1, 2. ¿Mbaʼérepa kristianokuéra ñañeinteresa vaʼerã koʼág̃arupi Levítico rehe?

APÓSTOL Pablo omomanduʼa vaʼekue iñamígo Timotéope: “Entéro mbaʼe oĩva Ñandejára Ñeʼẽme ou Ñandejáragui, ha ideprovécho” (2 Tim. 3:16). Umíva apytépe oĩ avei pe lívro de Levítico. ¿Mbaʼépa nde repensa Levíticogui? Heta oĩ opensáva ko lívrope oĩha sólamente umi rrégla ndaideprovechovéimava ñane tiémpope g̃uarã. Péro ñande kristianokuéra nañapensái upéicha.

² Ojapo 3.500 áñorupi ojeskrivi hague Levítico, upéicharõ jepe Jehová oheja ko lívro “ñanerekomboʼe hag̃ua” (Rom. 15:4). Levítico ñanepytyvõ jaikuaa hag̃ua Jehová opensa lája, upévare ñañeinteresa vaʼerã ko lívrore. Jaʼe porãsérõ g̃uarã, oĩ hetaiterei mbaʼe ikatúva ñaaprende ko lívro oúvagui Ñandejáragui. Jahechamína 4 mbaʼe ikatúva ñaaprende.

3. ¿Mbaʼérepa ojejapo vaʼekue sakrifísio pe Día Oñeperdonahápe umi Pekádo?

³ Leksión 1: Jehová ñandeguerohory vaʼerã ojeasepta hag̃ua ñande sakrifísio. Káda áño, pe Día Oñeperdonahápe umi Pekádo, pe nasión de Israel oñembyaty vaʼekue ha pe súmo saserdóte oofrese umi animál sakrifísioramo. Umi sakrifísio ningo oipytyvõ vaʼekue pe puévlope pórke omomanduʼa umi israelítape oikotevẽha oñemopotĩ chupekuéra ipekadokuéragui. Péro pe súmo saserdóte ogueraha mboyve umi animál ruguy pe Santísimope ha omopotĩ pe puévlope pekádogui, haʼe ojapo vaʼerã ótra kósa iñimportanteve jeýva upévagui.

4. Heʼiháicha Levítico 16:12, 13, ¿mbaʼépa ojapo pe súmo saserdóte oike jave primera ves pe tavernákulope pe Día Oñeperdonahápe umi Pekádo? (Ehecha pe taʼanga oĩva ko rrevísta apére).

 ⁴ (Elee Levítico 16:12, 13). Ñañeimahinamína mbaʼépa oiko vaʼekue pe Día Oñeperdonahápe umi Pekádo: Pe súmo saserdóte oike pe tavernákulope primera ves, upe rire oike jeýta upépe 2 vése mas. Peteĩ ipópe oreko peteĩ mbaʼyru henyhẽva insiénso hyakuã asývagui, ha pe ótro ládo katu oreko pe mbaʼyru de óro henyhẽva tatapỹigui. Haʼe opytaʼimi pe kortína renondépe, omoʼãva pe Santísimo entráda. Haʼe oikuaa orekoha peteĩ priviléhio tuichaitereíva, pórke ikatu jaʼe oĩtaha hína Ñandejára Jehová renondépe. Upéi oike pe Santísimope ha oñemboʼy pe Árka del Pákto renondépe. Koʼág̃a pe súmo saserdóte ohykuavo pe insiénso pe tatapỹi ári, ha pe tatatĩ osẽva pe insiénso hyakuã asývagui ojagarrapaite pe koty. * Upe rire pe súmo saserdóte oike jeýta pe Santísimope umi animál ojesakrifikáva ruguykue reheve. ¿Péro jahechakuaápa pe súmo saserdóte ohapy hague pe insiénso oofrese mboyve umi animál ojesakrifikáva ruguykue?

5. ¿Mbaʼépa ikatu ñaaprende ojepuru haguére insiénso pe Día Oñeperdonahápe umi Pekádo?

