1, 2. a) ¿Mbaʼérepa ñanemokyreʼỹ jahechávo umi ermáno opredikaha umi território ijetuʼúvape? (Ehecha pe taʼanga oĩva iñepyrũme). b) ¿Mbaʼépa heʼi vaʼekue Jesús pe predikasión ojapóvare “ivállepe”? (Ehecha pe nóta).

SERGIO HA OLINDA ningo peteĩ matrimónio oservíva de prekursór Estados Unídospe. Mokõivéva oreko mas de 80 áño, ha ojapo un tiémpo oñepyrũ hague hetyma rasy hikuái ha ndaikatuvéi oguata puku. Upéicharõ jepe, káda pyhareve la 7 de la mañána oho hikuái peteĩ plásape ohasahárupi heta hénte. Haʼekuéra heta áñorema oñemoĩ hague peteĩ paráda de kolektívo ypýpe oĩva pe plásape, ha oofrese umi puvlikasión umi persóna ohasávape upérupi. La majoría umi hénte nopenái Sergio ha Olíndare, péro haʼekuéra osegi upépe ha hory umi omañávape hesekuéra. Asajekue, oho jey hikuái mbeguekatu asy yvýrupi hógape. Al ótro día, Sergio ha Olinda oho jey la 7 de la mañána pe paráda de kolektívo ypýpe. Péicha ojapo hikuái tódo el áño, 6 día a la semána.

² Heta ermáno ha ermána ojapo avei Sergio ha Olinda ojapoháicha. Haʼekuéra osegi opredika heta áñorema la majoría umi hénte oĩva iterritóriope nohenduséiramo jepe. Ikatu oime nde  repredika avei peteĩ território ijetuʼúvape ha resegi reaguanta. Añetehápe iporãiterei la rejapóva. * Ne ehémplo omokyreʼỹ heta ermáno ha ermána oservívape Jehovápe heta tiémporema. Peteĩ superintendénte de sirkuíto heʼi vaʼekue: “Chemokyreʼỹeterei asẽ jave umi ermáno ha ermána ifiélvandi”. “Iñehemplokuéra chepytyvõ asegi hag̃ua tenonde gotyo ha chepyʼaguasu hag̃ua predikasiónpe”. “Añetehápe opokoiterei cherehe iñehemplokuéra”.

3. ¿Mbaʼépa ñarrespondéta ko artíkulope, ha mbaʼérepa?

³ Ko artíkulope ñambohováita koʼã mbohapy porandu: ¿Mbaʼérepa sapyʼánte ikatu ñañedesanima? ¿Mbaʼépa heʼise japrodusi Jehová servísiope? ¿Mbaʼépa ñanepytyvõta jasegi hag̃ua japrodusi tekotevẽramo jepe ñaaguanta heta mbaʼe ijetuʼúva? Ñarrespondemína koʼã porandu, péicha ñanekyreʼỹvéta jasegi hag̃ua japredika Jesús omanda haguéicha.

4. a) ¿Mbaʼéichapa oñeñandu Pablo la majoría umi judío nohenduséi haguére chupe? b) ¿Mbaʼérepa Pablo oñeñandu péicha?

⁴ ¿Reñedesanimápa sapyʼánte umi hénte nde territoriopegua nohenduséi rupi umi marandu porã? Oimérõ péicha, katuete rentendéta mbaʼéichapa oñeñandu vaʼekue apóstol Pablo. Haʼe opredika 30 áñorupi ha oipytyvõ hetápe oiko hag̃ua chuguikuéra kristiáno (Hech. 14:21; 2 Cor. 3:2, 3). Upéicharõ jepe, la majoría umi judío nohenduséi pe mensáhe ha oĩ voi opersegíva chupe. Upévare haʼe ndaikatúi oipytyvõ heta judíope oiko hag̃ua chuguikuéra kristiáno (Hech. 14:19; 17:1, 4, 5, 13). ¿Mbaʼéichapa oñeñandu Pablo oĩ haguére nohenduséiva chupe? Haʼe heʼi: “Ndachejapúi haʼévo añembyasyetereiha ha opa árape chejopyha che korasõ” (Rom. 9:1-3). ¿Mbaʼérepa Pablo oñeñandu péicha? Haʼe omombaʼe ipyʼaite guive pe predikasión ha ohayhueterei umi héntepe. Ñandejára ningo oiporiahuvereko vaʼekue umi judíope, ha Pablo ombyasy nomombaʼéi haguére hikuái upéva.

5. a) ¿Mbaʼépa ñanemomýi japredika hag̃ua? b) ¿Mbaʼérepa sapyʼánte ikatu ñañedesanima?

