1, 2. ¿Mbaʼépa rejapo vaʼerã rejevautisa mboyve?

 UMI 5 áño ohasa vaʼekuépe, mas de un millón de persóna ojevautisa ha oiko chuguikuéra testígo de Jehová. Heta oĩ koʼãva apytépe ojoguáva Timotéope, pórke oñepyrũ vaʼekue oikuaa Jehovápe ‘imitã guive’ (2 Tim. 3:​14, 15). Ótro katu oikuaa Jehovápe okakuaapa riréma ha algúno ijeda riréma voi. Por ehémplo, ojapo unos kuánto áño peteĩ kuñakarai oñepyrũ hague ostudia la Biblia ha ojevautisa orekópe 97 áño.

² Oiméramo peteĩ Testígo nemboʼe hína la Biblia heʼíva, ¿repensámapa rejevautisávo? Térã oiméramo nde tuakuéra nemboʼe la Biblia nemichĩete guive, ¿repensámapa avei rejevautisávo? Iporãitereíta ningo rejapóramo upéva. Tahaʼe haʼéva la ne situasión, rejevautisa mboyve reñemeʼẽ vaʼerã Jehovápe. Ko artíkulo oexplika porãta mbaʼépa heʼise ñañemeʼẽ Jehovápe. Avei nepytyvõta rehechakuaa hag̃ua natekotevẽiha rekyhyje reñemeʼẽ hag̃ua Jehovápe ha rejevautisa oiméramo reĩma preparádo.

¿MBAʼÉPA HEʼISE ÑAÑEMEʼẼ JEHOVÁPE?

3. Según la Biblia, ¿máva mávapa oñemeʼẽ vaʼekue Jehovápe?

³ ¿Mbaʼépa heʼise peteĩ persóna oñemeʼẽha Jehovápe? La Bíbliape upéva heʼise peteĩ persónape ojeaparta hague ojapo hag̃ua álgo espesiál Jehovápe g̃uarã. Por ehémplo umi israelita kompletoite haʼe vaʼekue peteĩ puévlo oñemeʼẽva Jehovápe. Péro ijapytepekuéra oĩ jey vaʼekue oñemeʼẽva Jehovápe ojapo hag̃ua hetave mbaʼe. Por ehémplo, Aarón oreko vaʼekue pe iturvántere peteĩ “pláka de óro sagrádo omimbíva”. Upe pláka de óro ohechauka vaʼekue ‘ojeaparta hague chupe ombaʼapo hag̃ua Ñandejárape g̃uarã’. ¿Ha mbaʼépa ojapo vaʼekue Aarón? Oservi súmo saserdóteramo Israélpe (Lev. 8:9).  Avei umi nazareo oñemeʼẽ vaʼekue Jehovápe ojapo hag̃ua álgo espesiál chupe g̃uarã. Pe palávra “nazareo” hebréope heʼise voi “oñemboyke” térã “oñemeʼẽva Ñandejárape”. ¿Mbaʼépa ojapo vaʼekue hikuái? Haʼekuéra osegi vaʼerã kuri unos kuánto léi ojeskrivíva chupekuéra g̃uarãite (Núm. 6:​2-8).

4. a) Reñemeʼẽvo Jehovápe, ¿mbaʼépa reñekompromete rejapotaha? b) ¿Mbaʼépa heʼise reñembyesaraitaha ndejehegui? (Ehecha pe taʼanga).

