Áño 1923-pe, Jehová organisasión ojapo heta kámbio ikatu hag̃uáicha umi Estudiánte de la Biblia omombaʼeguasu Jehovápe en unida. Ñemañaháme oñepyrũ osẽ umi informasión oexplikáva umi téxto oñeanalisátava káda semána pe rreunión héravape “Aty Ñañemboʼe ha Ñamombaʼeguasu hag̃ua Jehovápe”. Avei umi Estudiánte de la Biblia oprepara peteĩ kalendário. Upépe osẽ mbaʼe téxtopa oñeanalisáta umi rreunionhápe káda semána, ha avei mbaʼe kántikopa ikatu opurahéi hikuái káda día ostudia jave haʼeñoháme térã ojapo jave pe estúdio de família.

Umi rreunionhápe, umi Estudiánte de la Biblia ojepokuaa vaʼekue omombeʼu umi experiénsia orekóva. Por ehémplo la ohasa vaʼekue predikasiónpe, álgo oagradesetereíva Ñandejárape, opurahéi térã oñemboʼe hikuái. Peteĩ ermána hérava Eva Barney ojevautisa vaʼekue áño 1923-pe orekórõ guare 15 áño. Haʼe heʼi: “Upe tiémpope emombeʼusérõ la ne experiénsia epuʼã vaʼerã eñemboʼy ha eñepyrũ ere: ‘Aagradeseterei Ñandejárape entéro mbaʼe porã ojapo vaʼekuére cherehehápe’”. Heta ermáno ningo omombeʼuseterei vaʼekue la iñexperiénsia. Ermána Eva osegi heʼi: “Chemanduʼa ermáno Godwin rehe, rohayhueterei vaʼekue chupe ha ijedáma kuri. Haʼe siémpre oagradesesémi Ñandejárape hetaiterei mbaʼére, péro hembireko opillávo pe ermáno omoakãva pe rreunión ikaneʼõmaha ohendu haguére chupe, ostira iména sáko ruguái ha haʼe okirirĩntema ha oguapy”.

Una ves al mes káda kongregasión ojapo álgo espesiál pe rreunión héravape “Aty Ñañemboʼe ha Ñamombaʼeguasu hag̃ua Jehovápe”. Pe Ñemañaha 1 de abril de 1923 omombeʼu mbaʼéichapa ojejapo vaʼerã koʼã aty. Heʼi: “Alamita peve pe rreunión oñemombeʼu vaʼerã umi experiénsia ohasáva umi ermanokuéra predikasiónpe, péicha oñemokyreʼỹta umi ótro ermánope. Roĩ segúro koʼã aty omoag̃uivetaha umi ermanokuérape ojuehe”.

Charles Martin haʼe vaʼekue peteĩ puvlikadór orekóva 19 áño, oĩva pe kongregasión Vancouver, Canadápe. Haʼe omombeʼu umi aty tuichaiterei oipytyvõ hague chupe ha heʼi: “Umi atýpe añepyrũ vaʼekue aaprende mbaʼépa ikatu haʼe apredika jave ogahárupi, umi ermáno omombeʼúmi la ohasáva predikasiónpe ha upéicha rupi che aikuaáma mbaʼépa ikatu haʼe predikasiónpe ha mbaʼéichapa ikatu akontesta oĩ jave cheñeʼẽjokoséva”.

Umi ermanokuéra osẽ rupi opredika iñunidove. Pe Ñemañaha 1 de abril de 1923 oanunsia vaʼekue: “Ñasẽvo japredika ñambaʼapo hína unidopa. Upévare ojeporavo martes 1 de mayo de 1923 oñesẽ hag̃ua ojepredika. Avei káda mes pe primer martes oñemboykéta predikasionrã. Entéro umi puvlikadór oĩva umi kongregasiónpe opartisipa vaʼerã ko traváhope”.

Umi imitãva jepe osẽ vaʼekue opredika. Peteĩ ermána hérava Hazel Burford, oreko vaʼekue upérõ 16 áño ha heʼi: “Pe Bulletin a ogueru vaʼekue umi presentasión roaprende hag̃ua de memória. Che avuélondi kyreʼỹme ropartisipa vaʼekue koʼã aktividápe”. Péro oĩ álgo osorprendéva ko ermánape. Oĩ kuri peteĩ ermáno ijedáva ndogustaietévape la haʼe opredika. Pe ermána heʼi: “Peteĩ ermáno ijedáva ndoipotaiete vaʼekue añeʼẽ umi héntendi. Upe tiémpope algúno nontendeporãi gueteri enterove opredika vaʼerãha omombaʼeguasu hag̃ua ñande Apoharépe, tahaʼe jepe raʼe umi ‘mitãrusu ha mitãkuñanguéra’” (Sal. 148:12, 13). Péro ermána Burford noñentregái ha osegi opredika. Upéi haʼe oho pe segunda kláse de Galaádpe ha oservi de misionéra Panamápe. Kon el tiémpo umi ermáno okambia la opensáva ha ontende umi mitãrusukuéra osẽ vaʼerãha avei opredika.