⁵ Pablo ojapo haguéicha, ñande japredika jajepyʼapýgui umi héntere ha ñaipytyvõségui chupekuéra (Mat. 22:39; 1 Cor. 11:1). Jaikuaa igustoitereiha jaservi Jehovápe ha ndaiporiha ótra kósa iporãvéva upévagui. Upéicha rupi ñaipytyvõ ñande rapichápe ovyʼa hag̃ua avei ñandéicha. Avei ñamokyreʼỹ umi héntepe oikuaa hag̃ua Jehovápe ha mbaʼe propósitopa oreko yvyporakuérape g̃uarã. Jajapóvo koʼã mbaʼe haʼete ñameʼẽva chupekuéra peteĩ rregálo iporãitereíva ha jajerure asýva: “¡Easeptamína!”. Orrechasáramo hikuái ko rregálo ikatu voi ñañeñandu Pábloicha, ñambyasy chupekuéra ñande pyʼaite guive. Ñande ñañeñandu péicha jahayhu añetégui umi héntepe, ndahaʼéi ñande jerovia ikangy haguére. Upévare, sapyʼánte ñañedesanimáramo jepe, jasegi japredika. Peteĩ ermána hérava Elena oservímava de prekursóra 25 áñore heʼi: “Heta vése ijetuʼu chéve apredika, péro ndaipóri ótro traváho iporãvéva upévagui”.

6. ¿Mbaʼe pregúntapa ñambohováita koʼág̃a?

⁶ ¿Mbaʼérepa ikatu ñaĩ segúro jahupytytaha heta mbaʼe porã tahaʼe haʼéva pe lugár japredikahápe? Ñarresponde hag̃ua ko porandu iñimportantetéva, jahecháta mokõi  ehémplo Jesús omoĩ vaʼekue ohechaukáva tekotevẽha japrodusi Jehová servísiope (Mat. 13:23). Pe primer ehémplo oñeʼẽ pe parrál mátare.

7. a) Jesús ehémplope, ¿mávapepa orrepresenta “pe oñotỹva”, “pe parrál máta” ha “umi parrál rakã”? b) ¿Mbaʼe porandúpa tekotevẽ ñambohovái?

⁷ (Elee Juan 15:1-5, 8). Ko ehémplope Jehová haʼe “pe oñotỹva” térã pe agrikultór, Jesús haʼe “pe parrál máta”, ha idisipulokuéra katu “umi parrál rakã”. * Upéi Jesús heʼi idisipulokuérape: “Akóinte penerembiapo porãramo ha pehechaukáramo peẽ haʼeha che disípulo, pembotuicha hína che Túape”. Péro, ¿mbaʼépa heʼise ñanerembiapo porã térã japrodusi Jehová servísiope? Ko ehémplope, Jesús ndeʼíri espesífikamente mbaʼépa japrodusi vaʼerã, péro heʼi peteĩ mbaʼe ñanepytyvõtava ñambohovái hag̃ua ko pregúnta.

8. a) ¿Mbaʼéichapa Jesús ehémplo ohechauka japrodusi ndeʼiseiha jajapo disípulo? b) ¿Mbaʼépa Jehová núnka ndojeruremoʼãi ñandéve?

⁸ Jesús heʼi vaʼekue Itúare: “Umi parrál rakã oĩva cherehe ha ndahiʼáiva haʼe oipeʼa”. Upéva heʼise japrodusímante vaʼerãha Jehová servísiope (Mat. 13:23; 21:43). Péro ko ehémplope, japrodusi ndeʼiséi jajapoha disípulo (Mat. 28:19). Heʼisérire upéva, heta ermáno ha ermána ifiélva neʼĩrava oipytyvõ algúnope ojevautisa hag̃ua, ojoguáta umi parrál máta ndahiʼáivape. Péro ndaupeichaiete. Ñande ndaikatúi jaovliga umi héntepe oiko hag̃ua chuguikuéra Jesús disípulo. Jehová ñanderayhueterei, upévare núnka ndojeruremoʼãi ñandéve peteĩ mbaʼe ndaikatumoʼãiva jajapo (Deut. 30:11-14).

9. a) ¿Mbaʼéichapa jahechauka japrodusiha? b) ¿Mbaʼe ehémplopa ñahesaʼỹijóta koʼág̃a?

⁹ Upéicharõ, ¿mbaʼépa heʼise japrodusiha? Katuete upéva haʼe vaʼerã peteĩ mbaʼe entéro ikatúva jajapo. ¿Mbaʼe tembiapópa Jehová oenkarga isiervokuérape? Japredika hag̃ua umi marandu porã oñeʼẽva Ñandejára Rréinore (Mat. 24:14). * Pe ehémplo Jesús omoĩ vaʼekue oñeʼẽva pe chokokuére omyesakãta ñandéve. Ñahesaʼỹijomína koʼág̃a pe ehémplo.

