1. ¿Mbaʼérehepa Jesús oñeʼẽ kuri pe último pyhare ohasa vaʼekuépe idisipulokuérandi?

JESÚS omensiona vaʼekue pe mborayhu 30 vése rupi pe último pyhare ohasávape idisipulokuérandi. Haʼe heʼi idisipulokuérape tekotevẽha ojoayhu hikuái (Juan 15:12, 17). Enterovéva ohechakuaa vaʼerã Jesús segidorkuéra ojoayhuha. Péicha umi hénte oikuaáta añetehápe haʼeha hikuái Jesús disípulo (Juan 13:34, 35). Pe mborayhu Jesús oñeʼẽ vaʼekuére ndahaʼéi peteĩ sentimiénto reínte. Pe mborayhu añeteguáva ipoderóso ha ojekuaa ñaime rupi dispuésto jajapóvo sakrifísio ótro rehehápe. Jesús heʼi vaʼekue: “Ndaipóri mborayhu tuichavéva kóvagui: ñameʼẽ ñande rekove ñane amigokuéra rehehápe. Peẽ hína che amígo, pejapóramo che haʼéva” (Juan 15:13, 14).

2. a) ¿Mbaʼérehepa ojekuaa porãiterei Ñandejára siervokuérape? b) ¿Mbaʼe porandúpa ñambohováita ko artíkulope?

² Jehová siervokuéra jajekuaa opárupi jajoayhu añete haguére ha ñaĩ rupi dispuésto jajesakrifikávo ñane ermanokuérare. Avei imbareteterei pe unida oĩva ñande apytépe (1 Juan 3:10, 11). Entéro kristiáno ñañehaʼã jajoayhu tahaʼe haʼéva ñane nasionalida térã trívu ha pe idióma ñañeʼẽva. Avei noimportái  moõguipa jaju térã mbaʼe kostúmbrepa ojeguereko pe lugár jakakuaa haguépe. Ko yvy tuichakuére Jehová siervokuéra ojoayhu añete. Péro, ¿mbaʼérepa tekotevẽterei jajoayhu koʼág̃arupi? ¿Mbaʼéichapa Jehová ha Jesús ñanemombarete pe mborayhu rupive? Ha ¿mbaʼéichapa jahechauka vaʼerã jajoayhuha ikatu hag̃uáicha ñamombarete ha ñakonsola ótrope? (1 Cor. 8:1).

3. ¿Mbaʼéichapa oafekta umi héntepe umi situasión ijetuʼuetéva oĩva ñane tiémpope?

³ Koʼág̃arupi ijetuʼu la situasión, la Biblia heʼíma vaʼekue voi upeichataha, upévare heta ñaneprovléma ha jahasa asy (Sal. 90:10; 2 Tim. 3:1-5). Heta hénte osufrietereíva naikyreʼỹvéi mbaʼeverã ha oñentregaséntema. Upéicha rupi mas de 800.000 persóna ojesuisida káda áño, upéva ningo heʼise ojesuisidaha peteĩ persóna káda 40 segúndo. Ñambyasýramo jepe, oĩ ermáno oñeñandúva avei péicha ha upéva káusare ojesuisida vaʼekue.

4. ¿Máva mávapa umi Jehová siérvo heʼi vaʼekue omanoseha?

⁴ La Biblia heʼi yma oĩ hague unos kuánto Ñandejára siérvo ifiélva oñedesanimaitéva oreko haguére heta provléma. Péicha oñeñandu rupi, haʼekuéra omanoséntema voi. Por ehémplo, Job oñeñandu vaʼekue péicha, upévare heʼi: “Chekueráima che rekovégui, amanoséntema voi” (Job 7:16; 14:13). Jonás oñeñandúrõ guare yvýre heʼi vaʼekue: “Koʼág̃a Jehová ajerure ndéve chejukántema hag̃ua, pórke ikuentave chéve amano mbaʼe aikove rangue” (Jon. 4:3). Proféta Elías oñeñanduʼietérõ guare heʼi vaʼekue: “¡Ovalémante Jehová! Eipeʼántemana chehegui che rekove” (1 Rey. 19:4). Péro Jehová ohayhu vaʼekue koʼã isiérvo ifieletévape ha oipota osegi oikove hikuái. Haʼe nokondenái chupekuéra oñeñandu haguére péicha. Upéva rangue, oipytyvõ koʼã kuimbaʼépe oreko jey hag̃ua pe deséo oikovévo ha osegi hag̃ua oservi chupe fiélmente.

5. ¿Mbaʼérepa iñimportanteterei umi ermáno ha ermána ohechakuaa jahayhuha chupekuéra?

