Mary ha iména John a oiko peteĩ país oĩháme heta hénte Filipinasgua ohóva ombaʼapo ha oiko upe lugárpe. Ko matrimónio ovyʼaiterei ikatu haguére opredika umi extranhérope. Pe pandémia de COVID-19 aja Mary omoñepyrũ heta kúrso bíblico pe país haʼe oikohápe, péro avei haʼe ombostudia heta hénte oikóvape ótro paíspe. ¿Mbaʼéichapa ojapo upéva?

Mary siémpre oporandu umi ostudiávape hendive: “¿Ndépa reikuaa ótro ostudiasévape avei la Biblia?”. Ojeʼérõ chupe oĩha álgien ostudiaséva, haʼe ojerure iñestudiántepe ikatúpa oipytyvõ chupe oñeʼẽmi hag̃ua upe persónandi. Upe porandu isensilloitéva siémpre ideprovécho. ¿Mbaʼérepa? Pórke normálmente umi hénte omombaʼetereíva la Biblia heʼíva, omombeʼuse ihénte ha iñamigokuérape la oaprendéva. Jahechamína mbaʼépa oiko Mary oporandu rupi ko mbaʼe iñestudiantekuérape.

Jasmin haʼéva Mary estudiánte heʼi chupe oĩha 4 persóna ostudiaséva la Biblia. Umi ostudiaséva apytépe oĩ vaʼekue Kristin. Haʼe oñepyrũ vaʼekue ostudia la Biblia ha ogustaiterei voi chupe la oaprendéva. Upévare haʼe ojerure Márype ostudia hag̃ua hendive 2 vése por semána. Upéi Mary oporandu Kristínpe oikuaápa avei álgien ostudiasévape la Biblia. Ha Kristin heʼi chupe: “Si, oĩ hína algúno ostudiaséva”. Unas kuánta semána haguépe, Kristin oipytyvõ Márype oikuaa hag̃ua 4 iñamigakuéra ostudiasévape la Biblia. Tiémpo rire Kristin heʼi jey Márype oĩveha unas kuánta iñamíga ostudiaséva avei. Upéi umi Kristin amigakuéra heʼi avei Márype máva mávapa ostudiase la Biblia.

Kristin oipota vaʼekue ihentekuéra oikóva Filipínaspe ostudia avei la Biblia, upévare oñeʼẽ imembykuña Andrea ndive. Ñepyrũrã Andrea opensa kuri: “Umi testígo de Jehová ningo haʼe peteĩ rrelihión iñextráño léntova. Haʼekuéra ndojeroviái Jesúsre ha sólamente oipuru pe Viejo Testamento”. Péro Andrea okambiaitéma opensa lája pe primera ves ostudia rire. Káda ke haʼe oaprende peteĩ mbaʼe ipyahúva heʼi: “La Bíbliapema ningo heʼi kóva, upévare siértomante vaʼerã”.

Tiémpo rire Andrea heʼi Márype oĩha mokõi iñamíga ha peteĩ ikompañéra de traváho ostudiaséva la Biblia. Upéi haʼekuéra oñepyrũma katu ostudia. Avei Andrea oreko peteĩ itia ndohecháiva hérava Angela, ha aviasído Mary oikuaaʼỹre haʼe ojapysaka kuri oikóvo haʼekuéra ostudia aja la Biblia. Upémarõ Angela oporandu Andréape ndaikatúipa Mary ombostudia avei chupe. Ángelape ogustaiterei umi mbaʼe oaprendéva ha un mes haguépe oikuaáma de memória hetaiterei téxto ha ostudiase la Biblia 4 vése por semána. Upéi  Andrea oipytyvõma avei itiápe oñepyrũ hag̃ua oñekonekta meme rreunionrã.

Upéi Mary oikuaa Kristin ména hérava Josué siémpre oĩha ijypýrupi haʼekuéra ostudia aja oñondive la Biblia. Upémarõ Mary oporandu Josuépe ndostudiaséipa avei la Biblia, ha Josué heʼi chupe: “Che ahendútante, péro eporandu sapyʼáramo chéve álgo, upepete apuʼãta aha”. ¿Mbaʼépa oiko raʼe upéi? Pe primera ves ostudiárõ guare hikuái, 5 minúto haguépe Josuéma katu la oporanduvéva ha upéi osegiséma avei ostudia la Biblia.

Mary oporandu haguérente oĩpa ótro ostudiaséva la Biblia ikatu kuri omoñepyrũ 28 kúrso bíblico 4 paíspe. Avei haʼe omeʼẽ vaʼekue umi ermáno ha ermánape hetaiterei kúrso bíblico haʼekuéra oñatende hag̃ua umívare.

Pe primera estudiánte ñamensiona vaʼekue ko experiénsiape hérava Jasmin ojevautisa abril de 2021-pe. Kristin avei ojevautisa vaʼekue mayo de 2022-pe ha oho jey Filipínaspe oĩ hag̃ua ihentekuérandi. Avei mokõi estudiánte Kristin opresenta vaʼekue Márype ojevautisa. Unos kuánto mése upe rire Angela ojevautisa ha koʼág̃a oservíma de prekursóra rregulár. Avei Kristin ména ha imembykuña Andrea ha hetave ótro osegi oprogresa porã.

Jesús ha umi apóstol tiémpope la hénte pyaʼe voi omombeʼu ifamília ha iñamigokuérape umi notísia porã (Juan 1:​41, 42a; Hech. 10:​24, 27, 48; 16:​25-33). Nde avei ikatu eporandu ne estudiántepe ha umi hénte ogustávape chupe la Biblia ndoikuaáipa ótra persóna ostudiasévape avei. Moõ jaikuaapa mboy kúrso bíblicopa ikatu emoñepyrũ reporandu haguérente upéva. Upéicharõ, etanteamína ha ejapo upe porandu.