1. ¿Mbaʼépa oipytyvõ Jehová siervokuérape osegi hag̃ua oadora chupe ijetuʼúramo jepe?

 LA Biblia heʼi koʼág̃arupi jaikoha peteĩ tiémpo ‘ijetuʼu ha ipeligrosohápe’ (2 Tim. 3:1). Ñande, Jehová siervokuéra jahasa umi provléma enterovéva voi ohasáva ko múndo añáme. Péro hiʼarive oĩ ñandepersegíva ha oñemoĩva ñanderehe jaservi haguérente Jehovápe. ¿Mbaʼépa ñanepytyvõ jasegi hag̃ua jaadora chupe ijetuʼúramo jepe? Jajapo upéva jahecháma rupi Jehová ñanepytyvõha ha jaikuaágui haʼe haʼeha “Ñandejára oikovéva” (Jer. 10:10; 2 Tim. 1:12).

2. ¿Mbaʼépa ñanepytyvõta jasegi hag̃ua ñaaguanta?

² Jehová ningo ohecha entéro umi mbaʼe ijetuʼúva jahasáva ha siémpre ñanepytyvõse (2 Crón. 16:9; Sal. 23:4). Ñanemanduʼa meméramo Jehová haʼeha Ñandejára oikovéva ha siémpre oĩha ñanepytyvõ hag̃uáicha, upéva ñanemombaretéta ñaaguanta hag̃ua tou la oúva. Jahechamína mbaʼéichapa upéva oipytyvõ vaʼekue rréi Davídpe.

3. ¿Mbaʼérepa David heʼi vaʼekue Jehová haʼeha “peteĩ Dios oikovéva”?

³ David oikuaa porã vaʼekue Jehovápe ha okonfia hese. Rréi Saúl ha hetave hénte opersegírõ guare Davídpe, haʼe oñemboʼe vaʼekue Jehovápe ojerure hag̃ua chupe ajúda (Sal. 18:6). Ñandejára okontesta vaʼekue Davídpe ha osalva chupe. Upérõ David heʼi vaʼekue: “Jehová ningo peteĩ Dios oikovéva” (Sal. 18:46). David heʼírõ guare upéva, ndeʼiséi vaʼekue Ñandejára oexistinteha. Peteĩ lívro oexplika, David heʼírõ guare upéva, ohechauka hague mbaʼeichaite pevépa ojerovia Jehováre, haʼe ndodudái vaʼekue Ñandejára oikoveha ha siémpre oĩha oipytyvõ hag̃uáicha isiervokuérape. Jahechaháicha, David oikuaa vaʼekue Jehová haʼeha peteĩ Dios oikovéva ha upéva oipytyvõ vaʼekue chupe ojedesidiete  hag̃ua osegitaha oservi ha omombaʼeguasu Jehovápe (Sal. 18:​28, 29, 49).

4. ¿Mbaʼéichapa ñanepytyvõta ñanemanduʼa memérõ Jehová haʼeha “Ñandejára oikovéva”?

⁴ ¿Mbaʼéichapa ñanepytyvõta ñaiméramo segúro Jehová haʼeha “Ñandejára oikovéva”? Jasegíta jaservi chupe kyreʼỹme, ñanembaretéta ñaaguanta hag̃ua tou la oúva ha jasegiséta ñambaʼapo Ñandejára servísiope. Avei ñanepytyvõta jajedesidiete hag̃ua jasegitaha ñañemoag̃ui Jehováre.

“ÑANDEJÁRA OIKOVÉVA” ÑANEMOMBARETÉTA

5. ¿Mbaʼépa ikatu ñanembopyʼaguasu ñambohovái jave umi provléma oñepresentáva? (Filipenses 4:13).

⁵ Ikatúta ñaaguanta oimeraẽ mbaʼe ijetuʼúva, tahaʼe michĩ térã tuicháva, ñanemanduʼa memérõ Jehová oikoveha ha siémpre oĩha ñanepytyvõ hag̃ua. Amo ipahápe ningo oimeraẽ provléma ñande jarekóva ndahaʼéi mbaʼevete henondépe, pórke haʼe ningo pe Todopoderóso ha ikatu omeʼẽ ñandéve la fuérsa ñaaguanta hag̃ua (elee Filipenses 4:13). Jaikuaa rupi upéva ñandepyʼaguasuve ñaaguanta hag̃ua umi provléma oñepresentáva ñandéve. Jahecha jave mbaʼéichapa Jehová ñanepytyvõ jahasa jave umi provléma michĩvéva, ñaĩve segúro haʼe ñanepytyvõtaha jahasa jave umi provléma tuichavéva.

