1, 2. ¿Mbaʼépa jajapo vaʼerã Jehová oasepta hag̃ua ñane adorasión?

 ¿MBAʼÉPA nde repensa rehendúvo pe palávra “adorasión”? ¿Oúpa ndéve ne akãme peteĩ ermáno oñesũva hína hupa ykére ha oñemboʼe oke mboyve? ¿Térãpa repensa peteĩ família vyʼápe ostudiávare hína oñondivepa?

² Koʼã mokõive kásope jaʼekuaa oadoraha hína hikuái Jehovápe. ¿Serápa Jehová oaseptáta pe adorasión omeʼẽva chupe hikuái? Si oaseptáta ojapóramo hikuái upéva ohayhu ha orrespetágui chupe. Ñande ningo jahayhueterei Jehovápe ha jaikuaa haʼe omereseha jaadora chupe, ha jajapose upéva ñande pyʼaite guive ñameʼẽségui chupe la iporãvéva.

3. ¿Mbaʼépa jahecháta ko artíkulope?

³ Ko artíkulope jahecháta mbaʼeichagua adorasiónpa Jehová oasepta vaʼekue yma, avei 8 kósa jajapóva jaadora hag̃ua Jehovápe haʼe oipotahaichaite koʼág̃arupi. Ha jahecha aja koʼã mbaʼe, ñapensa mbaʼéichapa ikatu jajapo porãve káda uno koʼã mbaʼe. Jahecháta avei mbaʼérepa javyʼavéta jaadoráramo Jehovápe haʼe oipotahaichaite.

4. ¿Mbaʼéichapa Jehová siervokuéra yma guare ohechauka vaʼekue orrespeta ha ohayhuha Jehovápe?

⁴ Yma ningo oĩ vaʼekue umi Jehová siérvo ojerovia vaʼekue hese. Por ehémplo Abel, Noé, Abrahán ha Job. ¿Ha mbaʼéichapa haʼekuéra ohechauka vaʼekue ohayhu ha orrespetaha Jehovápe? Haʼekuéra ningo iñeʼẽrendu, ojerovia ha ojapo chupe sakrifísio. La Biblia ndeʼíri ñandéve entéro mbaʼe haʼekuéra ojapo vaʼekue oadora hag̃ua Jehovápe, péro si jaikuaa haʼekuéra ojapo  hague pe iporãvéva omombaʼeguasu hag̃ua chupe. Tiémpo rire, Moisés rupive Jehová omeʼẽ vaʼekue umi léi Abrahán familiarépe. Umívape Jehová heʼi vaʼekue espesífikamente mbaʼéichapa haʼe oipota ojeadora chupe ikatu hag̃uáicha oasepta upéva.

5. ¿Mbaʼéichapa Jehová oipota Jesús segidorkuéra oadora chupe?

⁵ Jesús omano rire, Jehová nohaʼarõvéima ñakumpli pe léi omeʼẽ vaʼekue Moisés rupive, síno Jesús omeʼẽ vaʼekue peteĩ léi pyahu. Upévare ñande jasegi vaʼerã pe “Cristo léi” (Rom. 10:4; Gál. 6:2). Kóva ko léi ndorekói peteĩ lísta tekotevẽva jaikuaa de memória ha heʼíva ñandéve mbaʼépa jajapo ha ndajajapói vaʼerã. Upéva rangue ñande jasegínte vaʼerã Jesús ehémplo ha ñakumpli umi mbaʼe haʼe omboʼe vaʼekue. Upévare enterovéva ñañehaʼãmbaite hína jasegi porã Jesús ehémplo, ha upéva ningo ‘katuete ñanembopiroʼýta’ (Mat. 11:29).

6. ¿Mbaʼe mbaʼépa ikatu jajapo ñanepytyvõ porãve hag̃ua ko artíkulo?

⁶ Jahechávo umi mbaʼe jajapóva jaadora hag̃ua Jehovápe, ñañeporandumi: “¿Mbaʼetekópa che aha hína hese kóvape, ha mbaʼépa ikatu ajapo amehorave hag̃ua?”. Ikatu oime ñapensa omacha porãmaha la ñande progréso, péro iporãta avei ñañemboʼe ha ñapensa mbaʼépepa ikatu ñamehorave ikatu hag̃uáicha jaadora porãve Jehovápe.

7. ¿Mbaʼépa Jehová opensa umi ñane ñemboʼére?

