1, 2. a) ¿Mbaʼépepa ojojogua ñane situasión ha umi judío situasión? b) ¿Mbaʼe mbaʼépa ohasa umi judío oho jey vaʼekue Jerusalénpe? (Ehecha pe rrekuádro “ Oiko vaʼekue Ageo, Zacarías ha Esdras tiémpope”).

 ¿JAJEPYʼAPÝPA jepi ñane renonderãre? Ikatu oime japerde raʼe ñande traváho ha ñandepyʼapy mbaʼéichapa ñamantenéta ñane família. Térã ikatu jakyhyje ojehúramo g̃uarã ñane famíliape álgo oĩ rupi heta provléma polítiko ñande paíspe, jajepersegi térã oĩ rupi ojokoséva pe predikasión. ¿Ñambohováipa hína peteĩva koʼã situasión? Oimérõ upéicha, tuicha ñanemokyreʼỹta jahechávo mbaʼéichapa Jehová yma oipytyvõ vaʼekue umi israelítape, oñepresentárõ guare chupekuéra koʼãichagua provléma.

² Umi judío tekotevẽ kuri ojerovia mbarete Ñandejárare. ¿Mbaʼérepa? Pórke oikove aja pukukue haʼekuéra oĩ vaʼekue Babilóniape ha upépe oiko porã ha oreko heta komodida. Péro koʼág̃a katu oho vaʼerã hikuái peteĩ país la majoría ndoikuaaguasúivape. Hiʼarive og̃uahẽmírente hikuái oñepyrũma ijetuʼu chupekuéra omeʼẽ hag̃ua ifamíliape la oikotevẽva. Oĩ kuri heta provléma polítiko ha heta país oĩva ijerére oñemoĩ hesekuéra. Upévare algúnope ijetuʼúma kuri omotenonde hag̃ua pe traváho iñimportantevéva orekóva hikuái: Omopuʼã jey Jehová témplo. Upéicha rupi áño 520 rupi a.C. Jehová omondo proféta Ageo ha Zacaríaspe omokyreʼỹ jey hag̃ua pe puévlope (Ageo 1:1; Zac. 1:1). Jahecháta mbaʼéichapa tuicha oipytyvõ vaʼekue koʼã proféta pe puévlope. Péro 50 áñorupi upe rire umi judío oñedesanima jey vaʼekue, upévare Esdras oho Babilóniagui Jerusalénpe. Haʼe ivale vaʼekue okopia hag̃ua Ñandejára Ñeʼẽ. Esdras oho omokyreʼỹ hag̃ua umi judíope omotenonde hag̃ua pe adorasión verdadéra (Esd. 7:​1, 6).

3. ¿Mbaʼe mbaʼépa ñakontestáta jahávo? (Proverbios 22:19).

 ³ Ageo ha Zacarías profesía oipytyvõ vaʼekue Ñandejára puévlope osegi hag̃ua ojerovia Jehováre oĩrõ guare oñemoĩva hesekuéra. Péicha avei umi profesía ikatu ñanepytyvõ jasegi hag̃ua ñakonfia Jehováre tahaʼe haʼéva la oikóva (elee Proverbios 22:19). Koʼág̃a ñaanalisáta umi profesía omeʼẽ vaʼekue Ageo ha Zacarías, avei jastudiáta Esdras ehémplo. Péicha ñakontestáta koʼã mbohapy pregúnta: ¿Mbaʼéichapa oafekta vaʼekue umi judíope umi mbaʼe ijetuʼúva ohasáva hikuái? ¿Mbaʼérepa iñimportánte ñamotenonde meme Ñandejára volunta oĩramo jepe heta provléma? ¿Mbaʼéichapa ikatu jajeroviave Jehováre ivai jave la pórte?

4, 5. ¿Mbaʼérepa oiméne umi judío ou naikyreʼỹvéi omopuʼã jey hag̃ua pe témplo?

⁴ Umi judío og̃uahẽrõ guare Jerusalénpe oreko vaʼekue heta mbaʼe ojapo vaʼerã. Ensegídama voi haʼekuéra omopuʼã Jehová altár ha omoĩmba pe témplo simiénto (Esd. 3:​1-3, 10). Péro heta mbaʼe ijetuʼúva oñepresenta rupi chupekuéra ensegída ou naikyreʼỹvéi hikuái. Umi judío ndahaʼéi omopuʼã jeýnte vaʼerã kuri pe témplo, síno ojapo vaʼerã hetave mbaʼe. Por ehémplo, ojogapo vaʼerã, oñemitỹ vaʼerã kokuépe, ha omoĩ vaʼerã ifamíliape hemikotevẽ (Esd. 2:​68, 70). Avei iñenemigokuéra oñemoĩ umi judíore ha okalkula mbaʼéichapa ikatu ojoko chupekuéra anivéma hag̃ua omopuʼã pe témplo (Esd. 4:​1-5).