6. ¿Mbaʼe mbaʼépa David ohasa vaʼekue imitãrõ guare oipytyvõva chupe ojeroviave hag̃ua Jehováre?

⁶ David ohasa vaʼekue mokõi mbaʼe ijetuʼúva oipytyvõ vaʼekue chupe ojeroviave hag̃ua Jehováre. Haʼe imitãrõ guare okuida vaʼekue itúa ovechakuérare. Peteĩ díape ou peteĩ león ogueraha peteĩ ovecha. Ótra vuéltape katu peteĩ óso ogueraha la ovecha. Péro David pyʼaguasúpe omuña vaʼekue umi animálpe ha osalva umi ovechápe. David ndeʼíri vaʼekue ojapo hague koʼã mbaʼe ijehegui reínte, pórke haʼe oikuaa porã vaʼekue Jehová oipytyvõ hague chupe (1 Sam. 17:​34-37). David núnka ndahesaráiri vaʼekue la ohasa vaʼekuégui. Ojepyʼamongeta rupi umívare, haʼe oĩ vaʼekue segúro “Ñandejára oikovéva” omombarete jeytaha chupe amo gotyove.

7. ¿Mbaʼe rehepa David opensa meme vaʼekue, ha mbaʼéichapa upéva oipytyvõ chupe?

⁷ Tiémpo rire, David imitãrusu aja gueteri oho vaʼekue oĩháme pe ehérsito israelita. Upérõ guare haʼe ohecha umi soldádo israelita okyhyjeterei hague pórke peteĩ gerréro filisteo tuichaitereíva, hérava Goliat oho vaʼekue ‘odesafia pe ehérsito israelítape’ (1 Sam. 17:​10, 11). Umi soldádo israelita okyhyjeterei vaʼekue pórke opensa meme Goliat heʼi vaʼekuére chupekuéra ha orekoiterei rupi enkuénta haʼe tuichaitereiha (1 Sam. 17:​24, 25). Péro David opensa meme vaʼekue ótra kósare. Haʼe oikuaa porã vaʼekue Goliat oñembohorýrõ guare Israel ehérsitore, oñembohoryha avei pe Dios oikovévare, haʼéva ‘Israel Jára soldadokuéra’ (1 Sam. 17:26). David ojerovia vaʼekue Jehováre ipyʼaite guive. Haʼe oikuaa Ñandejára oipytyvõ haguéicha chupe okuidárõ guare umi ovecháre, peichaite oipytyvõ jeytaha chupe ko situasiónpe. Ha jaikuaaháicha Ñandejára oipytyvõ rupi Davídpe haʼe oho oñorairõ Goliat kóntrape ha ogana chupe (1 Sam. 17:​45-51).

8. ¿Mbaʼéichapa ikatu ñaĩve segúro Jehová ñanepytyvõtaha? (Ehecha pe taʼanga).

⁸ Ñande avei ikatu ñambohovái porã umi situasión ijetuʼúva ñanemanduʼa memérõ Ñandejára oikovéva oĩha ñanepytyvõ hag̃uáicha siémpre (Sal. 118:6). Ikatu ñamombarete ñande jerovia ñapensávo umi mbaʼe Jehová ojapo vaʼekuére yma. Upearã ikatu jalee la Bíbliape umi rreláto ohechaukáva mbaʼéichapa Jehová osalva vaʼekue isiervokuérape (Is. 37:​17, 33-37). Avei ikatu jalee térã jahecha umi notísia osẽva ñande sítio jw.org-pe, ohechaukáva mbaʼéichapa Jehová oipytyvõ ñane ermanokuérape koʼág̃arupi. Avei iporãta nemanduʼa  memérõ umi mbaʼe Jehová ojapóma vaʼekuére nderehehápe voi. Natekotevẽi katuete reñorairõ raʼe peteĩ óso o peteĩ leóndi ehechakuaa hag̃ua Jehová oĩ hague nde ykére. ¿Mbaʼérepa? Pórke la iñimportánteva hína Jehová ojapóma hague heta mbaʼe nderehehápe, haʼe ningo oipota oiko ndehegui iñamigoite (Juan 6:44). Ani nderesarái Ñandejára nepytyvõ rupínte ikatuha resegi reservi chupe. Upévare, ejeruremína Jehovápe tanemomanduʼa haʼe okontestárõ guare ndéve ne ñemboʼe, omeʼẽrõ guare ndéve la reikotevẽva itiempoitépe ha okuidárõ guare nderehe peteĩ situasión ijetuʼúvape. Jajepyʼamongeta memérõ koʼã mbaʼére ñaiméta segúro Jehová osegitaha ojapo heta mbaʼe ñanderehehápe.