⁷ Ñande jaadora Jehovápe ñañemboʼe jave chupe. La Biblia ningo okompara pe insiénso rehe umi ñemboʼe ñande jajapóva Jehovápe (Sal. 141:2). Heʼi avei pe insiénso hyakuã asy ha ogustaiterei hague chupe. Upéicha avei, Jehovápe ogustaiterei ñañemboʼe jave chupe ñande pyʼaite guive, taisensíllo jepe raʼe umi mbaʼe jaʼéva chupe (Prov. 15:8; Deut. 33:10). Eñeimahinamíntena mbaʼeichaitépa opoko Jehováre ñañemboʼe jave chupe jaʼe hag̃ua jahayhueterei ha jaagradesetereiha chupe opa mbaʼére. Haʼe ohenduseterei voi ñamombeʼu jave chupe umi mbaʼe ñandepyʼapýva, ha mbaʼe esperánsa ha deséopa jaguereko. Upévare iporãta ñañemboʼe mboyve jajepyʼamongetáramo umi mbaʼe jaʼétavare chupe. Péicha jajapóramo jaofreséta hína ñande Ru yvagapeguápe pe insiénso iporãvéva.

8. ¿Mbaʼe oportunida iporãitereívapa jareko ñamombaʼeguasu hag̃ua Ñandejárape?

⁸ Ñande jaadora Jehovápe japredika jave (Sal. 34:1). Ñande ningo ñamombaʼeguasu Jehovápe jaʼévo ñande rapichakuérape mbaʼeichaitépa ñande jahayhu ha jaguerohory umi mbaʼe Jehová ojapo vaʼekue, ha umi kualida porãite haʼe orekóva. Ñañemotiémporamo jajepyʼamongeta hag̃ua umi mbaʼe Jehová ojapóma vaʼekuére ñanderehehápe, siémpre jarekóta álgo iporãva jaʼe hag̃ua hese ótrope. Pe predikasión rupive ningo jareko peteĩ oportunida iporãitereíva ñameʼẽ hag̃ua Jehovápe peteĩ sakrifísio, ‘jaipurúvo ñande juru jaikuaauka hag̃ua héra enterove renondépe’ (Heb. 13:15). Ha ñañemotiempoháicha ñapensa porã hag̃ua umi mbaʼe jaʼétavare ñañemboʼe jave Jehovápe, upéicha avei ñapensa porã vaʼerã umi mbaʼe jaʼétavare umi hénte japredikávape. Ñande ningo ñameʼẽ jave ñande sakrifísio Jehovápe ñameʼẽse hína pe iporãvéva, upévare ñande ñanekyreʼỹeterei voi predikasiónpe.

9. ¿Mbaʼéichapa ñandéve ñanevenefisia umi rreunión, yma ovenefisia haguéicha umi israelítape? Ikatu emombeʼu ne experiénsia.

⁹ Ñande jaadora Jehovápe ñaime jave rreunionhápe. Yma ningo umi israelítape ojeʼe vaʼekue: “Tres vése káda áño enterove kuimbaʼe oho vaʼerã Jehová pende Jára renondépe, pe lugár Jehová oiporavohápe” (Deut. 16:16). Umi israelita ningo oheja vaʼerã kuri hóga ha ikokue, ha avave ndopytamoʼãi kuri oñangareko hese. Péro Jehová opromete vaʼekue chupekuéra:  “Peẽ peho aja peñepresenta Jehová renondépe 3 vése káda áño, avave ndojagarramoʼãi pendehegui pende yvy” (Éx. 34:24). Umi israelita ningo ojerovia vaʼekue Jehováre ipyʼaite guive, ha upéicha rupi osẽ oho hikuái umi fiésta ojejapóvape káda áño. ¿Ha mbaʼépa la ohupytýva hikuái ojapo haguére upéicha? Tuicha oñevendesi chupekuéra, ontende porãve Ñandejára léi, ojepyʼamongeta hikuái umi mbaʼe porã Jehová ojapo vaʼekuére hesehapekuéra, ha avei ovyʼa hikuái umi ótro hapicha oadorávandi Jehovápe (Deut. 16:15). Ñande avei ñañevenefisia umi israelítaicha jajesakrifika jave ñaime hag̃ua rreunionhápe. Ha ñapensamíntena mbaʼeichaitépa oiméne Jehová oguerohory ohecha jave jajepreparaha rreunionrã, ha ñameʼẽha umi komentário mbyky ha ideprovechoitereíva.