⁵ Umi judío oho jeýva Jerusalénpe ombohovái avei heta provléma ekonómiko ha polítiko. Upérõ guare iterritoriokuéra oĩ pe goviérno persa poguýpe. Rréi Ciro omano vaʼekue áño 530-pe a.C. ha hendaguépe ojupi rréi Cambises. Ko rréi ojagarrase kuri Egipto ha omondo ijehérsitope upearã. Ohokuévo Egíptope umi soldádo oiméne ohasa raʼe Israel territóriorupi ha provávlemente ojerure umi judíope tembiʼu, y ha peteĩ lugár opyta hag̃ua. Péva káusare oiméne ijetuʼuvéntema la situasión umi judíope g̃uarã. Rréi Cambises rire ojupi kuri Darío Primero, ha haʼe oñepyrũrõ guare ogoverna oĩ vaʼekue gueteri heta provléma. Upévare oiméne umi judío oñekevranta ndaikatúirõ g̃uarã omantene ifamília. Ohasa rupi hetaite situasión ijetuʼúva, oĩ vaʼekue judío opensáva nokonveniriha upe moméntope oñemopuʼã Jehová témplo (Ageo 1:2).

6. ¿Mbaʼe ótro provlémapa ombohovái raʼe umi judío ha mbaʼépa oasegura vaʼekue chupekuéra Zacarías? (Zacarías 4:​6, 7).

⁶ (Elee Zacarías 4:​6, 7). Umi judío ombohovái vaʼekue avei ótro provléma: Oĩ vaʼekue oñemoĩva hesekuéra. Áño 522-pe a.C. umi judío enemigokuéra okonvense vaʼekue pe goviérno pérsape oproivi hag̃ua chuguikuéra osegi omopuʼã pe témplo. Péro Zacarías oasegura pe puévlope Jehová oipurutaha ijespíritu pono ojoko chupekuéra mbaʼeve, ha péicha osegi hag̃ua hikuái pe traváho. ¿Mbaʼépa oiko upéi? Áño 520-pe a.C. rréi Darío opermiti jey umi judíope osegi omopuʼã pe témplo. Upearã omeʼẽ chupekuéra pláta, ha ojerure umi governadorkuérape oapoja hag̃ua umi judíope (Esd. 6:​1, 6-10).

7. Umi judío omotenonde rupi Jehová volunta, ¿mbaʼe vendisiónpa ohupyty hikuái?

 ⁷ Proféta Ageo ha Zacarías rupive, Jehová opromete ipuévlope oipytyvõtaha chupekuéra omotenondéramo pe témplo traváho (Ageo 1:​8, 13, 14; Zac. 1:​3, 16). Umi proféta omokyreʼỹ rupi chupekuéra, umi judío oñepyrũ jey ombaʼapo pe témplore áño 520-pe a.C. Ha ménos de 5 áñope otermina hikuái la traváho. Umi judío omotenonde meme jey kuri Jehová volunta iprovléma hetáramo jepe hikuái.  Upéicha rupi Jehová oipytyvõ chupekuéra oñemantene hag̃ua ha osegi hag̃ua oñemoag̃ui hese. Upévare umi judío vyʼápe oservi Jehovápe (Esd. 6:​14-16, 22).

8. ¿Mbaʼérepa Ageo 2:4 heʼíva ñanepytyvõ ñamotenonde meme hag̃ua Jehová volunta? (Ehecha pe nóta).

⁸ Pe jehasa asy guasu ningo hiʼag̃uimbaitéma. Upévare iñimportanteterei ñaneñeʼẽrendu Ñandejárape ha jasegi japredika (Mar. 13:10). Upéicharamo jepe ikatu hína ijetuʼu ñandéve ñamotenonde meme pe predikasión oimérõ jahasa hína peteĩ provléma ekonómiko, térã oĩ oñemoĩva ñanderehe japredika haguére. ¿Mbaʼépa ñanepytyvõta ñamotenonde hag̃ua Jehová volunta? Jasegi vaʼerã jajerovia “Jehová, umi ehérsito yvagapegua ruvicha” oĩha ñande ykére. b Ha haʼe siémpre ñanepytyvõta ñamotenondéramo ivolunta, upévare ndaipóri mbaʼérepa jakyhyje vaʼerã (elee Ageo 2:4).