⁵ ¿Mbaʼépa ikatu ñaaprende ojepuru haguére insiénso pe Día Oñeperdonahápe umi Pekádo? La Biblia ningo heʼi ojoguaha insiénsope umi ñemboʼe Jehová oguerohorýva ojapóva umi isiérvo ifiélva (Sal. 141:2; Apoc. 5:8). Ñanemanduʼa vaʼerã yma pe súmo saserdóte omombaʼeterei hague pe priviléhio orekóva oikévo Jehová renondépe oofrese hag̃ua insiénso. Péicha avei ñande ñañemboʼe jave Jehovápe: Jahechauka jarrespetaha chupe ha ñamombaʼetereiha upe priviléhio. Ñande ningo jaagradeseterei Ñandejára Jehovápe, upe ojapo vaʼekue ko univérso kompletoite, opermiti haguére ñandéve ñañemoag̃ui hese, ojapoháicha peteĩ mitã oñemoag̃uíva itúare (Sant. 4:8). Jehová ñandeasepta iñamígoramo, ha ñande ñamombaʼeterei ko priviléhio, upéicha rupi núnka ndajajaposéi mbaʼeve ombopochy vaʼerã chupe (Sal. 25:14).

6. ¿Mbaʼépa ñaaprende pe súmo saserdóte ohapy haguére insiénso oofrese mboyve umi sakrifísio?

⁶ Avei ñanemanduʼa vaʼerã pe súmo saserdóte ohapy vaʼerãha pe insiénso oofrese mboyve umi sakrifísio. Péicha haʼe oĩta segúro Ñandejára oguerohoryha chupe oofrese vove umi sakrifísio. ¿Mbaʼépa ñaaprende upévagui? Ñapensamína Jesús kásore. Jaikuaa haʼe ou hague ko yvy ape ári omeʼẽ hag̃ua hekove sakrifísioramo. Péro ojapo mboyve upéva, Jesús ojapo vaʼerã kuri peteĩ mbaʼe iñimportantevéva yvyporakuéra salvasióngui. ¿Mbaʼépa upéva? Ikatu hag̃uáicha Jehová oasepta isakrifísio, Jesús ifiél ha iñeʼẽrendu vaʼerã kuri Itúape entéro mbaʼépe. Péicha Jesús ohechaukáta jaiko porãveha jajapóramo opa mbaʼe Jehovápe ogustaháicha, avei Itúa orekoha derécho ñanegovernávo ha igoviérno iporãveha ñandéve g̃uarã.

7. ¿Mbaʼérepa entéro mbaʼe Jesús ojapóva ombovyʼa vaʼekue Itúape?

⁷ Oikove aja entéro ko yvy ape ári, Jesús iñeʼẽrendu vaʼekue Jehovápe entéro mbaʼépe. Ombohováiramo jepe umi tentasión, pruéva ijetuʼúva, ha oikuaáramo jepe heta ohasa asytaha omano mboyve, haʼe oĩ vaʼekue desidído ohechaukataha Itúa siémpre ñanegoverna porãha (Filip. 2:8). Ombohováirõ guare umi situasión ijetuʼúva, Jesús “hatã osapukái” ha “hasẽ” vaʼekue oñemboʼévo Itúape (Heb. 5:7). Umi ñemboʼe ojapóva ipyʼaite guive ohechauka vaʼekue haʼe ifiél hague Jehovápe, ha omombarete chupe osegi hag̃ua iñeʼẽrendu Itúape.  Jehovápe g̃uarã, umi ñemboʼe ojapóva Jesús ojogua vaʼekue pe insiénso hyakuã asývape. Entéro mbaʼe Jesús ojapóva ombovyʼaiterei vaʼekue Itúape, ha ohechauka vaʼekue Ñandejára goviérno iporãveha ñandéve g̃uarã.

8. ¿Mbaʼéichapa ikatu jasegi Jesús ehémplo?

