1, 2. a) ¿Mbaʼéicha javépa ijetuʼu jepi ñandéve ñaporoperdona? b) ¿Mbaʼéichapa Denise ohechauka vaʼekue operdonakuaaha hapichápe?

 ¿IJETUʼÚPA ndéve sapyʼánte eperdona nde rapichápe? Ñarrekonose vaʼerã ndahaʼeiha la ifasilpáva ñandéve upéva. Koʼýte oimérõ peteĩ persóna heʼíva térã ojapóva ñanemoñeñandu vaieterei. Péro oĩ unas kuánta kósa ikatúva jajapo anivéma hag̃ua ñandepochy ha ñaporoperdona hag̃ua. Por ehémplo jahechamína la oiko vaʼekue Denísere. a Ko ermána ohechauka vaʼekue oporoperdonakuaaitereiha. Áño 2017-pe haʼe ha ifamília oho ovisita pe sentrál mundiál de los testigos de Jehová ojeavri ramoite vaʼekue. Ojevy jeývo hógape, peteĩ kuimbaʼe omaneháva ohóvo hiʼáutope ochokami hesekuéra. Denise odesmajaite upépe. Ha opáy jeýrõ guare otopa imembykuéra ojegolpea vaipaite hague ha iména Brian katu omanoite. Imanduʼa jeývo la oiko vaʼekuére, Denise heʼi: “Yvýre ningo apyta. Upe moméntope haʼete voi ni nantendéiva la oikopa vaʼekue”. Tiémpo rire Denise oikuaa pe kuimbaʼe ndahaʼéi okaʼu, ojedroga térã ojedistrae haguére la ochoka vaʼekue hesekuéra, síno legálmente peteĩ aksidénte la oikóva. Upérõ Denise ojerure Jehovápe ombopyʼaguapymi hag̃ua chupe.

² Pe aksidéntepe Denise ména omanoite, upévare ojerahámante préso pe ochoka vaʼekuépe hesekuéra. Ha la ojetopárõ haʼe kulpavleha ikatu voi opyta kárselpe. Upéi ojeexplika porã Denísepe odependeha la haʼe heʼívare upe kuimbaʼe opyta hag̃ua kárselpe térã nahániri. Denise heʼi: “Haʼete voi chéve álgien ohóva oavri mbaʼe la che erída ha oñohẽ pype juky. Hasyeterei ningo chéve pórke aha vaʼerã amombeʼu la oiko vaʼekue che ména omanórõ guare”. Unas kuánta semána haguépe, Denise oguapýma hína pe trivunálpe omombeʼu hag̃ua la oiko vaʼekue ha upépe oĩ avei pe ochoka vaʼekue hesekuéra. ¿Mbaʼépa heʼi upérõ Denise?  Haʼe ojeruremi pe huéspe oiporiahuvereko hag̃ua pe kuimbaʼépe. b Denise oñeʼẽmba rire, pe hués oñepyrũ hasẽ ha heʼi: “Chéngo aĩma ko traváhope 25 áñore, ha núnka nahendúiva ojejerureha upéva peteĩ kásope. Primera ves la ahendu peteĩ víktima ojerurévo chéve aperdona hag̃ua pe ojeakusávape. Ápe núnka ndahecháiva umi hénte ojoayhu ha oñoperdonaha”.

 3. ¿Mbaʼépa oipytyvõ vaʼekue Denísepe operdonakuaa hag̃ua?

³ ¿Mbaʼépa oipytyvõ vaʼekue Denísepe? Haʼe ojepyʼamongeta vaʼekue mbaʼéichapa Jehová ñaneperdona (Miq. 7:18). Jaagradeséramo ñande pyʼaite guive Jehovápe ñaneperdona haguére, upéva ñanemomýita ñaperdonakuaa hag̃ua ñande rapichápe.

 4. ¿Mbaʼépa Jehová oipota jajapo? (Efesios 4:32).

