1-3. a) ¿Mbaʼéichapa jahechauka ñamombaʼeha umi mbaʼe ñaaprende vaʼekue la Bíbliagui? (Ehecha umi taʼanga oĩva iñepyrũme). b) ¿Mbaʼe porandúpa ñambohováita ko artíkulope?

ÑANE tiémpope pyʼỹinte umi hénte ojogua álgo ha upéi oraha jey ontrega. Ojoguáramo hikuái Internet rupive katu, pyʼỹivéntema oiko upéva. ¿Mbaʼérepa? Ikatu oime la ojoguáva ndahaʼéi la opensa haguéicha, térã oreko algún defékto ỹrõ ndogustái chupekuéra. Péicha jave oñehaʼã okambia ótro prodúktore, térã ojerure oñemyengovia jey hag̃ua chupekuéra ipláta.

² Ikatúramo jepe jajerure oñemeʼẽ jey hag̃ua ñandéve ñande pláta peteĩ mbaʼe ñantregávare, arakaʼeve nañantregaséi jey “pe añetegua” ñaaprende vaʼekue la Bíbliagui (elee Proverbios 23:23; 1 Tim. 2:4). Jahecha haguéicha pe ótro artíkulope, ñaaprende hag̃ua pe añetegua jaipuru kuri heta tiémpo. Heta oĩ ñande apytépe omboyke vaʼekue peteĩ profesión porã, térã ndojeheʼavéi yma guaréicha ihénte ha iñamigokuérare. Avei oĩ umi okambiáva kuri opensa lája ha oiko lája, térã omboykéva heta kostúmbre ha práktika ombojeguarúva Jehovápe. Upéicharõ jepe, umi sakrifísio jajapóva michĩeterei ñambojojáramo umi vendisión jarresivívare.

 ³ Jesús omoĩ vaʼekue peteĩ ehémplo oñeʼẽva peteĩ komersiánte oviahávare oheka hag̃ua umi pérla iporãva. Pe kuimbaʼe otopávo peteĩ pérla iporãitereíva ovendéma voi la orekomíva guive ojogua hag̃ua upéva. Pe pérla orrepresenta pe añetegua oñeʼẽva Ñandejára Rréinore. Upéicha, Jesús ohechauka mbaʼeichaitépa umi persóna oñehaʼãva oikuaa Ñandejáragui, omombaʼe pe añetegua (Mat. 13:45, 46). Ñañepyrũrõ guare ñaaprende pe añetegua Ñandejára Rréinogui ha entéro umi enseñánsa oúva la Bíbliagui, ñaime kuri avei dispuésto jahejávo opa mbaʼe umíva rehehápe. Jasegíramo ñamombaʼe la ñaaprende vaʼekue, arakaʼeve ndajahejamoʼãi. Péro ñambyasýramo jepe, sapyʼánte oĩ umi Ñandejára siérvo oúva nomombaʼevéi pe añetegua ha ohejáva voi upéva. ¡Ndajaipotaiete ningo oiko ñanderehe upéva! Upearã jajapo vaʼerã pe konsého oĩva la Bíbliape ñanemomýiva jasegi hag̃ua jaiko “pe añetegua rapére” (elee 3 Juan 2-4). Upéva heʼise ñamotenonde vaʼerãha pe añetegua ha jahechauka upéva pe jaiko lájare. Péro, ¿mbaʼérepa ha mbaʼéichapa ikatu peteĩ persóna ‘ovende’ térã oheja pe añetegua? ¿Mbaʼépa jajapo vaʼerã ani hag̃ua arakaʼeve oiko ñanderehe upéva? ¿Ha mbaʼéichapa ñaimevéta desidído jaiko hag̃ua “pe añetegua rapére”?

4. ¿Mbaʼérepa oĩ vaʼekue ‘ovendéva’ pe añetegua síglo primérope?

