1. ¿Mbaʼérepa Jehová omerese jaadora chupe añoite?

JEHOVÁ hína ñande Apohare, haʼe omeʼẽ ñandéve la vída, upévare haʼe omerese jaadora chupe añoite (Apoc. 4:11). Péro oĩ peteĩ pelígro. Jahayhu ha jarrespetáramo jepe Jehovápe, ikatu hína oĩ ótra kósa ñandestiráva ha jaju ndajahayhúi ni ndajaadorái chupe haʼe omereseháicha. Upévare tekotevẽ ñantende mbaʼéichapa ikatu oiko upéva. Péro jahechami raẽta mbaʼépa heʼise jaadora Jehovápe añoite.

2. Heʼiháicha Éxodo 34:14, ¿mbaʼépa ndajajapomoʼãi jaadoráramo Jehovápe añoite?

² La Bíbliape heʼi jave jaadora vaʼerãha Jehovápe añoite, heʼise avei jahayhu vaʼerãha chupe ñande pyʼaite guive. Upévare ndajahejamoʼãi mbaʼeve ni avave oipeʼa Jehovápe ñane korasõgui (elee Éxodo 34:14).

3. ¿Mbaʼérepa jadesidi jaadora Jehovápe?

³ Ñande jaadora Jehovápe ndahaʼéi ojeʼégui reínte ñandéve jajapo hag̃ua upéva. Ñande ñaaprendéma heta mbaʼe chugui ha ñandegusta umi kualida haʼe orekóva. Avei jaikuaa mbaʼépa ogusta ha ndogustái chupe ha ñande ñapensa avei haʼéicha. Ñantende umi mbaʼe oipotáva ñandéve g̃uarã ha jaiko haʼe oipotaháicha. Ñañeñandu porãiterei haʼe omeʼẽ haguére ñandéve pe oportunida jaiko hag̃ua iñamígoramo (Sal. 25:14). Entéro koʼã mbaʼére ñande jadesidi jaadora Ñandejárape. Añetehápe, opa mbaʼe ñaaprendéva chugui, ñanemoag̃uive hese (Sant. 4:8).

4. a) ¿Mbaʼépa Satanás oipuru ani hag̃ua jaadora Jehovápe añoite? b) ¿Mbaʼépa jahecháta ko artíkulope?

 ⁴ Pe Diablo ningo okontrola ha oipuru ko múndo ikatu hag̃uáicha hasyve ñandéve ñadomina hag̃ua umi deséo vai ha umi mbaʼe yvyporakuéra normálmente ojaposéva (Efes. 2:1-3; 1 Juan 5:19). Satanás ndoipotái ñande jaadora Jehovápe añoite, upévare haʼe ñanemomýi jahayhu hag̃ua avei ótra kósa. Jahecháta mokõi mbaʼe Satanás oipurúva ñanemomombyry hag̃ua Jehovágui. Primero, haʼe ñanemomýi jaiko hag̃ua pláta rapykuéri, ha segundo, jaiporavo hag̃ua umi entretenimiénto ivaíva.

5. ¿Mbaʼérepa ñañatende vaʼerã ani hag̃ua ñañepyrũ jahayhu pe pláta?

⁵ Opavavénte jarekose jaʼumi vaʼerã, ao ñamonde vaʼerã ha peteĩ lugár jaiko hag̃ua. Péro ñañatende vaʼerã ani hag̃ua ñañepyrũ jahayhu pe pláta. Heta hénte koʼág̃arupi ohayhu pe pláta ha umi mbaʼerepy (2 Tim. 3:2). Jesús oikuaa porã idisipulokuéra ikatuha oñepyrũ iplatarayhu, upévare heʼi: “Avave ndaikatúi oservi esklávoramo mokõi patrónpe. Pórke peteĩme ohayhúta ha pe ótrore katu ndaijaʼemoʼãi, térã peteĩre ojepokuaavéta ha pe ótrope katu odespresiáta. Upéicha avei, peẽ ndaikatúi peservi Ñandejárape ha avei peiko pláta rapykuéri” (Mat. 6:24). Peteĩ persóna oadoráva Jehovápe ha avei oipurúva hetaiterei tiémpo oñehaʼãvo ipláta heta hag̃ua, ikatu jaʼe oserviha hína mokõi patrónpe. Pe persóna ndoadorái hína Jehovápe añoite.

6. ¿Mbaʼépa ikatu ñaaprende Jesús heʼi vaʼekuégui pe kongregasión de Laodicéape?