⁴ Reñemeʼẽvo Jehovápe redesidi oikotaha ndehegui Jesucristo disípulo ha Ñandejára volunta haʼetaha la iñimportantevéva nde rekovépe. ¿Mbaʼépa tekotevẽta rejapo upearã? Jesús heʼi vaʼekue: “Oĩramo chemoirũséva, toñembyesarái ijehegui” (Mat. 16:24). Pe fráse “toñembyesarái ijehegui” ikatu avei ojetradusi péicha: “Heʼi vaʼerã no ijupe”. Peteĩ persóna oñemeʼẽva Jehovápe ndojapomoʼãi mbaʼeve ndogustáiva chupe (2 Cor. 5:​14, 15). Upéicha rupi ndojapomoʼãi ‘umi mbaʼe vai ogustáva ñande rete imperféktope’, umíva apytépe pe tekovai. Orrechasávo koʼã mbaʼe upe persóna heʼi hína no ijupe (Gál. 5:​19-21; 1 Cor. 6:18). ¿Reiko asýtapa rekumplíramo koʼã léi? Rehayhúramo Jehovápe ha regueroviáramo la haʼe heʼíva iporãveha, ndereikoʼasymoʼãi ni michĩmi (Sal. 119:97; Is. 48:​17, 18). Peteĩ ermáno hérava Nicolás heʼi voi: “Algúnope g̃uarã Jehová léi haʼete umi rréha orekóva peteĩ kársel ojokóva chupe pono ojapo la ojaposéva. Ha ótrope g̃uarã katu haʼete umi rréha oĩva peteĩ soolóhikope oprotehéva chupe umi leóngui. Péro odependéma káda únore mbaʼépa opensáta”.

5. a) ¿Mbaʼépa rejapo vaʼerã reñemeʼẽ hag̃ua Jehovápe? b) ¿Mbaʼépepa idiferénte ñañemeʼẽ Jehovápe ha jajevautisa? (Ehecha pe taʼanga).

⁵ ¿Mbaʼépa rejapo vaʼerã reñemeʼẽ hag̃ua Jehovápe? Repromete vaʼerã chupe peteĩ ñemboʼépe readorataha chupe añoite ha ivolunta haʼetaha la iñimportantevéva ndéve g̃uarã.  Rejapóvo péicha reprometéma rehayhutaha Jehovápe “nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30). Ko promésa rejapóva Jehovápe, nde ha Jehovánte peikuaa, pórke upéva neañohápente rejapo. Pe vautísmo katu idiferentete, upéva ojejapo umi ótro rovake ikatu hag̃uáicha umi hénte ohechakuaa reñemeʼẽma hague Jehovápe. Upe moméntope rejapo hína peteĩ promésa tuichaitereíva ha reñehaʼã vaʼerã rekumpli. Jehová voi ohaʼarõ ndehegui upéva (Ecl. 5:​4, 5).

¿MBAʼÉPA NEMOMÝI VAʼERÃ REÑEMEʼẼ HAG̃UA JEHOVÁPE?

6. ¿Mbaʼépa omomýi vaʼerã peteĩ persónape oñemeʼẽ hag̃ua Jehovápe?

⁶ ¿Mbaʼépa nemomýi vaʼerã reñemeʼẽ hag̃ua Jehovápe? Prinsipálmente rehayhúgui chupe. Péro upéva ndahaʼéi vaʼerã peteĩ sentimiénto reínte. Upéva rangue, reñehaʼã vaʼerã rehayhu Jehovápe ‘reikuaa porãgui hembipota’, ha ‘rentendégui opa mbaʼe ijespíritu sánto rupive’ (Col. 1:9). Restudia porã rupi la Biblia nderedudái vaʼerã: 1) Jehová añetehápe oexistiha, 2) la Biblia haʼeha Iñeʼẽ, ha 3) haʼe oipuruha iñorganisasión okumpli hag̃ua ivolunta.

7. ¿Mbaʼépa jajapóma vaʼerã jaikóvo ñañemeʼẽ mboyve Jehovápe?

⁷ Umi oñemeʼẽva Jehovápe oikuaa umi enseñánsa iñimportantevéva oĩva la Bíbliape ha oñehaʼãmbaite oiko heʼiháicha Ñandejára Ñeʼẽme. Haʼekuéra ojapo avei ikatúva entéro omombeʼu hag̃ua ótrope umi mbaʼe oaprende vaʼekue (Mat. 28:​19, 20). Ha káda día ohasáva ohayhuve rei Jehovápe, upévare chupe añoiténte oadorase. ¿Ndépa upéicha avei?  Rehayhúramo nde pyʼaite guive Jehovápe, nde voi reñemeʼẽséta chupe ha rejevautisaséta. Nderejapomoʼãi upéva rembovyʼa hag̃uánte la ne instruktórpe o nde tuakuérape. Ni nderejapomoʼãi upéva ne amigokuéra ojapo haguérente avei.