⁴ Jesús tiémpope, oĩ vaʼekue umi oaseptáva pe añetegua péro upéi ou ndojegiavéi hese. Por ehémplo, Jesús ojapórõ guare pe milágro omongaru hag̃ua peteĩ hénte atýpe, haʼekuéra osegi chupe pe ótra kósta peve Mar de Galiléape. Upépe Jesús heʼi peteĩ mbaʼe ndogustáiva chupekuéra. Haʼe heʼi kuri: “Ndapeʼúiramo pe Yvypóra Raʼy roʼo ha napemboyʼúiramo huguy, ndapeikovemoʼãi”. Oporandu rangue Jesúspe mbaʼépa la heʼiséva, ojekeha hikuái heʼívo: “Koʼã mbaʼe heʼíva ningo ivaieterei, ¿máva piko ohenduséta chupe?”. Upévare “heta idisípulo ojevy umi mbaʼe oheja vaʼekuépe ha nomoirũvéi chupe” (Juan 6:53-66).

5, 6. a) ¿Mbaʼérepa ñane tiémpope oĩ umi ohejáva pe añetegua? b) ¿Mbaʼéichapa peteĩ persóna ikatu oheja ohóvo pe añetegua?

⁵ Ñambyasy ningo péro ñane tiémpope oĩ avei umi oñemomombyry vaʼekue pe añeteguágui. Ikatu oime ndogustái kuri chupekuéra peteĩ entendimiénto pyahu, térã omoñepysanga chupekuéra la heʼíva térã ojapóva peteĩ ermáno ipriviléhio hetáva. Koʼã persóna ikatu avei ipochy oĩ rupi oñemoñeʼẽva chupekuéra la Biblia rupive, térã noñontendéi rupi peteĩ ermánondi kongregasiónpe. Ikatu avei koʼã persónape okonvense umi enseñánsa japu omosarambíva umi apóstata térã umi oñemoĩva pe añeteguáre. Oĩ umi odesidíva oheja Jehovápe ha pe kongregasión koʼã mbaʼére (Heb. 3:12-14). Haʼekuéra ningo osegi vaʼerãmoʼã kuri apóstol Pedro ehémplo. Umi héntepe ndogustáirõ guare la Jesús heʼíva, haʼe oporandu ijapostolkuérape ndohejaséipa avei chupe hikuái. Upérõ Pedro heʼi: “Ore Ruvicha, ¿máva rendápe piko rohóta? Ne ñeʼẽ ningo omeʼẽ jeikove opaveʼỹva” (Juan 6:67-69).

⁶ Oĩ avei umi mbeguekatúpe oheja vaʼekue ohóvo pe añetegua, ha ndopillái oiko hague hese upéva. Peteĩ persóna mbeguekatúpe oñemomombyrýva ojogua peteĩ várko oñemomombyrývape ohóvo pe kóstagui. Upéicha rupi, la Biblia heʼi ñañatende vaʼerãha “ani hag̃ua arakaʼeve jajei tape porãgui” (Heb. 2:1). Heta persóna ohejáva ohóvo pe añetegua nopensái  kuri ojapotaha upéva. Péro haʼekuéra oheja mbeguekatúpe ikangy pe amista orekóva Jehovándi oñemomombyryete peve chugui. ¿Mbaʼépa ikatu jajapo ani hag̃ua arakaʼeve oiko ñanderehe upéva?

7. ¿Mbaʼépa ñanepytyvõta ani hag̃ua arakaʼeve ‘ñavende’ pe añetegua?

⁷ Jasegi hag̃ua jaiko pe añetegua rapére tekotevẽ jaasepta ha jajapo opa mbaʼe Jehová heʼíva. Pe añetegua haʼe vaʼerã la iñimportantevéva ñandéve g̃uarã ha jajegia vaʼerã la Biblia heʼívare entéro mbaʼépe. Rréi David oñemboʼérõ guare Jehovápe heʼi chupe: “Che asegíta pe añetegua rapére” (Sal. 86:11). David oĩ vaʼekue desidído oikotaha pe añetegua rapére ha ñande jasegi vaʼerã iñehémplo. Ndajajapóiramo péicha, ikatu ñanemanduʼa jey umi mbaʼe jaheja vaʼekuére pe añetegua rehehápe, ha ñañepyrũ jaipota jey umi mbaʼe. Péro ndovaléi jaelehi mbaʼe pártepa jaaseptáta la Biblia heʼívagui ha mbaʼépa ñamboykéta. Tekotevẽ jajapo opa mbaʼe ñaaprendéva chugui (Juan 16:13). Pe primer artíkulo de estúdiope jahecha 5 mbaʼe ikatúva kuri jaheja ñaaprende hag̃ua pe añetegua ha jajapo hag̃ua la ñaaprendéva. Koʼág̃a jahecháta mbaʼépa jajapo vaʼerã ani hag̃ua arakaʼeve jaheka jey umi mbaʼe jahejáma vaʼekue (Mat. 6:19).

