¿Mbaʼépa nde repensa? ¿Ikatúnepa ñande ñasolusionambaite umi provléma oĩva ko múndope? Peteĩ pohã ñanemonguera hag̃ua, ndahaʼéi okalmánte vaʼerã umi síntoma síno oataka vaʼerã pe mbaʼasy voi.

Ñapensamíntena ko situasiónre: Peteĩ karai hérava Tom ou kuri hasyete ha upe riremínte omanóma. Pe doktór oñatendéva pe ospitál haʼe oho haguépe heʼi: “Tom oñepyrũrõ guare hasy, avave noinvestigái mbaʼépa la ombohasýva chupe”. Posívlemente umi oñatende vaʼekue hese ñepyrũrã, noinvestigái mbaʼépa la ombohasýva chupe síno omeʼẽnte chupe kalmánte omoñeñandu porãve hag̃ua chupe.

¿Noiméipa upéva hína avei la ojejapóva oñesolusiona hag̃ua umi provléma oĩva ko múndope? Por ehémplo, oĩ rupi hetaiterei ojapóva ivaíva, umi goviérno omoĩ hetave léi, omoĩka kámara de segurida ha omoĩ hetave polisía. Péro koʼã mbaʼe ideprovéchoramo jepe, ndoatakái hína pe provléma teete. ¿Mbaʼérepa jaʼe upéva? Pórke umi hénte opensáva, ogueroviáva ha oñandúva, la omomýiva chupekuéra iñaña hag̃ua.

Daniel oiko peteĩ país oĩvape Sudaméricape ha upépe ivaieterei la pórte. Haʼe heʼi: “Anteve ningo trankiloite roiko vaʼekue. Ndorokyhyjéi vaʼekue oĩrõ g̃uarã oreasaltáva. Péro koʼág̃arupi ndaikatuvéi roiko trankílo koʼápe. Ivaieterei rupi la pórte la hénte ohechaukáma itaryryiha ha ndorrespetaiha hapicha rekove ni ikosakuéra”.

Peteĩ kuimbaʼe osẽ vaʼekue hetãgui umi hénte opuʼãmba rupi ojuehe, oñepyrũ vaʼekue ostudia la Biblia. Haʼe heʼi: “Pe siuda che aiko haguépe, umi tuakuéra, umi iglésia ha umi polítiko omboligámi umi mitãrusúpe oho hag̃ua gerrahápe ikatu hag̃uáicha oñemombaʼe chupekuéra. Péro umi ikontrário peichaite avei ojapo. Upépe apilla ndovaleiha la péna ñakonfia umi autoridáre”.

Emañamína mbaʼépa heʼi la Biblia:

• “Umi hénte, [...] imitãite guive ojapose ivaívante voi” (Génesis 8:21).

• “Yvypóra korasõ itraisionerove oimeraẽ mbaʼégui ha ojedesespera rupi ikatu ojapo oimeraẽ mbaʼe. ¿Máva piko oikuaa porãne chupe?” (Jeremías 17:9).

• “Umi hénte korasõgui osẽ umi deséo vai: jejuka, [...], tekovai, ñemonda, japu” (Mateo 15:19).

Ñandéve ningo ñandestira voi umi mbaʼe vai ha upévare japerhudika jepi ñande rapichápe. Péro ndahaʼéi voi upévante, síno amás día la hénte ojapo hetave mbaʼe vai hapicháre ha upévare oĩ hetaite provléma, jahecha haguéicha pe artíkulo ohasa vaʼekuépe (2 Timoteo 3:1-5). Hiʼarive ko ñane tiémpope hetaitereive informasión oĩ yma guarégui ha ndahasyiete avei ñañekomunika hag̃ua umi ótrondi. ¿Mbaʼéreiko upéicharõ la ndaikatúi jaiko trankílo? ¿Ñande piko jareko jepe la kapasida ñamehora hag̃ua la situasión? ¿Térãpa núnka voínte ndaikatumoʼãi jaiko trankílo?

Oikóramo jepe peteĩ milágro ha umi hénte okambia ha ndojapovéima ivaíva, ndaikatumoʼãi voínte jaiko trankílo ko múndope. ¿Mbaʼérepa? Pórke ñande ndajarekói la kapasida jajapo hag̃ua heta mbaʼe.