⁶ Opakuévo pe primer síglo, umi ermáno oĩ vaʼekue pe kongregasión de Laodicéape oñemombaʼeguasu pórke ipláta heta ha noikotevẽi voi mbaʼevete. Péro Jehová  ha Jesús renondépe isituasión ivaipaitéma, imboriahu, hesatũ ha ijopío hikuái. Jesús ningo ndokorrehíri chupekuéra irríko haguére, síno pórke oñemomombyry ohóvo Ñandejáragui ohayhu rupi umi rrikésa (Apoc. 3:14-17). Oiméramo ñande japilla ñañepyrũha avei jahayhu umi rrikésa, tekotevẽ pyaʼe porã ñakambia (1 Tim. 6:7, 8). Ndajajapóiramo upéva, ñaĩta dividído ha Jehová ndoaseptamoʼãi ñane adorasión. Haʼe ningo “peteĩ Dios oipotáva chupe añoite ojeadora” (Deut. 4:24). ¿Mbaʼéicha ikatu jaju jahayhueterei pe pláta?

7-9. ¿Mbaʼépa ñaaprende pe ansiáno héravagui David?

⁷ Jahechamína David ehémplo, peteĩ ansiáno iguapoitereíva oikóva Estados Unídospe. Ko ermáno heʼi ijehe itravahadorha. Pe emprésa haʼe ombaʼapo haguépe oñemeʼẽ chupe peteĩ puésto iñimportánteva, ha ojeʼe voi hese haʼeha peteĩva umi ivalevéva ipaíspe ojapo hag̃ua pe itraváho. David heʼi: “Upérõ apensa oho porãha chéve pórke Jehová chevendesi”. Péro, ¿añetépa raʼe upéva?

⁸ David ohechakuaa itraváho oñepyrũha omomombyry chupe Jehovágui. Haʼe heʼi: “Rreunionhápe ha predikasiónpe apensa aikóvo umi provléma oĩvare che traváhope. Agana ningo heta pláta, péro ajestresaiterei. Ha añepyrũma avei cheprovléma che matrimóniope”.

⁹ Upéi David opilla tekotevẽha odesidi mbaʼépa la iñimportantevéva chupe g̃uarã. Haʼe heʼi: “Ajedesidiete akorrehi la che situasión”. Upémarõ oorganisa porã mboy tiémpopa ombaʼapóta ha opresenta upéva ipatrónpe. ¿Mbaʼépa oiko? David oñemosẽ itraváhogui. ¿Mbaʼépa ojapo David upémarõ? Haʼe omombeʼu: “Al día sigiénte antrega  che solisitu ajapo hag̃ua pe prekursorádo auxiliár de kontínuo”. Oñemantene hag̃ua, David ha hembireko oñepyrũ ojapo traváho de limpiésa. Upe rire David oñepyrũ pe prekursorádo rregulár ha kon el tiémpo hembireko avei ojapo upéva. Ko matrimónio ojapo peteĩ traváho heta persóna odespresiáva, péro upéva ndahaʼéi la iñimportantevéva chupekuéra g̃uarã. Haʼekuéra saʼi ogana ñakomparátarõ pe traváho yma oreko vaʼekuére, péro ohupytýma chupekuéra opaga hag̃ua umi gásto orekóvare káda mes. Ko matrimónio omotenondese Jehovápe opa mbaʼépe, upéicha rupi ohecha hikuái mbaʼeichaitépa Jehová oñangareko umi omotenonde memévare Irréino (Mat. 6:31-33).

10. ¿Mbaʼéichapa ikatu ñañangareko ñane korasõre?

¹⁰ Oiméramo ñandepláta térã ñanemboriahu, enterovénte tekotevẽ ñañangareko ñane korasõre. ¿Mbaʼéichapa jajapokuaa upéva? Aníkena ñañepyrũ jahayhu umi rrikésa. Aníkena ñapermiti ñande traváho iñimportanteve Jehová servísiogui. Jahecha hag̃ua noiméipa oikóma upéva ñanderehe, ikatu ñañeporandu: “Aime jave rreunionhápe ha predikasiónpe, ¿apensápa siémpre che traváhore? ¿Aikópa ajepyʼapy ofaltárõ g̃uarã chéve pláta amo gotyove? ¿Cheprovlémapa che matrimóniope pláta káusare? ¿Aĩpa dispuésto ajapo hag̃ua umi traváho la hénte odespresiáva chetiempove hag̃ua Jehovápe g̃uarã?” (1 Tim. 6:9-12). Jajepyʼamongetávo koʼã porandúre ñanemanduʼa vaʼerã Jehová ñanderayhuha ha ojapoha ko promésa entéro umi oservívape chupe ipyʼaite guive: “Núnka ndorohejamoʼãi ha núnka nderepytamoʼãi neaño”. Upévare apóstol Pablo oskrivi: “Aníkena peiko pendeplatarayhu” (Heb. 13:5, 6).