9, 10. ¿Mbaʼéichapa peteĩ matrimónio ohechakuaa siertoha la heʼíva Mateo 6:33?

⁹ Jahechamína la ohasa vaʼekue Osvaldo ha Irina. c Ko matrimónio oservíva de prekursór ova ótra sónape oipytyvõ hag̃ua peteĩ kongregasión oikotevẽvape. Péro upéi operde hikuái itraváho oĩ rupi hetaiterei provléma ekonómiko ipaíspe. Ndorekóiramo jepe hikuái peteĩ traváho segúro un áñorupi, haʼekuéra siémpre ohecha mbaʼéichapa Jehová mborayhúpe okuida hesekuéra. Sapyʼánte umi ermáno avei oipytyvõ ko matrimóniope. ¿Mbaʼépa oipytyvõ chupekuéra ombohovái hag̃ua pe situasión ijetuʼúva? Osvaldo primerorã oñedesanima kuri péro upéi heʼi: “Orerembiapo heta kuri predikasiónpe, ha upéva orepytyvõ romotenonde hag̃ua pe iñimportantevéva”. Ko matrimónio oheka aja itravahorã nomboykéi ni michĩmi pe predikasión.

 ¹⁰ Peteĩ día og̃uahẽvo hógape predikasióngui, ko matrimónio oikuaa peteĩ iñamigoite oviaha hague amo 160 kilómetrorupi ogueraha hag̃ua chupekuéra 2 vólsa provísta. Osvaldo heʼi: “Upérõ rohecha jey mbaʼeichaitépa Jehová ha pe kongregasión ojepyʼapy orerehe. Roime segúro Jehová ndahesarairiha isiervokuéragui, haʼetéramo jepe ñandéve ndaiporivéimava esperánsa” (Mat. 6:33).

11. ¿Mbaʼépa jahupytýta ñamotenondéramo Jehová volunta?

¹¹ Jehová oipota ñamotenonde meme pe predikasión ikatu hag̃uáicha umi hénte ojesalva. Jahecháma haguéicha  párrafo 7-pe, Ageo omokyreʼỹ umi judíope omoñepyrũ jey hag̃ua pe traváho sagrádo orekóva. Jehová opromete haʼekuéra ojapóramo upéva ovendesitaha chupekuéra (Ageo 2:​18, 19). Ñande avei ikatu ñaime segúro Jehová ñanevendesitaha, ñañehaʼãmbaitéramo ñamotenonde pe traváho onkarga vaʼekue ñandéve.

12. ¿Mbaʼérepa Esdras ha umi ótro judío tekotevẽ vaʼekue ojerovia mbarete Ñandejárare?

¹² Áño 468-pe a.C., Esdras oviaha ótro grúpo de judíondi Babilóniagui Jerusalénpe. Ojapo hag̃ua ko viáhe Esdras ha umi judío ojerovia mbarete vaʼerã Ñandejárare. ¿Mbaʼérepa jaʼe upéva? Pórke pe tape ipeligróso vaʼekue, hiʼarive haʼekuéra oraha heta óro ha pláta oñemeʼẽ vaʼekue chupekuéra pe témplope g̃uarã. Upévare umi mondaha ikatu kuri opeska hesekuéra (Esd. 7:​12-16; 8:31). Péro ndahaʼéi voi upévante. Og̃uahẽvo Jerusalénpe ohechakuaa hikuái pe siuda ipeligrosonteha avei, saʼi la oikóva upépe ha umi murálla ha okẽ neʼĩra oñemyatyrõ. Jahechamína mbaʼéichapa Esdras ehémplo ohechauka mbaʼépa jajapo vaʼerã jajeroviave hag̃ua Jehováre.

13. ¿Mbaʼéichapa Esdras omombarete raʼe ijerovia Jehováre? (Ehecha pe nóta).