⁴ Jehová ojerure ñandéve ñaperdona hag̃ua ñande rapichápe haʼe voi ñaneperdonaháicha (elee Efesios 4:32). Jehová oipota ñaĩ ñaperdona hag̃uáicha oiméramo oĩ álgien ojapóva álgo ñanemoñeñandu vaíva (Sal. 86:5; Luc. 17:4). Ko artíkulope jahecháta mbohapy mbaʼe ñanepytyvõtava ñaporoperdonakuaave hag̃ua.

EREKO ENKUÉNTA UMI MBAʼE EÑANDÚVA

 5. Ohechaukaháicha Proverbios 12:​18, ¿mbaʼéichapa ikatu ñañeñandu oĩramo ojapóva álgo ivaíva ñanderehe?

⁵ Ikatu ningo oĩ ojapóva térã heʼíva álgo hasyetereíva ñandéve. Haʼete voi pe persóna ñandekutu rasýva. Ha ni ndajaʼeséi oimérõ pe persóna haʼe peteĩ ñane amigoite térã ñane hénte (Sal. 55:​12-14; elee Proverbios 12:18). Primerorã ikatu ñañehaʼã nañapenáinte la ñañandúvare. Péro jajapóramo upéicha haʼete ku álgien ñandekutúva ha jahejáva pe kyse ñande erídare. Péicha avei, jaikóramo nañapenáinte la ñañandúvare ndaikatúi ñahaʼarõ ñaĩ porã jeytaha.

 6. ¿Mbaʼépa ikatu oiko oĩramo ñaneofendéva?

⁶ Oĩramo ñaneofendéva, primerorã ikatu ñarrenegaiterei. La Biblia heʼi voi sapyʼánte ikatuha ñandepochy, péro ñandeavisa avei ndovaleiha jaheja ñanedomina la ñañandúva (Sal. 4:4; Efes. 4:26). ¿Mbaʼérepa? Pórke la ñañandúva ikatu hína ñanemomýi jajapo hag̃ua peteĩ mbaʼe. Ha jajapóramo álgo pochykue reheve, ndahaʼemoʼãi katuete iporãva (Sant. 1:20). Nemanduʼákena: Sapyʼánte ndepochýtante voi, péro nderehéma odepende resegítapa upéicha.

 7. ¿Mbaʼéichapa ikatu ñañeñandu ojejapo jave álgo ivaíva ñanderehe?

⁷ Japyta vaieterei jepi ojejapo jave álgo ñanderehe. Por ehémplo peteĩ ermána hérava Ana heʼi: “Chemitãrõ guare, papa oheja vaʼekue mamáme ha oho omenda che niñérare. Añeñandu vaʼekue cheaño peteĩ. Upéi haʼekuéra oñepyrũrõ guare ifamília, añandu cherekoviáma hague. Akakuaa aja apensámi vaʼerã avave ndacherayhuiha”. Peteĩ ermána hérava Griselda omombeʼu mbaʼéichapa oñeñandu vaʼekue iména omoakãratĩrõ guare chupe: “Ore ningo oñoamigoite vaʼekue oremitã guive. Upéi rojapo ore prekursorádo oñondive. Upévare ndaikatúi ni amombeʼupa mbaʼeichaitépa hasy asy vaʼekue chéve la ojapóva cherehe”. Upéi pe ermána ojedivorsia. Ótra ermána hérava Naomi heʼi: “Núnka naimoʼãiva che ména ojapotaha álgo hasyetereíva chéve. Upévare omombeʼúrõ guare chéve ohechaha oikóvo pornografía kañyháme, añandu chetraisiona hague”.

 8. a) ¿Mbaʼe mbaʼérepa ñaperdona vaʼerã ñande rapichápe? b) ¿Mbaʼe iporãvapa jahupyty ñaporoperdona jave? (Ehecha pe rrekuádro “ Ojejapórõ nderehe álgo nemarkaitéva ha ndaikatúivagui nderesarái”).

