1-3. a) ¿Mbaʼe situasiónpepa oĩ vaʼekue umi israelita Zacarías oñepyrũrõ guare oprofetisa? b) ¿Mbaʼérepa Jehová ojerure ipuévlope oñemoag̃ui jey hag̃ua hese?

ZACARÍAS ohecha vaʼekue peteĩ kuatiañeʼẽ ovevéva, peteĩ kuña ojerekóva peteĩ mbaʼyrúpe ha mokõi kuña ipepóva ha ovevéva, umi ipepo katu haʼete umi siguéña pepo. Añetehápe ñaneimpresiona koʼã mbaʼe ojehaíva Zacaríaspe (Zac. 5:1, 7-9). ¿Mbaʼérepa Jehová ohechauka koʼã visión Zacaríaspe? ¿Mbaʼe situasiónpepa oĩ vaʼekue umi israelita upe tiémpope? ¿Mbaʼépa ñanemboʼe koʼã visión?

² Ñandejára puévlo ningo oĩ vaʼekue prisionéro Babilóniape 70 áñore, ha áño 537-pe a.C. ojelivera chupekuéra. Ovyʼaiterei ningo hikuái ikatu haguére oho jey Jerusalénpe omyatyrõ hag̃ua pe témplo, ha ikatútagui oadora jey Jehovápe. Un áño rire, umi israelita omoĩma pe témplo simiénto. Ikyreʼỹeterei voi hikuái ha vyʼágui “hatãiterei osapukái ha mombyryeterei guive oñehendu chupekuéra” (Esd. 3:10-13,  TNM). Péro umi enemígo ndoipotáiva ojejapo upe traváho amás día oñemoĩ mbareteve hesekuéra. Upéicha rupi umi israelita ou oñedesanima ha nombaʼapovéi. Upéva rangue oñemoĩ ojogapónte hikuái ha oñemitỹ. Upéicha rupi, 16 áñoma ohasa ha Jehová témplo neʼĩraiti oñetermina. Upévare Jehová omomanduʼa kuri ipuévlope anive hag̃ua opensa ijehénte, ha oñemboja jey hag̃ua hese ikatu hag̃uáicha kyreʼỹ ha pyʼaguasúpe oadora chupe.

³ Upévare, áño 520-pe Jehová omondo proféta Zacaríaspe omomanduʼa hag̃ua ipuévlope maʼerãpa haʼe olivera kuri chupekuéra Babilóniagui. Zacarías réra ningo heʼise voi “Jehová imanduʼa”. Umi israelita hesaráiramo jepe mbaʼépa Jehová ojapo hesehapekuéra, haʼe ndahesaráiri chuguikuéra (elee Zacarías 1:3, 4). Jehová opromete oipytyvõtaha ipuévlope ikatu hag̃uáicha ojeadora jey chupe haʼe oipotaháicha. Péro heʼi avei umi israelítape oadora vaʼerãha chupe ipyʼaite guive ikatu hag̃uáicha haʼe oguerohory chupekuéra. Jahechamína umi visión 6 ha 7 jatopáva Zacaríaspe. Péicha jahecháta mbaʼéichapa Jehová omokyreʼỹ umi israelítape ha avei mbaʼéichapa koʼã visión ikatu ñanepytyvõ ko tiémpope.

4. a) ¿Mbaʼépa ohecha vaʼekue Zacarías pe visión seihápe? b) ¿Mbaʼérepa ojeskrivi pe kuatiañeʼẽre mokõive ládope? (Ehecha pe primer taʼanga oĩva iñepyrũme).

⁴ Pe kapítulo 5 de Zacarías omombeʼu peteĩ visión iñextrañoitereíva (elee Zacarías 5:1, 2). Zacarías ohecha peteĩ kuatiañeʼẽ ovevéva, ipukúva 9 métro ha ipéva 4 métro imédio. Pe kuatiañeʼẽ ojepyso ojelee hag̃ua pe mensáhe oĩva pype (Zac. 5:3). Upe tiémpope ningo ojeskrivi meme vaʼekue umi kuatiañeʼẽre peteĩ ládopente, péro ko kuatiañeʼẽre ojeskrivi mokõive ládo, ha upéva heʼise iñimportantetereiha la ojeskrivíva pype. Añetehápe, peteĩ mensáhe de kastígo hína la orekóva.

5, 6. ¿Mbaʼéichapa Jehová ohecha opaichagua ñemonda?

