Anase vaʼekue 1955-pe. Roĩ vaʼekue mbohapy ermáno, ha che la chemitãvéva ijapytepekuéra. Akakuaa sur gotyo Finlándiape, peteĩ siuda koʼág̃a héravape Vantaa.

Che sýgui oiko vaʼekue testígo de Jehová unos kuánto áñonte che anase mboyve. Péro papápe ndogustaiete vaʼekue, ha oproivi chugui orembostudia la Biblia térã oregueraha rreunionhápe. Upéicharõ jepe, haʼe oremboʼémi vaʼekue la Biblia heʼíva papa ndaipóri aja.

Che chemitãite guive ajepytaso mbarete vaʼekue Jehová ykére. Por ehémplo, arekórõ guare 7 áño che profesóra orrenegaiterei cherehe ndaʼuséi haguére verilättyjä. Upéva haʼe peteĩ tembiʼu finlandés ojoguáva tortíllape ha ojejapóva tuguýgui. Upe che profesóra un ládo ipópe ojopy la che rova oavri hag̃ua che juru, ha ótro ládo katu mbaretépe oñehaʼã hoʼuka hag̃ua chéve peteĩ pedáso. Ndaikuaái ningo ni mbaʼéichapa, péro aity ipógui la itenedór.

Arekórõ guare 12 áño, la che túa omanomi. Upe rire ikatúma kuri aha rreunionhápe. Umi ermanokuéra ningo oñeinteresa vaʼekue cherehe ha upéva chemokyreʼỹ añemoag̃uive hag̃ua Jehováre. Añepyrũ alee la Biblia káda día ha astudia porã umi ñane puvlikasionkuéra. Péicha ajapo rupi ikatúma kuri ajevautisa el 8 de agosto de 1969, arekópe 14 áño.

 Atermina riremi che koléhio, añepyrũ ajapo che prekursorádo. Upéi unas kuánta semána haguépente aváma oñekotevẽvehápe opredika vaʼerã. Upe lugár héra vaʼekue Pielavesi, opytáva ag̃uínte pe séntrogui Finlándiape.

Pielavésipe aikuaa ypy vaʼekue che rembireko Sírkkape. Chegustaiterei mbaʼéichapa haʼe iñumílde ha ohayhueterei Jehovápe. Haʼe ndoikói vaʼekue ipláta hetase ni iñimportanteseve ótrogui. Mokõivévante rojapose vaʼekue opa ikatúva roservi porã hag̃ua Jehovápe, ha roĩ vaʼekue dispuésto rojapóvo oimeraẽ mbaʼe oñeasignáva oréve. Romenda vaʼekue el 23 de marzo de 1974, ha roho rangue de lúna de miél roho roservi Kárttulape. Upe lugárpe oñekotevẽve kuri opredika vaʼerãre.

Romenda ypy guive Jehová ohechauka omeʼẽtaha oréve la roikotevẽva romotenondéma guive Irréino (Mat. 6:33). Por ehémplo, roikórõ guare Kárttulape ndoroguerekói vaʼekue áuto. Upéicha rupi visikléta ári mante roho ótro ládo. Inviérnope katu roʼyeterei vaʼekue, ha tuichaiterei rupi ore território roikotevẽmante peteĩ áuto roho hag̃ua ropredika. Péro ore ndoroguerekói la hepyrã.

Upeichaháguinte che ermáno majór ou orevisita, ha imbaʼeporãgui orendive, omeʼẽ oréve la hiʼáuto. Haʼe opagapáma hese isegúro entéro, kombustívlentema rokarga vaʼerã pype. Upépe rorekóma la áuto ifaltaite vaʼekue oréve.

Jehová ohechaukáma oñenkargataha umi mbaʼe roikotevẽvare, ore romotenondénte vaʼerã iservísio.