8. ¿Mbaʼépa ikatu nepytyvõ reñemeʼẽse hag̃ua Jehovápe ha mbaʼérepa? (Salmo 116:​12-14).

⁸ Repensávo entéro mbaʼe Jehová ojapómavare nderehehápe reñemeʼẽsetereíta voi chupe (elee Salmo 116:​12-14). La Biblia heʼi voi “entéro mbaʼe porã ha rregálo iporãva” ouha Jehovágui (Sant. 1:17). Jehová ningo omeʼẽ vaʼekue Itaʼýra Jesucristo nderehehápe. ¡Ndaipóri ningo rregálo iporãvéva upévagui! Epensamíntena: Upe sakrifísio rupive koʼág̃a ikatúma reñamiga Jehováre. Upéicha rupínte avei Jehová omeʼẽ ndéve koʼág̃a pe esperánsa reiko hag̃ua pára siémpre (1 Juan 4:​9, 10, 19). Ndaipóri ningo ótro peichaite peve nderayhúva, ha ndaiporimoʼãi avei omeʼẽva ndéve hetaite mbaʼe ndaijojaháiva. Reagradesetereígui koʼã mbaʼére, nde voi reñemeʼẽséta Jehovápe (Deut. 16:17; 2 Cor. 5:15). Ko témare oñeñeʼẽ avei pe lívro héravape ¡Jaikóta vyʼápe pára siémpre!, leksión 46, púnto 4-pe. Upépe oĩ avei peteĩ vidéo orekóva 3 minúto hérava ¿Mbaʼépa ikatu jarregala Jehovápe?

¿IKATÚMAPA REÑEMEʼẼ JEHOVÁPE HA REJEVAUTISA?

9. ¿Mbaʼérepa peteĩ persóna noñekomparái vaʼerã ótrore oikuaa hag̃ua oĩmapa preparádo oñemeʼẽ hag̃ua Jehovápe?

⁹ Ikatu oime repensa nereimeitiha preparádo reñemeʼẽ hag̃ua Jehovápe ha rejevautisa. ¿Mbaʼérepa ikatu reju repensa upéicha? Ikatu oime rehechakuaa ndejehe ofaltaitiha ndéve rekambia reiko hag̃ua Jehová oipotaháicha, térã ofaltaitiha ndéve remombareteve nde jerovia (Col. 2:​6, 7). Enterovéva ningo ñanediferénte ojuehegui. Oĩ la pyaʼe oñepyrũva ohayhu Jehovápe ha oñemeʼẽva chupe, ha oĩ avei la orahamiéva chupe tiémpo ojapo hag̃ua upéva. Oĩ umi imitã reheve ojevautisáva ha oĩ la odesidíva ohaʼarõmie. Upévare, eñehaʼãmbaitékena ani eñekompara ótrore. Upéva rangue, iporãvéta repensa mbaʼépepa nde voi ikatu emehora ha upéi eñehaʼã embaʼapo ndejehe (Gál. 6:​4, 5).

10. ¿Mbaʼépa ikatu rejapo rehechakuaárõ nereimeitiha preparádo reñemeʼẽ hag̃ua Jehovápe ha rejevautisa? (Ehecha pe rrekuádro “ Oimérõ rekakuaa Jehová organisasiónpe”).

¹⁰ Oiméramo rehechakuaa nereimeitiha preparádo reñemeʼẽ hag̃ua Jehovápe, ¿mbaʼépa ikatu rejapo? Ani reñentrega ha eñehaʼã ehupyty upéva amo gotyove. Eñemboʼe avei Jehovápe tanepytyvõ rekambia hag̃ua tekotevẽhápe ha eñehaʼã nde voi avei ndejehe (Filip. 2:13; 3:16). Jehová ningo katuete ohendúta la ne ñemboʼe ha nepytyvõta (1 Juan 5:14).

¿MBAʼÉREPA OĨ NOÑANIMÁIVA?

11. ¿Mbaʼéichapa Jehová ikatu ñanepytyvõ ñandefiél hag̃ua chupe?