⁵ Koʼág̃arupi, heta ermáno ha ermána ombohovái umi situasión ijetuʼuetereíva. Upévare tekotevẽ jahechauka jahayhuha chupekuéra. Oĩ umi oaguantáva la hénte oñembohory hesekuéra térã opersegi chupekuéra. Sapyʼánte oĩ umi oñepresionaitereíva itravahohápe térã oñeñeʼẽ reíva hese. Avei heta ermáno ikaneʼõ pórke ombaʼapo heta órare térã ojexihieterei chuguikuéra itraváhope. Oĩ katu orekóva heta provléma hogapýpe. Ikatu iména térã hembireko ndahaʼéi Testígo ha pyʼỹinte otaky hese. Koʼã mbaʼére ikatu heta ermáno ou ikangyete ha oñandu ndovaleiha mbaʼeverã. ¿Mávapa ikatu oipytyvõ chupekuéra?

6. ¿Mbaʼéichapa Jehová mborayhu omombarete isiervokuérape?

⁶ Jehová oasegura isiervokuérape ohayhuha chupekuéra ha osegitaha ohayhu opa árare umi oservívape chupe. Ñapensamíntena mbaʼéichapa oñeñandúne rakaʼe umi israelita Jehová heʼírõ guare: “Nde ningo neporãiterei chéve g̃uarã, che romombaʼe ha rohayhueterei [...]. Ani rekyhyje, che aime nendive” (Is. 43:4, 5). Ñande ningo jaikuaa porã Jehová hakateʼỹha káda únore. * La Biblia opromete: “Haʼe ningo ipoderóso ha haʼe ndesalváta. Haʼe ovyʼaitereíta ndereheve” (Sof. 3:16, 17).

7. ¿Mbaʼépepa ojogua Jehová ñanderayhu lája ha peteĩ sy ohayhu lája imemby michĩetévape? (Ehecha pe taʼanga oĩva iñepyrũme).

⁷ Jehová opromete omombarete ha  okonsolataha ipuévlope tahaʼe haʼéva umi provléma ohasáva. Haʼe heʼi: “Peteĩ sy omokambuháicha imembýpe, péicha oñeñangarekóta penderehe, jyva ári pejegueraháta, opopoʼiháicha umi mitã isy rapypaʼũme, péicha peẽ peikóta. Peteĩ sy okonsolaháicha imembýpe, péicha che asegíta pokonsola” (Is. 66:12, 13). Epensamína mbaʼeichaitépa oiméne oñeñandu porã peteĩ mitãraʼy isy oreko jave chupe ijyva ári ha ohuga jave hendive. Jehová avei ñanderayhueterei ha oipota ñañeñandu porã. Aníkena arakaʼeve jaduda Jehová ñanemombaʼetereiha (Jer. 31:3).

8, 9. ¿Mbaʼéichapa Jesús mborayhu ikatu ñanemombarete?

⁸ Entéro kristiáno ikatu avei jaguerovia Jehová ñanderayhuha, pórke Iñeʼẽme heʼi voi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Jahechaháicha, Jesús avei ohechauka ñanderayhuha ha upéva ñanemombarete. La Biblia heʼi ke mbaʼeveichagua “jehasa asy [térã] jepyʼapy” nañandepeʼamoʼãi “Cristo mborayhúgui” (Rom. 8:35, 38, 39).

⁹ Sapyʼánte jahasa umi situasión ñanemokangýva físikamente térã ñanemoñeñandu vaietereíva, ỹrõ upéva káusare ndajavyʼavéi Jehová servísiope. Péicha jave ñanemanduʼa vaʼerã mbaʼeichaitépa Cristo ñanderayhu ha upéva ñanemombaretéta jasegi hag̃ua ñaaguanta (elee 2 Corintios 5:14, 15). Avei omeʼẽta ñandéve pe deséo jaikove hag̃ua ikatu hag̃uáicha jasegi jaservi Jehovápe. Jesús mborayhu ikatu ñanepytyvõ ani hag̃ua ñañentrega, ñandeafektáramo jepe umi desástre naturál, jajepersegírõ, nosẽiramo algúna kósa ñapensa haguéicha kuri térã jajepyʼapyetereíramo jepe.

10, 11. ¿Mávapa oreko pe rresponsavilida omombaretévo umi ermáno oñeñandu vaietévape? Emyesakã.

¹⁰ Jehová ñanderayhúgui ojevale avei pe kongregasiónre ñanepytyvõ hag̃ua. Jahayhúramo ñane ermáno ha ermanakuérape jahechauka hína jahayhuha Jehovápe. Upéicharõ, jajapo vaʼerã ikatúva guive ñaipytyvõ hag̃ua ñane ermanokuérape, péicha ohechakuaáta hikuái ñamombaʼeha chupekuéra  ha Jehová ohayhuha enterovépe (1 Juan 4:19-21). Apóstol Pablo oskrivi vaʼekue: “Pesegíkena peñomokyreʼỹ ha peñomombarete, pejapoháicha voi peikóvo” (1 Tes. 5:11). Péro ndahaʼéi umi ansiáno añónte la oporopytyvõ vaʼerã. Káda ermáno ikatu ohaʼanga Jehová ha Jesúspe okonsoláramo iñermáno ha iñermanakuérape (elee Romanos 15:1, 2).