Áño 1978-pe roho Eskuéla de Prekursórpe. Peteĩva umi instruktór héra Raimo Kuokkanen, a ha haʼe oremokyreʼỹ rokompleta hag̃ua pe solisitu roho hag̃ua Eskuéla de Galaádpe. Upémarõ roñepyrũ rostudia inglés ikatu hag̃uáicha roho upéi. Péro 1980-pe, roenvia mboyve ore solisitu, roñeinvita roservi hag̃ua pe sukursál de Finlándiape. Upe tiémpope, umi betelita ndaikatúi vaʼekue omyenyhẽ pe solisitu oho hag̃ua Galaádpe. Péro ore roservise vaʼekue la Jehová  heʼihápe oredeprovechotaha, ha ndahaʼéi ore ropensahápe iporãvetaha. Upévare roasepta vaʼekue upe invitasión. Upéicharõ jepe rosegi rostudia inglés, peichahágui oñepresenta mbaʼérõ g̃uarã la oportunida romyenyhẽ hag̃ua pe solisitu de Galaad.

Upéi, unos kuánto áño haguépe pe Kuérpo Governánte heʼi umi betelita ikatuha avei omyenyhẽ pe solisitu oho hag̃ua Galaádpe. Ensegída voi ore romyenyhẽ la ore solisitu, péro ndahaʼéi ndorovyʼáigui Betélpe, síno roserviségui oñekotevẽvehápe rokalifikáma guive upearã. Upéi roñeinvita roho hag̃ua Galaádpe ha rojegradua septiembre de 1985-pe kláse 79, ha roñeasigna Colómbiape.

Colómbiape roñeasigna raẽ pe sukursálpe. Upépe añehaʼãmbaite ajapo porã che asignasión, péro un áño haguépe añandu roikotevẽha peteĩ kámbio. Primera ves ha upérõ guaremi ajerure peteĩ kámbio de asignasión. Upérõ roñeasigna kómo misionéro del kámpo peteĩ siuda héravape Neiva, opytáva pe departaménto héravape Huila.

Chéve siémpre chegustaitereíva la predikasión. Chesoltérope aservírõ guare de prekursór Finlándiape, sapyʼánte añepyrũ apredika pyhareve voi porã guive, kaʼaruete pytũ mbota peve. Romenda ramóme avei, Sirkka ha che ropredika tódo el día. Ropredika jave mombyryhápe katu, sapyʼánte ropytánte roke ore áutope. Péicha ikatu kuri voi porã roñepyrũ jey ropredika ha natekotevẽvéima roviaha puku roho jey hag̃ua ógape.

Roservívo kómo misionéro del kámpo, orekyreʼỹeterei jey predikasiónpe yma guaréicha. Ore kongregasión okakuaa ha umi ermanokuéra colombiano ijagradesído, opororrespeta ha oporohayhukuaa.

Neiva ypýpe oĩ vaʼekue umi puevloʼi ndaiporihápe ni peteĩ Testígo. Ha chéve chepyʼapyeterei vaʼekue mbaʼéichapa ropredikáta umi lugárpe. Umi gerrilléro ojagarrapa vaʼekue umírupi, ha upévare ndaisegúroi vaʼekue oho hag̃ua umi ndahaʼéiva upe lugarpegua. Upémarõ añemboʼe Jehovápe álgien koʼã puevloʼipegua, péro oikóva Néivape oñepyrũ hag̃ua ostudia la Biblia ha upéi toiko chugui Testígo. Avei añemboʼe upe persóna ojevautisa rire toprogresa ha upéi toho jey ivállepe opredika hag̃ua. Péro naimoʼãiete kuri Jehová oreko hague ótra solusión iporãitevéva.

Upe riremínte añepyrũ astudia la Biblia peteĩ mitãrusúndi hérava Fernando González. Haʼe oiko Algecíraspe, peteĩva umi puevloʼi ndaiporihápe Testígo. Fernando oviahámi vaʼerã mas de 50 kilómetro ombaʼapo hag̃ua Néivape. Haʼe ojeprepara porãmi vaʼerã káda estudiorã ha ensegídama voi oñepyrũ oho rreunionhápe. Pe primera semána oñepyrũ guive ostudia, Fernando oñembyatýma ótro ivalleguándi ha omboʼe chupekuéra umi mbaʼe oaprende vaʼekue la Bíbliagui.

