1, 2. ¿Mbaʼeichagua provlémapa ombohovái heta ermáno?

APÓSTOL Pablo omokyreʼỹ vaʼekue Timotéope, ha avei enterove kristiánope, ojapo porã hag̃ua hembiapo Ñandejára servísiope (2 Tim. 4:5). Ñande jasegi Pablo konsého ha jajapo opa ikatúva Ñandejára servísiope. Péro upéva sapyʼánte ndahaʼéi la ifasilpáva. Heta ermáno ha ermanakuéra oñembopyʼaguasu vaʼerã opredika hag̃ua (2 Tim. 4:2). Ñapensamíntena por ehémplo umi ñane ermanokuéra oĩvare umi lugár ojeproivihápe ñane rembiapo, tahaʼe en párte térã kompletoite voi. Haʼekuéra ningo opredika oikuaáramo jepe ikatuha oho kárselpe upe haguére.

² Jehová siervokuéra ningo ombohovái opaichagua provléma ikatúva odesanima chupekuéra. Por ehémplo, oĩ ombaʼapóva heta óra ikatu hag̃uáicha omantene ifamíliape. Chupekuéra hiʼãiterei ohasa hetave tiémpo predikasiónpe, péro ikaneʼõitereíma hikuái og̃uahẽvo pe fin de semána. Oĩ avei umi saʼieterei ikatúva ojapo Jehová servísiope hasykatu térã ijedáma rupi, oĩ katu umi ndaikatuietéva voi osẽ hógagui, ha ótro oñandu ndovaleiha mbaʼeverã. Por ehémplo, Mary * heʼi: “Che ningo añehaʼãmbaite vaʼerã añekontrola añedesanima jave, ha upéva chemokangypaite voi. Ha upéi apyta añeñandu vai jey, pórke upéva hoʼupaite chehegui che mbaretekue ha che tiémpo ikatu vaʼekue aipuru predikasiónpe”.

3. ¿Mbaʼépa jahecháta ko artíkulope?

³ Tahaʼe haʼéva umi provléma jarekóva, Jehová ikatu ñanemombarete jasegi hag̃ua jaservi chupe ñande posivilida omeʼẽha peve. Ko artíkulope jahecháta mbaʼéichapa Jehová ñanepytyvõ, péro upe mboyve jahecha raẽta mbaʼéichapa haʼe omombarete vaʼekue Pablo ha Timotéope ojapo porã hag̃ua hembiapo iservísiope, ombohováiramo jepe hikuái heta mbaʼe ijetuʼúva.

4. ¿Mbaʼe provlémapa Pablo ombohovái vaʼekue?

⁴ Pablo ningo heta iprovléma vaʼekue. Haʼe koʼýte oikotevẽ vaʼekue Jehová omombarete chupe oñembyepotírõ guare, ojegueraha kárselpe ha ojejukasérõ guare chupe (2 Cor. 11:23-25). Pablo ndokyhyjéi vaʼekue heʼi hag̃ua haʼe sapyʼánte tekotevẽ hague oñorairõ umi mbaʼe oñandúvandi ani hag̃ua oñedesanima (Rom. 7:18, 19, 24). Pablo oreko vaʼekue avei peteĩ mbaʼasy ojoguáva ‘peteĩ ñuatĩ oikutúvape chupe hetépe’, ha haʼe ojerure asy vaʼekue Jehovápe oipeʼamínte hag̃ua chugui upéva (2 Cor. 12:7, 8).

5. ¿Mbaʼe mbaʼépa Pablo ohupyty vaʼekue ohasáramo jepe heta mbaʼe ijetuʼúva?