Umi asambléa oipytyvõ vaʼekue umi ermánope iñunidove hag̃ua. Heta koʼã aty guasúpe ojeporavo peteĩ día ojepredika hag̃ua. Por ehémplo pe asambléa ojejapo vaʼekue Winnipeg, Canadápe, oñeinvita kuri entéro ohóvape osẽ hag̃ua opredika upe siudápe el 31 de marzo. Hetaiterei héntendi oñeñeʼẽ koʼã día espesiál de predikasiónpe, ha upévare ojehupyty heta mbaʼe porã. Upéicha rupi el 5 de agosto oho 7.000 persónarupi ótra asambléa ojejapo vaʼekuépe upe siudápe. Upe fécha peve ndaipóri vaʼekue gueteri ótra asambléa hetaite hénte oho haguépe.

Los Ángeles, Califórniape ojejapo kuri peteĩ aty guasu iñimportantetereíva del 18 al 26 de agosto de 1923. Unas kuánta semána pe asambléa mboyve osẽ kuri umi diáriope oikotaha pe aty guasu.  Umi Estudiánte de la Biblia orreparti mas de 500.000 invitasión. Avei oñemoĩ kuri letréro umi kolektívo ha áutore oñeanunsia hag̃ua oikotaha pe asambléa.

Sábado 25 de agosto ermáno Rutherford ojapo peteĩ diskúrso hérava “Umi ovecha ha kavara”. Upe diskúrsope haʼe oexplika porã umi “ovecha” haʼeha umi persóna ipyʼaporãva oikótava ko yvy ape ári peteĩ paraísope. Avei ermáno Rutherford ojapo peteĩ diskúrso ha olee peteĩ rresolusión hérava: “Peteĩ avíso”. Ko rresolusiónpe oñemombeʼu umi mbaʼe vai ojapóva umi rrelihión japu ha omokyreʼỹ entéro umi ipyʼaporãvape osẽ hag̃ua ‘Babilonia Guasúgui’ (Apoc. 18:2, 4). Kon el tiémpo umi Estudiánte de la Biblia oĩva ko yvy tuichakuére kyreʼỹme orreparti hetaiterei tratádo oĩhápe ko rresolusión.

Pe último día pe asambléape oĩ kuri mas de 30.000 persóna. Haʼekuéra ohendu ermáno Rutherford diskúrso hérava: “Entéro umi nasión og̃uahẽta Armagedónpe, péro hetaiterei oikovéva koʼág̃a nomanomoʼãi arakaʼeve”. Umi Estudiánte de la Biblia oikuaa rupi ohotaha hetaiterei hénte ko asambléape oalkila peteĩ estádio pyahu oĩva Los Ángelespe. Umi ermáno oipota kuri enterove oĩva pe asambléape ohendu porã la ojeʼéva. Upévare oipuru hikuái umi parlánte orekóva pe estádio, upe tiémpope upe teknolohía ipyahuete kuri. Hetaitereive ótra hénte ohendu upe asambléa rrádio rupive.

Áño 1923-pe hetaiteve ojepredika África, Europa, India ha Sudaméricape. Índiape ermáno A. J. Joseph oipytyvõ vaʼekue ojejapo hag̃ua umi puvlikasión koʼã idiómape: Hindi, tamil, telugu, ha urdu. Hiʼarive upe aja haʼe omantene avei hembireko ha umi 6 ifamíliape.

