1. ¿Mbaʼérepa ovyʼaite entéro oadoráva Jehovápe? (Ehecha pe taʼanga oĩva iñepyrũme).

ENTÉRO testígo de Jehová ningo javyʼaiterei. Ñaime jave oñondive, tahaʼe rreunionhápe, asambléape térã ñañembyaty jave jahasa porã hag̃ua ñañemongeta ha japuka joa oñondive. ¿Mbaʼérepa javyʼaite? Jaikuaágui Jehovápe haʼéva hína “Ñandejára ovyʼáva”. Ñande jaservi chupe ha ñañehaʼã jasegi iñehémplo (1 Tim. 1:11; Sal. 16:11). Jehovágui ningo ou pe vyʼa, upévare haʼe oipota javyʼa ha ohechauka ñandéve mbaʼéichapa ikatu jahupyty upéva (Deut. 12:7; Ecl. 3:12, 13).

2, 3. a) ¿Mbaʼépa heʼise peteĩ persóna ovyʼaha? b) ¿Mbaʼérepa ijetuʼu jepi javyʼa hag̃ua?

² Péro, ¿mbaʼéichapa ñande ñañeñandu? ¿Javyʼápa? Peteĩ persóna ovyʼáva ningo oñeñandu porã, ogusta chupe la ojapóva térã heta vése ojekuaa voi hese ovyʼaha. La Biblia ohechauka peteĩ persóna ovyʼaha orekóramo Jehová vendisión. Péro ko múndo jaikohápe ikatu ijetuʼu hína javyʼa hag̃ua. ¿Mbaʼérepa?

³ Ijetuʼu ningo javyʼa hag̃ua jahasa jave umi situasión ivaívare. Por ehémplo, ijetuʼu omano jave peteĩ persóna jahayhúva térã oñemosẽramo kongregasióngui, jajúramo jajedivorsia térã  japytáramo travahoʼỹre. Avei nañanembovyʼái ndaipórirõ pyʼaguapy ñande rogapýpe, ñane kompañéro de traváho térã de koléhio oñembohorýramo ñanderehe ỹrõ jajepersegi térã jajegueraha kárselpe jaservi haguére Jehovápe. Ikatu avei jaju nañaneresãiguasuvéi térã ndajakuerái peteĩ enfermedágui, ỹrõ jareko depresión. Péro ñanemanduʼa vaʼerã Jesucristo, haʼéva pe Governánte Ipoderosoite ha ovyʼáva, okonsolaha umi héntepe ha oipytyvõ chupekuéra ovyʼa hag̃ua (1 Tim. 6:15; Mat. 11:28-30). Pe Sermón del Móntepe, Jesús oñeʼẽ kuri umi mbaʼe ikatúvare ñanepytyvõ. Jasegíramo umi konsého katuete javyʼáta, ñaneprovléma hetáramo jepe jaiko rupi Satanás múndope.

4, 5. ¿Mbaʼépa jajapo vaʼerã javyʼa hag̃ua ha akóinte jasegi hag̃ua javyʼa?

⁴ Jesús omombeʼu vaʼekue peteĩ mbaʼe iñimportantetereíva heʼírõ guare: “Ovyʼa umi ohechakuaáva oikotevẽha Ñandejárare”, imbaʼekuéra hína pe Rréino yvagapegua” (Mat. 5:3). Jahechakuaáramo ñaikotevẽha Ñandejárare ñañehaʼãta jaikuaa chupe ha jahejáta haʼe ñanepytyvõ ha ñandegia. ¿Mbaʼéichapa jahechaukáta jajapoha upéva? Jastudiáramo la Biblia, jasegírõ umi konsého jatopáva pype ha jahechaukáramo la iñimportantevéva ñandéve g̃uarã haʼeha hína jaadora Jehovápe. Jajapóramo koʼã mbaʼe, javyʼáta ha jajerovia mbaretevéta Ñandejára promesakuérare. Péicha “pe esperánsa ñanembovyʼaitéva” oĩva la Bíbliape ñanemokyreʼỹta (Tito 2:13).