Fernando ojevautisa enero de 1990-pe, 6 mése oñepyrũ haguépe ostudia la Biblia. Upéi haʼe oñepyrũ ojapo iprekursorádo rregulár. Oĩmarõ peteĩ Testígo oikóva Algecíraspe, isegurovéma ikatu hag̃uáicha pe sukursál  omondo upépe umi prekursór espesiál. Febrero de 1992-pe, oĩma pe primera kongregasión upe siudápe.

Péro Fernando ndahaʼéi vaʼekue opredikáva ivállepente. Upéi haʼe omenda, ha hembirekóndi ova hikuái San Vicente del Caguánpe, haʼéva ótro puevloʼi ndaiporihápe Testígo. Upépe haʼekuéra oipytyvõ oñepyrũ hag̃ua peteĩ kongregasión. Áño 2002-pe Fernándope oñenombra superintendénte de sirkuíto. Koʼág̃a peve haʼe ha hembireko Olga osegi upe asignasiónpe.

Upérõ aaprende iñimportanteha ñañemboʼe Jehovápe ha ñamombeʼu porã chupe umi mbaʼe ñandepyʼapýva ñane asignasiónpe. Jehová ojapopa umi mbaʼe ñande ndaikatúiva jajapo. Jaikuaa ningo haʼe haʼeha la ‘kokue Jára’, ndahaʼéi ñande (Mat. 9:38).

Áño 1990-pe añeasigna vaʼekue aservi hag̃ua de superintendénte de sirkuíto. Ore primer sirkuíto haʼe vaʼekue Bogotá, pe siuda kapitál. Ore rokyhyje vaʼekue norokumpliporãirõ g̃uarã ko asignasión. Che rembireko ha che ningo ndahaʼéi ku orevaletereíva. Hiʼarive ore ndorojepokuaái vaʼekue roiko peteĩ siuda tuichávape. Péro Jehová okumpli la opromete vaʼekue Filipenses 2:​13-pe. Upépe heʼi: “Ñandejára ojapo umi mbaʼe ogustáva chupe ha penemombarete, ikatu hag̃uáicha pereko pe deséo ha pe podér pejapo hag̃ua entéro mbaʼe chupe ogustáva”.

Upéi roñeasigna peteĩ sirkuíto oĩvape Medellínpe, pe siuda amensiona vaʼekue iñepyrũme. Upépe ipeligrosoiterei vaʼekue ha la hénte ojepokuaa oiko upéicha, nomondyivéima chupekuéra la oikóva. Por ehémplo, peteĩ jey che ajapo hína kuri peteĩ estúdio bíblico, ha oiko sapyʼa la tirotéo okápe. Che ajeitýtama kuri pe yvýpe, péro pe estudiánte osegi olee la párrafo trankiloiténte. Oleepávo, ojerure permíso ha osẽ okápe. Upéi un rráto haguépe ou jey mokõi mitãndi ha trankílo porãnte heʼi: “Chediskulpákena, péro ahámante agueru koʼã mokõi che famíliape”.

Upéi rohasa jey vaʼekue peteĩ situasión ipeligrósova. Peteĩ jey ropredika roikóvo ogahárupi ha che rembireko odipara oúvo che rendápe, morotĩ sakã la hóva oñemondýigui. Heʼi chéve álgien ojapi hague chupe. Upépe tuichaiterei añemondýi. Péro upéi ahechakuaa la karai ndahaʼéi hague Sírkkape la ojapiséva, síno álgien ohasávape ohóvo Sirkka ykerete.

Tiémpo rire roikokuaáma umi lugár ipeligrosohápe. Oremokyreʼỹ rohechávo mbaʼéichapa umi ermanokuéra upepegua ombohovái porã koʼãichagua situasión ha umi ivaivéva jepe. Rohechakuaa Jehová oipytyvõha chupekuéra, ha oréve avei katuete orepytyvõtaha. Ore siémpre rosegi umi ansianokuéra upepegua konsého, roñehaʼã ndorojapeligrái ha upéi rohejáma Jehová pópe entéro mbaʼe.

