Peteĩ méta ndahaʼéi peteĩ suéño reínte reipotáva oñekumpli. Rehupyty hag̃ua peteĩ méta rekalkula porã vaʼerã mbaʼépa rejapóta, rekambiaʼimi tekotevẽrõ ha rembaʼapo rehupyty hag̃ua.

Ikatu remoĩ méta rehupytykuaáva unos kuánto día térã unas kuánta semánape. Avei oĩ umi méta ikatúva rehupyty unos kuánto mésepe, ha upéi oĩ umi rehupytýtava amo gotyove, por ehémplo un áñope térã hetave voi. Péro rehupyty hag̃ua umi méta ipukuvéva eñehaʼã vaʼerã rehupyty rehóvo umi mbykyvéva.

Rehupytývo rehóvo umi méta rejeroviavéta ndejehe, erekovéta amígo tee ha revyʼavéta.

Rejeroviavéta ndejehe. Rehupytývo rehóvo umi méta mbykyvéva, reñanimáta remoĩ umi méta tuichavéva. Avei ndepyʼaguasuvéta rembohovái hag̃ua káda día umi situasión ijetuʼúva, por ehémplo nderejapomoʼãi la ivaíva oĩramo jepe nemboligáva upearã.

Erekovéta amígo tee. Igústo ñaĩ umi oikuaávandi la ohupytyséva ha oñehaʼãva okumpli iméta. Ikatúta avei reñemoag̃uive umi ne amígo orekóvare la mísma méta nde erekóva pórke ikatúta peñopytyvõ pehupyty hag̃ua.

Revyʼavéta. Remoĩrõ méta ha upéi rehupyty revyʼáta la rejapo vaʼekuére.

“Igústo chéve amoĩ méta pórke chepytyvõ ani hag̃ua cherekorei ha añekonsentra hese ahupyty peve. Ha upéi ahupytývo álgo aipota vaʼekue avyʼavéntema” (Christopher).

¿MBAʼÉPA HEʼI LA BIBLIA? “Pe oikóva okontrola pe yvytu, noñemitỹmoʼãi. Ha pe oikóva omañánte umi araíre, ndokosechamoʼãi” (Eclesiastés 11:4).

Esegi koʼã konsého emoĩ hag̃ua méta ha rehupyty hag̃ua.

Ehecha mbaʼe mbaʼépa rehupytyse. Eanota umi méta ikatúva emoĩ ha upéi emohenda porã mavaitévapa rehupytyse raẽ rehóvo.

Ekalkula porã. Káda méta ykére ikatu reanota koʼã mbaʼe:

• Peteĩ fécha nandeforsamoʼãiva.

• Mbaʼe mbaʼépa rejapóta rehóvo.

• Umi mbaʼe ikatúva ndejoko ha mbaʼéichapa esolusionáta.

Eho rei hese. Natekotevẽi reikuaapaite entéro umi detálle reñepyrũ hag̃ua. Epensa mbaʼépa primeroite tekotevẽ rejapo ha eñepyrũ ejapo. Amedída ke reho hese ekontrola mbaʼéichapa reprogresa rehóvo.

¿MBAʼÉPA HEʼI LA BIBLIA? “Umi oplanea porãva la ojapótava, katuete osẽ porã chupekuéra la ojaposéva” (Proverbios 21:5).