⁵ Oiméramo jasegise javyʼa, jasegi vaʼerã ñañemoag̃uive Jehováre tahaʼe haʼéva umi provléma jahasáva. Apóstol Pablo heʼi vaʼekue: “Akóintekena pevyʼa ñande Ruvicha servísiope, haʼe jeýta voi peẽme: ¡Pevyʼákena!” (Filip. 4:4). Jaipotáramo Jehová ñaneamigoite jaheja vaʼerã haʼe ñanemoarandu. Ñandejára Ñeʼẽ heʼi: “Ovyʼa pe persóna oaprendéva arandu, pe oaprendéva odiferensia hag̃ua iporãva ha ivaíva. Pe persóna oñakarama hatãva pe arandúre ovyʼáta, pe arandu haʼetéta chupe g̃uarã peteĩ yvyramáta omeʼẽva vída” (Prov. 3:13, 18).

6. ¿Mbaʼépa ikatu jajapove jasegi hag̃ua javyʼa?

⁶ Péro jasegi hag̃ua javyʼa iñimportanteterei akóinte jajapo umi mbaʼe ñaaprendéva la Bíbliagui. Jesús ohechauka vaʼekue mbaʼeichaite pevépa iñimportánte jajapo upéva heʼírõ guare: “Peẽ peikuaáma koʼã mbaʼe, ha pejapóramo katu pevyʼáta” (Juan 13:17; elee Santiago 1:25). Tekotevẽterei jajapo Jesús heʼíva ñanembarete hag̃ua espirituálmente ha jasegi hag̃ua javyʼa. Péro, ¿mbaʼéichapa ikatu javyʼa oikóramo jepe hetaite mbaʼe vai? Jahechamína mbaʼépa heʼive rakaʼe Jesús pe Sermón del Móntepe.

7. ¿Mbaʼéichapa ikatu ovyʼa umi oñembyasýva?

⁷ “Ovyʼa umi oñembyasýva, upéi oñekonsoláta chupekuéra” (Mat. 5:4). Péro ikatu ñañeporandu: ¿Mbaʼéicha piko ovyʼáta peteĩ oñembyasýva? Upérõ Jesús noñeʼẽi kuri entéro umi oñembyasývare. Heta hénte iñañáva oñembyasy térã oñeñandu vai pórke ohasa avei heta situasión ijetuʼúva koʼã “ára pahápe” hasyetéva “jagueropuʼaka hag̃ua” (2 Tim. 3:1). Péro umi hénte ñaña ojepyʼapy ijehénte nopensái Jehováre ha noñehaʼãi oñemoag̃ui hese, upévare ndaikatúi ovyʼa hikuái. Umi persóna oñeʼẽ vaʼekuére Jesús haʼe hína umi ohechakuaáva  oikotevẽha Ñandejárare. Koʼã persóna oñembyasy pórke ohecha heta hénte omboykeha Ñandejárape ha ndoikói haʼe oipotaháicha. Haʼekuéra oraha enkuénta pekadorha hikuái, ha ohecha umi mbaʼe vai oikóva ko múndope. Jehová oikuaa umi añetehápe oñembyasývape. Haʼe okonsola koʼã persónape Iñeʼẽ rupive ha oipytyvõ chupekuéra ikatu hag̃uáicha ovyʼa (elee Ezequiel 5:11; 9:4).

8. ¿Mbaʼérepa ikatu jaʼe javyʼataha nañandepochyreíriramo?

⁸ “Ovyʼa umi ndaipochyreíriva, Ñandejára omeʼẽta chupekuéra ko yvy” (Mat. 5:5). ¿Mbaʼérepa ikatu jaʼe javyʼataha nañandepochyreíriramo? Heta hénte ningo oikose mbaretépente ha ndojejokói voi, ha upéicha rupi heta iprovléma jepi. Péro oaprende rire pe añetegua okambia hikuái ha oñemonde pe “teko pyahúgui”. Koʼág̃a haʼekuéra ohechauka oiporiahuverekoha hapichápe ipyʼaite guive, imbaʼeporã, oñemomirĩ, ndaipochyreíri ha ipasiénsia (Col. 3:9-12). Okambia rupi ou ipyʼaguapy hikuái, ojegueraha porã hapichándi ha ovyʼa. Avei Ñandejára Ñeʼẽ opromete omeʼẽtaha chupekuéra ko yvy (Sal. 37:8-10, 29).