¹¹ Umi ñane ermáno oñedeprimíva térã oñeñandu vaietereíva ikatu hína oikotevẽ okonsulta doktórpe ha hoʼu medikaménto (Luc. 5:31). Umi ansiáno ha umi ótro ermáno oĩva kongregasiónpe ohechakuaa vaʼerã haʼekuéra ndahaʼeiha doktór. Upéicharõ jepe iñimportanteterei oñehaʼã oipytyvõ ha okonsola umi ohasa asývape. Enterovéva kongregasiónpe ñamokyreʼỹ vaʼerã ñane ñeʼẽ rupive umi oñeñandu vaietereívape, ñaipytyvõ vaʼerã umi ikangývape ha ñanepasiénsia hesekuéra (1 Tes. 5:14). Ñañehaʼãkena ñantende mbaʼéichapa oñeñandu ñane ermanokuéra. Iñimportánte ñanepasiénsia hesekuéra, ha oĩ jave oñeñandu vaíva jaʼe chupekuéra umi mbaʼe ikatúva oporokonsola. ¿Ñañehaʼãmapa ñamokyreʼỹ ótrope? ¿Mbaʼépa ikatu jajapo ñamombarete ha ñakonsola porãve hag̃ua ñane ermanokuérape?

12. Emoĩ peteĩ ehémplo ohechaukáva mbaʼéichapa oipytyvõ peteĩ ermánape pe mborayhu oĩva kongregasiónpe.

¹² Peteĩ ermána oikóva Európape heʼi: “Sapyʼánte ou chéve pe deséo ha ajesuisidase, péro heta oĩ la chepytyvõva ani hag̃ua ajapo upéva. Pe kongregasión aĩháme oñangareko ani hag̃ua oiko cherehe mbaʼeve ivaíva. Umi ermáno ha ermána siémpre chemokyreʼỹ ha ahechakuaa cherayhuha hikuái. Ndahetái oĩ la oikuaáva arekoha depresión, péro entéro ermáno siémpre oĩ dispuésto chepytyvõvo. Peteĩ matrimónio ningo oñatende cherehe che túa teerõguáicha. Haʼekuéra oñangareko porã cherehe, ha aikuaa ikatuha ajerure chupekuéra ajúda oimeha órante”. Jaikuaaháicha, naentéroi ikatúta ñaporopytyvõ pe ermána omombeʼu haguéicha. Péro oĩ heta mbaʼe enterovéva ikatúva jajapo ñaipytyvõ hag̃ua ñane ermáno ha ermanakuéra oñedeprimívape. *

13. ¿Mbaʼépa ikatu jajapo ñakonsola hag̃ua ótrope?

¹³ Ñaporohendukuaa (Sant. 1:19). Jahayhúramo ñane ermánope ñañemoĩta ilugárpe ha ñahendu porãta chupe. Avei tekotevẽ jajapo hendápe porã umi pregúnta ñantende porãve hag̃ua la oñandúva. Pe ermánope ifasilvéta oñemongeta hag̃ua ñanendive jajapysaka porãramo la heʼívare. Iñimportánte ojekuaa voi ñande rováre ñañeinteresa añeteha hese. Haʼe oñeʼẽ aja, ñanepasiénsia vaʼerã ha jaheja teʼi la oñandúva ha ani ñañeʼẽjoko chupe. Ñaporohendukuaáramo ikatúta jaikuaa mbaʼéichapa añetehápe opensa ha okonfiáta ñanderehe. Avei ifasilvéta chupe ohendu hag̃ua la jaʼéva. Añetehápe ñañeinteresáramo umi ótrore, tuichaiterei ñakonsoláta chupekuéra.

14. ¿Mbaʼérepa ñañehaʼãse pono jakritika ótrore?

¹⁴ Ani jakritika ótrore. Peteĩ persóna oñedeprimíva oñeñandu vaivéta opensáramo jakritikaha hese. Oikóramo upéva ijetuʼuvéta ñandéve ñaipytyvõ hag̃ua upe persónape. Proverbios 12:18 heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha, péro  umi iñarandúva heʼíva haʼete peteĩ pohã ñanemongueráva”. Ndajaipotái ningo umi persóna oñedeprimíva oñedesanima umi mbaʼe jaʼévare, péro ikatu hína oiko upéva ñañeʼẽramo ñapensaʼỹre. Iñimportánte ñakonvense chupekuéra añetehápe ñantendeseha la ohasáva hikuái (Mat. 7:12).

