1, 2. a) ¿Mávarepa ñepyrũrã oñekumpli Mateo 24:12? b) ¿Mbaʼéichapa lívro de Hechos omombeʼu heta kristiáno ypykue osegi hague ohechauka mborayhu? (Ehecha pe taʼanga oĩva iñepyrũme).

JESÚS oñeʼẽrõ guare “ko múndo ára pahaite” rehe heʼi kuri: “Hetaiterei hénte ndojoayhumoʼãvéima” (Mat. 24:3, 12). Upéva ojekuaa kuri umi judío síglo primeropeguáre. Haʼekuéra heʼi kuri ijehe haʼeha Ñandejára puévlo péro ou ndohayhuguasuvéi chupe.

² Péro heta kristiáno upe tiempopegua “oikuaauka meme [...] pe marandu porã oñeʼẽva Cristo Jesús rehe”, ha ohechauka ohayhuha Ñandejárape, iñermanokuérape ha avei umi ndahaʼéivape kristiáno (Hech. 2:44-47; 5:42). Upéicharõ jepe oĩ mimi avei ijapytepekuéra mbeguekatúpe oúva ndohayhuvéi Ñandejárape.

3. ¿Mbaʼérepa oiméne Éfesope oĩ vaʼekue kristiáno ndoporohayhuvéiva?

³ Jesús heʼi vaʼekue umi kristiáno Efesoguápe: “Nderehayhuvéima Ñandejárape, rehayhu haguéicha chupe iñepyrũme” (Apoc. 2:4). ¿Mbaʼérepa heʼi chupekuéra upéicha? Pórke umi  hénte oikóva Éfesope opensa vaʼekue ijehénte, ha oiméne umi kristiánore ova avei haʼekuéra opensa lája (Efes. 2:2, 3). Éfeso haʼe vaʼekue peteĩ siuda irrikoitereíva, ha umi oikóva upépe ohayhueterei umi mbaʼerepy. Avei hekovai ha ndorrespetái hikuái Ñandejára Léi. Haʼekuéra omeʼẽsénte gústo ijupe, ohayhu rangue Ñandejárape ha hapichakuérape.

4. a) ¿Mbaʼéichapa opensa koʼág̃a heta hénte ndoporohayhuvéi rupi? b) ¿Mbaʼépa jahecháta ko artíkulope?

⁴ Jesús heʼírõ guare “hetaiterei hénte ndojoayhumoʼãvéima” oñeʼẽ avei kuri ñane tiémpore. Amáske jaha hese, umi hénte koʼag̃agua menove ohayhu Ñandejárape. Ojerovia rangue haʼe osolusionataha umi provléma oĩva ko múndope, ojeroviave yvyporakuéra organisasiónre. Añetehápe pe mborayhu opa ohóvo. Upévare, Jehová siervokuéra jepe ikatu hína mbeguekatúpe ndoporohayhuvéi, oiko haguéicha ymave Éfesope. ¿Mbaʼépa jajapo vaʼerã ani hag̃ua oiko ñanderehe upéva? Ko artíkulope jahecháta mbohapy mbaʼe: 1) tekotevẽ jahayhu Jehovápe, 2) jahayhu pe añetegua oĩva la Bíbliape, ha 3) jahayhu ñane ermanokuérape.

5. ¿Mbaʼérepa jahayhu vaʼerã Ñandejárape?

⁵ ¿Mávapepa jahayhuve vaʼerã? Jesús heʼi vaʼekue: “Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve’. Kóva hína pe mandamiénto tuichavéva ha tenondegua” (Mat. 22:37, 38). Jahayhúramo Ñandejárape jajapóta umi mbaʼe omandáva ñandéve, jagueropuʼakáta umi situasión ijetuʼúva ha ñanembojeguarúta umi mbaʼe vai (elee Salmo 97:10). Satanás ha imúndo oñehaʼãmbaite ñanemokangy ani hag̃ua jahayhuve Ñandejárape.

6. ¿Mbaʼépa ojapo umi hénte ndohayhuvéi rupi Ñandejárape?

⁶ Ko múndope umi hénte ndohechái pe mborayhu Ñandejára ohechaháicha. Haʼekuéra ijehénte ojepyʼapy ohayhu rangue Ñandejárape (2 Tim. 3:2). Satanás múndo oipota jahayhu “ñande rete rembipota vai, ñande resa oipotáva, ha jaiko jajechaukase umi mbaʼe jarekóvare” (1 Juan 2:16). Apóstol Pablo oavisa porã vaʼekue umi kristiánope ndohoporãmoʼãiha chupekuéra oikóramo hete rembipota vai rapykuéri. Haʼe heʼi: “Ñapensa meméramo ñande rete rembipotáre, ñamanóta [...], oikóta ñandehegui Ñandejára enemígo” (Rom. 8:6, 7). Umi persóna oipurupaitéva itiémpo ombyaty hag̃ua pláta ha oñemeʼẽ hag̃ua tekovaípe, amo ipahápe ndovyʼái jey ha oike heta akãrasýpe (1 Cor. 6:18; 1 Tim. 6:9, 10).