¹³ Esdras ohecha vaʼekue mbaʼéichapa Jehová oipytyvõ ipuévlope ijetuʼúrõ guare la situasión. Antevéma voi áño 484-pe a.C., Esdras oiméne oiko raʼe Babilóniape, rréi Asuero omandárõ guare oñehundipaite hag̃ua umi judío oikóvape pe goviérno persa poguýpe (Est. 3:​7, 13-15). Upérõ Esdras ojapeligra kuri ombohovái rupi upe situasión ijetuʼuetéva. Umi judío ‘káda distritopegua oajuna, hasẽ ha ojaheʼo’ ha katuete oñemboʼe rakaʼe hikuái Jehovápe ogiami hag̃ua chupekuéra (Est. 4:3). Péro upéi umi ojukase vaʼekue chupekuéra nosẽi la ijidéape ha ojere hesekuéra la oplanea vaʼekue ojapo. Ñañeimahinamíntena mbaʼéichapa oiméne oñeñandu raʼe Esdras ha umi ótro judío (Est. 9:​1, 2). Upe oiko vaʼekue oiméne oprepara rakaʼe Ésdraspe ombohovái hag̃ua umi situasión ijetuʼúva oñepresentátava chupe upéi. Ha oiméne opyta ojeroviavéntema Jehová oñangarekotaha ipuévlore. d

14. ¿Mbaʼépa oaprende peteĩ ermána ohechávo mbaʼéichapa Jehová okuida hese?

¹⁴ Jahechávo mbaʼéichapa Jehová oñangareko ñanderehe ijetuʼu jave la situasión, jajeroviavéntema hese. Jahechamína Anastasia ehémplo, haʼe oiko Europa del Éstepe. Haʼe orrenunsia vaʼekue itravahohápe umi ikompañerokuéra oovligasérõ guare chupe oike hag̃ua polítikape. Haʼe heʼi: “Upérõ primera ves la apyta vaʼekue plataʼỹre”. Upéi heʼive: “Añemboʼe Jehovápe ha ahecha mbaʼéichapa haʼe mborayhúpe oñangareko cherehe. Upévare algúna ves apyta jeýramo travahoʼỹre ni mbaʼevéicharõ ndakyhyjemoʼãi. Che Ru yvagapegua okuida cherehe koʼág̃ama voi ha aime segúra amo gotyove osegitaha okuida cherehe”.

15. ¿Mbaʼépa oipytyvõ vaʼekue Ésdraspe osegi hag̃ua ojerovia Jehováre? (Esdras 7:​27, 28).

 ¹⁵ Esdras ohechakuaa vaʼekue Jehová oipytyvõ hague chupe. Esdras ojepyʼamongetávo mbaʼéichapa Jehová oñangarekóma vaʼekue hese, oipytyvõ chupe ojerovia hag̃ua Jehová osegitaha oñangareko hese. Haʼe heʼi vaʼekue voi: “Che Jára Jehová chepytyvõ” (elee Esdras 7:​27, 28). Esdras oipuru vaʼekue 6 vése peichagua fráse pe lívro bíblico oskrivi vaʼekuépe (Esd. 7:​6, 9; 8:​18, 22, 31).

16. ¿Mbaʼéicha javépa ikatu jahecha porãvéntema Jehová ñanepytyvõha? (Ehecha pe taʼanga).

¹⁶ Jehová ikatu ñanepytyvõ jahasa jave peteĩ situasión ijetuʼúva. Por ehémplo ikatu tekotevẽ jajerure permíso ñane patrónpe jaha hag̃ua asambleahápe, térã ñakambiaʼimi hag̃ua ñande orário de traváho pono jafalta rreunionhápe. Jajapóramo koʼã mbaʼe ñameʼẽ oportunida Jehovápe ñanepytyvõ hag̃ua, ha ikatu hína oiko umi mbaʼe nañahaʼarõiva ha tuicha ñanesorprendéva. Ha jahechávo la Jehová ojapóva ñanderehehápe jajeroviavéta hese.

17. ¿Mbaʼéichapa Esdras ohechauka vaʼekue iñumildeha ohasárõ guare umi situasión ijetuʼúva? (Ehecha pe taʼanga oĩva ko rrevísta apére).

¹⁷ Esdras iñumílde ha ojerure ajúda Jehovápe. Sapyʼánte Esdras ojepyʼapyeterei vaʼekue irresponsavilidakuérare, péicha jave haʼe iñumílde ha oñemboʼe Jehovápe (Esd. 8:​21-23; 9:​3-5). Esdras ojerovia rupi Jehováre, umi ótro israelita oapoja chupe ha oñehaʼã ojerovia haʼe ojapoháicha (Esd. 10:​1-4). Ñande avei ikatu ñañemboʼe ñande pyʼaite guive Jehovápe jajepyʼapyeterei jave ñane remikotevẽre, térã jakyhyjérõ hína la ikatúvare oiko ñane famíliare.