 La Biblia ningo heʼi voi “yvypóra ndorekoiha derécho ni odirihívo hekove ijehegui rei” (Jeremías 10:23). Upéva heʼise avave voínte ndajarekoiha la kapasida ñagoverna hag̃ua, ndajarekoiháicha avei la kapasida jaiko hag̃ua y guýpe térã jaiko hag̃ua pe espásiope.

Epensamíntena koʼã mbaʼére: ¿Ogustápa la héntepe hapicha heʼi jave chupe mbaʼéichapa oiko vaʼerã térã mbaʼépa ojapo vaʼerã? ¿Ogustápa la héntepe oĩrõ heʼíva chupekuéra mbaʼéichapa okorrehi vaʼerã ifamíliape térã mbaʼépa opensa vaʼerã pe avórtore ha pe péna de muértere? Koʼã mbaʼérente voi la hénte oñeʼẽta jave, oiko vaipáma jepi. Upévare ijetuʼúramo jepe ñandéve jaasepta hag̃ua, la Biblia heʼíva siertoite. Ñande ndajarekói pe kapasida ni pe derécho ñagoverna hag̃ua ñande rapichápe. ¿Mávapa upéicharõ ikatu ñanepytyvõ?

Ñandejára añoite ikatu ñanepytyvõ. Haʼe ningo ñande Kreadór ha heta hénte opensáramo jepe haʼe hesaraimaha ñandehegui, ndahaʼéi upéicha. Umi konsého porãite jatopáva la Bíbliape, ohechauka porã mbaʼeichaitépa haʼe ojepyʼapy ñanderehe. Ñantende porãramo mbaʼépa ñanemboʼe ko lívro, ñantendevéta avei mbaʼépa la ikatúva jajapo ha mbaʼépa ndaikatúi. Avei ñantendéta mbaʼérepa ko múndo ymaite guive voínte oho vai hese koʼag̃aite peve. Upévare peteĩ filósofo alemán heʼi vaʼekue: “Umi goviérno noaprendéi mbaʼeve umi mbaʼe oikóma vaʼekuégui ha oaprendéramo jepe hikuái, ndojapói jey umi mbaʼe oaprendéva”.

Rréi Salomón haʼe vaʼekue peteĩ kuimbaʼe iñaranduetereíva, ha haʼe heʼi vaʼekue: “Reipurukuaáta la ne akã ha upéva ndeprotehéta, rediferensiáta ivaíva ha iporãva ha upéva oñangarekóta nderehe” (Proverbios 2:11). La Biblia ikatu ñanepytyvõ jaipurukuaa hag̃ua ñane akã ha ñadiferensia hag̃ua la ivaíva ha iporãva. Por ehémplo Isaías 2:22-pe heʼi: “Pende provechorãnte haʼéta peẽme: anive pejerovia umi yvypórare”. Ñapenáramo ko konséhore, ndajaikomoʼãi voínte ñahaʼarõiterei iporãva umi goviérno koʼag̃aguágui. Kenneth, oikóva peteĩ siuda oĩvape Norteaméricape oĩháme hetaiterei violénsia heʼi: “Umi polítiko siémpre opromete omehorataha la situasión péro mbaʼeve nokonsegíri hikuái. Upéva ohechauka porãiterei siertoiteha la Biblia heʼíva”.

Daniel, pe kuimbaʼe ajeʼi ñañeʼẽ hague heʼi: “Amás día apilla porãvéntema ñande ndaikatuiha voínte ñagoverna porã. [...]. Jarekóramo jepe heta pláta vánkope térã ñambaʼapóramo jepe jareko hag̃ua peteĩ huvilasión, ndahaʼéi jeýnte avei garantía jaikotaha trankílo amo gotyove. Heta héntepema ahecha lomímonte osẽ vaiha”.

La Biblia ningo ohechauka porã ñandéve jajerovia reitaha umi goviérno oĩvare koʼág̃a. Péro omeʼẽ avei ñandéve peteĩ esperánsa iporãitereíva, jahechataháicha umi artíkulo oúvape.