7. ¿Mbaʼeichagua pensamiéntopa ikatu omokangy kristianokuérape?

⁷ Heta ningo oĩ ndogueroviáiva oĩha peteĩ Apohare, térã heʼíva ndaiporiha pruéva oexistiha. Avei heta hénte oguerovia pe evolusión. Koʼãichagua persóna omboliga umi ótrope ani hag̃ua ohayhu Ñandejárape ni oguerovia haʼe oexistiha. Haʼekuéra heʼi umi persóna ijestudioʼíva térã itavývante ogueroviaha oĩha peteĩ Apohare. Avei, heta hénte orrespetave umi sientífikope orrespeta rangue ñande Apoharépe (Rom. 1:25). Kristianokuérape jepe ikatu omokangy hína koʼãichagua pensamiénto. Oikóramo upéva, ikatu jaju ñañemomombyry Jehovágui ha ndajahayhuvéi chupe (Heb. 3:12).

8. a) ¿Mbaʼépa ikatu omokangy heta Jehová siervokuérape? b) ¿Mbaʼéichapa ñanemokyreʼỹ pe Salmo 136?

⁸ Oĩ heta mbaʼe ikatúva ñanemokangy jaiko aja Satanás múndo añáme (1 Juan 5:19). Jahejáramo umi vyʼaʼỹ ipuʼaka ñanderehe ikangýta ohóvo ñande jerovia ha ikatu  jaju ndajahayhuvéi Ñandejárape. Por ehémplo, ikatu ijetuʼu ñanendive ñandeeda haguére, ñanderasykatúgui térã ñandesogue rupi. Sapyʼánte ñañeñandu vai avei ñapensa rupi ndaikatuiha jajapo peteĩ mbaʼe ñande jajaposeháicha, térã oĩgui algúna kósa nosẽiva ñahaʼãrõ haguéicha. Tahaʼe haʼéva umi mbaʼe jahasáva, arakaʼeve nañapensái vaʼerã Jehová ñanderejaha ñaneaño. Upéva rangue, ñapensa vaʼerã Salmo 136:23 heʼívare: “Ñaime vaietérõ guare Ñandejára ndahesaráiri ñandehegui. Peagradese chupe pórke haʼe siémpre oporohayhu ha ndofallái avavéndi” (TNM). Jajeroviákena Jehová katuete ñanerenduha jajerure jave chupe ñanepytyvõmi hag̃ua (Sal. 116:1; 136:24-26).

9. ¿Mbaʼépa oipytyvõ Páblope ohayhu hag̃ua Ñandejárape ipyʼaite guive?

⁹ Apóstol Pablo imanduʼa meme vaʼekue mbaʼéichapa Jehová oipytyvõ chupe, ha upéicha rupi osegi ojerovia. Haʼe heʼi: “Jehová chepytyvõ hína, ndakyhyjemoʼãi, ¿mbaʼe piko ojapóta cherehe peteĩ yvypórante?” (Heb. 13:6). Pablo ojeroviaiterei rupi Jehováre ogueropuʼaka vaʼekue heta mbaʼe. Ohasárõ guare umi situasión ijetuʼúva siémpre oñemoĩ Jehová pópe. Upévare, ojeguerahárõ guare kárselpe, lomímonte osegi oskrivi kárta umi kongregasiónpe omokyreʼỹ hag̃ua iñermanokuérape (Efes. 4:1; Filip. 1:7; Filem. 1). Tahaʼe haʼéva umi provléma Pablo ombohovái vaʼekue, siémpre ohayhu Jehovápe ipyʼaite guive. Haʼe ojerovia meme Ñandejárare “omeʼẽva opaichagua konsuélo”, ñanekonsoláva “opa umi ñande jehasa asýpe” (2 Cor. 1:3, 4). ¿Mbaʼéichapa ikatu jasegi Pablo ehémplo?

10. ¿Mbaʼépa ñanepytyvõta siémpre jahayhu hag̃ua Jehovápe?