8. ¿Mbaʼéichapa peteĩ kristiáno ndoipuruporãirõ itiémpo ikatu oñemomombyry pe añeteguágui? Emoĩ peteĩ ehémplo.

⁸ Tiémpo. Ani hag̃ua núnka jaheja pe añetegua, tekotevẽ jaipuru porã ñane tiémpo. Nañañatendéiramo ikatu japerde heta tiémpo vyʼarã rapykuéri, umi mbaʼe ñandegustávape, jaipuruhápe Internet térã jahechahápe téle. Ndaivaíriramo jepe koʼã mbaʼe ikatu hoʼupa ñandehegui ñane tiémpo, ha saʼivéma hemby ñandéve jajapo hag̃ua ñande estúdio personál ha ñambaʼapo hag̃ua Jehová servísiope. Jahechamína la oiko vaʼekue Émmare. * Imichĩete guive ko ermánape ogustaiterei vaʼekue umi kavaju ha oiko hiʼári káda ke ikatu. Péro ojepyʼapy ohechakuaágui heta tiémpoma ohasaha ojapohápe upéva. Upéicha rupi odesidi okambia. Avei omokyreʼỹ chupe peteĩ ermána hérava Cory Wells rembiasakue. Ko ermána ningo oiko vaʼekue kavaju ári umi rrodéope. * ¿Mbaʼépa oiko upe rire? Koʼág̃a Emma ombaʼapove Jehovápe g̃uarã, ha itiempove ohasa hag̃ua ihentekuéra ha iñamigokuérandi oservíva avei Ñandejárape. Haʼe oñandu hiʼag̃uiveha Ñandejáragui ha ovyʼa oipuru porã haguére itiémpo.

9. ¿Mbaʼéichapa ikatu jaju ñamombaʼeterei umi mbaʼerepy?

⁹ Umi mbaʼerepy. Jasegi hag̃ua jaiko pe añetegua rapére nañapensái vaʼerã umi mbaʼerepy iñimportantetereiha. Ñañepyrũrõ guare ñaaprende pe añetegua, jahechakuaa vaʼekue Jehová servísio iñimportanteveha umi mbaʼerepýgui, ha javyʼa jahejávo heta mbaʼe pe añetegua rehehápe. Péro amedída ohasa la tiémpo, ikatu jahecha oĩha ojoguáva umi aparáto elektróniko osẽ ramovéva, térã okonsegiha hetave mbaʼe. Péicha jave, ikatu ñañandu ofaltaha ñandéve umíva, ha nañañekontentavéi umi mbaʼe jarekóvarente. Ikatu voi ñañepyrũ ñañehaʼãve ñakonsegi hag̃ua umi mbaʼerepy ha ñambotapykue Jehová servísio. Demas rehe oiko vaʼekue upéva “ohayhu rupi ko múndo”. Upéicha rupi oheja rei pe asignasión orekóva apóstol Páblondi (2 Tim. 4:10). ¿Noiméi piko haʼe omombaʼeve rakaʼe  umi mbaʼerepy Ñandejára servísiogui? Ikatu kuri oiko hese upéva, ỹrõ katu noñehaʼãsevéi osegi hag̃ua oservi Páblondi. ¿Mbaʼépa ñaaprende ko ehémplogui? Ikatu oime anteve ñamombaʼeterei vaʼekue umi mbaʼerepy. Péro nañañatendéiramo, ikatu hína ñandegustaiterei jey umíva ha ipahápe jaju nañamombaʼevéi pe añetegua.

10. ¿Mbaʼépa ndajahejái vaʼerã oiko ñanderehe jasegisérõ pe añetegua rapére?

¹⁰ Ñane hénte ha ñane amigokuéra. Jasegi hag̃ua pe añetegua rapére, ndajahejái vaʼerã ñandegueraha vai umi ndoservíriva Jehovápe. Ñaaprendérõ guare pe añetegua ndajajeheʼavéi kuri ymave guaréicha ñane hénte ha ñane amígo ndahaʼéivare Testígo. Ijapytepekuéra ikatu oĩ umi ñanderrespetáva, péro avei umi oñemoĩva ñane kóntrape (1 Ped. 4:4). Ñande ningo ñañehaʼã jajogueraha porã hendivekuéra ha jatrata porã chupekuéra. Péro ñañatende vaʼerã pono ñamboyke Jehová omandáva ñambovyʼaségui chupekuéra. Primera a los Corintios 15:33 heʼi porã ñandéve jaiporavo vaʼerãha ñane amigorã umi persóna ohayhúvape Jehovápe.