¹¹ Ikatu oime reĩma preparádo reñemeʼẽ hag̃ua Jehovápe ha rejevautisa. Upéicharõ jepe, ikatu oime reduda gueteri hína. ¿Mbaʼérepa? Oĩ ningo opensáva péicha: “¿Mbaʼe piko oikóta chehegui upéi ajúramo apeka vaieterei ha añemosẽ kongregasióngui?”. Oiméramo nde repensa upéicha, nemanduʼákena Ñandejára ikatuha nepytyvõ reiko hag̃ua “oikoháicha umi oservíva” chupe ikatu hag̃uáicha ‘haʼe ndeguerohory entéro mbaʼépe’ (Col. 1:10). Haʼe ningo oipytyvõma hetaiterei persónape ojapose hag̃ua pe iporãva. Ha ndéve avei ikatu nepytyvõ upéicha (1 Cor. 10:13). Jehová oipytyvõ ipuévlope ifiél hag̃ua chupe. Upéicha rupínte ndahetaguasúi la oñemosẽva kongregasióngui.

12. ¿Mbaʼépa ikatu ñanepytyvõ ani hag̃ua japeka vai?

 ¹² Enterovéva ningo ñaneimperfékto, upévare ñandestirátante voi la ivaíva (Sant. 1:14). Ha ndofaltamoʼãi avei oportunida jajapo hag̃ua ivaíva. Upéicharõ jepe, nemanduʼákena peteĩ mbaʼére: Nde ikatu redesidi mbaʼépa rejapóta, nde ikatu redesidi mbaʼéichapa reikóta. Oĩ ningo heʼíva ndaikatuiha jajoko umi deséo vai, péro upéva japu. Nde ikatu reaprende rekontrolakuaa hag̃ua koʼã deséo vai. Upéicha rupi oñepresentáramo ndéve peteĩ tentasión amo gotyove ikatúta rejejoko. ¿Mbaʼépa nepytyvõta rejapo hag̃ua koʼã mbaʼe? Eñemboʼékena Jehovápe káda día, eñehaʼã estudia meme Iñeʼẽ, ani refalta rreunionhápe ha emombeʼu ótrope umi mbaʼe regueroviáva. Rejapóramo koʼã mbaʼe nembaretéta ndefiél hag̃ua Jehovápe. Ha aníkena nderesarái Jehová voi nepytyvõtaha ndefiél hag̃ua chupe (Gál. 5:16).

13. ¿Mbaʼérepa ikatu jaʼe José haʼeha ehémplo porã ñandéve g̃uarã?

¹³ ¿Mbaʼépa ikatu rejapo oñepresenta mboyve ndéve peteĩ tentasión? Iporãta koʼág̃ama voi redesidíramo mbaʼépa rejapóta. Upéicha ifasilvéta ndéve ndefiél hag̃ua Jehovápe. La Bíbliape oñemombeʼu voi oĩ hague unos kuánto kuimbaʼe ha kuña ojapóva upéva, iñimperféktoramo jepe hikuái. Por ehémplo, Potifar rembireko oiko hatã vaʼekue José rapykuéri oñeno hag̃ua hendive, péro José oikuaáma vaʼekue la ojapótava. La Biblia heʼi José ‘nopenái hague hese’ ha heʼi voi chupe: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?” (Gén. 39:​8-10). Jahechaháicha, José oikuaáma kuri mbaʼépa ojapóta oñepresenta mboyve chupe peteĩ tentasión. Upéicha rupi ifasilve kuri chupe orrechasa hag̃ua Potifar rembirekópe.

14. ¿Mbaʼéichapa ikatu jajepokuaa ñamboyke hag̃ua umi mbaʼe Jehovápe ombojeguarúva?

¹⁴ ¿Mbaʼéichapa nde ikatu avei ndefiél Jehovápe Joséicha? Upearã koʼág̃ama redesidi vaʼerã mbaʼépa rejapóta oñepresentáramo ndéve peteĩ tentasión. Ejepokuaa vaʼerã pyaʼe porã errechasa umi mbaʼe ombojeguarúva Jehovápe ha ani voi ni epensa umívare (Sal. 97:10; 119:165). Upéva nepytyvõta reikuaa hag̃ua mbaʼépa ere ha ejapo vaʼerã oñepresenta jave ndéve peteĩ tentasión, ha ni nderedudamoʼãi rerrechasa hag̃ua umíva.