9. a) ¿Mbaʼépa omboʼe vaʼekue Jesús heʼírõ guare Ñandejára omeʼẽtaha ko yvy umi ndaipochyreírivape? b) ¿Mbaʼérepa ikatu “ovyʼa umi oipotaitereíva oĩ hustísia”?

⁹ ¿Mbaʼépa Jesús heʼise rakaʼe omboʼérõ guare Ñandejára omeʼẽtaha ko yvy umi ndaipochyreírivape? Umi kristiáno unhídope ningo oñemeʼẽta ko yvy ogoverna vove hikuái kómo rréi ha saserdóte (Apoc. 20:6). Péro hetaitereive persóna oĩ ndohomoʼãiva yvágape, péro oñemeʼẽta chupekuéra ko yvy ikatu hag̃uáicha oiko upépe opa árare. Upérõ g̃uarã, iperféktotama hikuái ha oikóta vyʼápe ha pyʼaguapýpe. Koʼã persónare Jesús heʼi vaʼekue avei: “Ovyʼa umi oipotaitereíva oĩ hustísia” (Mat. 5:6). Pe hustísia haʼekuéra oipotaitéva ojehupytýta Jehová oipeʼapaite vove entéro mbaʼe vai (2 Ped. 3:13). Upe rire, umi persóna ihústova ovyʼáta ha arakaʼeve ndojepyʼapymoʼãvéi umi mbaʼe vai ojapóvare umi hénte aña.

10. ¿Mbaʼépa heʼise jaiporiahuverekoha ñande rapichápe?

¹⁰ “Ovyʼa umi oiporiahuverekóva hapichápe, chupekuéra ojeporiahuverekóta avei” (Mat. 5:7). Japoroporiahuvereko heʼise jahayhu ñande rapichápe ha ñambyasy umi osufrívape. Péro pe oiporiahuverekóva hapichápe ndahaʼéi ombyasýnteva chupe. La Biblia heʼi japoroporiahuverekóramo jajapotaha álgo ñaipytyvõ hag̃ua umi ótrope.

11. ¿Mbaʼépa ikatu ñaaprende pe ehémplo oñeʼẽvagui pe samaritano ipyʼaporãvare?

¹¹ (Elee Lucas 10:30-37). Pe ehémplo Jesús omoĩ vaʼekue oñeʼẽrõ guare peteĩ samaritano ipyʼaporãvare ohechauka porãiterei mbaʼépa heʼise jaiporiahuvereko ñande rapichápe. Pe samaritano ombyasyeterei kuri pe hapicha osufrívape ha upéva omomýi chupe oipytyvõ hag̃ua chupe. Jesús omoĩ rire pe ehémplo heʼi: “Tereho ejapo nde avei upéicha”. Upévare iporã ñañeporandu: “¿Ajapópa avei pe samaritano ipyʼaporãva ojapo haguéicha?¿Ambyasýpa umi persóna osufrívape? ¿Ikatúnepa ajapo algúna kósa aipytyvõ hag̃ua chupekuéra? Por ehémplo, ¿ikatúpa aipytyvõ umi ijedávape oĩva kongregasiónpe, umi viúdape térã umi imitãvape ituakuéra ndahaʼéiva Testígo? ¿Ikatúpa amokyreʼỹ che ñeʼẽ rupive umi oñeñandu vaietereívape?” (1 Tes. 5:14; Sant. 1:27).

12. ¿Mbaʼérepa javyʼa jahechaukáramo ñambyasyha ñande rapichápe?

¹² ¿Mbaʼérepa javyʼa jaiporiahuvereko  jave ñande rapichápe? Ñambyasy jave ñande rapichápe ñameʼẽ hína, ha Jesús heʼi ñameʼẽramo javyʼataha. Jaikuaa avei jajapóramo upéva Jehová ñandeguerohoryha (Hech. 20:35; elee Hebreos 13:16). Rréi David heʼi vaʼekue umi oiporiahuverekóvare hapichápe: “Peichagua persónape Jehová oprotehéta ha oñangarekóta hese osegi hag̃ua oikove. Enterove ohechakuaáta haʼe ovyʼaha” (Sal. 41:1, 2). Jahechaukáramo jaiporiahuverekoha ñande rapichápe Jehová ñandeporiahuverekóta ha javyʼáta opa árare (Sant. 2:13).