⁵ Jehová omombarete vaʼekue Páblope ojapo porã hag̃ua hembiapo ohasáramo jepe heta mbaʼe ijetuʼúva. Jahechamína mbaʼe mbaʼépa Pablo ohupyty vaʼekue. Por ehémplo, orekórõ guare prisión domisiliária Rómape, haʼe lomímonte kyreʼỹme opredika vaʼekue umi notísia porã, umíva apytépe umi líder judíope ha oiméne avei umi autoridakuéra omanda guasúvape (Hech. 28:17; Filip. 4:21, 22). Haʼe opredika vaʼekue avei umi guardiakuéra rrománope, ha enterove umi ohóvape ovisita chupe (Hech. 28:30, 31; Filip. 1:13). Upe tiémpope avei, Ñandejára ojevale Páblore oskrivi hag̃ua umi kárta oipytyvõva umi kristiáno teépe, ymaite guive koʼag̃aite peve. Avei Pablo ehémplo omombarete vaʼekue pe kongregasión oĩvape Rómape, ha upéicha rupi umi ermanokuéra “ipyʼaguasuve omombeʼu hag̃ua Ñandejára ñeʼẽ kyhyjeʼỹme” (Filip. 1:14). Pablo sapyʼánte ndaikatúiramo jepe ojapo heta mbaʼe ojaposéva, ojapo ikatumíva entéro pe situasión oreko vaʼekuépe. Upéva ‘añetehápe omeʼẽ chupe peteĩ oportunida omombeʼu hag̃ua umi notísia porã’ (Filip. 1:12).

6. Heʼiháicha 2 Corintios 12:9, 10, ¿mbaʼépa oipytyvõ vaʼekue Páblope ojapo porã hag̃ua hembiapo Ñandejára servísiope?

⁶ Pablo ohechakuaa vaʼekue entéro mbaʼe ojapóva Jehová servísiope ndojapói hague ijehegui reínte, síno Ñandejára omombarete rupi chupe. Haʼe orrekonose vaʼekue Ñandejára podér ‘ojekuaa porãve hague ikangy jave’ (elee 2 Corintios 12:9, 10). Ijespíritu sánto rupive Jehová omombarete vaʼekue Páblope ojapo porã hag̃ua hembiapo iservísiope, jepe ojepersegi, ojegueraha chupe kárselpe, ha ombohovái hetave mbaʼe ijetuʼúva.

7. ¿Mbaʼe provlémapa Timoteo ombohovái vaʼekue ojapo porã hag̃ua hembiapo Ñandejára servísiope?

⁷ Timoteo imitãme omoirũ vaʼekue Páblope, ha haʼe ojerovia vaʼerã avei kuri Ñandejára  omombaretetaha chupe ojapo porã hag̃ua hembiapo iservísiope. Por ehémplo, Timoteo oho vaʼekue Páblondi umi viáhe puku puku ojapóvape opredika hag̃ua. Avei Pablo omondo vaʼekue chupe hetave lugárpe ovisita hag̃ua umi kongregasión, ha omokyreʼỹ hag̃ua ermanokuérape (1 Cor. 4:17). Timoteo oñandúne raʼe ndaikatumoʼãiha ojapo porã hembiapo, ha upévare oiméne Pablo heʼi rakaʼe chupe: “Aníke arakaʼeve eheja avave ndeapoʼi nemitã haguére” (1 Tim. 4:12). Avei upe tiémpope, Timoteo ‘pyʼỹinte hasykatu vaʼekue’, ha upéva ojogua vaʼekue peteĩ ñuatĩ oikutúvape chupe hetépe (1 Tim. 5:23). Péro haʼe oikuaa vaʼekue Jehová espíritu sánto ipoderosoitéva omombaretetaha chupe, ikatu hag̃uáicha opredika umi notísia porã ha oservi iñermanokuérape (2 Tim. 1:7).

8. ¿Mbaʼéichapa Jehová omombarete ipuévlope koʼág̃arupi?

⁸ Koʼág̃arupi Jehová omeʼẽ ipuévlope “pe podér umi ótra hénte ndorekóiva”, ikatu hag̃uáicha osegi oservi chupe fiélmente (2 Cor. 4:7). Jahechamína 4 mbaʼe Jehová omeʼẽva ñandéve ñanemombarete hag̃ua: Pe ñemboʼe, la Biblia, umi ermanokuéra ha pe predikasión.

9. ¿Mbaʼéichapa ñanepytyvõ pe ñemboʼe?