¹⁰ Pablo heʼi kuri mbaʼépa ñanepytyvõta jasegi hag̃ua jahayhu Ñandejárape. Haʼe oskrivi vaʼekue: “Peñemboʼe jey jeýkena”. Upéi heʼi avei: “Peñemboʼe memékena” (1 Tes. 5:17; Rom. 12:12). ¿Mbaʼérepa ikatu jaʼe ñañemboʼérõ ñañemoag̃uivetaha Ñandejárare? Pórke péicha ñañeʼẽ hína hendive. Ñamboykéramo tiémpo ñañemboʼe hag̃ua Jehovápe, ñamombaretevéta pe amista jarekóva hendive (Sal. 86:3). Ñamombeʼúrõ ñande Ru yvagapeguápe umi mbaʼe ñapensáva ha ñañandúva, ñañemoag̃uivéta hese (Sal. 65:2). Ha jahecha jave Jehová ombohovaiha ñane ñemboʼe, koʼýte jahayhuvéta chupe. Ñaiméta segúro haʼe ndohejaiha “umi hese ojeroviávape” (Sal. 145:18, TNM). Ñaĩramo segúro Ñandejára ñanderayhuha ha ñanepytyvõtaha, ñambohováita oimeraẽ provléma oñepresentáva ñandéve koʼág̃a ha amo gotyove.

11, 12. ¿Mbaʼépa ikatu ñanepytyvõ jahayhuve hag̃ua pe añetegua oĩva la Bíbliape?

¹¹ Entéro kristiáno ningo jahayhu pe añetegua, ha Ñandejára Ñeʼẽme jatopa upéva. Jesús heʼi vaʼekue Itúape: “Ne ñeʼẽ hína pe añetegua” (Juan 17:17). Jahayhu hag̃ua pe añetegua oĩva la Bíbliape jaikuaa raẽ vaʼerã la oĩva pype (Col. 1:10). Péro tekotevẽ jajapo hetave mbaʼe. Jahechamína mbaʼéichapa pe Salmo 119 heʼíva ikatu ñanepytyvõ jahayhu hag̃ua pe añetegua oĩva la Bíbliape (elee Salmo 119:97-100). Káda día jalee vaʼerã la Biblia, ha pe día pukukue jajepyʼamongeta vaʼerã hese. Ñapensárõ mbaʼéichapa ñanevenefisia umi konsého oĩva pype, jahayhuvéta Ñandejára Ñeʼẽ.

¹² Pe salmísta heʼi: “Ñandejára, chegustaiterei ne ñeʼẽ, haʼete voi heʼẽ asýva che jurúpe, chéve g̃uarã heʼẽve eiretégui” (Sal. 119:103, TNM). Umi puvlikasión onohẽva Ñandejára organisasión ha  oñemopyendáva Iñeʼẽme, haʼete voi umi tembiʼu hetereíva. Jaʼu jave peteĩ tembiʼu ñandegustáva ñañemotiémpo jadisfruta hag̃ua. Upéicha avei jastudia jave Ñandejára Ñeʼẽ ndajajapói vaʼerã pyaʼe pyaʼe. ¿Mbaʼérepa? Pórke péicha jadisfrutáta jaleévo “umi palávra porã porã”. Avei ifasilvéta ñandéve ñanemanduʼa hag̃ua umi mbaʼe jaleévare ha jaipurúta umíva ñaipytyvõ hag̃ua ótrope (Ecl. 12:10, TNM).

13. a) ¿Mbaʼépa oipytyvõ Jeremíaspe ohayhu hag̃ua pe añetegua oĩva Ñandejára Ñeʼẽme? b) ¿Mbaʼépa ojapo Jeremías ohayhu rupi Ñandejára Ñeʼẽ?

¹³ Proféta Jeremías ohayhu vaʼekue pe añetegua oĩva Ñandejára Ñeʼẽme. Haʼe heʼi: “Arresivírõ guare ne ñeʼẽ amoĩ che pyʼapýpe. Ha ne ñeʼẽ chembovyʼa ha chembopyʼarory, pórke che agueraha nde réra Jehová, pe ehérsito yvagapegua Ruvicha” (Jer. 15:16, TNM). Jeremías ohayhu vaʼekue Ñandejára Ñeʼẽ ha ojepyʼamongeta meme hese. Haʼe omombaʼe ikatu haguére oñeʼẽ Jehová rérape ha omombeʼu pe marandu oúva chugui. Jahayhúrõ pe añetegua, ñamombaʼéta pe priviléhio jarekóva ñañehenói haguére testígo de Jehová, ha ikatu rupi ñañeʼẽ Irréinore koʼã ára pahápe.

14. ¿Mbaʼépa ikatu avei jajapo jahayhuve hag̃ua pe añetegua oĩva la Bíbliape?