13, 14. ¿Mbaʼérepa ikatu jaʼe ovyʼaha “umi ipyʼapy potĩva”?

¹³ Jesús heʼi vaʼekue: “Ovyʼa umi ipyʼapy potĩva, haʼekuéra ohecháta Ñandejárape” (Mat. 5:8). Ikatu hag̃uáicha ñandepyʼapy potĩ tekotevẽ iporã ha ipotĩ umi pensamiénto ha deséo jarekóva. Upéva ningo iñimportanteterei jaipotáramo Jehová oguerohory ñane adorasión (elee 2 Corintios 4:2; 1 Tim. 1:5).

¹⁴ Umi ipyʼapy potĩva ikatu oñemoag̃ui Jehováre pórke haʼe heʼi voi: “Ovyʼa umi ojohéi vaʼekue ijao puku” (Apoc. 22:14). ¿Mbaʼépa heʼise jajoheiha ñande ao puku? Umi kristiáno unhídope g̃uarã upéva heʼise Jehová ohechaha chupekuéra hénte ipotĩvaramo. Haʼe omeʼẽta umi unhídope jeikove opaveʼỹva yvágape ha haʼekuéra ovyʼaitereíta opa árare. Umi ambue ovechakuéra oikovétava ko yvy ape ári katu, oikóta Jehová amígoramo pórke haʼe ohecháta chupekuéra persóna hekopotĩvaramo. La Biblia heʼi haʼekuéra ojoheiha “ijao puku” ha omomorotĩha “pe Ovecharaʼy ruguýpe” (Apoc. 7:9, 13, 14).

15, 16. ¿Mbaʼéichapa “ohecháta Ñandejárape” umi ipyʼapy potĩva?

¹⁵ Jehová heʼi: “Avave ndaikatúi cherecha ha osegi oikove” (Éx. 33:20). ¿Mbaʼéichapa upéicharõ “ohecháta Ñandejárape” umi ipyʼapy potĩva? Pe palávra griega ojetradusíva “ohecháta” heʼise avei oñeimahináta, ontendéta térã oikuaáta. Upévare umi ohechaséva Ñandejárape oikuaa vaʼerã mbaʼeichagua persónapa haʼe ha omombaʼe vaʼerã umi kualida porãite orekóva (Efes. 1:18). Jesús ningo osegi porãiterei Ñandejára ehémplo, upéicha rupi heʼi: “Chéve cherecháva ohecháma avei pe Túape” (Juan 14:7-9).

¹⁶ Upéicha avei, ikatu jahecha Ñandejárape ñañemeʼẽ jave enkuénta mbaʼéichapa ñanepytyvõ ñande rekovépe (Job 42:5). Avei jahecháta chupe jajesareko meméramo umi mbaʼe ijojahaʼỹva Jehová oprometévare umi osegívape ipotĩ ha ifiél chupe. Péro umi kristiáno unhído ikatúta añetehápe ohecha Jehovápe oñemoingove  jey vove chupekuéra oiko hag̃ua yvágape (1 Juan 3:2).

17. ¿Mbaʼérepa ovyʼa umi ipyʼaguapýva?

¹⁷ Jesús heʼi avei: “Ovyʼa umi ipyʼaguapýva” (Mat. 5:9). Ñañehaʼãramo jaiko hag̃ua pyʼaguapýpe enterovéndi ikatúta javyʼa. Disípulo Santiago oskrivi vaʼekue: “Umi hénte ojogueraha porãva ótrondi oñehaʼã hína oĩ hag̃ua pyʼaguapy, ha upéicha rupi haʼekuéra ojapo iporãva” (Sant. 3:18). Ijetuʼúramo jajogueraha porã hag̃ua ótrondi kongregasiónpe térã ñande rogapýpe, jarrogákena Jehovápe tañanepytyvõ jaiko hag̃ua pyʼaguapýpe. Péicha Jehová ikatúta omeʼẽ ñandéve ijespíritu sánto ñanepytyvõtava ñamehora hag̃ua ñande lája ha javyʼavéta. Jesús ohechauka vaʼekue mbaʼeichaitépa iñimportánte ñañehaʼã jaiko pyʼaguapýpe heʼírõ guare: “Regueraha jave nde jopói pe altárpe nemanduʼáramo ne ermáno ipochyha nderehe, eheja nde jopói pe altár renondépe, ha tereho eñemoĩ porã raẽ ne ermánondi, upéi ae eju emeʼẽ nde jopói” (Mat. 5:23, 24).