10. a) Jesús ehémplope, ¿mbaʼépa hína pe semílla ha pe yvy? b) ¿Mbaʼépa oprodusi pe trígo?

¹⁰ (Elee Lucas 8:5-8, 11-15). Jesús omoĩ pe ehémplo oñeʼẽva pe chokokuére ha omyesakã pe semílla haʼeha “Ñandejára ñeʼẽ” térã pe mensáhe oñeʼẽva Ñandejára Rréinore. Pe yvy katu haʼe umi persóna korasõ. Pe semílla hoʼáva pe yvy porãme oñepyrũ kuri oñembohapo, ou heñói ha oiko chugui peteĩ plánta. Upéi pe plánta “hiʼa 100 peve peteĩ semíllagui”. Oiméramo pe plánta haʼe hína trígo, ¿mbaʼépa oprodusíta? ¿Hiʼa jeýtapa trígo? Nahániri, pe plánta oprodusíta semílla, ha pe semíllagui ae oikóta trígo. Ko ehémplope Jesús heʼi peteĩ semíllagui osẽha 100 semílla. ¿Mbaʼépa ñanemboʼe koʼã mbaʼe?

11. a) ¿Mbaʼépa ñaaprende pe ehémplo oñeʼẽvagui pe chokokuére? b) ¿Mbaʼéicha javépa ñande japrodusi semílla pyahu?

¹¹ Ñande tuakuéra térã algún ermáno o ermána ñanemboʼérõ guare umi marandu porã, haʼete oñotỹ vaʼekue pe semílla yvy porãme. Haʼekuéra ovyʼaiterei kuri jaaseptárõ guare pe añetegua. Pe semílla oñepyrũ kuri heñói ha okakuaa oĩ peve preparádo oprodusi hag̃ua. Jaʼe haguéicha  ajeʼi, pe trígo ndahiʼái trígo jey, síno semílla. Péicha avei ñande ndajaprodusíri disípulo, síno semílla pyahu. * ¿Mbaʼéichapa jajapo upéva? Káda ke ñañeʼẽ ñande rapichakuérape Ñandejára Rréinore, haʼete ñambohetavéva ha ñamosarambíva pe semílla oñeñotỹ vaʼekue ñane korasõme (Luc. 6:45; 8:1). Upévare, jasegívo japredika pe marandu porã oñeʼẽva Ñandejára Rréinore, jahechauka hína ñaaguanta ha jasegiha japrodusi.

12. a) ¿Mbaʼépa ñaaprende pe ehémplo oñeʼẽvagui pe parrál mátare ha pe chokokuére? b) ¿Mbaʼépa nde repensa upe ehémplogui?

¹² ¿Mbaʼépa ñaaprende pe ehémplo oñeʼẽvagui pe parrál mátare ha pe chokokuére? Japrodusi Jehová servísiope ndeʼiseiha mboy persónapa oasepta pe marandu porã, síno ñande jasegiha japredika. Pablo heʼíva ohechauka avei upeichaha. Haʼe heʼi: “Káda únope ojepagáta hembiapokuére” (1 Cor. 3:8). Jehová ñanepremiáta ñambaʼapo haguére, ndahaʼéi umi mbaʼe jahupytývare. Peteĩ ermána hérava Matilda oservímava 20 áño kómo prekursóra, heʼi: “Avyʼaiterei aikuaa rupi Jehová ñanepremiataha ñañehaʼã haguére”.

13, 14. Ohechaukaháicha Romanos 10:1, 2, ¿mbaʼérepa Pablo osegi opredika?

¹³ ¿Mbaʼépa ñanepytyvõta jasegi hag̃ua japrodusi? Jahecháma kuri mbaʼéichapa Pablo oñeñandu la majoría umi judío orrechasa haguére pe mensáhe oñeʼẽva Ñandejára Rréinore. Upéicharõ jepe, haʼe noñentregái, síno osegi opredika. Tiémpo rire, haʼe oexplika mbaʼépa oipota ohupyty entéro umi judío. Haʼe heʼi: “Añetehápe che pyʼaite guive aipota ha ajerure asy Ñandejárape hesekuéra, ojesalva hag̃ua hikuái. Che ikatu amombeʼu haʼekuéra añetehápe oĩ porãseha Ñandejára ndive, péro ndoikuaaporãi chupe” (Rom. 10:1, 2). ¿Mbaʼérepa Pablo osegi opredika?