⁸ Ndaikatúi ningo ñadomina entéro mbaʼe  ñande rapicha heʼi térã ojaposéva, péro ñande si ikatu jajejoko pono ñarreaksiona vai. Ha iporãve ningo ñaporoperdona. ¿Mbaʼérepa? Pórke ñande jahayhu Jehovápe ha haʼe oipota ñaperdona ñande rapichápe. Jasegíramo ñandepyʼaro, provávlemente jajapóta hína peteĩ mbaʼe naiporãmbáiva ha ikatu voi japerhudika ñande salu (Prov. 14:​17, 29, 30). Jahechamína la oiko vaʼekue peteĩ ermánare, hérava Cristina. Haʼe heʼi: “Aikóramo chepochyeterei hína, ndapukavéima, haʼu oimeraẽ mbaʼe ha ni ndakeporãvéima. Upéi ndaikatuvéima adomina la añandúva ha upéicha rupi añepyrũma atrata vai che ménape ha umi ótro oĩvape che jerére”.

 9. ¿Mbaʼérepa noĩporãi jasegi ñandepyʼaro?

⁹ Pe persóna ojapo vaʼekue álgo ivaíva ñanderehe ikatu núnka ndojeruréi ñandéve perdón. Upéicharõ jepe ikatu jajapo álgo pono osegi ñandeperhudika la oiko vaʼekue. ¿Mbaʼépa ikatu jajapo? Pe ermána ñañeʼẽma vaʼekuére, hérava Griselda, heʼi: “Ohasávo ohóvo el tiémpo añehaʼã pono asegi chepochy che menakuéndi. Upéicha rupi aju tuicha chepyʼaguapy”. Ñañehaʼãramo pono jasegi ñandepyʼaro, ndajaikomoʼãi ñañamarga la oiko vaʼekuére. Péicha haʼetéta voi jajapóva peteĩ rregálo ñandejupe g̃uarã, pórke jasuperáta la oiko vaʼekue ha javyʼa jeýta (Prov. 11:17). Péro ñamoĩ chupe epensa rire la eñandúvare, ehechakuaaha ndaikatuiha eporoperdona. ¿Mbaʼépa ikatu rejapo?

ANI ESEGI NDEPOCHY

10. ¿Mbaʼérepa tekotevẽ ohasa peteĩ tiémpo anivéma hag̃ua ñandepochy? (Ehecha pe taʼanga).

¹⁰ ¿Mbaʼépa nepytyvõta anivéma hag̃ua resegi ndepochy la ojejapo vaʼekuére nderehe? Tekotevẽ ningo eheja ohasa peteĩ tiémpo reime porã jey hag̃ua. Por ehémplo, peteĩ persóna oñelastima vaírõ jaikuaa tekotevẽha peteĩ doktór oñatende hese. Péro upéi ohasámante vaʼerã la tiémpo pe persóna okueraite jey hag̃ua. Péicha avei ohasámante vaʼerã peteĩ tiémpo ñaĩ porã jey hag̃ua, ikatu hag̃uáicha ñaperdona peteĩ persónape ñande pyʼaite guive (Ecl. 3:3; 1 Ped. 1:22).

11. ¿Mbaʼéichapa pe ñemboʼe ikatu ñanepytyvõ ñaperdona hag̃ua?

¹¹ Eñemboʼékena Jehovápe ejerure hag̃ua chupe tanepytyvõ eporoperdona hag̃ua. c Ana, pe ermána ñañeʼẽma vaʼekuére, omombeʼu  mbaʼépa oipytyvõ chupe. Haʼe heʼi: “Ajerure Jehovápe tacheperdona chéve ha che famíliape umi mbaʼe vai roʼe ha rojapo vaʼekuére. Upéi askrivi peteĩ kárta che túa ha hembirekópe g̃uarã haʼehápe aperdonaha chupekuéra”. Ko ermána omombeʼu ijetuʼu hague chupe ojapo upéva. Péro upéi heʼive: “Añehaʼã ningo asegi Jehová ehémplo ha aporoperdona, ha hiʼãite chéve upéva omomýi che túa ha hembirekópe oikuaaseve hag̃ua Jehovápe”.