⁹ Ñanemombarete pe ñemboʼe rupive. Efesios 6:18-pe Pablo ñanemokyreʼỹ “kontinuadoite” ñañemboʼe hag̃ua Ñandejárape, ha haʼe ohendúta ñane ñemboʼe ha ñanemombaretéta. Jonnie oikóva Bolíviape, oñandu vaʼekue mbaʼéichapa Jehová oipytyvõ chupe ojoʼapárõ guare chugui la provléma. Hembireko, isy ha itúa ou hasyete ojojapaite voi. Ijetuʼueterei vaʼekue Jónniepe oñangareko hag̃ua mbohapyvévare. Upéi isy ou omano, ha hembireko ha itúa katu hasypeterei ojerrekupera jey. Imanduʼávo upe ohasa vaʼekuére, Jonnie heʼi: “Ajepyʼapyetereírõ guare, katuete chepytyvõmi añemboʼe Jehovápe ha amombeʼupaite chupe la añandúva”. Jehová omombarete Jónniepe ogueropuʼaka hag̃ua upe situasión. Ronald, peteĩ ansiáno oĩva avei Bolíviape, oikuaa vaʼekue isy orekoha kánser, ha un mes haguépente omanóma la isy. ¿Mbaʼépa oipytyvõ vaʼekue Rónaldpe upe situasiónpe? Haʼe heʼi: “Añemboʼe jave Jehovápe amombeʼupaite chupe mbaʼéichapa añeñandu, aikuaa haʼe chentende porãvetaha oimeraẽvagui, chejehegui jepe”. Sapyʼánte ñande avei ikatu ñañandu ndaikatuveimaha jagueropuʼaka ñane provléma, ha ndajaikuaái mbaʼépa jaʼéta ñañemboʼe jave. Péro Jehová oipota ñande ñañemboʼe chupe ndajaikuaáiramo jepe mbaʼéichapa ñamombeʼúta umi mbaʼe ñapensáva ha ñañandúva (Rom. 8:26, 27).

10. Ohechaukaháicha Hebreos 4:12, ¿mbaʼérepa iñimportantete jalee la Biblia ha jajepyʼamongeta hese?

¹⁰ Ñanemombarete la Biblia rupive. Pablo olee vaʼekue Ñandejára Ñeʼẽ oñemombarete ha otopa hag̃ua konsuélo, ha ñande avei ikatu jajapo upéicha (Rom. 15:4). Jalee jave Ñandejára Ñeʼẽ ha jajepyʼamongeta hese, Jehová ikatu oipuru ijespíritu sánto ontendeka hag̃ua ñandéve mbaʼéichapa umi téxto ikatu ñanepytyvõ ñane situasiónpe (elee Hebreos 4:12). Ronald, pe ermáno ajeʼi ñañeʼẽ hague, heʼi: “Avyʼaiterei ningo añehaʼã haguére ajepokuaa alee la Biblia káda pyhare. Heta ajepyʼamongeta umi kualida Jehová orekóvare, ha mbaʼéichapa haʼe mborayhúpe oñangareko vaʼekue isiervokuérare. Upéva chepytyvõ chembarete jey hag̃ua”.

11. ¿Mbaʼéichapa la Biblia oipytyvõ peteĩ ermána oñembyasyetereívape?

¹¹ Jajepyʼamongetáramo Ñandejára Ñeʼẽre, ñanepytyvõta jahecha hag̃ua hendápe porã ñane provlemakuéra. Jahechami mbaʼéichapa la Biblia oipytyvõ peteĩ ermána oñembyasyetereívape. Haʼe ningo oñeñandu vaieterei iména omano haguére. Upévare peteĩ ansiáno oakonseha chupe olee hag̃ua pe lívro de Job,  pórke oaprendéta chugui hetaiterei mbaʼe iñimportánteva. Haʼe ojapórõ guare upéva, ensegída oñepyrũ okritika Jóbpe opensa vai haguére. Iñakãme haʼe heʼi: “¡Job, anivéna epensa ne provlémarente!”. Péro upéi pe ermána ohechakuaa opensa hague oikóvo Job opensa hagueichaite avei. Upéva oipytyvõ chupe anivéma hag̃ua opensaiterei iprovlemakuérarente, síno opensave hag̃ua Jehováre ha pe esperánsa haʼe omeʼẽvare, ha upéva oipytyvõ chupe ogueropuʼaka hag̃ua imbaʼembyasy.

12. ¿Mbaʼéichapa Jehová ojevale umi ermáno ha ermanakuérare ñanemombarete hag̃ua?