10. ¿Mbaʼérepa iñimportantete japurahéi Jehovápe jaadora hag̃ua chupe?

¹⁰ Ñande jaadora Jehovápe japurahéi jave oñondivepa (Sal. 28:7). Umi israelítape g̃uarã ningo iñimportánte vaʼekue opurahéi oadora hag̃ua Jehovápe. Rréi David oiporavo vaʼekue voi 288 levítape opurahéi hag̃ua pe témplope (1 Crón. 25:1, 6-8). Koʼág̃arupi avei ñande japurahéi Jehovápe jahechauka hag̃ua jahayhu ha ñamombaʼeguasuha chupe. Ha naiñimportanteguasúi hína ñandépa japurahéi porã térãpa nahániri. Jahechamína peteĩ ehémplo. Ñande ñañeʼẽ jave ningo heta vése ikatu jajavy, péro ndahaʼéi upe haguérente ñande nañañeʼẽvéimava rreunionhápe ni predikasiónpe (Sant. 3:2). Upéicha avei oiméramo ñande vos ndahaʼéi hína la iporãmbáva, upéva nañandejokomoʼãi ni nañandepyʼapymoʼãi ñamombaʼeguasu hag̃ua Jehovápe.

11. Heʼiháicha Salmo 48:13-pe, ¿mbaʼérepa ñañemotiémpo vaʼerã jastudia hag̃ua la Biblia ñane familiakuérandi?

¹¹ Ñande jaadora Jehovápe jastudia jave la Biblia ñane familiakuérandi. Yma ningo umi israelita oaparta vaʼekue pe día sábado oñekonsentra hag̃ua pe amista orekóvare Jehovándi (Éx. 31:16, 17). Umi israelita ifiélva omboʼe vaʼekue ifamiliakuérape mbaʼeichaitépa Jehová imbaʼeporã hendivekuéra. Ñande avei jareko la ovligasión ñañemotiémpovo jalee ha jastudia hag̃ua la Biblia, pórke péicha jajapóramo jaadora hína Jehovápe, ha péva ñanepytyvõta avei ñañemoag̃uive hag̃ua hese (Sal. 73:28). Ha jastudia jave la Biblia ñane famíliandi, ñamboʼe hína chupekuéra oreko hag̃ua peteĩ amista imbaretéva Jehovándi (elee Salmo 48:13).

12. ¿Mbaʼépa Jehová opensa vaʼekue pe traváho ojejapo vaʼekuére pe tavernákulope, ha mbaʼépa ñanemboʼe upéva?

¹² Ñande jaadora Jehovápe jaapojávo umi projékto de konstruksión orekóva iñorganisasión. La Biblia ningo heʼi pe traváho ojejapo vaʼekue pe tavernákulope ha umi muévle oĩ vaʼekue upépe sagrádo hague (Éx. 36:1, 4). Koʼág̃arupi avei Jehovápe g̃uarã sagrádo hína umi traváho ojejapóva oñemopuʼã hag̃ua peteĩ Salón del Reino ha umi ótro lugár ojepurúva ojeadora hag̃ua chupe. Oĩ ningo umi ermáno ha ermanakuéra oipurúva heta itiémpo ojapo hag̃ua koʼã mbaʼe. ¡Ajépa ñamombaʼete la ojapóva hikuái Ñandejára Rréino rehehápe! Jaikuaaháicha haʼekuéra opredika avei, ha oĩ voi ijapytepekuéra ojaposéva iprekursorádo. ¿Mbaʼéichapa umi ansiáno ikatu oapoja umi konstruksión ha avei umi ermáno ombaʼapóvape umívape? Por ehémplo, peteĩva ojeruréramo iprekursorádo rregulár ha okalifika upearã, ndaipóri provléma oñenombra hag̃ua chupe. Ha ñande ndahaʼéiramo jepe profesionál la konstruksiónpe, lomímonte enterove ikatu ñaipytyvõ ñamopotĩ ha ñamantene hag̃ua ñane Salón.

13. ¿Mbaʼépa jajapo hína ñameʼẽ jave ñane kontrivusión Jehovápe g̃uarã?

