1, 2. ¿Mbaʼérepa sapyʼánte ñapensa Jehová nokontestaiha ñandéve ñane ñemboʼe?

 “EVYʼA nde pyʼaite guive rejapóvo Jehová heʼíva, ha haʼe katuete omeʼẽta ndéve umi mbaʼe ne korasõ oipotáva” (Sal. 37:4). ¡Ajépa iporãite ko promésa! ¿Péro heʼisépa upéva Jehová omeʼẽtaha ñandéve entéro mbaʼe jajeruréva ensegídama voi? ¿Mbaʼérepa iñimportánte ñakontesta ko pregúnta? Ñañeimahinamína koʼã situasión: Peteĩ ermána soltéra oñemboʼe ha ojerure Jehovápe oho hag̃ua Eskuéla de Evanhelisadórpe. Péro ohasa heta áño ha noñeinvitái chupe. Peteĩ ermáno imitãva ojerure Jehovápe okuera hag̃ua peteĩ mbaʼasy igrávevagui ikatu hag̃uáicha ojapo hetave mbaʼe kongregasiónpe. Péro ohasa la tiémpo ha haʼe nomehorái. Peteĩ sy ha túa oñemboʼe ha ojerure Jehovápe ifamília osegi hag̃ua pe kongregasiónpe. Péro upéi upe ifamília odesidi oheja Jehovápe.

² Ikatu oime nde avei rejeruréma raʼe álgo Jehovápe, péro koʼág̃a peve nokontestái ndéve. Upéicha rupi ikatu repensa Jehová okontestaha ótropente la iñemboʼe ha ndéve katu nahániri. Térã oiméne ekalkula ejapo hague álgo ivaíva. Peteĩ ermána hérava Jessica b oñeñandu vaʼekue péicha. Haʼe ha iména oñemboʼe vaʼekue Jehovápe ha omombeʼu chupe ohosetereiha oservi Betélpe. Pe ermána heʼi: “Aĩ vaʼekue segúra ensegída roñeinvitataha roho hag̃ua Betélpe”. Péro ohasa heta áño ha noñeinvitái chupekuéra. Jessica heʼi: “Añeñandu vai ha ndaikuaái vaʼekue mbaʼépa ajapóta. Añepyrũ apensa mbaʼépepa  afalláne raʼe Jehovándi, pórke hetaite ningo añemboʼe roho hag̃ua roservi Betélpe. Ha aikuaase kuri mbaʼérepa ndoikói mbaʼeve”.

3. ¿Mbaʼépa ñaanalisáta ko artíkulope?

³ Sapyʼánte jaikuaase ohendupa Jehová la ñane ñemboʼe. Yma oĩ vaʼekue unos kuánto Ñandejára siérvo ijerovia mbaretéva oñeporandúva upéva (Job 30:20; Sal. 22:2; Hab. 1:2). ¿Mbaʼépa ñanepytyvõta ani hag̃ua jaduda Jehová ohenduha ñane ñemboʼe? (Sal. 65:2). Jaikuaa hag̃ua upéva ñaanalisa raẽta mbohapy mbaʼe: 1) ¿Mbaʼépa Jehová ojapóta ñañemboʼe jave chupe? 2) ¿Mbaʼépa Jehová ohaʼarõ ñandehegui? 3) ¿Mbaʼérepa sapyʼánte tekotevẽ ñakambiaʼimi la jajeruréva?

4. Ohechaukaháicha Jeremías 29:​12, ¿mbaʼépa opromete ñandéve Jehová?

⁴ Jehová opromete ohendutaha ñane ñemboʼe (elee Jeremías 29:12). Ñande ningo jaservi Ñandejárape fiélmente, upévare haʼe ñanderayhu ha ohendu ñane ñemboʼe (Sal. 10:17; 37:28). Péro upéva ndeʼiséi haʼe omeʼẽtaha ñandéve jajeruréva guive chupe. Oĩ ningo heta kósa Jehová omeʼẽtava ñandéve pe múndo pyahúpe ae, upévare ñahaʼarõmante vaʼerã upe tiémpo peve.

5. ¿Mbaʼépa Jehová oreko enkuénta okontesta hag̃ua ñane ñemboʼe? Emyesakã.