⁵ (Elee Zacarías 5:3, 4). Enterove jajecháta Ñandejárandi umi mbaʼe jajapóvare. Koʼýte ñande haʼéva testígo de Jehová jareko peteĩ rresponsavilida tuichaitereíva ñañehenóigui hérarupi. Ñande ningo jahayhu chupe ha jaikuaa porã ñamondáramo ñamongyʼataha héra (Prov. 30:8, 9). Oĩ hénte opensáva ndaivairiha ñamonda jajapóramo upéva ñaikotevẽtereígui, térã ndoperhudikamoʼãiramo ótrope. Péro tahaʼe haʼeháicha, pe persóna omondáva ohechauka umi mbaʼerepy iñimportanteveha chupe g̃uarã Jehovágui, héragui ha imandamientokuéragui.

⁶ Jahecha haguéicha, Zacarías 5:3, 4-pe heʼi pe maldisión “oiketaha pe mondaha rógape” ha opytataha upépe ohundi peve chupe. ¿Mbaʼépa heʼise upéva? Jehová ikatuha oikuaauka umi mbaʼe oñeñomíva, ha ohusgataha oimehaichagua mbaʼe vai ojapóva isiervokuéra. Ikatu ningo peteĩ persóna omondáva oñomi upéva polisiágui, ipatróngui, ansianokuéragui térã itúa umíagui. Péro ndaikatumoʼãi omokañy Ñandejáragui, haʼe oasegura oimehaichagua ñemonda ojekuaataha katuete (Heb. 4:13). Entéro Ñandejára siérvo ovyʼa ikatu haguére ojeheʼa iñermanokuérare, oñehaʼãva hína iñonrrádo “opa mbaʼépe” (Heb. 13:18).

7. ¿Mbaʼépa jajapo vaʼerã ani hag̃ua ñanderupyty pe maldisión oĩva pe kuatiañeʼẽme ohecha vaʼekue Zacarías?

⁷ Tahaʼe haʼéva ñemonda ningo ombojeguaru Jehovápe. Umi oservíva chupe omombaʼeterei oikuaa ha ikatu haguére osegi umi konsého oĩva Iñeʼẽme. Umíva ñanepytyvõ jaikuaa hag̃ua mbaʼépa oĩ porã ha mbaʼépa oĩ vai, ha ani hag̃ua jajapo umi mbaʼe omotĩtava Jehovápe. Jajapóramo  upéicha, haʼe ndoguerumoʼãi ñande ári pe kastígo ohaʼarõva umi hénte oikuaávape imandamiénto péro lomímonte naiñeʼẽrendúiva chupe.

8-10. a) ¿Mbaʼépa jajapo hína jahura jave? b) ¿Mbaʼe huraméntopa Sedequías ndorrespetái kuri?

⁸ Pe mensáhe oĩva pe kuatiañeʼẽme ohecha vaʼekue Zacarías heʼi avei mbaʼépa oikóta umi ohurávare Jehová rérape péro nokumplíri (Zac. 5:4). Jahura ningo heʼise jaaseguraha siertoha peteĩ mbaʼe jaʼéva, por ehémplo ikatu ñapromete jajapotaha térã ndajajapomoʼãiha peteĩ mbaʼe.

⁹ Jaikuaaháicha, ndahaʼeiete vyrorei ñañekomprometéramo Jehovápe jajapotaha peteĩ mbaʼe. Jahechamína mbaʼépa oiko vaʼekue Sedequías rehe, pe último rréi ogoverna vaʼekue Jerusalénpe. Haʼe ohura vaʼekue Jehová rérare oñemoĩtaha pe rréi de Babilonia poguýpe. Péro upe rire nokumplíri la heʼíva. Upévare Jehová heʼi Sedequíasre: “Che rekovére ahura peẽme haʼe omanotaha Babilóniape, pe lugár oikohápe pe rréi omoĩ vaʼekue chupe rréiramo. Haʼe odespresia kuri upe rréi huraménto ha nokumplíri pe ikompromíso” (Ezeq. 17:16, TNM).

¹⁰ Sedequías ohura vaʼekue Ñandejára rérare, upévare Jehová ohaʼarõ okumpli ipalávra (2 Crón. 36:13). Péro ko rréi opyrũ iñeʼẽre ha ojerure ajúda Egíptope ikatu hag̃uáicha oipytyvõ chupe ojei hag̃ua Babilonia poguýgui. Péro Egipto noipytyvõi chupe (Ezeq. 17:11-15, 17, 18).

11, 12. a) ¿Mbaʼe promésapa la iñimportantevéva? b) ¿Mbaʼéichapa “káda día” jahechauka ñañemeʼẽma hague Jehovápe?