12. ¿Mbaʼérepa jajerovia vaʼerã Jehová heʼívare ha ani la ñande ñañandúvare? (Proverbios 3:​5, 6).

¹² Ejeroviákena la Jehová heʼívare ha ani la nde reñandúvarente (elee Proverbios 3:​5, 6). Jehová oikuaa porãiterei mbaʼépa la ou porãtava ñandéve ha ni mbaʼevéicharõ ndojeruremoʼãi jajapo hag̃ua álgo ñandeperhudikátava (Is. 55:​8, 9). Upévare haʼe heʼi jave ñaperdona vaʼerãha, ikatu ñaĩ segúro upéva iporãveha (Sal. 40:4; Is. 48:​17, 18). Péro jajegiáramo umi mbaʼe ñañandúvarente, provávlemente núnka ndaikatumoʼãi ñaporoperdona (Prov. 14:12; Jer. 17:9). Naomi, pe ermána ñañeʼẽma vaʼekuére heʼi: “Primerorã apensa oĩ porãtaha naperdonáiramo che ménape ohecha haguére pornografía. Haʼete vaʼekue chéve la aperdonárire chupe ojapo jeýta hague cherehe la mísma kósa, térã hesaráita hague mbaʼeichaitépa hasy kuri chéve la ojapo vaʼekue. Upévare haʼe voi Jehová ontendeha la añandúva. Péro upéinte ahechakuaa peteĩ mbaʼe: Jehová ontende haguére la añandúva, ndeʼiséi oĩ porãha chupe g̃uarã upe añandúva. Siérto, haʼe oikuaa mbaʼéichapa añeñandu ha tekotevẽha ohasa tiémpo chepochyjera hag̃ua, péro avei oipota aporoperdona”. d

EKAMBIA LA OĨVA NDE PYʼAPÝPE

13. Ohechaukaháicha Romanos 12:​18-21, ¿mbaʼépa tekotevẽ jajapo?

¹³ Ñaperdona jave álgienpe ndeʼiséi nañañeʼẽmoʼãveintemaha la oiko vaʼekuére. Oimérõ pe persóna haʼe peteĩ ñane ermáno térã ñane ermána kongregasionpegua, ñañehaʼã vaʼerã jaiko jey pyʼaguapýpe hendive (Mat. 5:​23, 24). Jaiko rangue ñandepochy, jadesidi jaiporiahuvereko ha ñaperdonataha (elee Romanos  12:​18-21; 1 Ped. 3:9). ¿Mbaʼépa ñanepytyvõta upearã?

14. ¿Mbaʼépa ñañehaʼã vaʼerã jajapo ha mbaʼérepa?

¹⁴ Jehová ningo omaña umi mbaʼe porã orekóvare la hénte. Ñande avei ñañehaʼã vaʼerã jasegi iñehémplo ha jaheka umi mbaʼe porã orekóva pe persóna ofalla vaʼekue ñanendive (2 Crón. 16:9; Sal. 130:3). Legálmente jatopasérõ ivaíva ñande rapicháre, jatopátante voi. Péro upéicha avei jahekáramo umi mbaʼe porã orekóva hikuái, katuete jatopáta. Ñañehaʼã jave jahecha iporãva ótrore, ifasilvéta ñandéve ñambohasa reínte hag̃ua la ojapóva. Por ehémplo peteĩ ermáno hérava John heʼi: “Ifasilve chéve aperdona peteĩ ermánope apensárõ umi mbaʼe porã porã orekóvare, aiko rangue ajesarekoiterei la ifállare”.