⁵ Jehová oreko enkuénta ivolunta ohendu jave ñane ñemboʼe (Is. 55:​8, 9). Jehová ningo oipota ko yvy ape ári oiko umi oaseptáva vyʼápe chupe igovernánteramo ha iñeʼẽrendúva chupe. Péro Satanás heʼi yvyporakuéra ovyʼavetaha oñegovernáramo ijupe (Gén. 3:​1-5). Ojehechauka hag̃ua Satanás ijapuha, Jehová oheja yvyporakuéra oñegoverna ijupe. Péro heta umi provléma ñambohováiva koʼág̃arupi oĩ la umáno ogoverna rupi (Ecl. 8:9). Upéicharõ Jehová oipeʼaitérõ umi provléma koʼag̃aite voi, oĩta opensáva yvyporakuéra osolusiona hague entéro mbaʼe. Ha amo ipahápe heʼíta umi umáno osẽ porãha oñegovernárõ ijupe.

6. ¿Mbaʼérepa ñaĩ vaʼerã segúro Jehová siémpre oporohayhu ha ihustoha?

⁶ Oĩramo jepe heta ojeruréva la mísma kósa, Jehová ikatu okontesta diferénte hendáicha. Por ehémplo, rréi Ezequías ou vaʼekue hasyete ha ojerure asy Jehovápe oipytyvõmínte hag̃ua chupe. Upéicha rupi Jehová omonguera ko rréipe (2 Rey. 20:​1-6). Apóstol Pablo posívlemente hasy vaʼekue avei. Upévare ojerure vaʼekue Jehovápe oipeʼamínte hag̃ua chugui ‘peteĩ ñuatĩ oikutu’ rasýva chupe. Péro upe kásope Jehová nosolusionái la provléma (2 Cor. 12:​7-9). Jahechamína avei la oiko vaʼekue apóstol Santiago ha Pédrore. Rréi Herodes ojukase vaʼekue mokõivévape. Upévare pe kongregasión oñemboʼe Pédrore, ha katuete oñemboʼéne raʼe avei Santiágore. Upéicharõ jepe Santiágope ojejuka ha Pédrope katu osalva peteĩ ánhel (Hech. 12:​1-11). ¿Mbaʼéreiko Jehová oprotehe Pédrope ha ndosalvái Santiágope? La Biblia ndeʼíri mbaʼeve upévare. c Péro ikatu ñaĩ segúro Jehová ‘arakaʼeve naiñinhustoiha’ (Deut. 32:4). Ha jaikuaa Jehová ohayhueterei hague mokõivévape, Pedro ha Santiágope (Apoc. 21:14). Sapyʼánte ningo Jehová ikatu nokontestái ñandéve ñahaʼarõhaichaite. Péro ñande ndajadudái entéro mbaʼe Jehová ojapóva ohechaukaha oporohayhu ha ihustoha. Upévare ndajaikói ñakuestiona mbaʼéichapa okontesta ñane ñemboʼe (Job 33:13).

7. ¿Mbaʼépa naiporãi jajapo ha mbaʼérepa?

⁷ Naiporãmoʼãi ningo jaikóramo ñakompara ñane situasión la ótro ohasávare. ¿Mbaʼérepa? Ikatu oime jajerure raʼe Jehovápe peteĩ mbaʼe, péro haʼe nomeʼẽi ñandéve upéva. Péro  upéi ñahendu ótro ojerure hague la mísma kósa oñemboʼérõ guare, ha haʼetévaicha Jehová si okontestáva upe persónape. Por ehémplo, peteĩ ermána hérava Ana ohasa vaʼekue upéva. Iména oreko kuri kánser, upévare haʼe oñemboʼe hesehápe. Upe tiémpope avei mokõi ermána ijedávape ojagarra kánser. Upévare Ana oñemboʼe ipyʼaite guive iména ha umi mokõi ermánare. Kon el tiémpo umi mokõi ermána ojerrekupera, péro Ana ména katu omano. Upérõ guare Ana oikuaase vaʼekue Jehovápa la omonguera vaʼekue umi ermánape, ha oimérõ upéicha mbaʼére nohendúi chupe oñemboʼérõ guare iména rehehápe. Ñande ningo ndajaikuaái mbaʼéicha rupípa umi ermána ojerrekupera, péro oĩ peteĩ mbaʼe jaikuaáva: Koʼẽrõitéma Jehová osolusionáta entéro umi provléma ha omoingove jeýta umi iñamígo omano vaʼekuépe (Job 14:15).