15. ¿Mbaʼéichapa peteĩ persóna ikatu ohechauka oñehaʼãha oadora Jehovápe ipyʼaite guive? (Hebreos 11:6).

¹⁵ Katuete oiméne repilláma kóva haʼeha pe  añetegua ha oiméne reservise hína Jehovápe nde pyʼaite guive. Upéicharõ jepe, ikatu oime redudáiti hína reñemeʼẽ hag̃ua Jehovápe ha rejevautisa. Oimérõ upéicha, ejapomína la rréi David ojapo vaʼekue. Haʼe ojerure vaʼekue Jehovápe: “Ñandejára, ejesarekóna cherehe reikuaa hag̃ua mbaʼépa areko che korasõme. Emañána pe che pyʼapýpe oĩvare reikuaa hag̃ua mbaʼépa la chekevrantáva. Ehechána noiméipa aha hína tape vaíre, ha chegiána ikatu hag̃uáicha aiko opa árare” (Sal. 139:​23, 24). Jehová katuete ovendesíta umi “oñehaʼãvape ipyʼaite guive oadora chupe”, ha nde ningo rejapose hína upéva. Upévarente reñehaʼãmbaite ikatu hag̃uáicha reñemeʼẽ Jehovápe ha rejevautisa (elee Hebreos 11:6).

ESEGÍKENA EÑEMOAG̃UIVE JEHOVÁRE

16, 17. ¿Mbaʼérepa ikatu jaʼe Jehová omoag̃uiha avei ijehe umi oikuaávape chupe imitãite guive? (Juan 6:44).

¹⁶ La Biblia heʼi Jehová oipytyvõha la héntepe oiko hag̃ua chugui Jesús disípulo (elee Juan 6:44). ¡Ajépa iporãite upéva! Eñeimahinamíntena: Upéva heʼise Jehová ojesarekoha káda persónare, ha ohechávo álgo iporãva hese, omoag̃ui chupe ijehe. Jehovápe g̃uarã upe persóna haʼe álgien “espesiál” ha ‘hakateʼỹ hese’ (Deut. 7:​6, nóta). Aníkena nderesarái Jehová hakateʼỹha nderehe.

¹⁷ ¿Ndépa reservi hína Jehovápe nemitãite guive? Oimérõ upéicha, sapyʼánte ikatu hína repensa reimeha kongregasiónpe nde tuakuéra haʼe haguérente Testígo, ha ndahaʼéi Jehová nemoag̃ui haguére ijehe. Oiméramo repensa upéicha, nemanduʼákena la Biblia heʼiha: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8; 1 Crón. 28:9). Upéva ohechauka peteĩ mbaʼe iñimportánteva. Nde reñehaʼãvo reñemoag̃ui Jehováre, haʼe avei oñehaʼã oñemoag̃ui nderehe. Jehovápe g̃uarã ningo nde ndahaʼéi “Fuláno raʼýnte” térã “Fulána membýnte”. Haʼe ningo ndekuaa porã ndéve. Haʼe oipytyvõ káda únope oñemoag̃ui hag̃ua hese, ha umíva apytépe oĩ hína umi okakuaámava Jehová organisasiónpe. Jehová ohecha jave peteĩ persóna oñehaʼãha oñemoag̃ui hese haʼe avei ojapo upéva heʼiháicha Santiago 4:8 (ekompara 2 Tesalonicenses 2:13 heʼívare).

18. ¿Mbaʼépa ñaanalisáta pe artíkulo oúvape? (Salmo 40:8).

¹⁸ Reñemeʼẽramo Jehovápe ha rejevautisa, resegíta hína Jesús ehémplo. Haʼe ningo ijeheguiete oñepresenta vaʼekue Itúa renondépe ojapo hag̃ua ivolunta (elee Salmo 40:8; Heb. 10:7). Pe artíkulo oúvape, ñaanalisáta mbaʼépa ikatu nepytyvõ resegi hag̃ua ndefiél Jehovápe rejevautisa rire.