Sierra Leónape, ermáno Alfred Joseph ha Leonard Blackman oskrivi pe sentrál mundiálpe oĩva Brooklyn, Nueva Yórkpe, ha ojerure oñemondo hag̃ua upépe umi ermáno oipytyvõ vaʼerã predikasiónpe. El 14 de abril de 1923 oñekontesta chupekuéra la ipedído. Alfred omombeʼu: “Peteĩ sábado pyhare tárdema arresivi peteĩ llamáda nahaʼarõietéva. Ahendu peteĩ oñeʼẽ hatãva ha oporandúva chéve: ‘¿Ndéiko la reskrivi vaʼekue pe sentrálpe ejerure hag̃ua penepytyvõ vaʼerã predikasiónpe?’. Upépe la cherenóiva heʼi chéve: ‘Vuéno haʼekuéra chembou hína poipytyvõ hag̃ua’”. Ermáno Wiliam Brown la ohenói vaʼekue. Haʼe ou Caríbegui, hembireko Antonia ha mokõi itajýrandi hérava Louise ha Lucy. Haʼekuéra og̃uahẽ kuri upe díape Sierra Leónape, upéicha rupi umi ermáno upepegua ensegídama voi oikuaa ko família og̃uahẽ ramóvape.

 Alfred osegi omombeʼu: “Al día sigiénte Leonard ha che rostudia la Biblia rojapoháicha jepi voi káda semána. Upeichahágui rohecha pe okẽme peteĩ karai puku, avía sído ermáno Wiliam raʼe. Haʼe ikyreʼỹeterei vaʼekue, ha upévare al día sigiéntema voi oñanima ojapo peteĩ diskúrso púvliko”. Un mes mboyve ermáno Wiliam ohejapaitéma umi puvlikasión ogueru vaʼekue. Upe riremínte orresivi 5.000 lívro, péro ensegída ofalta jeýma hetave lívro, péro la hénte ndeʼíri vaʼekue hese lívro vendeha. Oikove aja pukukue ko ermáno ikyreʼỹeterei vaʼekue Jehová servísiope, ha ojapo jave umi diskúrso pyʼỹinte omensiona umi téxto bíblico, upéicha rupi la hénte ohenói chupe karai Biblia.

Upe aja Alemániape umi ermáno odesidi oguerovataha pe sukursál oĩva Bármenpe, pórke michĩetereíma chupekuéra g̃uarã. Avei oñehendúma kuri pe ehérsito francés ohopotaiteha ojagarra hag̃ua upe siuda. Umi ermanokuéra otopa kuri peteĩ lugár oikoitétava oñeimprimi hag̃ua umi puvlikasión peteĩ siuda héravape Magdeburgo. El 19 de junio opreparapaitéma hikuái umi imprénta ha muévle oguerova hag̃ua pe Betel pyahúpe. Upéi ojeavisáma pe sentrál mundiálpe ojevapáma hague ha al día sigiénte osẽ umi diáriope pe ehérsito francés ojagarra hague pe siuda oĩ hague pe sukursál. Upépe umi ermanokuéra ohechakuaa Jehovánte voi oprotehe ha ovendesi hague chupekuéra.

Brasílpe, ermáno George Young, oviaha hetáva opredika hag̃ua, oorganisa la oñekotevẽva oĩ hag̃ua peteĩ sukursál upépe. Péicha oñepyrũ osẽ pe Ñemañaha portuguéspe. Unos kuánto mése haguépente ko ermáno ohejáma umi héntepe mas de 7.000 puvlikasión. Sara Ferguson ovyʼaiterei vaʼekue ermáno Young og̃uahẽ haguére hógape. Sara oleéma kuri oikóvo pe Ñemañaha áño 1899 guive, péro neʼĩra vaʼekue oreko la oportunida ojevautisa hag̃ua. Ohasa rire unos kuánto mése, ermána Sara ojevautisa umi 4 imembýndi.

Opávo ohóvo pe áño 1923, pe Ñemañaha 15 de diciembre upe añopegua, omombeʼu mbaʼeichaitépa oipytyvõ umi kámbio ojejapóva umi rreunión, predikasión ha asambléape. Pe rrevísta heʼi: “Ojekuaa porãiterei mbaʼéichapa umi kongregasión ijerovia mbareteve koʼág̃a, upévare jasegíkena ñambaʼapo jejopy ha jaservi Ñandejárape kyreʼỹ ha vyʼápe ko áño oúvape”.

Áño 1924 iñimportanteterei avei kuri umi Estudiánte de la Bíbliape g̃uarã. Umi ermáno Betelpegua ombaʼapo oikóvo kuri unos kuánto mésere, pe lugár hérape Staten Island, namombyrýiva Betel de Brooklyn oĩhágui. Oñepyrũmíre 1924 oñekompleta pe traváho ojejapóva oikóvo upépe. Upe lugár oipytyvõ umi ermánope iñunidovéntema hag̃ua ha umi notísia porã oñemog̃uahẽ hag̃ua umi lugár mombyryvehápe jepe.