9. ¿Mbaʼe rehepa ñanemanduʼa vaʼerã jahasa jave umi pruéva? (Proverbios 27:11).

⁹ Ñanemanduʼa memérõ Jehová haʼeha “Ñandejára oikovéva”, ñambohovái porãvéta umi pruéva jahasáva. ¿Mbaʼérepa jaʼe upéva? Jahasa jave umi situasión ijetuʼúva tekotevẽ ñanemanduʼa mbaʼépa hína la iñimportantevéva. Satanás heʼíma vaʼekue ñande ñaneprovléma jave jahejataha Jehovápe. Upévare, la jajapóva ijetuʼu jave ñanendive ikatu omoñeñandu vai térã omoñeñandu porã Jehovápe (Job 1:​10, 11; elee Proverbios 27:11). Péro jasegi jave ñandefiél Jehovápe, tahaʼe haʼéva la jahasáva jahechauka jahayhuha chupe ha Satanás ijapuha. Ikatu ningo oime nde reikohápe pe goviérno oñemoĩ mbarete Jehová puévlore térã ikatu oime ereko hína provléma ekonómiko. Avei ikatu umi hénte nohenduséi umi notísia porã nde reikohárupi térã ikatu rehasa oimehaichagua ótro provléma. Oimérõ upéicha, nemanduʼákena erekoha peteĩ oportunida embovyʼa hag̃ua Jehovápe. Ani nderesarái avei haʼe ndohejamoʼãiha rehasa mbaʼeve ndaikatumoʼãiva reaguanta (1 Cor. 10:13). Jehová ningo katuete ñanemombaretéta jasegi hag̃ua ñaaguanta.

“ÑANDEJÁRA OIKOVÉVA” OMYENGOVIA PORÃTA ISIERVOKUÉRAPE

10. ¿Mbaʼépa ojapóta Ñandejára isiervokuéra rehehápe?

¹⁰ Jehová ningo siémpre omyengovia porã umi oadorávape chupe (Heb. 11:6). Koʼág̃ama voi haʼe ñanepytyvõ jaiko hag̃ua pyʼaguapýpe ha vyʼápe. Amo gotyove katu omeʼẽta ñandéve pe jeikove opaveʼỹva. Jehová omyengovia porãse  isiervokuérape ha oreko la podér ojapo hag̃ua upéva, ha ñande ndajadudái upévagui. Upéicha rupi jasegi ñanerembiapo heta iservísiope, ojapo haguéicha isiervokuéra yma guare. Jahechamína pe ehémplo porã oheja vaʼekue Timoteo síglo primérope (Heb. 6:​10-12).

11. ¿Mbaʼérepa Timoteo ombaʼapo jejopy vaʼekue kongregasiónpe? (1 Timoteo 4:10).

¹¹ (Elee 1 Timoteo 4:10). Timoteo oĩ vaʼekue segúro Ñandejára oikovéva omyengovia porãtaha chupe. Upévare haʼe ombaʼapo jejopy vaʼekue Jehová ha umi ótro rehehápe. ¿Mbaʼe mbaʼépa ojapo vaʼekue? Por ehémplo apóstol Pablo omokyreʼỹ vaʼekue chupe omboʼe porãve hag̃ua kongregasiónpe ha predikasiónpe. Tekotevẽ vaʼekue avei Timoteo omoĩ ehémplo porã umi ermanokuérape g̃uarã, tahaʼe imitãva térã ijedávape. Oñemeʼẽ vaʼekue avei chupe umi asignasión ijetuʼúva, umíva apytépe oñemoñeʼẽ mbarete porã vaʼerã kuri umi oikotevẽvape, péro siémpre ojapo vaʼerã upéva mborayhúpe (1 Tim. 4:​11-16; 2 Tim. 4:​1-5). Sapyʼánte ikatu vaʼekue oĩ ndohecháiva térã nomombaʼéiva la Timoteo ojapo vaʼekue. Péro haʼe oĩ vaʼekue segúro Jehová omyengovia porãtaha chupe (Rom. 2:​6, 7).