18. ¿Mbaʼépa ikatu ñanepytyvõ jajeroviave hag̃ua Jehováre?

¹⁸ Ñande kásope avei tekotevẽ ñaneumílde jajerure hag̃ua ajúda Jehovápe, ha jaasepta vaʼerã avei ñane ermanokuéra ñanepytyvõse jave. Koʼã mbaʼe omombaretevéta ñande jerovia Jehováre. Jahechamína la ohasa vaʼekue Erika. Haʼe ningo mbohapy imemby ha ojoʼaripa oiko kuri hese heta mbaʼe ivaietereíva. Péro Erika siémpre okonfia Jehováre, operdéramo jepe imemby ha omanóramo jepe chugui iména ohayhuetéva. Haʼe heʼi: “Oiko mboyve nderehe álgo, ndaikatúi reikuaa mbaʼeichaitépa Jehová nepytyvõta hína. Haʼe ikatu ñanepytyvõ ñahaʼarõʼỹhaichaite. Che ahechakuaáma okontestaha che ñemboʼe che amigokuéra heʼíva ha ojapóva rupive. Péro apilláma amombeʼu vaʼerãha che amigokuérape la ahasáva ikatu hag̃uáicha ifasilve chupekuéra chepytyvõ”.

19, 20. ¿Mbaʼépa ñaaprende umi judío ndaikatúi vaʼekuégui oho jey Jerusalénpe?

¹⁹ Ñanemanduʼa avei oĩ hague unos kuánto judío ndaikatúi vaʼekue oho Jerusalénpe. ¿Mbaʼépa ñaaprende chuguikuéra? Provávlemente oĩ vaʼekue ndaikatuvéiva oviaha ijeda, hasykatu, térã oreko rupi algúna rresponsavilida familiár ndaikatúiva oheja. Upéicharamo jepe haʼekuéra ovyʼa, pórke oapoja umi ohótavape Jerusalénpe. Upearã omeʼẽ chupekuéra heta mbaʼerepy pe témplope g̃uarã (Esd. 1:​5, 6). Amalisia 19 áñorupi pe primer grúpo de judío og̃uahẽ rire Jerusalénpe, umi judío opyta vaʼekue Babilóniape osegi omondo ikontrivusión Jerusalénpe (Zac. 6:10).

²⁰ Oimérõ ndaikatuvéima jajapo heta mbaʼe Jehová servísiope, ñaĩ vaʼerã segúro Jehová ovyʼaitereiha ñañehaʼãmbaite haguére jajapo la ikatumíva. ¿Mbaʼérepa jaʼekuaa upéva? Zacarías tiémpope Jehová ojerure iprofétape ojapo hag̃ua peteĩ koróna, ha upearã oipuru vaʼerã pe pláta ha óro omondo vaʼekue umi judío oĩva Babilóniape (Zac. 6:11). Upe “koróna ojajaipáva” omomanduʼáta kuri umi judíope umi kontrivusión oñemeʼẽ vaʼekuére chupekuéra (Zac. 6:​14, nóta). Aníkena núnka jaduda, Jehová ni mbaʼevéicharõ ndahesaraimoʼãi ñañehaʼãmbaite hague jaservi chupe ñande pyʼaite guive ijetuʼúrõ guare la situasión (Heb. 6:10).

21. ¿Mbaʼépa ñanepytyvõta jajerovia hag̃ua Jehováre toiko la oikóva amo gotyove?

²¹ Katuete ningo jahasáta gueteri heta situasión ijetuʼúva, ha ikatu voi ivaive hína ohóvo (2 Tim. 3:​1, 13). Péro natekotevẽi ñañekevranta rasapa. Ñanemanduʼa Jehová heʼi hague ipuévlope Ageo tiémpope: ‘Che aime penendive. Aníkena pekyhyje’ (Ageo 2:​4, 5). Ñande avei ikatu ñaĩ segúro Jehová oĩtaha ñanendive ñañehaʼãmbaitéma guive jajapo ivolunta. Jasegíkena jareko enkuénta umi mbaʼe ñaaprende vaʼekue Ageo ha Zacarías profesíagui, ha avei Esdras ehémplogui. Péicha jasegíta jajerovia mbarete Jehováre toiko la oikóva ñane renonderãme.