⁸ Ñande ikatu jasegi Jesús ehémplo ñañehaʼãmbaitévo ñaneñeʼẽrendu Jehovápe ha ñandefiél chupe. Jahasa jave umi mbaʼe ijetuʼúva, ñañemboʼe vaʼerã ñande pyʼaite guive ha jajerure Jehovápe tañanepytyvõ jajapo hag̃ua haʼe oipotáva. Péicha jahechaukáta jaapojaha Jehová goviérno. Avei ñanemanduʼa vaʼerã haʼe ndoaseptamoʼãiha ñane ñemboʼe jajapóramo jaikóvo umi mbaʼe ombojeguarúva chupe. Péro jajapóramo umi mbaʼe haʼe oguerohorýva, ikatu jajerovia umi ñemboʼe jajapóva ñande pyʼaite guive haʼetetaha Jehovápe g̃uarã pe insiénso hyakuã asyetéva. Ha ikatu ñaime segúro ñande Ru yvagapegua ovyʼaitereiha ñandefiél ha ñaneñeʼẽrendúramo chupe (Prov. 27:11).

9. ¿Mbaʼérepa umi israelita ojapo vaʼekue umi ofrénda de paz?

⁹ Leksión 2: Ñande jaservi Jehovápe jahechauka hag̃ua jaagradeseha chupe. Jahechamína avei peteĩ mbaʼe iñimportánteva ojapo vaʼekue umi israelita oadora hag̃ua Ñandejárape: Umi ofrénda de paz. * Levíticope ñaaprende umi israelita ikatu hague omeʼẽ peteĩ ofrénda de paz “oagradese hag̃ua Ñandejárape” (Lev. 7:11-13, 16-18). Haʼekuéra ndojapói upe ofrénda ojejerure rupi chupekuéra, síno ojapose  rupi. Pe persóna omeʼẽva ko ofrénda voluntária ojapo upéva ohayhu rupi Ijára Jehovápe. Upe ojapóva pe ofrénda, ifamília, ha pe saserdóte ikatu vaʼekue hoʼu pe animál ojesakrifikáva roʼokue. Péro oĩ algúna párte upe animálgui oñemeʼẽva Jehovápe añoite. ¿Mbaʼe pártepa rakaʼe umíva?

10. ¿Mbaʼéichapa umi ofrénda de paz oñemensionáva Levítico 3:6, 12, 14-16-pe, ojojogua pe servísio Jesús ojapo vaʼekuéndi Itúape?

¹⁰ Leksión 3: Ñameʼẽ Jehovápe pe iporãvéva jahayhu rupi chupe. Jehovápe g̃uarã ningo pe animál kyrakue haʼe vaʼekue pe párte iporãvéva umi animálgui. Avei omyesakã vaʼekue umi rriñón ha pe ígado ivaliosoitereiha chupe g̃uarã (elee Levítico 3:6, 12, 14-16). Jehová ningo ovyʼaiterei vaʼekue peteĩ israelita ijeheguiete oofrese jave chupe koʼã párte ha pe ikyrakue. Pe israelita ojapóva pe ofrénda ohechauka ohayhuetereiha Jehovápe, ha omeʼẽseha chupe pe iporãvéva. Péicha avei Jesús omeʼẽ vaʼekue Jehovápe pe iporãvéva, oservívo Itúape ipyʼaite guive ha ohayhúgui chupe (Juan 14:31). Jesús ningo vyʼápe ojapo vaʼekue Ñandejára volunta, ha ohayhueterei vaʼekue Iléi (Sal. 40:8). ¡Mbaʼeichaitépa oiméne ovyʼa raʼe Jehová ohechávo Itaʼýra oserviha chupe ipyʼaite guive!

11. a) ¿Mbaʼépepa ojojogua ñande servísio Jehovápe ha umi ofrénda de paz? b) ¿Mbaʼéichapa ikatu ñanekonsola upéva?