¹¹ Sedequías ojapo vaʼekue ñanemboʼe Jehová orahaha enkuénta ñapromete jave peteĩ mbaʼe. Ñande ñakumpli vaʼerã  la ñaprometéva jaipotáramo Ñandejára ñandeguerohory (Sal. 76:11). Ñañemeʼẽrõ guare Jehovápe jajapo kuri pe promésa iñimportantevéva. Upérõ ñapromete Ñandejárape jaservitaha chupe toiko la oikóva.

¹² Ñañemeʼẽrõ guare Jehovápe ñañekompromete kuri ñaneñeʼẽrendutaha chupe opa mbaʼépe. “Káda día” jareko oportunida jahechauka hag̃ua ñakumpliha ñane promésa ñambohovái lájare umi provléma, tahaʼe michĩva térã tuicháva (Sal. 61:8, TNM). Por ehémplo, ¿ñaneñeʼẽrendútapa Jehovápe oĩramo ojegustáva ñanderehe koléhiope térã ñande travahohápe? (Prov. 23:26). Oiméramo ñaneañoite jaservi Jehovápe ñane hentekuéra apytépe, ¿jajerurétapa Jehovápe tañanepytyvõ ikatu hag̃uáicha siémpre jaiko kristiáno teéicha? ¿Ñañemboʼépa káda día tahaʼe haʼéva ñane situasión jaagradese hag̃ua Jehovápe ñanderayhu ha ñandegia haguére? ¿Ñañemotiémpopa jalee hag̃ua la Biblia káda día? Ñañemeʼẽrõ guare Jehovápe ñañekomprometéma kuri jajapopaitetaha koʼã mbaʼe. Upévare, ñaneñeʼẽrendu jave ha ñañehaʼãmbaitévo jaservi porã Jehovápe, jahechauka hína jahayhuha chupe ha ñande haʼeha imbaʼe. Ñande jaservi Jehovápe ñandepyʼaite guive, ndahaʼéi ñakumpli hag̃uánte hendive. Haʼe opromete hetaiterei mbaʼe porã isiervokuéra ifiélvape (Deut. 10:12, 13).

13. ¿Mbaʼéichapa ñanepytyvõ pe visión seiha ohecha vaʼekue Zacarías?

¹³ Pe visión seiha Zacarías ohecha vaʼekue ñanepytyvõ ñantende hag̃ua jahayhúramo Jehovápe nañamondamoʼãiha ni nañapyrũmoʼãiha ñane ñeʼẽre. Ñanemboʼe avei Jehová okumpliha ipromésa ha ndahesarái hague umi israelítagui ofalláramo jepe hikuái. Haʼe oraha enkuénta ipuévlo enemigokuéra oĩva ijerére ojopyetereiha chupekuéra. Jahechaháicha, Jehová siémpre okumpli ipromésa ha péicha ohechauka mbaʼépa ohaʼarõ ñandehegui. Ani jaduda haʼe ñanepytyvõtaha ñakumpli hag̃ua umi mbaʼe ñaprometéva. ¿Mbaʼéichapa ojapo upéva? Por ehémplo omeʼẽ ñandéve esperánsa. Koʼẽrõitéma opáta umi mbaʼe vai oĩva ko yvy ape ári. Pe ótra visión Zacarías ohecha vaʼekue oasegura ñandéve oñekumplitaha umi mbaʼe ñahaʼarõva.

14, 15. a) ¿Mbaʼépa ohecha Zacarías pe visión sietehápe? (Ehecha pe segundo taʼanga oĩva iñepyrũme). b) ¿Mbaʼépa orrepresenta pe kuña oĩva pe mbaʼyrúpe? c) ¿Mbaʼérepa pe ánhel otapa jey pe mbaʼyru?

¹⁴ Zacarías ohecha rire pe kuatiañeʼẽ ovevéva, peteĩ ánhel heʼi chupe: “Emaʼẽmi”. ¿Mbaʼépa ohecha ko proféta pe visión sietehápe? Ohecha peteĩ mbaʼyru ojoguáva kanástope, ojepurúva oñemedi hag̃ua un efá (elee Zacarías 5:5-8). Ko mbaʼyru oreko peteĩ “tápa apuʼa de plómo”. Ojepeʼávo pe tápa, Zacarías ohecha oĩha hyepýpe “peteĩ kuña oguapýva”. Pe ánhel heʼi chupe upéva haʼeha “entéro umi mbaʼe vai ojejapóva”. Ñapensamíntena mbaʼeichaitépa oiméne Zacarías oñemondýi raʼe ohechávo pe kuña osẽseha pe mbaʼyrúgui. Péro pe ánhel ensegída omoinge jey chupe hyepýpe ha otapa pe mbaʼyru pe itápa pohýipe. ¿Mbaʼépa heʼise koʼã mbaʼe?