11. ¿Mbaʼéichapa ikatu ñamboyke umi mbaʼe vai?

¹¹ Umi mbaʼe vai ñapensáva ha jajapóva. Ani hag̃ua jaheja pe añetegua, tekotevẽ jasegi ñanepotĩ Jehová oipotaháicha (Is. 35:8; elee 1 Pedro 1:14-16). Amáske ñaaprende kuri jahávo pe añetegua, entéronte tekotevẽ vaʼekue ñakambia jajapo hag̃ua umi mbaʼe iporãva oĩva la Bíbliape. Ikatu voi kuri tuicha la kámbio tekotevẽva jajapo. Péro ñañatende vaʼerã ani hag̃ua arakaʼeve ñakambia pe tekopotĩ ñañemeʼẽ jey hag̃ua tekokyʼápe. ¿Mbaʼépa ikatu ñanepytyvõ ñamboyke hag̃ua umi tentasión? Jajepyʼamongeta vaʼerã la ojapo vaʼekuére Jehová ñanepotĩ hag̃ua. Haʼe omeʼẽ Itaʼýra ohayhuetéva rekove ñanderehehápe (1 Ped. 1:18, 19). Jasegi hag̃ua ñanepotĩ Jehová renondépe, siémpre ñanemanduʼa vaʼerã mbaʼeichaitépa iñimportánte la ojapo vaʼekue Jesús ñanderreskata hag̃ua.

12, 13. a) ¿Mbaʼérepa ñañehaʼã vaʼerã jahecha umi festého Jehová ohechaháicha? b) ¿Mbaʼépa ñahesaʼỹijóta koʼág̃a?

¹² Umi kostúmbre ha práktika ndogustáiva Ñandejárape. Ñane hentekuéra, ñane kompañerokuéra de traváho, de eskuéla térã kolehiopegua oipota jepi ñakomparti hendivekuéra umi mbaʼe haʼekuéra ofesteháva. ¿Mbaʼépa ikatu ñanepytyvõ ani hag̃ua jasegi umi kostúmbre ha práktika Jehovápe ndogustáiva? Tekotevẽ hesakã porã ñandéve mbaʼérepa Jehovápe ndogustái heta festého ojapóva umi hénte. Iporãta jahekáramo ñane puvlikasiónpe ikatu hag̃uáicha ñanemanduʼa mbaʼéichapa oñepyrũ vaʼekue umi festého oikóva koʼág̃arupi. Jajepyʼamongetárõ koʼã mbaʼére, ñaiméta konvensído jahechakuaaha “mbaʼépa oguerohory ñande Ruvicha” ha jasegíta jaiko upe tapére (Efes. 5:10). Jajeroviákena Jehováre ha Iñeʼẽre, péicha ndajakyhyjemoʼãi umi ótro opensávagui (Prov. 29:25).

¹³ Ñande ningo jasegise opa árare pe añetegua rapére. ¿Mbaʼépa ñanepytyvõta ñaimeve hag̃ua desidído jajapo hag̃ua upéva? Jahechamína mbohapy mbaʼe ikatúva ñanepytyvõ.

14. a) ¿Mbaʼéichapa jastudia memérõ la Biblia ñaimevéta desidído ani hag̃ua jaheja pe añetegua? b) ¿Mbaʼérepa ñaikotevẽ arandu, disiplína ha entendimiénto?

¹⁴ Primero, jasegi jastudia la Biblia ha ñapensa porã umi mbaʼe ñaaprendévare. Jareko vaʼerã peteĩ orário ikatu hag̃uáicha jastudia meme. Amáske jastudia  ñamombaʼevéta pe añetegua ha ñaimevéta desidído ndajahejamoʼãiha arakaʼeve. Proverbios 23:23 heʼi: “Ejogua pe añetegua” ha avei pe “arandu, disiplína ha entendimiénto”. Ndahaʼéi jaikuaánte vaʼerã pe añetegua oĩva la Bíbliape, tekotevẽ jajapo la heʼíva upépe. Ñantendevéta jahávo pe añetegua ñakomparáramo la ñaaprendéva umi mbaʼe jaikuaámavare voi. Ñanearandúrõ katu jajapóta umi mbaʼe ñaaprendéva. Sapyʼánte pe añetegua ñandekorrehi avei, pórke ohechauka ñandéve mbaʼépepa ñakambia vaʼerã. Pyaʼe porã jajekorrehi vaʼerã pórke la Biblia heʼi Jehová disiplína iporãveha pe plátagui (Prov. 8:10).