12. ¿Mbaʼérepa umi ansiáno osegi ombaʼapo jejopy pe kongregasiónpe? (Ehecha pe taʼanga).

¹² Koʼág̃arupi umi ansiáno ikatu oĩ segúro Jehová ohecha ha ovaloraitereiha la ojapóva. Umi ansiáno ningo okuida umi ermánore, oporomboʼe ha opredika. Heta oĩ avei oapojáva umi projékto de konstruksión ha oipytyvõva oiko jave desástre naturál. Oĩ umi oservíva umi Grúpo de visíta al pasiéntepe térã pe Komite de Enlásepe. Umi ansiáno ningo oikuaa pe kongregasión haʼeha Jehová mbaʼe, ha ndahaʼéi oĩva peteĩ yvypóra rei poguýpe. Upéicha rupi umi ansiáno ombaʼapo ipyʼaite guive pe kongregasiónpe g̃uarã ha oĩ segúro Ñandejára omyengovia porãtaha chupekuéra (Col. 3:​23, 24).

13. ¿Mbaʼéichapa Jehová oñeñandu ohechávo ñañehaʼãmbaiteha iservísiope?

¹³ Naentéroi ikatu jaservi de ansiáno, péro enterovetéva jareko álgo ikatúva ñameʼẽ Jehovápe. Ñandejára omombaʼeterei ñañehaʼãmbaite jave jaservi hag̃ua chupe. Haʼe ningo ohecha  ñameʼẽ jave ñane kontrivusión pe óvra mundiálpe g̃uarã, sapyʼánte ndaikatúiramo jepe ñameʼẽ heta. Jehová ovyʼa ohechávo ñamopuʼãha ñande po ñakomenta hag̃ua rreunionhápe ñaneotĩramo jepe. Avei opokoiterei hese ohechávo ñaperdonaha peteĩ ñaneofende vaʼekuépe. Sapyʼánte repensáramo ndaikatuiha rejapo heta mbaʼe Jehovápe g̃uarã, aníkena reduda haʼe ovaloraitereiha la rejapóva. Jehová ningo nderayhueterei ha katuete omyengovia porãta ndéve (Luc. 21:​1-4).

JASEGÍKENA ÑAÑEMOAG̃UI ÑANDEJÁRA OIKOVÉVARE

14. ¿Mbaʼépa ñanepytyvõta jasegi hag̃ua ñandefiél Jehovápe ha mbaʼérepa? (Ehecha pe taʼanga).

¹⁴ Jehová haʼéramo ñane amigoite, ifasilvéta ñandéve jasegi hag̃ua ñandefiél chupe. Upéicha vaʼekue José kásope. Haʼe ningo orrechasaite vaʼekue pe tekovai pórke oikuaa vaʼekue Jehovápe g̃uarã iñimportanteha la haʼe ojapóva ha nomoñeñanduvaiséi chupe (Gén. 39:9). Oiko hag̃ua ñandehegui Jehová amigoite tekotevẽ ñañemotiémpo ñañemboʼe hag̃ua chupe ha jastudia Iñeʼẽ. Péicha ñane amista hendive imbaretevéta. José ojapo haguéicha, ñande ñañehaʼãrõ avei jareko peteĩ amista imbaretéva Jehovándi, ndajajaposemoʼãi ni mbaʼevéicharõ mbaʼeve ndogustáiva chupe (Sant. 4:8).

15. ¿Mbaʼépa ñaaprende la oiko vaʼekuégui umi israelítare? (Hebreos 3:12).