8. a) Ohechaukaháicha Isaías 43:​2, ¿mbaʼéichapa Jehová ñanepytyvõ? b) ¿Mbaʼéichapa pe ñemboʼe ñanepytyvõ jahasa asy jave? (Ehecha pe vidéo Pe ñemboʼe ñanepytyvõ ñaaguanta hag̃ua).

⁸ Jehová siémpre ñanepytyvõta. Haʼe ningo ñande Ru ñanderayhuetéva, upévare ndoipotái jasufri (Is. 63:9). Upéicharõ jepe, sapyʼánte jahasa umi situasión ijetuʼúva, haʼete voi jahasáva hína peteĩ rríore térã tata mbytérupi (elee Isaías 43:2). Jehová ndoipeʼapái ñandehegui koʼã provléma, péro si opromete ñandéve ñanepytyvõtaha jahasa jave umichagua situasión. Tahaʼe haʼéva la jahasáva haʼe siémpre ñanepytyvõta jaservi hag̃ua chupe. Avei Jehová omeʼẽ ñandéve ijespíritu sánto ipoderosoitéva ikatu hag̃uáicha ñaaguanta (Luc. 11:13; Filip. 4:13). Entéro koʼã mbaʼére ikatu ñaĩ segúro siémpre jarekotaha la ñaikotevẽva ñaaguanta ha jasegi hag̃ua ñandefiél Jehovápe. d

9. Ohechaukaháicha Santiago 1:​6, 7, ¿mbaʼérepa ñakonfia vaʼerã Jehová ñanepytyvõtaha?

⁹ Jehová oipota jajerovia hese (Heb. 11:6). Sapyʼánte ijetuʼueterei rupi la jahasáva ñapensáma voi ndajagueropuʼakamoʼãiha. Ikatu voi ñapensa Jehová ndaikatumoʼãiha ñanepytyvõ. Péro la Biblia opromete ñandéve Ñandejára ikatuha ‘ñanemombarete jahasa hag̃ua umi murálla ári jepe’ (Sal. 18:29). Upévare jaiko rangue jaduda, ñañemboʼékena ñande pyʼaite guive ha jajerovia Jehová okontestataha ñane ñemboʼe (elee Santiago 1:​6, 7).

10. ¿Mbaʼépa jajapo vaʼerã ñañemboʼe rire? Emoĩ peteĩ ehémplo.

¹⁰ Ñañemboʼe rire Jehová oipota jajapo ñande párte. Por ehémplo peteĩ ermáno ikatu oime okonsegise permíso itravahohápe oho hag̃ua asambleahápe, ha ojerure Jehovápe oipytyvõmi hag̃ua chupe. ¿Mbaʼéichapa Jehová okontestáta chupe? Haʼe ikatu oipytyvõ pe ermánope ipyʼaguasu hag̃ua ha péicha oñeʼẽ hag̃ua ipatróndi. Péro pe ermáno ojapo vaʼerã ipárte ha oho vaʼerã ojerure la permíso. Sapyʼánte tekotevẽta voi oñeʼẽ heta vése ipatróndi, ojeofrese ombaʼapo hag̃ua ótro día térã heʼi anínte hag̃ua ojepaga chupe upe asambléa díape ikatu hag̃uáicha ilívre.

11. ¿Mbaʼérepa kontinuadoite ñañemboʼe vaʼerã umi mbaʼe ñandepyʼapývare?