¹⁴ ¿Mbaʼépa ikatu avei jajapo jahayhuve hag̃ua pe añetegua oĩva la Bíbliape? Tekotevẽ jaha meme rreunionhápe, upépe ningo Jehová ñanemboʼe. Por ehémplo, káda semána haʼe ñanerekomboʼe espesiálmente ñahesaʼỹijóvo la Biblia pe Ñemañaha rupive. Jaaprovecha porã hag̃ua pe estúdio iñimportanteterei jajeprepara porã. Upearã, iporãta jahekapaite umi téxto ojesitáva. Koʼág̃a ifasilve jalee térã jadeskarga ko rrevísta ñande sítiogui oĩva Internétpe. Ko rrevísta oĩ disponívle hetaiterei idiómape jw.org-pe, ha avei pe aplikasión JW Library-pe. Oĩ formáto elektróniko ñanepytyvõva jatopa pyaʼeve hag̃ua umi téxto ojesitáva. Péro tahaʼe haʼéva umi médio jaipurúva jastudia hag̃ua umi artíkulo, tekotevẽ jalee umi téxto ha jajepyʼamongeta hese. Péicha katuete jahayhuvéta  pe añetegua oĩva la Bíbliape (elee Salmo 1:2).

15, 16. a) ¿Mbaʼe mandamiéntopa Jesús omeʼẽ vaʼekue Juan 13:34, 35-pe? b) ¿Mbaʼérepa ikatu jaʼe jahayhúrõ Ñandejárape ha la Biblia jahayhutaha avei ñane ermánope?

¹⁵ Pe pyhare Jesús omano mboyvemi heʼi vaʼekue idisipulokuérape: “Ameʼẽ peẽme peteĩ mandamiénto pyahu: pejoayhúkena. Che pohayhu haguéicha, peẽ pejoayhu vaʼerã avei. Péicha pejoayhúramo, enterove ohechakuaáta peẽ haʼeha che disípulo” (Juan 13:34, 35).

¹⁶ Jahayhúramo Jehovápe jahayhúta avei ñane ermáno ha ñane ermanakuérape. Ñande ndajahayhúirõ Ñandejárape ndaikatumoʼãi jahayhu ñane ermanokuérape. Upéicha avei ndajahayhúirõ ñane ermanokuérape ndaikatúi jaʼe jahayhuha Ñandejárape. Apóstol Juan oskrivi vaʼekue: “Oĩramo heʼíva: ‘Che ahayhu Ñandejárape’, péro ndohayhúi iñermánope, ijapu. Ndaikatúi ohayhu Ñandejárape arakaʼeve ndohecháivape, ndohayhúiramo iñermáno ohechávape” (1 Juan 4:20). Jahayhúramo Jehovápe ha ñane ermanokuérape jahechaukáta jahayhuha avei la Biblia. ¿Mbaʼérepa jaʼe upéva? Pórke jahayhúrõ umi mbaʼe ñaaprendéva la Bíbliagui jajapóta la heʼíva, ha upépe oñemanda ñandéve jahayhu hag̃ua ñande pyʼaite guive Ñandejárape ha ñane ermanokuérape (1 Ped. 1:22; 1 Juan 4:21).

17. ¿Mbaʼe mbaʼépa ikatu jajapo jahechauka hag̃ua jahayhuha ñane ermanokuérape?

¹⁷ (Elee 1 Tesalonicenses 4:9, 10). ¿Mbaʼéichapa ikatu jahechauka jahayhuha ñane ermanokuérape? Ikatu ningo ñañekuaveʼẽ jagueraha hag̃ua rreunionhápe umi ermáno ijedávape, térã ikatu oĩ viúda oikotevẽva oñemyatyrõ algúna kósa hógape (Sant. 1:27). Avei oĩ ermáno ha ermána naikyreʼỹvéiva, oñedeprimíva térã ombohováiva ótra situasión ijetuʼúva. Tekotevẽ ñaanima ha ñakonsola umi ohasávape koʼã mbaʼe, térã jahechauka jajepyʼapyha hesekuéra ambue hendáicha (Prov. 12:25; Col. 4:11). Jahechaukákena jahayhuha ñane ermanokuérape umi mbaʼe jaʼéva ha jajapóva rupive (Gál. 6:10).

18. ¿Mbaʼépa ñanepytyvõta ñasolusiona hag̃ua umi provléma jarekóva ñane ermánondi?

¹⁸ La Biblia heʼi koʼã “ára pahápe” heta hénte ohayhuvetaha umi mbaʼerepy ha opensáta ijehénte (2 Tim. 3:1, 2). Upéicha rupi entéro kristiáno oñehaʼãmbaite vaʼerã ohayhuve Jehovápe, Iñeʼẽ ha iñermanokuérape. Entéro ningo ñaneimperfékto, upévare sapyʼánte ikatu jajoavyʼimi ñane ermánondi. Péro jajoayhu rupi ñañehaʼãta ñasolusiona opaichagua provléma mborayhúpe, ha jajapóta upéva pyaʼe porã voi (Efes. 4:32; Col. 3:14). Aníkena arakaʼeve jaheja ikangy ñane mborayhu, jasegi guei jahayhu ñande pyʼaite guive Jehovápe, Iñeʼẽ ha ñane ermanokuérape.