¹² Ñanemombarete ermanokuéra rupive. Jehová ningo ojevale avei ñane ermanokuérare ñanemombarete hag̃ua. Pablo oskrivi vaʼekue hiʼãiterei hague chupe ohecha iñermanokuérape ‘ikatu hag̃uáicha káda uno oñomokyreʼỹ’ (Rom. 1:11, 12). Mary, pe ermána ajeʼi ñañeʼẽ hague, omombaʼeterei ikatu haguére ohasa tiémpo umi ermáno ha ermanakuérandi. Haʼe heʼi: “Jehová oipurúma umi ermáno ha ermanakuéra ndoikuaáivape jepe umi mbaʼe ijetuʼúva che ahasáva. Haʼekuéra sapyʼánte heʼi peteĩ mbaʼe chemokyreʼỹva, térã oskrivi chéve peteĩ tarhéta, ha kavalete upéva la aikotevẽ vaʼekue upe moméntope. Avei chepytyvõ añeʼẽramo umi ermáno ohasa vaʼekuéndi umi provléma che arekovaichagua, ha aaprende chuguikuéra. Umi ansiáno ningo chepytyvõ avei ahechakuaa hag̃ua umi ermáno ha ermanakuéra kongregasionpegua chemombaʼe ha cherayhuetereiha”.

13. ¿Mbaʼéichapa ikatu ñañomokyreʼỹ rreunionhápe?

¹³ Rreunionhápe ningo jareko umi oportunida iporãvéva ñañomokyreʼỹ hag̃ua. Ñaime jave upépe, ñañehaʼãkena ñamombarete ñane ermanokuérape jaʼévo chupekuéra ñamombaʼeha umi mbaʼe ojapóva, ha jahayhuha chupekuéra. Por ehémplo, oñepyrũ mboyve peteĩ rreunión peteĩ ansiáno hérava Peter heʼi peteĩ ermána iména ndahaʼéivape Testígo: “Oremokyreʼỹeterei ningo rohechávo reimeha koʼápe. Nde siémpre reprepara porã umi 6 ne membykuérape, ha orekopáma avei hikuái ikomentariorã”. Ko ermána hesay pororopa oagradesévo pe ansiánope, ha heʼi chupe: “Nereimoʼãichéne mbaʼeichaitépa aikotevẽ kuri ahendu upéva koestedía”.

14. ¿Mbaʼéichapa ñanepytyvõ pe predikasión?

¹⁴ Ñanemombarete predikasión rupive. Japredika jave ótrope ñande ñañeñandu porã, umi hénte ñanerendu térã nañanerenduséiramo jepe (Prov. 11:25). Peteĩ ermána hérava Stacy ohechakuaa vaʼekue mbaʼéichapa pe predikasión ikatu ñanemombarete. Haʼe opyta vaʼekue oñeñandu vaieterei peteĩ hogaygua oñemosẽrõ guare kongregasióngui. Haʼe manterei opensa vaʼekue: “¿Che piko ndaikatuichéne raʼe ajapo álgo aipytyvõve hag̃ua chupe?”. Haʼe ndaikatúi vaʼekue oipeʼa upéva iñakãgui. ¿Mbaʼépa oipytyvõ raʼe chupe ogueropuʼaka hag̃ua upe situasión ijetuʼuetéva? ¡Pe predikasión! Opredika jave haʼe opensa umi hénte oĩvare iterritóriope, ha mbaʼeichaitépa oikotevẽ hikuái haʼe oipytyvõ chupekuéra. Stacy heʼi: “Upe tiémpope Jehová omeʼẽ chéve peteĩ estudiánte pyaʼeterei oprogresáva, ha upéva chemokyreʼỹeterei vaʼekue. Pe predikasión hína la tuichave chepytyvõva ambohovái jave peteĩ situasión ijetuʼúva”.

15. ¿Mbaʼépa ñanemboʼe umi mbaʼe Mary heʼi vaʼekue?