¹⁵ Umi hesaráiva Ñandejára oikoveha ha ndojeroviavéiva hese, ikatu hína ou oheja chupe. Jahechamína la oiko vaʼekue umi israelítare oĩrõ guare pe desiértore. Haʼekuéra oikuaa porãramo jepe Jehová oexistiha, oñepyrũ opensa haʼe nomeʼẽmoʼãiha chupekuéra la oikotevẽva. Oporandu voi hikuái: “¿Ñanepytyvõta piko Jehová térãpa nahániri?” (Éx. 17:​2, 7). Upéicha rupi, umi israelita oñemoĩ vaʼekue Ñandejára kóntrape. Ñande ningo ni mbaʼevéicharõ ndajaipotái oiko upéva ñanderehe, upévare aníkena jasegi umi israelita ehémplo vai (elee Hebreos 3:12).

16. ¿Mbaʼérepa sapyʼánte ikatu ijetuʼu jasegi hag̃ua jajerovia Ñandejárare?

¹⁶ Ko múndope ijetuʼueterei jasegi hag̃ua ñañemoag̃ui Jehováre. Oĩ heta hénte ni ndogueroviáiva  Ñandejára oexistiha ha heta vése umi omboykéva Ñandejárape haʼete oho porãitereíva hese. Jahecha jave oikoha upéva ikatu ijetuʼu ñandéve jasegi jajerovia Ñandejárare. Ndajadudáiramo jepe Ñandejára oexistiha, ikatu hína ñañepyrũ ñapensa haʼe nañanepytyvõmoʼãiha. Pe oskrivi vaʼekue Salmo 73 oñeñandu vaʼekue avei péicha un tiémpore. Haʼe ohecha vaʼekue mbaʼéichapa umi hénte oĩva ijerére nopenái Ñandejára léire, péro lomímonte oiko hikuái vyʼápe. Upéicha rupi pe salmísta ou vaʼekue oñeporandu ovalépa la péna osegi oservi Ñandejárape (Sal. 73:​11-13).

17. ¿Mbaʼépa ñanepytyvõta jasegi hag̃ua ñañemoag̃ui Jehováre?

¹⁷ ¿Mbaʼépa upéi oipytyvõ vaʼekue pe salmístape okambia hag̃ua la opensáva? Haʼe ojepyʼamongeta vaʼekue la oikótavare umi ndojeroviavéivare Jehováre (Sal. 73:​18, 19, 27). Avei opensa meme vaʼekue umi mbaʼe porã ohupytýva umi osegíva oservi Ñandejárape (Sal. 73:24). Ñande avei ñanemanduʼa meme vaʼerã umi vendisión Jehová omeʼẽ vaʼekuére ñandéve. Iporãta avei ñañehaʼãramo ñañeimahina mbaʼeichaitépa idiferénteta kuri ñande rekove ndajaservíririre Jehovápe. Ñanemanduʼáramo mbaʼérepa iporã ñandéve g̃uarã jaservi Jehovápe, ifasilvéta ñandéve jasegi hag̃ua ñandefiél chupe. Ha pe salmísta heʼi haguéicha ikatúta avei jaʼe: “Che katu añemoag̃ui Ñandejárare, ha ndaipóri mbaʼeve iporãvéva upévagui” (Sal. 73:28).

18. ¿Mbaʼérepa natekotevẽi jakyhyje la oikótavagui koʼẽrõite?

¹⁸ Ñande ikatúta ñambohovái porã oimeraẽ mbaʼe oikóva koʼã ára pahápe pórke jaservi “esklávoramo Ñandejára tee ha oikovévape” (1 Tes. 1:9). Ñandejára oñeinteresa ñanderehe ha oĩ siémpre ñanepytyvõ hag̃uáicha. Yma haʼe oipytyvõma vaʼekue voi isiervokuérape ha ojapo jey hína upéicha ñane tiémpope. Koʼẽrõitéma ningo og̃uahẽta pe jehasa asy guasu arakaʼeve oikoʼỹ haguéicha ko yvy ape ári. Péro nañaimemoʼãi ñaneaño. Jehová katuete oĩta ñande ykére (Is. 41:10). Upéicharõ “ani jakyhyje, síno jaʼe vaʼerã: ‘Jehová chepytyvõ hína, ndakyhyjemoʼãi asy’” (Heb. 13:​5, 6).