15. ¿Mbaʼépa jaipurukuaa ñakonsola hag̃ua ótrope mborayhúpe?

¹⁵ Jaipuru Ñandejára Ñeʼẽ ñaporokonsola hag̃ua (elee Romanos 15:4, 5). “Ñandejára ningo ñanemombarete ñaaguanta hag̃ua ha ñanekonsola”. La Biblia ou chugui ha upévare umi mbaʼe oĩva pype ñanepytyvõiterei. Avei jareko hetave mbaʼe ñandeajudáva jatopa hag̃ua umi téxto ha puvlikasión ideprovéchova ñakonsola ha ñamokyreʼỹ hag̃ua ñane ermanokuérape. Por ehémplo, jareko pe Índice de las publicaciones Watch Tower ha pe Gía oipurúva testígo de Jehová otopa hag̃ua informasión.

16. ¿Mbaʼépa jajapo vaʼerã ñamokyreʼỹ hag̃ua umi oñedeprimívape?

¹⁶ Jahechauka japorohayhuha ha japorotrata porã. Jehová haʼe “peteĩ Túa oporoporiahuverekóva ha Ñandejára omeʼẽva opaichagua konsuélo”. Haʼe ningo “imbaʼeporãitereígui” ombyasy isiervokuérape (elee 2 Corintios 1:3-6; Luc. 1:78; Rom. 15:13). Pablo ohaʼanga vaʼekue Jehovápe otrata lájape iñermanokuérape, upévare omoĩ ñandéve peteĩ ehémplo porã. Pablo heʼi vaʼekue: “Ore orembaʼeporã penendive, peteĩ sy omokambu ha omokunuʼũháicha imembýpe. Ore ningo pohayhueterei, upévare vyʼápe roikuaauka peẽme umi marandu porã oñeʼẽva Ñandejárare; ha poipytyvõ hag̃ua romeʼẽ voi ore rekove jepe penderehehápe” (1 Tes. 2:7, 8). Jahechaukáramo japorohayhuha ha ñañatende porãramo japorotrata lája, ikatúta ñaipytyvõ umi ermáno oñemboʼe asývape ojerurévo konsuélo.

17. ¿Mbaʼépa jareko vaʼerã enkuénta ikatu hag̃uáicha ñamokyreʼỹ ñane ermanokuérape?

¹⁷ Ani ñahaʼarõ perfeksión ermanokuéragui. Ñapensáramo ñane ermanokuéra iperfektoha ñañedesepsionáta (Ecl. 7:21, 22). Jasegi vaʼerã Jehová ehémplo, haʼe ningo oikuaa porã mbaʼépa ikatu ohaʼarõ ñandehegui. Upéicha avei, tekotevẽ ñanepasiénsia ñane ermanokuérare (Efes. 4:2, 32). Arakaʼeve ndajaipotái ñane ermanokuéra opensa noñehaʼãiha voi ni nañakomparái vaʼerã chupekuéra la ótro ojapóvare. Upéva rangue, ñamokyreʼỹ vaʼerã chupekuéra ha ñamombaʼe umi mbaʼe porã ojapóva. Péicha ñaipytyvõta umi ermánope ovyʼa hag̃ua Jehová servísiope (Gál. 6:4).

18. ¿Mbaʼérepa enterovéva ñañopytyvõse mborayhúpe?

¹⁸ Jehová omombaʼeterei káda uno ñaĩva ipuévlope, ha Jesús ñandeguerohory avei (Gál. 2:20). Ñande katu jahayhueterei ñane ermáno ha ermanakuérape, upévare ñañehaʼã jatrata porã chupekuéra. Tekotevẽ jajapo meme “opa mbaʼe oguerúva pyʼaguapy ha ñañopytyvõ ñanembarete hag̃ua” (Rom. 14:19). Hiʼãitéma ningo jaiko pe paraísope, upépe ndaiporimoʼãvéima mbaʼeve ñanedesanimátava. Upérõ ndaiporimoʼãvéi mbaʼasy ni gérra, ha nomanovéima avave pe pekádo káusare. Avei ndaiporimoʼãi ñandepersegíva, opátama umi provléma oĩva ogapýpe ha nañañeñanduvaimoʼãi umi mbaʼe oikóvare. Amo ipahápe, ohasa rire mil áño ñandeperféktotama. Upérõ g̃uarã Jehová oaseptáta ifamíliaramo ko yvy ape ári umi osegívape ifiél ohasa rire pe última pruéva. Koʼã persóna ovyʼaitereíta pórke “ohupytýta Ñandejára raʼykuéra liverta ijojahaʼỹva” (Rom. 8:21). Upévare, jahechaukákena japorohayhuha, péicha ñañopytyvõta jahupyty hag̃ua Ñandejára múndo pyahu ndaijojaháiva.