¹⁵ Oĩ umi ermáno oñandúva ndaikatuiha ojapo heta mbaʼe Ñandejára servísiope, pórke isituasión nopermitíri chupekuéra. Oiméramo ñañeñandu upéicha, ñanemanduʼa vaʼerã Jehová ovyʼaha ñameʼẽramo chupe pe iporãvéva. Jahechami jeýna Mary ehémplo. Haʼe ovárõ guare oservi hag̃ua peteĩ lugár oñeñeʼẽhápe ótro idióma, opensa vaʼekue ndaideprovechoguasuiha noñeʼẽporãi haguére upe idióma. Haʼe heʼi: “Peteĩ tiémpore che sólamente ikatu vaʼekue akomenta mbykymi, alee peteĩ téxto, térã ameʼẽ peteĩ tratádo predikasiónpe”. Haʼe ningo oñeñandu vaieterei vaʼekue oñembojojávo umi  ermáno oñeʼẽ porãvare upe idióma, péro upéi okambia opensa lája. Haʼe oñepyrũ ohechakuaa Jehová ikatuha ojevale hese noñeʼẽporãiramo jepe upe idióma. Mary heʼi: “Umi mbaʼe omboʼéva la Biblia ningo hesakã porã ha ikatu okambia umi hénte rekove, ha upéva nodependéi katuete peteĩ persónapa oñeʼẽ porã hína peteĩ idióma térã nahániri”.

16. ¿Mbaʼépa omombaretéta umi ndaikatúivape osẽ hógagui ha opredikaséva?

¹⁶ Jehová ningo ohecha ha omombaʼeterei pe deséo jarekóva japredika hag̃ua ndaikatúiramo jepe ñasẽ ñande rógagui. Haʼe ikatu omeʼẽ ñandéve oportunida japredika hag̃ua umi oñangarekóvape ñanderehe, umi doktór térã enfermerokuérape. Ñakomparáramo umi mbaʼe jajapóva koʼág̃a umi mbaʼe jajapo vaʼekuére yma, ikatu hína ñañedesanima. Péro jahechakuaáramo mbaʼéichapa Jehová ñanepytyvõ hína koʼág̃a, ñanembaretéta jagueropuʼaka hag̃ua vyʼápe oimehaichagua provléma.

17. Heʼiháicha Eclesiastés 11:6, ¿mbaʼérepa jasegi vaʼerã japredika ndajahecháiramo jepe ensegída umi mbaʼe porã ojehupytýva?

¹⁷ Ñande ningo ndajaikuaái moõpa oñembohapóta ha oñepyrũta okakuaa pe semílla ñañotỹva (elee Eclesiastés 11:6). Por ehémplo, peteĩ ermána hérava Barbara, orekóva mas de 80 áño, pyʼỹinte opredika por teléfono ha kárta rupive. Peteĩva umi kártandi haʼe omoĩ vaʼekue pe Ñemañaha 1 de marzo de 2014, orekóva pe artíkulo “¿Mbaʼépa ojapo Ñandejára nderehehápe?”. Oikuaaʼỹre, haʼe omondo kuri upe kárta peteĩ matrimónio oñemosẽ vaʼekuépe kongregasióngui. Ko matrimónio olee pe rrevísta heta vése, ha pe ména oñandu kuri Jehovaite voi oñeʼẽ hague chupe. Pe matrimónio oñepyrũ oho jey rreunionhápe, ha mas de 27 áño haguépe oiko jey chuguikuéra Testígo. Ñapensamíntena mbaʼeichaitépa oiméne omokyreʼỹ ha omombarete raʼe Bárbarape oikuaávo umi mbaʼe porã ojehupyty vaʼekue pe kárta oskrivi vaʼekue rupive.

18. ¿Mbaʼépa jajapo vaʼerã Ñandejára ñanemombarete hag̃ua?

¹⁸ Jehová ningo omeʼẽ ñandéve heta mbaʼe ñanemombarete hag̃ua. Por ehémplo, pe ñemboʼe, la Biblia, ermanokuéra ha avei pe predikasión. Jaipuru jave koʼã mbaʼe jahechauka hína Jehovápe jajeroviaha hese haʼe ikatuha ñanepytyvõ ha ojaposeha voi upéva. Upévare, jajeroviákena siémpre ñande Ru yvagapeguáre, pórke haʼe ohechaukase “ipodér umi ojeroviávape hese ikorasõ mbytete guive” (2 Crón. 16:9).