OIMÉNE rehechakuaáma ko múndope oĩha hetaiterei persóna opensáva iñimportanteveha hapichágui. Oĩ oimoʼãva orekoha hetave derécho ha opensa ojetrata porãve vaʼerãha chupe. Oñemeʼẽramo jepe chupekuéra heta mbaʼe, lomímonte osegi oipota potave. Koʼã ára pahápe ojekuaa porã mbaʼeichaitépa la hénte ojepyʼapy ijehénte ha imalagradesído (2 Tim. 3:2).

Péro jaikuaa porã ndahaʼeiha koʼág̃ante la oĩva hénte opensáva ijehénte. Por ehémplo yma Adán ha Eva odesidise vaʼekue ijeheguiete mbaʼépa iporã ha ivai ha koʼag̃aite peve ñande jasufri haʼekuéra odesidi vai haguére. Avei heta tiémpo upe rire rréi Uzías Judagua opensa vaʼekue orekoha derécho ohapývo insiénso pe témplope. Péro upérõ haʼe tuichaiterei ojavy kuri (2 Crón. 26:​18, 19). Avei umi fariséo ha saduséo opensa vaʼekue Ñandejára katuete oguerohory vaʼerãha chupekuéra haʼekuéra haʼe haguére Abrahán familiare (Mat. 3:9).

Oĩ ningo hetaiterei persóna opensáva ijehénte ha haʼekuéra opensa lája ikatu hína ova ñanderehe (Gál. 5:26). Ikatu hína ñañepyrũ ñapensa ñamereseha peteĩ priviléhio térã umi hénte ñanemombaʼeve vaʼerãha. ¿Mbaʼépa ikatu jajapo ani hag̃ua ñapensa upéicha? Jaikuaa porã vaʼerã mbaʼépa Jehová opensa ko mbaʼére. Jahechamína mbaʼépa heʼi la Biblia.

Jehová la odesidíva mbaʼépa ñamerese. Jahechamína unos kuánto ehémplo.

• Jehová oipota peteĩ famíliape tembireko orrespeta iménape ha pe ména ohayhu vaʼerã  hembirekópe (Efes. 5:33). Jehová heʼi umi omendávape ohechauka vaʼerãha ojupe ojoayhuha, péro haʼekuéra ndoikói vaʼerã ohechauka peichagua mborayhu ótra persóna ndahaʼéivape hembiayhu (1 Cor. 7:3). Avei tuakuéra omerese ifamília orrespeta chupekuéra ha umi mitã katu oñandu vaʼerã ituakuéra ohayhuha chupekuéra ha okuidaha hesekuéra (2 Cor. 12:14; Efes. 6:2).

• Jehová oipota jarrespeta kongregasiónpe umi ansiáno ombaʼapo jejopývape (1 Tes. 5:12). Péro péicha avei umi ansiáno ndoikói vaʼerã odominase umi ermáno ha ermánape (1 Ped. 5:​2, 3).

• Jehová omeʼẽ podér umi goviérno umánope, upévare ñande jareko pe ovligasión japagávo umi impuésto ha jarrespeta vaʼerã chupekuéra (Rom. 13:​1, 6, 7).

Jehová ñanderayhueterei rupi omeʼẽ ñandéve umi mbaʼe ni nañamereséiva. Ñande ningo pekadór Adán káusare, upévare ñamerese ñamano (Rom. 6:23). Péro Jehová hetaitereíma ñanevendesi ñanderayhuetereígui (Sal. 103:​10, 11). Haʼe imbaʼeporãitereíguinte omeʼẽ ñandéve heta priviléhio ha vendisión, ha ndahaʼéi ñande ñamereségui (Rom. 12:​6-8; Efes. 2:8).

Ñañatendékena ani hag̃ua ñapensa umi hénte ko mundopegua opensaháicha. Ñañemeʼẽʼỹre enkuénta ikatu ñañepyrũ ñapensa ñamereseha hetave mbaʼe umi ótrogui. Jesús omombeʼu vaʼekue peteĩ ehémplo ohechaukáva ndahasyieteha ñañepyrũ hag̃ua ñapensa upéicha. Haʼe oñeʼẽ vaʼekue unos kuánto travahadór okovra vaʼekuére 1 denario. Oĩ vaʼekue peteĩ grúpo oñepyrũva ombaʼapo voi pyharevete. Haʼekuéra ombaʼapo vaʼekue un día pytãite pe kuarahy akúpe, péro oĩ vaʼekue ótro grúpo ombaʼapo vaʼekue una órante. Amo ipahápe pe patrón opaga enterovépe 1 denario. Péro pe grúpo ombaʼapo vaʼekue un día pytãite opensa vaʼekue omereseha ojepagave chupekuéra (Mat. 20:​1-16). Ko ehémplo rupive Jesús ohechauka vaʼekue idisipulokuérape ovyʼáma vaʼerãha umi mbaʼe Ñandejára omeʼẽvare chupekuéra.

Ñandeagradesídokena ha ani ñaneexihenteterei (1 Tes. 5:18). Jasegíkena apóstol Pablo ehémplo. Haʼe ningo ndoikói vaʼekue ojerure umi ermáno Corintoguápe umi mbaʼe oikotevẽva, jepe haʼe oreko kuri derécho ojapóvo upéva (1 Cor. 9: 11-14). Upéicha avei ñande jaagradese vaʼerã entéro umi mbaʼe oñemeʼẽvare ñandéve ha ndajaikói vaʼerã ñaneexihenteterei ótrondi.

Ñaneumílde vaʼerã. Peteĩ persóna oñemombaʼeguasúva normálmente upéi opensáma avei omereseha hetave mbaʼe. Péro ñaneumílderamo núnka ndajarekomoʼãi peichagua pensamiénto ikatúva ñandeperhudika.

Proféta Daniel ohechauka vaʼekue mbaʼéichapa hína peteĩ persóna iñumíldeva. Por ehémplo haʼe ou vaʼekue peteĩ família iñimportántevagui, avei ipínta porã, iñarandu ha ikatupyry vaʼekue. Upévare haʼe ikatu vaʼekue ou oñemombaʼeguasu ha opensa omereseha umi priviléhio oñemeʼẽva chupe (Dan. 1:​3, 4, 19, 20). Péro haʼe osegi vaʼekue iñumílde ha oreko rupi upe kualida Jehová ohayhueterei vaʼekue chupe (Dan. 2:30; 10:​11, 12).

Upéicharõ, aníkena ñañepyrũ ñapensa ñandejehénte. Ko múndope opárupi la hénte opensa upéicha, péro ñande ñamboykete vaʼerã peichagua pensamiénto. Upéva rangue javyʼáma vaʼerã entéro umi vendisión Jehová omeʼẽvare ñandéve imbaʼeporãiterei rupi.