¹³ Ñande jaadora Jehovápe ñameʼẽvo ñane kontrivusión. Umi israelita ningo yma noñepresentái vaʼerã kuri Jehová renondépe po nandi (Deut. 16:16). Umi mbaʼe haʼekuéra ogueraháva Jehovápe, ogueraha vaʼerã hikuái  pe iposivilida omeʼẽmiháicha. Péicha haʼekuéra ohechauka vaʼekue oagradeseha entéro mbaʼe Jehová ojapo vaʼekue hesehapekuéra. ¿Ha mbaʼéichapa ñande ikatu jaagradese avei Jehovápe entéro mbaʼe ojapo vaʼekuére ñanderehehápe? Upearã ñande ikatu ñakontrivui ñande posivilida omeʼẽmiháicha, ha ikatu ñameʼẽ upéva ñane kongregasiónpe voi ha avei pe óvra mundiálpe g̃uarã. Apóstol Pablo ningo heʼi vaʼekue voi: “Ñandejára oguerohoryeterei umi hénte omeʼẽramo umi rregálo ipyʼaite guive. Pórke haʼe ohaʼarõ peteĩ persóna omeʼẽ pe ikatúva, ndahaʼéi pe ikatuʼỹva” (2 Cor. 8:4, 12). Jehová ningo ovaloraiterei umi kontrivusión ñameʼẽva ñande pyʼaite guive, tamichĩ jepe raʼe upéva (Mar. 12:42-44; 2 Cor. 9:7).

14. Ohechaukaháicha Proverbios 19:17, ¿mbaʼépa Jehová opensa ñanderehe ñaipytyvõ jave ñane ermanokuéra oikotevẽvape?

¹⁴ Ñande jaadora Jehovápe ñaipytyvõ jave ñane ermanokuéra oikotevẽvape. Jehová opromete vaʼekue umi israelítape ovendesitaha chupekuéra oipytyvõramo umi imboriahúvape (Deut. 15:7, 10). Ha ñande kásope katu, káda ves ke ñaipytyvõ ñane ermanokuéra oikotevẽvape, Jehová heʼi voi la jajapóva haʼeha peteĩ rregálo chupe g̃uarã (elee Proverbios 19:17). ¿Mbaʼérepa jaʼekuaa upeichaha? Vuéno, umi kristiáno oikóva Filípospe oipytyvõrõ guare apóstol Páblope oĩ aja préso, haʼe heʼi voi la ojapóva hikuái ojoguaha “peteĩ sakrifísio iporã ha hyakuã asývape Ñandejárape g̃uarã” (Filip. 4:18). Upévare iporãta ñapensáramo umi ermáno ha ermanakuéra oĩvare ñane kongregasiónpe, ha ñañeporandu: “¿Mávapepa ikatu che aipytyvõ?”. Jehová ningo ovyʼaiterei ohecha jave jaipuruha ñane tiémpo, ñande fuérsa, ñande avilida térã umi mbaʼe jarekóva ikatu hag̃uáicha ñaipytyvõ ñane ermanokuéra oikotevẽvape. Ha jajapo jave koʼã mbaʼe, Jehová heʼi voi jaadoraha hína chupe (Sant. 1:27).

15. ¿Mbaʼérepa ñandéve g̃uarã ndahaʼéi peteĩ kárga jaservi Jehovápe?

¹⁵ Jahecháma haguéicha, oĩ hetaiterei mbaʼe jajapóva jaservi hag̃ua Jehovápe. Péro ñandéve g̃uarã koʼã mbaʼe ndahaʼéi peteĩ kárga (1 Juan 5:3). ¿Mbaʼérepa? Pórke ñande jahayhueterei Jehovápe. Ñamoĩmína peteĩ ehémplo ñantende hag̃ua upéva. Eñeimahinamína peteĩ mitãʼi ojaposeha peteĩ divúho orregala hag̃ua itúape. Pe mitãʼi hetaiterei tiémpo oiko hese. ¿Serápa haʼe ombyasýta pe tiémpo oipuru vaʼekue ojapo hag̃ua pe rregálo itúape g̃uarã? ¡Ni mbaʼevéicharõ! Pórke haʼe ohayhueterei la itúape, ha ovyʼaiterei ikatu haguére omeʼẽ chupe algitomi. Ha ñande kásope upeichaite avei. Ñande jahayhueterei Jehovápe, upévare nañambyasýi pe tiémpo jaipurúva jaservi hag̃ua chupe, ha la jajapóva guive hesehápe, jajapo ñande pyʼaite guive.