11. ¿Mbaʼéichapa ikatu ñandeperhudika pe entretenimiénto?

¹¹ Jehová ningo oipota ñande javyʼa, ha umi entretenimiénto ikatu ñanepytyvõ upearã. Ñandejára Ñeʼẽ heʼi voi “ndaiporiha ótra kósa iporãvéva kóvagui: jakaru, jaʼu vevída ha javyʼa ñambaʼapo pohýivo” (Ecl. 2:24). Péro pe entretenimiénto oĩva ko múndope ikatu hína ñandeperhudika. ¿Mbaʼérepa jaʼe upéva? Pórke umi entretenimiénto ikatu omomýi umi héntepe oasepta térã ohayhu hag̃ua umi mbaʼe la Biblia okondenáva.

12. Heʼiháicha 1 Corintios 10:21, 22, ¿mbaʼérepa jaiporavo porã vaʼerã pe entretenimiénto?

 ¹² Ñande jaadorase Jehovápe añoite, upévare ndaikatúi jakaru “Jehová meságui” ha “demoniokuéra meságui” (elee 1 Corintios 10:21, 22). Ñakompartíramo peteĩ tembiʼu peteĩ persónandi, upéva heʼise jaikoha iñamígoramo. Ñande jaiporavóramo umi entretenimiénto ikatúva omomýi peteĩ persónape iviolénto hag̃ua, ojapo hag̃ua espiritísmo, hekovai hag̃ua, térã ojapo hag̃ua ótra kósa ivaíva, añetehápe jaʼu hína peteĩ tembiʼu opreparáva Ñandejára enemigokuéra. Jajapóramo upéva, ñande voi jajeperhudikáta ha avei ñañemomombyrýta Jehovágui.

13, 14. a) ¿Mbaʼérepa jaʼekuaa pe entretenimiénto ojoguaha pe tembiʼúpe? b) Heʼiháicha Santiago 1:14, 15, ¿mbaʼérepa ñañeñangareko vaʼerã jaiporavóta jave umi entretenimiénto?

¹³ Jahechamína mbaʼéichapa pe entretenimiénto ojogua pe tembiʼúpe. Jakaru vove ñande ikatu jadesidi mbaʼépa ñamoingéta ñande jurúpe, péro ñamokõ vove pe tembiʼu, ndaikatúi jadesidi mbaʼéichapa ñande rete oipurúta upéva. Jaʼúramo umi tembiʼu iporãva, ñaneresãita, péro pe tembiʼu ivaírõ, upéva ñandeperhudikáta. Ikatu ningo ndajahechái ensegidamínte pe rresultádo, péro ohasávo la tiémpo si ojekuaátama.

¹⁴ Upéicha avei jaiporavo jave umi entretenimiénto ikatu jadesidi mbaʼépa ñamoingéta ñane akãme. Péro ndaikatúi jadesidi mbaʼéichapa upéva oafektáta umi mbaʼe ñapensáva ha ñañandúva. Pe entretenimiénto iporãva ikatu ñanembopiroʼy, péro pe ivaíva ñandeperhudikáta (elee Santiago 1:14, 15). Pe entretenimiénto ivaíva ñandeafekta lája ikatu hína ndojekuaái ensegidami, péro upéi katuete ojekuaáta. Upévare la Biblia omeʼẽ ñandéve ko konsého: “Ani peñembotavy pendejupe voi: avave ningo ndaikatúi oñembohory Ñandejárare, pórke entéro mbaʼe oñotỹva peteĩ persóna, upéva avei omonoʼõta. Pórke pe oñotỹva omeʼẽ hag̃ua gústo hete imperféktope, omonoʼõta ñehundi” (Gál. 6:7, 8). Ajépa iñimportantete ñamboyke umi entretenimiénto ñanemomýitava jajapo hag̃ua umi mbaʼe Jehovápe ombojeguarúva (Sal. 97:10).

15. ¿Mbaʼe rregálopa Jehová omeʼẽ ñandéve?

