Umi persóna de konfiánsa orrespeta umi rrégla oñemoĩva, okumpli la oprometéva ha siémpre heʼi la verda. Péicha rupi ituakuéra, iñamígo ha ipatronkuéra ojerovia hesekuéra.

Ikatu hag̃uáicha oñemeʼẽve ndéve liverta eñehaʼã vaʼerã siémpre ojejeroviave hag̃ua nderehe.

“Reipotáramo nde tuakuéra okonfiave nderehe rehechauka vaʼerã siémpre neakãguapyha ha nerresponsavleha, ha ndahaʼéi reĩ javénte hendivekuéra” (Susi).

¿MBAʼÉPA HEʼI LA BIBLIA? “Pesegíkena pehecha mbaʼeichagua persónapa peẽ” (2 Corintios 13:5).

Koʼã konsého nepytyvõta reipotáramo nde tuakuéra ojeroviave nderehe, térã oimérõ oiko álgo raʼe, ikatu hag̃uáicha ojerovia jey nderehe.

Nesinsérokena. Umi hénte nokonfiamoʼãvéima nderehe ndejapúramo. Péro nesinséro ha neremokañýiramo refalla jave ojejeroviavéta nderehe.

“Ifásil ningo jaʼe la verda ou porãta jave ñandéve. Péro ñamombeʼúramo avei la siertogua nokonveníri jave ñandéve, umi ótro ojeroviavéta ñanderehe” (Carlos).

¿MBAʼÉPA HEʼI LA BIBLIA? “Hiʼãiterei rojapo porã entéro mbaʼe” (Hebreos 13:18).

Nerresponsávlekena. Estados Unídospe ojejapo peteĩ enkuésta umi okontratávape personál, ha pe 78 por ciento heʼi umi emprésape g̃uarã iñimportantetereiha umi persóna irresponsávle okontrata hag̃ua chupekuéra. Upéicharõ, koʼág̃ama voi rejepokuaárõ nerresponsávle, upéva nepytyvõta ág̃a rekakuaapa vove.

“Che tuakuéra oñemeʼẽ enkuénta ajapopárõ che kosakuéra oikoʼỹre chemomanduʼa hikuái tódo el tiémpo. Amáske cherresponsávle okonfiave cherehe hikuái” (Sara).

¿MBAʼÉPA HEʼI LA BIBLIA? “Che ajerovia nde rejapotaha upe ajeruréva ndéve, [...] ha aikuaa rejapotaha voi hetave mbaʼe upe haʼévagui ndéve” (Filemón 21).

Nepasiénsiakena. Oñemaña haguérente nderehe la hénte ikatúma ohecha rekakuaavépa raʼe, péro orahave tiémpo ojehecha hag̃ua oimérõ neakãguapyve ha nerresponsavlevéma. Upévare tekotevẽ nepasiénsia.

“Nerresponsávle haguére una ves ndeʼiséi upepete ojeroviatamaha nderehe nde tuakuéra ha umi ótra persóna. Péro resegíramo siémpre nerresponsávle, káda día oñekonfiavéta nderehe” (Bruno).

¿MBAʼÉPA HEʼI LA BIBLIA? “Pehechaukákena [...] penepasiensiaha” (Colosenses 3:12).