 ¹⁴ Primero, haʼe heʼi kuri: “Che pyʼaite guive aipota”. Péicha Pablo ohechauka añetehápe oipotaha umi judío ojesalva (Rom. 11:13, 14). Segundo, haʼe heʼi avei: “Ajerure asy Ñandejárape hesekuéra”. Pablo orroga Jehovápe oipytyvõ hag̃ua umi judíope ikatu hag̃uáicha oasepta pe mensáhe del Rréino. Ha tercero, Pablo heʼi: “Haʼekuéra añetehápe oĩ porãseha Ñandejára ndive”. Pablo ohecha umi mbaʼe porã orekóva umi persóna ha opensa amo gotyove ikatutaha oservi Jehovápe. Haʼe oikuaa umi judío oĩ porãseha Ñandejárandi, ha kon el tiémpo ikatuha oiko chuguikuéra kristiáno ikyreʼỹva, haʼéicha avei.

15. ¿Mbaʼéichapa ikatu jajapo Pablo ojapo haguéicha? Emoĩ ehémplo.

¹⁵ ¿Mbaʼéichapa ikatu jasegi Pablo ehémplo? Primero, añetehápe jatopase vaʼerã umi persóna oñehaʼãtava “ohupyty jeikove opaveʼỹva”. Segundo, jajerure asy vaʼerã Jehovápe topoko umi hénte korasõre (Hech. 13:48; 16:14). Péicha ojapo vaʼekue Silvana, oservímava de prekursóra haimete 30 áñore. Haʼe heʼi: “Ag̃uahẽ mboyve peteĩ ógape, ajerure Jehovápe tachepytyvõ ikatu hag̃uáicha chepositíva”. Ñande avei jajerure vaʼerã Jehovápe ikatu hag̃uáicha umi ánhel ñanepytyvõ jatopa hag̃ua umi hénte ohenduséva pe marandu porã (Mat. 10:11-13; Apoc. 14:6). Robert, oservímava de prekursór mas de 30 áño, heʼi: “Umi ánhel ningo oikuaa káda ogajára situasión. Upévare javyʼaiterei ñambaʼapóvo hendivekuéra”. Tercero, ñañehaʼã vaʼerã jahecha umi mbaʼe porã orekóva umi persóna ha kon el tiémpo ikatuha avei oservi Jehovápe. Peteĩ ansiáno hérava Carl, ojapómava mas de 50 áño ojevautisa hague omombeʼu: “Añehaʼã ahecha umi mbaʼe porã orekóva umi persóna, tamichĩ jepe raʼe, péro ohechaukáva ipyʼaporãha. Por ehémplo, opukavýramo, ikalidáramo, térã oporandúramo sinséramente peteĩ mbaʼe”. Ñande avei jajapóramo péicha, katuete jasegíta japrodusi, Pablo ojapo haguéicha.

16, 17. a) ¿Mbaʼépa ñaaprende Eclesiastés 11:6-gui? b) ¿Mbaʼéichapa ikatu orreaksiona umi ñanderecháva japredika?

¹⁶ Nañapensái vaʼerã japredika reiha, haʼetéramo jepe avave nañanerenduséiva (elee Eclesiastés 11:6). Ani ñanderesarái umi persóna ohechaha la jajapóva. Haʼekuéra oñemeʼẽ enkuénta ñañemonde porãha, ñandeedukádo ha siémpre ñanderoryha. Kon el tiémpo, umi opensa vaíva ñanderehe jepe ikatu okambia ohechávo ñanekondúkta porãha. Upéva ohechakuaa Sergio ha Olinda, ñañeʼẽ hague párrafo 1-pe.

¹⁷ Sergio omombeʼu: “Peteĩ tiempoʼimi roju kuri orerasy ha ndaikatuvéi roho pe plásape. Upéi roñepyrũ jey roho ha umi hénte oporandu oréve: ‘¿Mbaʼéiko oiko raʼe pendehegui? Pejechagaʼu koʼárupi’”. Olinda katu opukavy ha heʼi: “Umi chofér ohasakuévo oresaluda, ha oĩ avei ijapytepekuéra osapukáiva oréve: ‘Pendeguapoterei’. Hiʼarive ojerure oréve rrevísta”. Peteĩ vuéltape, oiko peteĩ mbaʼe osorprendéva Sergio ha Olíndape. Peteĩ kuimbaʼe oñemboja pe karríto ypýpe orregala hag̃ua chupekuéra peteĩ rrámo yvoty, ha oagradese hag̃ua opa mbaʼe ojapóvare hikuái.

18. ¿Mbaʼérepa resegíta reprodusi reaguantáramo jepe heta mbaʼe ijetuʼúva?

¹⁸ La Biblia heʼi: “Ani repytuʼu”. Upévare, esegíkena epredika pe mensáhe oñeʼẽva Ñandejára Rréinore. Rejapóramo upéva, reipytyvõta ojepredika hag̃ua “opa tetãrupi” (Mat. 24:14). Ha iñimportanteveha, reñeñandu porãta reikuaágui péicha rembovyʼaha Jehovápe. Haʼe ohayhueterei entéro umi osegívape oprodusi iservísiope, “oaguantáramo jepe heta mbaʼe ijetuʼúva”.