¹⁵ Hetaiterei Jehová siérvo ovyʼaiterei ohechávo JW Broadcasting^®, ñane kanál de televisión jarekóva Internétpe. Peteĩ ermána hérava Marilyn heʼi: “JW Broadcasting chepytyvõ chepositivave hag̃ua, ha ikatu ahecha opa mbaʼe oĩva pype. Añeñandu jave cheaño térã añedesanima, ahecha peteĩ diskúrso chemokyreʼỹva térã peteĩ prográma de adorasión matutína. Umíva chemoag̃uive Jehováre ha iñorganisasión rehe. JW Broadcasting ningo okambiaite la che rekove”. ¿Reaprovechapaitépa hína ko rregálo porãite Jehová omeʼẽva? Káda mes JW Broadcástingpe osẽ peteĩ prográma pyahu, péro oĩ avei hetaiterei vidéo ha músika ñanemokyreʼỹva ikatúva jahecha térã ñahendu ñandegustaha órape.

16, 17. ¿Mbaʼérepa ñañatende porã vaʼerã mboy tiémpopa jaipuru jajediverti hag̃ua, ha mbaʼéichapa ikatu jajapo upéva?

¹⁶ Tekotevẽ ñañeñangareko jadesidi hag̃ua mbaʼeichagua entretenimiéntopa jaiporavóta, ha mboy tiémpopa jaipurúta jajediverti hag̃ua. Nañañatendéiramo ikatu hína jaipuru hetave tiémpo jajediverti hag̃ua ke la jaservi hag̃ua Jehovápe. Hetápe ijetuʼu okontrola hag̃ua pe tiémpo oipurúva ojediverti hag̃ua. Peteĩ ermána hérava Abigaíl ha orekóva 18 áño heʼi: “Un diaite ambaʼapo rire, ahecha pe téle ajerrelaha hag̃ua. Péro ndajekuidáiramo,  órare aĩta pe téle renondépe”. Peteĩ ermáno imitãva hérava Samuel heʼi: “Sapyʼánte añemoĩ ahecha hetaiterei vidéo mbykýva Internétpe. Peteĩnte ahecháta jepi, ha añemeʼẽʼỹre enkuénta, ohasáma 3 térã 4 óra”.

¹⁷ ¿Mbaʼéichapa ikatu rekontrola pe tiémpo reipurúva rejediverti hag̃ua? Primeroite voi rehecha vaʼerã mboy tiémpopa reipuru upearã. Ikatu reanota peteĩ kalendáriope mboy órapa reipuru una semánape rehecha hag̃ua téle, reipuru hag̃ua Internet térã rehuga hag̃ua nde selulár térã távletpe. Rehecháramo reipuruha hetaiterei tiémpo koʼã mbaʼépe, iporãta rejapóramo peteĩ prográma. Primeroite redesidi vaʼerã mboy tiémpo reipurúta umi mbaʼe iñimportantevévape, ha upéi pe entretenimiéntope. Upéi ejerure Jehovápe tanepytyvõ rejapo hag̃ua reanota haguéicha. Upéicha rerekóta tiémpo ha fuérsa rejapo hag̃ua nde estúdio personál, estúdio de família, reho hag̃ua rreuniónpe, predikasiónpe ha remboʼe hag̃ua la héntepe. Rejapopáramo koʼã mbaʼe, nereñeñanduvaimoʼãi reipuru haguére avei ne tiémpo pe entretenimiéntope.

18, 19. ¿Mbaʼéichapa jahechauka jaadoraha Jehovápe añoite?

¹⁸ Apóstol Pedro heʼi rire Satanás múndo oñehunditaha ha oĩtaha peteĩ múndo pyahu, heʼi avei: “Che ermanokuéra pohayhuetéva, pehaʼarõ rupi koʼã mbaʼe, peñehaʼãmbaitékena penepotĩ Ñandejára renondépe, ani oĩ pende pype mbaʼeve ivaíva, ha peiko porã hendive” (2 Ped. 3:14). Ñande jasegíramo ko konsého ha ñañehaʼãmbaite ñanepotĩ opa mbaʼépe, jahechauka hína jaadoraha Jehovápe añoite.

¹⁹ Satanás ha imúndo osegíta oñehaʼã ñamotenonde hag̃ua ñande rekovépe oimeraẽ mbaʼe Jehovápe rangue (Luc. 4:13). Péro tahaʼe haʼéva umi provléma jarekóva, nañapermitimoʼãi mbaʼeve ni avave oipeʼa Jehovápe ñane korasõgui. Ñande ñaime desidído jaadorataha Jehovápe añoite, haʼe ningo omerese upéva.