¹¹ Ñande servísio Jehovápe ningo ojogua umi ofrénda de pázpe, pórke péicha jahechauka ñandejeheguiete mbaʼeichaitépa jahayhu chupe. Ñande ñameʼẽ Jehovápe pe iporãvéva, ha jajapo upéva jahayhúgui chupe ñande pyʼaite guive. Katuete oiméne Jehová ovyʼaiterei ohechávo hetaiterei hénte oserviha chupe ohayhuetereígui chupe ha umi imandamientokuéra. Jehová ndahaʼéi ku omombaʼénteva umi mbaʼe jajapóva, síno avei ohecha ha omombaʼe mbaʼérepa jajapo upéva. Por ehémplo, oiméramo ñandeedáma ha ndaikatúi jajapo heta mbaʼe iservísiope jaipotaháicha, ikatu ñaime segúro Jehová oikuaa ha ontendeha ñane situasión. Ikatu hína ñapensa saʼietereiha la ikatúva ñameʼẽ chupe, péro Jehová ohecha mbaʼeichaitépa jahayhu chupe ha upéva ñanemomyiha jajapo hag̃ua la ikatumíva entéro. Haʼe ningo vyʼápe oasepta ñameʼẽramo chupe pe iporãvéva.

12. ¿Mbaʼéichapa oñeñandu vaʼekue Jehová ojeofrese jave umi ofrénda de paz, ha mbaʼéichapa ñanemokyreʼỹ upéva?

¹² ¿Mbaʼépa ikatu ñaaprende umi ofrénda de pázgui? Jehová ovyʼaiterei vaʼekue amedída ke okái ohóvo pe altár ári umi párte iporãvéva umi animálgui, ha ojupi ohóvo mbeguekatu pe tatatĩ osẽva chugui. Upévare ikatu ñaime segúro Jehová ovyʼaha avei jaservi jave chupe ñande pyʼaite guive, ha jajapose rupi upéva (Col. 3:23). Ñapensamíntena mbaʼeichaitépa oiméne opukavy ha ovyʼa ñandereheve. Jehovápe g̃uarã ningo ivaliosoiterei entéro mbaʼe jajapóva iservísiope jahayhu rupi chupe, tahaʼe tuicháva térã michĩva. Ha haʼe imanduʼáta hese pára siémpre (Mat. 6:20; Heb. 6:10).

13. Asegún Levítico 9:23, 24, ¿mbaʼéichapa Jehová ohechauka oguerohoryha umi saserdótepe?

¹³ Leksión 4: Jehová ovendesi iñorganisasión pe párte oĩva ko yvy ape ári. Jahechamína mbaʼépa oiko vaʼekue áño 1512-pe a.C., oñemopuʼãrõ guare pe tavernákulo Sérro Sinaí ypýpe (Éx. 40:17). Moisés omoakã vaʼekue pe seremónia oñenombrárõ guare Aarón ha itaʼyrakuérape oservi hag̃ua saserdóteramo. Pe nasión de Israel oñembyaty ohecha hag̃ua umi saserdóte oofrese ypýrõ guare umi animál sakrifísioramo (Lev. 9:1-5). ¿Mbaʼéichapa Jehová ohechauka oguerohoryha umi saserdóte oñenombra ramo vaʼekuépe? Aarón ha Moisés  ovendesi aja pe puévlope, Jehová ombou tata ha ohapypaite pe ofrénda oĩva pe altár ári (elee Levítico 9:23, 24).

14. ¿Mbaʼérepa koʼág̃a iñimportánte ñandéve g̃uarã Jehová oguerohory haguére Aarón ha itaʼyrakuérape oservi hag̃ua saserdóteramo?

¹⁴ Ko mbaʼe oiko vaʼekue ningo ndaijojahái, ha upéva rupive Jehová ohechauka porãiterei oguerohory ha oapojaha Aarón ha itaʼyrakuérape oservi hag̃ua saserdóteramo. Umi israelita ohechárõ guare Jehová oguerohoryha umi saserdótepe, ohechakuaa tekotevẽha oapoja avei chupekuéra. Pe oiko vaʼekue iñimportánte avei ñandéve g̃uarã koʼág̃a. ¿Mbaʼérepa? Pórke umi saserdóte Israelgua ohechaukánte vaʼekue oĩtaha saserdóte iñimportantevéva. Jesús haʼe hína pe Súmo Saserdóte iñimportantevéva, ha oĩ avei 144.000 saserdóte ha rréi ombaʼapótava Jesúsndi yvágape (Heb. 4:14; 8:3-5; 10:1).