¹¹ Jehová oipota ñañemboʼe chupe kontinuadoite umi mbaʼe ñandepyʼapývare (1 Tes. 5:17). Jesús heʼi vaʼekuére jahechakuaa oĩha umi mbaʼe jajeruréva noñemeʼẽmoʼãiva ñandéve ensegidaite voi (Luc. 11:9). ¡Upévare aníkena ñañentrega! Jasegi vaʼerã ñañemboʼe ñande pyʼaite guive ha kontinuadoite (Luc. 18:​1-7). Ñande jasegíramo ñañemboʼe peteĩ mbaʼére, jahechauka hína Jehovápe iñimportanteha ñandéve g̃uarã la jajeruréva. Jahechauka avei chupe jajeroviaha hese ikatuha ñanepytyvõ.

12. a) ¿Mbaʼépa ñañeporandu vaʼerã ha mbaʼérepa? b) ¿Mbaʼéichapa ikatu jahechauka jarrespetaha Jehovápe ñañemboʼe jave? (Ehecha pe rrekuádro “ ¿Ahechaukápa arrespetaha Jehovápe umi mbaʼe ajeruréva rupive?”).

¹² Oiméramo noñekontestái ñandéve la jajeruréva ñane ñemboʼépe ikatu ñañeporandu mbohapy mbaʼe. Primero: “¿Oĩ porã piko hína la ajeruréva che ñemboʼépe?”. Ñande ningo ñaimoʼã jepi jaikuaaha mbaʼépa la iporãvéva ñandéve g̃uarã. Péro ikatu hína umi mbaʼe jajeruréva ñane ñemboʼépe ndahaʼéi la okonvenivéva ñandéve. Ñamoĩ chupe ñañemboʼeha peteĩ provlémare ha ñapensáma la solusiónre, péro añetehápe ikatu hína oñesolusiona porãve ótra fórma. Ha ikatu voi oĩ umi mbaʼe jajeruréva noiporãiva Ñandejára voluntándi (1 Juan 5:14). Upévare ñanemanduʼami jeýna umi tuakuéra ehémplo ñamensionáma vaʼekuére. Haʼekuéra ojerure Jehovápe ifamília osegi hag̃ua oservi chupe. Iporãitereívaicha la ojeruréva hikuái, péro Jehová ningo ndoovligamoʼãi avavépe oservi hag̃ua chupe. Haʼe oipota enterove, ha ñane familiakuéra avei odesidi ijeheguiete oservitaha chupe (Deut. 10:​12, 13; 30:​19, 20). Upéicharõ, ¿mbaʼépa umi tuakuéra ikatu ojerure Jehovápe? Ojerurekuaa oipytyvõmi hag̃ua chupekuéra og̃uahẽ hag̃ua ifamília korasõme, ha péicha ohayhu hag̃ua Jehovápe ha oiko iñamígoramo (Prov. 22:6; Efes. 6:4).

13. Heʼiháicha Hebreos 4:​16, ¿mbaʼe moméntopepa Jehová ñanepytyvõta? Emyesakã.

¹³ Pe segunda pregúnta ñañeporandu vaʼerã: “¿Koʼág̃apa haʼe Jehová tiémpo omeʼẽ hag̃ua chéve la ajeruréva chupe?”. Ikatu oime ensegídama voi jaipota oñekontesta ñandéve la ñane ñemboʼe, péro Jehová oikuaa hína mbaʼe moméntopepa opyta porãve ñanepytyvõ hag̃ua (elee Hebreos 4:16). Jehová nokontestái  jave ensegída ñane ñemboʼe, ikatu ñapensa haʼe nomeʼẽseiha ñandéve la jajeruréva chupe. Péro la irrespuésta ikatu hína: “Koʼag̃aitérõ ningo ndaikatumoʼãi gueteri”. Por ehémplo, ñapensami jeýna pe ermáno imitãvare, haʼe ojerure kuri Jehovápe omonguerami hag̃ua chupe imbaʼasýgui. Péro Jehová omonguerárire chupe peteĩ milágro rupive, Satanás ikatu heʼi pe ermáno osegiha oservi Jehovápe omonguera rupínte chupe (Job 1:​9-11; 2:4). Avei Jehová omoĩma pe tiémpo oipeʼatahápe opaichagua mbaʼasy (Is. 33:24; Apoc. 21:​3, 4). Ha og̃uahẽ mboyve upe tiémpo ñande ndaikatúi ñahaʼarõ Jehová ojapo peteĩ milágro ñanemonguera hag̃ua. Upévare pe ermáno la ikatúva ojerure Jehovápe tomombaretemi ha tombopyʼaguapy chupe ikatu hag̃uáicha ogueropuʼaka imbaʼasy ha osegi oservi chupe fiélmente (Sal. 29:11).

