apóstol Pablo ehémplogui?

²⁰ Ansianokuéra, tuichaiterei ningo penepytyvõta pesegíramo peanalisa apóstol Pablo ehémplo. Upearã ikatu peipuru pe Índice de las publicaciones Watch Tower, pe párte heʼihápe “Pablo”, ha upéi “ejemplo para los ancianos”. Ha releekuévo umi artíkulo oĩva upépe, epensa mbaʼéichapa Pablo ehémplo ikatu nepytyvõ esegi hag̃ua evyʼa ne asignasiónpe.

21. ¿Mbaʼépa Jehová opensa umi ansianokuérare?

²¹ Ansianokuéra, penemanduʼákena Jehová nohaʼarõiha pendehegui perfeksión. Haʼe oipotánte pendefiél ha peneñeʼẽrendu chupe (1 Cor. 4:2). Jehová ningo omombaʼeterei vaʼekue Páblope pórke haʼe iguápo, ikyreʼỹ, ha ifiél. Upévare ikatu peĩ segúro Jehová omombaʼetereiha avei la peẽ pejapóva. Haʼe ningo “ndahesaraimoʼãi umi mbaʼe pejapo vaʼekuégui ha mbaʼéichapa pehayhu héra. Peẽ pehechauka koʼã mbaʼe pesegívo peservi umi ermánope, yma guive koʼág̃a peve” (Heb. 6:10).