¹⁵ Ko visión ohechauka porã Jehová nopermitimoʼãiha mbaʼeveichagua mbaʼe vai ipuévlope, ha ohecháramo oĩha katu, pyaʼe oipeʼataha (1 Cor. 5:13). Pe ánhel ohechauka kuri upéva otapárõ guare pyaʼe porã pe mbaʼyru pe itápa pohýipe.

16. a) ¿Mbaʼépa ohecha Zacarías oikoha pe mbaʼyrúre? (Ehecha pe tercer taʼanga oĩva iñepyrũme). b) ¿Moõpa oraha pe mbaʼyru umi kuña ipepóva?

¹⁶ Upe rire Zacarías ohecha mokõi kuña ipepo mbaretéva, haʼetéva umi siguéña pepo (elee Zacarías 5:9-11). Koʼã kuña idiferentete voi pe kuña iñañávagui oĩva pe  mbaʼyrúpe. Haʼekuéra ohupi pe mbaʼyru ha oveve ohóvo ótro ládo. ¿Moõpa ogueraha pe kuñáme? Sinárpe, upéva hína Babilonia. ¿Maʼerãpa ojegueraha chupe upépe?

17, 18. a) ¿Mbaʼérepa Babilonia haʼe “entéro umi mbaʼe vai ojejapóva” renda? b) ¿Mbaʼépa ñaĩ vaʼerã desidído jajapo?

¹⁷ Umi israelita oikóva Zacarías tiémpope oiméne ontende porã mbaʼérepa Babilonia haʼe “entéro mbaʼe vai ojejapóva” renda. Haʼekuéra oikuaa porã Babilonia haʼeha peteĩ siuda henyhẽva tekovaígui ha adorasión fálsagui. Zacarías ha heta ótro judío oikóva upe siudápe, káda día oñehaʼã ani hag̃ua ojapo umi mbaʼe vai. Ko visión oiméne omokyreʼỹ chupekuéra pórke oasegura Jehová ndohejamoʼãiha mbaʼeve omongyʼa pe adorasión oñemeʼẽva chupe.

¹⁸ Ko visión omomanduʼa umi judíope ojapo vaʼerãha ikatúva guive ani hag̃ua mbaʼeve omongyʼa pe adorasión oñemeʼẽva Ñandejárape. Jehová puévlope noñepermitíri mbaʼeve ivaíva ha arakaʼeve noñepermitimoʼãi. Koʼág̃a avei haʼe ñandegueru iñorganisasión ipotĩvape, ha ohechauka ñandéve ñanderayhu ha oñangarekoha ñanderehe. Enterovéva ñañehaʼãmbaite vaʼerã ñamoĩ ñande párte ikatu hag̃uáicha ipotĩ iñorganisasión. Jehová puévlope ndaikatúi oĩ mbaʼeve ivaíva.

19. ¿Mbaʼéichapa ñanepytyvõ umi visión ohecha vaʼekue Zacarías?

¹⁹ Umi visión seis ha sieteha ohecha vaʼekue Zacarías, ñanemomanduʼa mbaʼépa ikatu oiko ñanderehe nañaneonrrádoiramo. Avei ñanemomanduʼa Jehová nopermitimoʼãiha oiko tódo el tiémpo umi mbaʼe vai. Upévare ñanembojeguaru vaʼerã koʼã mbaʼe. Koʼã visión oasegura avei ñandéve ñañehaʼãmbaitéramo jajapo ñande Ru ñanderayhuetévape ogustáva, haʼe oñangarekotaha ñanderehe ha ñanevendesíta. Oimérõ jepe ijetuʼu jasegi hag̃ua ñanepotĩ ko múndo añáme, Ñandejára ikatu hína ñanepytyvõ ñasẽ porã hag̃ua. Péro, ¿mbaʼéichapa ikatu ñaĩ segúro pe adorasión verdadéra noñehundimoʼãiha? Ha amáske hiʼag̃ui pe jehasa asy guasu, ¿mbaʼéichapa jaikuaa Jehová oñangarekotaha iñorganisasiónre? Koʼã porandu ñambohováita pe artíkulo oúvape.