PE MÚSIKA iñimportánte vaʼekue umi israelita kultúrape. La Biblia heta vése oñeʼẽ umi hénte opurahéivare térã ombopúvare algún instruménto. Ñandejára Ñeʼẽme oĩ voi heta purahéi, por ehémplo Salmo, Cantar de los Cantares ha Lamentaciónespe. Oĩ peteĩ lívro oñeʼẽva la Bíbliare ha heʼi pe músika oĩ hague entéro mbaʼe umi israelita ojapóvape (Music in Biblical Life).

Pe músika ha umi israelita. Haʼekuéra opurahéi térã ombopu vaʼekue algún instruménto ohechauka hag̃ua la oñandúva (Is. 30:29). Umi kuña ombopúmi vaʼerã panderéta, opurahéi kyreʼỹme ha ojeroky umi fiéstape. Haʼekuéra ojapómi péicha ojupi jave peteĩ rréi pyahu, umi soldádo ogana jave peteĩ gérra ha umi aretépe (Juec. 11:34; 1 Sam. 18:​6, 7; 1 Rey. 1:​39, 40). Avei opurahéi hikuái oñembyasy jave oĩrõ guare omanóva (2 Crón. 35:25). Peteĩ ensiklopédia heʼi: “Ndajadudái umi israelítape ogustaiterei hague la músika” (McClintock and Strongʼs Cyclopedia).

Pe músika ha umi rréi. Umi rréi israelítape ogusta vaʼekue la músika. Rréi Saúl ohenoika vaʼekue Davídpe ipalásiope ombopu hag̃ua chupe pe árpa (1 Sam. 16:​18, 23). Oiko rire Davídgui rréi haʼe ojapo vaʼekue instruménto musikál, oskrivi purahéi neporãva ha oorganisa pe orkésta ombopúva Jehová témplope (2 Crón. 7:6; Amós 6:5). Avei rréi Salomón oreko vaʼekue ipalásiope músiko opurahéiva, umíva apytépe kuña ha kuimbaʼe (Ecl. 2:8).

Pe músika ojeadora hag̃ua Ñandejárape. Iñimportanteveha, umi israelita opurahéi térã ombopu instruménto oadora hag̃ua Jehovápe. Oĩ vaʼekue 4.000 músiko ombopúva instruménto pe témplope Jerusalénpe (1 Crón. 23:5). Haʼekuéra ombopu vaʼekue platíllo, árpa, hetave instruménto de kuérda ha trompéta (2 Crón. 5:12). Péro ndahaʼéi vaʼekue umi músiko ivalévante la omombaʼeguasúva Jehovápe opurahéivo. Heta israelita opurahéi vaʼekue oho aja Jerusalénpe umi fiéstape g̃uarã. Umi purahéipe oñehenói vaʼekue “músika ojepurahéiva ojearrivávo Jerusalénpe” (Sal. 120–134). Umi óvra judía heʼi avei umi israelita opurahéimi hague unos kuánto Salmo pe Páskua aja. a

Koʼág̃a peve Jehová siervokuérape g̃uarã la músika iñimportánte (Sant. 5:13). Ñande japurahéi Jehovápe ñamombaʼeguasu hag̃ua chupe (Efes. 5:19). Ñañandu ñaimeha unído ñane ermanokuérandi japurahéi jave oñondivepa (Col. 3:16). Avei umi músika oñeʼẽva Jehováre ñanemombarete jahasa jave umi situasión ijetuʼúva (Hech. 16:25). Ikatu jaʼe umi purahéi rupive jahechaukaha Jehovápe jajeroviaha hese ha jahayhuha chupe.