16. Ohechaukaháicha Hebreos 6:10, ¿mbaʼépa Jehová opensa ñanderehe ohecha vove ñañehaʼãmbaiteha jaservi hag̃ua chupe?

¹⁶ Umi sy ha túa ningo ohayhueterei ifamiliakuérape, ha oikuaa porã káda uno idiferenteha ojuehegui. Upéicha rupi haʼekuéra nohaʼarõmoʼãi káda uno umi ifamília omeʼẽ chupekuéra el mísmo rregálo. Ha upéicha avei, ñande Túa Jehová oikuaa porã káda uno ñane situasión idiferenteha ojuehegui. Upévare ikatu oime nde voi ereko la posivilida ejapo hag̃ua hetave mbaʼe ne hénte ha ne amigokuéragui Jehová servísiope. Térã a lo mehór haʼekuéra ikatu ojapo hetave mbaʼe ndehegui. Ikatu oime koʼág̃a ndeedáma, nderasykatu térã ereko rresponsavilida nde rogapýpe, ha upéicha rupi ndaikatúi ejapo entéro mbaʼe ejaposéva Jehová servísiope. Oiméramo upéicha, aníkena reñedesanima (Gál. 6:4). Jehová ndahesaraimoʼãi umi mbaʼe nde rejapo vaʼekuégui. Reñehaʼãmbaitéramo ejapo hag̃ua la Jehovápe ogustáva rehayhúgui chupe, haʼe ndeguerohorýta katuete (elee Hebreos 6:10). Jehová ningo ohecha  nde rejaposetereiha oimeraẽ mbaʼe hesehápe, ha upévante voi ja ovaletereíma chupe g̃uarã. Haʼe ningo oipota nde revyʼa ha reñeñandu porã umi mbaʼe ikatúvare ejapo eservi hag̃ua chupe.

17. a) ¿Mbaʼépa ñanepytyvõta oiméramo ijetuʼu ñandéve jajapo hag̃ua peteĩva umi mbaʼe ñaanalisa vaʼekue? b) ¿Mbaʼéichapa nepytyvõma ndéve peteĩva umi mbaʼe ojehechaukáva pe rrekuádrope? (Ehecha pe rrekuádro “ ¿Mbaʼépa ejapokuaa evyʼave hag̃ua?”).

¹⁷ ¿Mbaʼépa ñanepytyvõta sapyʼánte ijetuʼúramo ñandéve jajapo hag̃ua peteĩva umi mbaʼe ñaanalisa vaʼekue? Por ehémplo, ¿ijetuʼúpa ndéve esẽ hag̃ua predikasiónpe, térã ejapo hag̃ua nde estúdio personál? ¿Mbaʼépa nepytyvõta oiméramo oiko nderehe upéva? Eñehaʼãmbaite ejapo meme umíva. En rrealida amáske jajapo koʼã mbaʼe, igustovéta hína ñandéve. Ñamoĩmína peteĩ ehémplo. Ñamoĩ chupe reaprendeseha rembopu peteĩ instruménto musikál. Oiméramo avésente reñakarama hese, hasy léntota nevakeáno hag̃ua ha embopukuaa hag̃ua upe instruménto. Péro eñehaʼãmbaitéramo káda día epraktika sapyʼaitemi jepe, saʼi saʼípe ni nereñandumoʼãvéima pe tiémpo ohasáva pórke osẽ porãvétama ndéve, edisfrutavéta ha ehaʼarõitereítama voi káda día og̃uahẽ upe moménto epraktika hag̃ua. Ha peichaiténte avei ikatu ejapo la oiméramo ijetuʼu ndéve peteĩva umi mbaʼe ñaanalisa vaʼekue.

18. ¿Mbaʼépa la iñimportantevéva ikatúva jajapo, ha mbaʼépa jahupytýta jajapóramo upéva?

¹⁸ Ñande ningo jaservise Jehovápe ñande pyʼaite guive, ha en rrealida ndaipóri voi ótra kósa iñimportantevéva upévagui. Ñañemeʼẽmbaitéramo Jehová servísiope ikatúta javyʼa ha ñañeñandu porã koʼág̃ama voi. Ha hiʼarive jarekóta la esperánsa jajapóvo upéva pára siémpre (Prov. 10:22). Avei koʼág̃ama voi ikatu ñañeñandu trankílo, pórke jaikuaa Jehová si o si oipytyvõha isiervokuérape ijetuʼu jave hendivekuéra (Is. 41:9, 10). Ndaipóri jaduda hag̃ua. ¡Jaservíramo ñande Túa Jehovápe, javyʼáta rreálmente! Ha heʼiháicha la Biblia, haʼe ‘omerese enterove omombaʼe ha ombotuicha’ chupe (Apoc. 4:11).