15. ¿Mbaʼéichapa pe añetegua ñandeprotehe peteĩ sinturóncha?

¹⁵ Segundo, jajedesidi vaʼerã jajegiataha pe añeteguáre káda día. La Biblia ombojoja pe añetegua pe sinturón oipurúvare peteĩ soldádo (Efes. 6:14). Ñandejára Ñeʼẽ heʼi umi soldádo oipuru hague peteĩ sinturón oipytyvõ hag̃ua chupekuéra. Péro tekotevẽ vaʼekue otuʼu porã ikuʼáre ikatu hag̃uáicha oprotehe chupe upe párte. ¿Mbaʼéichapa pe añetegua ñandeprotehe peteĩ sinturóncha? Jareko memérõ enkuénta pe añetegua oĩva la Bíbliape, ñandeprotehéta ani hag̃ua ñapensa hendapeʼỹ ha ñanepytyvõta jadesidi porã hag̃ua. Péicha, jareko jave peteĩ provléma ijetuʼuetereíva térã ñandestiráramo peteĩ mbaʼe noĩporãiva, umi mbaʼe ñaaprendéva la Bíbliagui ñanemomýita jasegi hag̃ua jajapo iporãva. Peteĩ soldádo ndahesaráiri vaʼekue oraha hag̃ua isinturón ohóta jave oñorairõ, ñande avei ñaĩ vaʼerã desidído ndajahejamoʼãiha pe añetegua. Pe sinturón oipurúva umi soldádo oreko vaʼekue peteĩ párte oraha hag̃ua ijespáda. Upéva ikatu ñakompara peteĩ mbaʼe tekotevẽvare avei jajapo. Jahechamína mbaʼe rehepa ñañeʼẽ hína.

16. ¿Mbaʼéichapa ñanepytyvõ jasegi hag̃ua pe tape porãre ñañehaʼãramo ñamboʼe pe añetegua?

¹⁶ Tercero, jajapo vaʼerã ikatúva guive ñamboʼe hag̃ua ñande rapichápe pe añetegua oĩva la Bíbliape. Ikatu jaʼe la Biblia ojoguaha peteĩ espádape. ¿Mbaʼérepa? Pórke peteĩ soldádo ojagarra porãháicha ijespáda, ñande tekotevẽ avei ñañakarama porã “Ñandejára Ñeʼẽ” rehe (Efes. 6:17). Iñimportánte ñandekatupyryve jahávo ñaporomboʼe hag̃ua ikatu hag̃uáicha jaipuru “Ñandejára Ñeʼẽ hekoitépe” (2 Tim. 2:15). Ñamboʼe jave la Biblia ñande rapichápe, jaikuaave ha jahayhuve pe añetegua. Avei ñaimeve desidído jasegitaha jaiko pe añetegua rapére.

17. ¿Mbaʼérepa nde remombaʼe pe añetegua?

¹⁷ Pe añetegua ningo peteĩ rregálo iporãitereíva oúva Jehovágui. Upéicha ñande ikatu ñañemoag̃ui ñande Ru yvagapeguáre, ha ndaipóri ótra kósa iñimportantevéva upévagui. Jehová ningo heta mbaʼéma ñanemboʼe, péro amáske jaha hese, hetaiterei mbaʼe jasegíta gueteri ñaaprende chugui. Haʼe opromete voi osegitaha ñanemboʼe opa árare. Upévare ñamombaʼe vaʼerã pe añetegua haʼeramoguáicha peteĩ pérla ijojahaʼỹva. Jasegi vaʼerã ‘jajogua pe añetegua ha ani núnka ñavende upéva’. Péicha ñande avei ñakumplíta pe promésa David ojapo vaʼekue: “Che asegíta pe añetegua rapére” (Sal. 86:11).