15, 16. ¿Mbaʼe mbaʼépa ohechauka porã Jehová oguerohoryha hína pe ‘esklávo de konfiánsa ha iñarandúvape’?

¹⁵ Áño 1919-pe, Jesús onombra peteĩ grúpo michĩva de unhídope oiko hag̃ua chugui “pe esklávo de konfiánsa ha iñarandúva”. Ko esklávo ningo omoakã hína pe predikasión ha avei oñenkarga ‘omeʼẽ hag̃ua aliménto hiʼoraitépe’ Jesús segidorkuérape (Mat. 24:45). ¿Jahechakuaápa añetehápe Jehová oguerohoryha hína ko esklávo de konfiánsa ha iñarandúvape?

¹⁶ Satanás ha imúndo oñehaʼãmbaite ani hag̃ua ko esklávo okumpli hembiapo. Ha añetehápe, Jehová noipytyvõirire chupe, ndaikatumoʼãi kuri ojapo hembiapo. Por ehémplo, oiko jepéma mokõi gérra mundiál, sapyʼánte ko múndope entéro mbaʼe hepypa ha oĩ heta país opytáva imboriahueterei, ojepersegi mbarete Testigokuérape térã ojejapo ñanderehe heta  inhustísia. Upéicharõ jepe, pe esklávo de konfiánsa ha iñarandúva osegi omeʼẽ pe aliménto Cristo segidorkuérape oĩva ko yvy ape ári. Ñapensamíntena: ¡Jareko hetaiterei puvlikasión gratiete mas de 900 idiómape! Upéva ohechauka porãiterei Jehová oapojaha hína ko esklávope. Avei pe predikasión ohechauka Jehová ovendesiha ipuévlope. Umi notísia porã añetehápe ojepredika hína “oparupiete ko yvy ape ári” (Mat. 24:14). Ojekuaa porãiterei Jehová ogia ha tuichaiterei ovendesiha iñorganisasiónpe ñane tiémpope.

17. ¿Mbaʼéichapa jahechauka jaapojaha pe organisasión Jehová oipurúva hína?

¹⁷ Iporã ningo ñañeporandumi: “¿Ahechaukápa aagradeseha aime haguére Jehová organisasión oĩvape ko yvy ape ári?”. Yma Moisés tiémpope Jehová ombou vaʼekue tata yvágagui ohechauka hag̃ua haʼe oguerohoryha umi onombra vaʼekuépe. Ñane tiémpope avei Jehová ohechauka porãiterei oapojaha hína iñorganisasión. Añetehápe oĩ heta mbaʼe jaagradese hag̃ua (1 Tes. 5:18, 19). ¿Mbaʼéichapa jahechauka jaapojaha pe organisasión Jehová oipurúva hína? Jasegívo umi konsého oúva la Bíbliagui ha osẽva umi puvlikasiónpe, térã ñaaprendéva umi rreuniónpe ha asambleahápe. Avei jajapóvo ikatumíva entéro japredika ha ñaporomboʼe hag̃ua umi héntepe (1 Cor. 15:58).

18. ¿Mbaʼépa jajedesidi vaʼerã jajapo?

¹⁸ Jajedesidíkena jajapotaha umi mbaʼe ñaaprendéva lívro de Levíticogui. Primero, ñañehaʼãmbaitékena Jehová tañandeguerohory oasepta hag̃ua ñande sakrifísio. Segundo, jaservi Ñandejárape jaagradese rupi chupe. Tercero, jasegíkena ñameʼẽ chupe pe iporãvéva jahayhu rupi chupe. Ha cuarto, jaapoja ñande pyʼaite guive pe organisasión Jehová oipurúva hína ñane tiémpope. Jajapóramo koʼã mbaʼe, jahechaukáta hína Jehovápe jaagradeseha jaservi haguére chupe, ha haʼe haguére Itestígo.