Oĩ avei kuri umi situasión ndahaʼéiva la ipeligrosoitereíva ropensa haguéicha. Peteĩ jey ag̃uahẽvo peteĩ óga ahénope, haʼetévaicha chéve ahendúva mokõi  kuñakarai ojojaʼóva hína pe óga okárape. Che ndapytaséi kuri ahendu la diskusión, péro pe óga jára heʼi chéve ahasa hag̃ua. Upépe apilla mokõi loríto raʼe la ojodiskutíva, haʼekuéra ohaʼangánte hína kuri umi vesínape.

Áño 1997-pe añenombra instruktór pe Eskuéla de Entrenamiénto Ministeriálpe g̃uarã. b Che siémpre amombaʼetereíva umi eskuéla orekóva Jehová organisasión. Péro núnka nañeimahináiva arekotaha la priviléhio aporomboʼévo peteĩvape.

Upéi aservi vaʼekue de superintendénte de distríto. Ha opárõ guare upéva aha jey aservi de superintendénte de sirkuíto. Péicha mas de 30 áño aservi de instruktór ha superintendénte de sirkuíto. Koʼã asignasión rupive ningo hetaiterei vendisión ahupyty. Péro ndahaʼéi vaʼekue la ifasilpáva siémpre. Tamombeʼumína peẽme mbaʼérepa.

Che ningo arrekonose la chembareteha. Ha upéva chepytyvõma ambohovái hag̃ua heta situasión ijetuʼúva. Péro sapyʼánte mbaretépema asolusionase heta mbaʼe kongregasiónpe. Avése aakonseha pohýima umi ermánope oporotrata hag̃ua mborayhúpe ha imbaʼerechakuaa hag̃ua. Péro legálmente chéve avei ofalta kuri ajapo upéva (Rom. 7:​21-23).

Sapyʼánte añedesanimaite apytávo afalla haguére jepi péicha (Rom. 7:24). Peteĩ jey, haʼe Jehovápe ikuentavetaha ahejánte la che servísio de misionéro ha aha jey Finlándiape. Upe pyharépe aha rreunionhápe, ha la ahendúva upépe chekonvense apyta vaʼerãha che asignasiónpe ha asegi vaʼerãha alucha amehora hag̃ua. Koʼág̃a peve amombaʼeterei mbaʼéichapa Jehová okontesta vaʼekue chéve upe che ñemboʼe. Avei aagradeseterei chupe chepytyvõ haguére mborayhúpe asupera hag̃ua umi devilida arekóva.

Sirkka ha che ore pyʼaite guive roagradese Jehovápe ikatu haguére roservi chupe de tiémpo kompléto hetaiterei áñorema. Avei aagradeseterei Jehovápe koʼã áño pukukue omeʼẽ haguére chéve che rembirekorã oporohayhukuaáva ha ojeroviáva hese.

Koʼẽrõitéma ambotýta 70 áño ha ndaservimoʼãvéima de instruktór ni de superintendénte de sirkuíto. Péro nambyasýi upéva. ¿Mbaʼérepa? Aime segúro ñamombaʼeguasu hag̃ua Jehovápe natekotevẽiha jareko peteĩ asignasión iñimportánteva. Síno haʼe oipota ñaneumílde ha jaadora chupe ñande pyʼaite guive, jahayhu ha jaagradeségui chupe (Miq. 6:8; Mar. 12:​32-34).

Chemanduʼávo umi asignasión areko vaʼekuére, ahechakuaa ndahaʼéi hague oñemeʼẽva chéve amereseve rupi ótrogui ni chevale haguére. ¡Ndaupeichaiete voi! Jehovánte omeʼẽ chéve koʼã priviléhio imbaʼeporãiterei rupi, ha haʼe ojapo upéva chedefékto hetáramo jepe. Aikuaa akumpli hague koʼã che asignasión Jehová rupive añónte. Péicha chekangy haguére, ojekuaa porãvéntema Jehová ipoderosoha (2 Cor. 12:9).