14. ¿Mbaʼépa ñaaprende Jessica ohasa vaʼekuégui?

¹⁴ Ñanemanduʼami jeýna Jessica ohasa vaʼekuére. Haʼe ojerure kuri Jehovápe oservi hag̃ua Betélpe. Ohasa rire 5 áño haʼe ohechakuaa Jehová okontesta hague chupe iñemboʼe, péro ndahaʼéi la haʼe ohaʼarõ haguéicha. Haʼe heʼi: “Jehová oipuru upe tiémpo chemboʼe hag̃ua heta mbaʼe, ha chepytyvõ aservi porãve hag̃ua chupe. Che aikotevẽ kuri ajeroviave hese, ha aaprende vaʼerã kuri astudia porãve la Biblia. Tekotevẽ avei kuri aaprende avyʼa tahaʼe haʼéva la che situasión”. Upéi Jessica ménape oñeinvita oservi hag̃ua de superintendénte de sirkuíto. Imanduʼávo la oiko vaʼekuére, Jessica heʼi: “Jehová okontesta la che ñemboʼe ndahaʼéiramo jepe la ahaʼarõ haguéicha. Tiémpo rire ae ahechakuaa mbaʼeichaitépa iporã la irrespuésta. Che korasõite guive aagradese chupe areko haguére la oportunida ahecha hag̃ua mbaʼeichaitépa haʼe cherayhu ha imbaʼeporã chendive”.

15. ¿Mbaʼérepa ñañemboʼe jave natekotevẽi sapyʼánte jaʼe espesífikamente mbaʼépa la jaipotáva? (Ehecha pe taʼanga).

 ¹⁵ Tercero, iporãta ñañeporandu: “¿Ajerure vaʼerãpa ótra kósa che ñemboʼépe?”. Iporã ningo añete ñañemboʼe jave jajerure espesífikamente mbaʼépa la jaipotáva. Péro sapyʼánte iporãvéta ndajajapóiramo upeichaite voi ikatu hag̃uáicha jahechakuaa mbaʼépa Jehová oipota jajapo. Por ehémplo ñanemanduʼa pe ermána soltéra oñemboʼévare oikóvo oho hag̃ua pe Eskuéla de Evanhelisadórpe. Haʼe ohose pe eskuélape ikatu hag̃uáicha oservi porãve peteĩ lugár oñekotevẽvehápe. Upévare osegi aja oñemboʼe oñeinvita hag̃ua chupe pe eskuélape, haʼe ikatu ojerure ohechakuaa hag̃ua mbaʼe ótra kósapa ikatu ojapo oservi porãve hag̃ua Jehovápe (Hech. 16:​9, 10). Oñemboʼe rire upévare haʼe ikatu oporandu pe superintendénte de sirkuítope ndaipóripa ag̃ui upégui peteĩ kongregasión ifaltahápe hetave prekursór, térã ikatu oskrivi peteĩ sukursálpe oporandu hag̃ua moõpa ifálta hína hetave opredika vaʼerã. e

16. ¿Mbaʼe rehepa ikatu ñaĩ segúro ñañemboʼe jave?

¹⁶ Jahecháma haguéicha ikatu ñaime segúro Jehová okontestataha ñane ñemboʼe ha ohechaukataha ñanderayhu ha ihustoha (Sal. 4:3; Is. 30:18). Sapyʼánte ikatu noñekontestái ñandéve la ñahaʼarõ haguéicha. Péro Jehová núnka noñembotavymoʼãi ñandehegui ñañemboʼe jave chupe. Haʼe siémpre ñanerendúta, pórke ñanderayhueterei ha arakaʼeve nañanderejareimoʼãi (Sal. 9:10). Upévare jasegíkena ‘jajerovia hese tódo el tiémpo’, ha ñamombeʼupaite chupe umi mbaʼe oĩva ñande pyʼapýpe (Sal. 62:8).