15. ¿Mbaʼérepa ikatu hína iporã ere pe persóna ofalla vaʼekuépe reperdonaha chupe?

¹⁵ Iporãta avei eréramo pe persóna ofalla vaʼekuépe nendive reperdonaha chupe. Upéva álgo iñimportánteva ikatúva rejapo hína. ¿Mbaʼérepa? Jahechamína mbaʼépa heʼi Naomi: “Che ména ningo oporandumi chéve aperdonámapa  chupe. Ajepreparárõ guare haʼe hag̃ua chupe: ‘Roperdona’, mbaʼevete nosẽi che jurúgui. Upépe apilla neʼĩra aperdona hague chupe che pyʼapýpe. Kon el tiémpo ikatúma haʼe che ménape aperdonaha chupe. Haʼérõ guare chupe upéva, che ména hesay pororopa omaña cherehe, ni naimoʼãi kuri mbaʼeichaitépa haʼe ipyʼaguapýta ha che avei. Upe guive akonfia jey hese ha che ménagui oiko jey che amigoite”.

16. ¿Mbaʼe mbaʼépa ñaaprendéma?

¹⁶ Jehová oipota ñaperdonakuaa ñande rapichápe (Col. 3:13). Upéicharõ jepe, sapyʼánte ikatu ijetuʼu ñandéve jajapo upéva. Péro tuicha ñanepytyvõta jarekóramo enkuénta la ñañandúva ha ñañehaʼãrõ ani hag̃ua jasegi ñandepochy. Avei iñimportánte ñakambia la oĩva ñande pyʼapýpe ha umi mbaʼe ñañandúva pe persóna ofalla vaʼekuére. (Ehecha pe rrekuádro “ Mbohapy mbaʼe nepytyvõtava reporoperdona hag̃ua”).

EPENSA MBAʼÉICHAPA IDEPROVÉCHO REPERDONAKUAÁRAMO

17. ¿Mbaʼe mbaʼépa jahupyty ñaperdonakuaáramo?

¹⁷ Heta mbaʼe porã jahupyty ñaperdonakuaáramo ñande rapichápe, ¿mbaʼe mbaʼépa hína umíva? Primeroite voi, ñaporoperdona jave jasegi pe ehémplo porãite omoĩva ñandéve ñande Ru ñandeporiahuverekóva (Luc. 6:36). Segundo, péicha jahechauka jaagradesetereiha Jehovápe ñaneperdona haguére (Mat. 6:12). Ha tercero, ñaporoperdonávo jakuida ñande salúre ha ikatu jareko heta amígo tee.

18, 19. ¿Mbaʼépa ikatu oiko ñaporoperdonakuaa rupi?

¹⁸ Ñaperdonáramo ikatu hína jarresivi heta vendisión ñaimoʼãʼỹva. Por ehémplo, jahechamína la oiko vaʼekue Denísere, pe ermána ñañeʼẽ hague iñepyrũme. Haʼe ndoikuaái kuri, péro pe ochoka vaʼekue hesekuéra oplanea ojesuisidataha ojehusgapa rire chupe pe trivunálpe. Péro upéi opokoiterei hese la Denise operdona haguére chupe. Upéicha rupi, upéi pe kuimbaʼe oñepyrũ ostudia la Biblia testígo de Jehovándi.

¹⁹ Ikatu oime ñapensa haguérente tekotevẽha ñaperdona álgienpe, ñañandúma voi upéva haʼeha peteĩva umi mbaʼe ijetuʼuvéva tekotevẽva jajapo. Péro ñaporoperdonáramo, jahecháta upéva haʼeha peteĩva umi mbaʼe ñanembovyʼavéva (Mat. 5:7). Upévare jajedesidíkena jasegitaha Jehová ehémplo porãite ha ñañehaʼã ñaperdonakuaa hag̃ua ñande rapichápe.