18, 19. ¿Mbaʼérepa kristianokuéra ikatu ovyʼa oĩramo jepe opersegíva chupekuéra?

¹⁸ Jesús ningo heʼi kuri: “Pevyʼa oĩramo otakýva penderehe, pendepersegíva, ha oikóva heʼi rei penderehe opaichagua mbaʼe vai che káusare”. ¿Mbaʼépa heʼise vaʼekue? Jesús osegi kuri heʼi: “Pendepyʼarory ha pevyʼaitereíkena péicha jave, ha penemanduʼa yvágape oĩha peteĩ rregálo tuichaitereíva peẽme g̃uarã. Penemanduʼa avei yma upéicha ojepersegi hague umi profétape” (Mat. 5:11, 12). Umi apóstol oñembyepotírõ ha oñemandárõ guare chupekuéra anivéma hag̃ua opredika, “haʼekuéra [...] osẽ pe Sanedríngui vyʼapópe”. Umi apóstol ningo ndahaʼéi ovyʼáva oñembyepoti haguére, síno ovyʼa “Ñandejára ohejágui ojeapoʼi chupekuéra Jesús réra rehehápe” (Hech. 5:41).

¹⁹ Koʼág̃arupi avei Jehová puévlo vyʼapópe oaguanta ojepersegi jave chupekuéra (elee Santiago 1:2-4). Umi apóstol rehe oiko haguéicha, ñande avei ndajavyʼái jasufri térã jajepersegi jave. Péro jasegi rupi ñandefiél Jehovápe, haʼe ñanemombarete ñaaguanta hag̃ua. Jahechamína mbaʼépa oiko vaʼekue Henryk Dornik ha iñermánore. Agosto de 1944-pe oñemondo vaʼekue chupekuéra peteĩ kámpo de konsentrasiónpe. Umi opersegíva chupekuéra heʼi kuri: “Ndojapomoʼãi voi hikuái la roipotáva. Haʼete voi ningo igústova mbaʼe chupekuéra osufri”. Henryk heʼi: “Ndorosufriséiramo jepe, roaguanta hekoitépe ikatu hag̃uáicha orefiél Jehovápe ha upéva orembovyʼaiterei”. Haʼe heʼi avei: “Roñemboʼe meme rupi Jehovápe roñemoag̃uive hese, ha haʼe ohechauka oréve ndaorerejamoʼãiha oreaño arakaʼeve”.

20. ¿Mbaʼérepa javyʼa jaservi haguére Jehovápe haʼéva “Ñandejára ovyʼáva”?

²⁰ La Biblia ohenói Jehovápe “Ñandejára ovyʼáva”. Upévare, jajapóramo chupe ogustáva ikatu javyʼa oĩramo jepe ñandepersegíva, oñemoĩva ñane kóntrape ñande rogapýpe, ñanderasykatúramo térã ñandeedáramo jepe (1 Tim. 1:11). Avei ikatu javyʼa jaikuaa porãitereígui Ñandejára “ikatuʼỹva ijapu” okumplipaitetaha entéro umi ipromésa porãite (Tito 1:2). Jehová ojapo vove upéva, ñanderesaráitama umi provléma koʼág̃a jahasávagui. Ndaikatúi ningo ni ñañeimahina mbaʼeichaite pevépa jaiko porãta ha javyʼáta ñaime vove pe paraísope. Añetehápe, enterovéva javyʼaitereíta pórke jaikóta pyʼaguapýpe ha nañañekevrantamoʼãi mbaʼevete asýre (Sal. 37:11).