¿Oexistípa siémpre raʼe pe univérso?

Génesis 1:1 heʼi: “Iñepyrũme Ñandejára ojapo vaʼekue yvága ha yvy”.

Áño 1950 mboyve heta sientífiko ifamósova oguerovia vaʼekue pe univérso siémpre oexisti hague. Péro koʼág̃a ojejapo heta deskuvrimiénto ipyahúva ha la majoría umi sientífiko orrekonose ko univérso ndoexistíri hague siémpre, síno oreko peteĩ prinsípio.

¿Mbaʼéichapa vaʼekue ko yvy iñepyrũme?

Génesis 1:2, 9 heʼi iñepyrũme ko yvýpe ndaipóri hague mbaʼevete ha ni naimóldei hague, ha oparupiete oĩ vaʼekue y memete.

Koʼã mbaʼe okoinsidi umi sientífiko odeskuvri vaʼekuéndi. Por ehémplo pe viólogo hérava Patrick Shih heʼi ke iñepyrũme ko ñane planétape ndaipóri vaʼekue oxíheno ojerrespira hag̃ua, ndaipóri vaʼekue yvyramáta ni mbaʼeveichagua vída. Pe rrevísta Astronomy heʼi umi deskuvrimiénto pyahu ohechaukaha iñepyrũme ñane planétape oĩ hague y  memete, ha saʼieterei oĩ vaʼekue lugár isekoha térã ndaiporiete voi.

¿Mbaʼéichapa okambia vaʼekue ohóvo pe atmósfera?

Génesis 1:3-5 ontendeka pe lus oñepyrũ hague oike pe atmósferape péro ndaikatúiti ojehecha ko yvy ape ári guive moõguipa ou pe lus. Peteĩ tiémpo rire ae oñepyrũ ojekuaa pe kuarahy ha pe jasy (Génesis 1:14-18).

Pe Centro de Investigaciones Ambientales hérava Smithsonian heʼi ke iñepyrũme pe atmósfera orrodeáva ñane planéta iñanambusuve hague. Upévare peteĩ lus kangymínte ikatu vaʼekue og̃uahẽ ko yvy ape ári. Haʼekuéra oexplika: “Iñepyrũme pe áirepe oĩ vaʼekue atyraite gotíta de metáno oformáva peteĩ nevlína ojagarrapaitéva ko yvy. Upe rire pe nevlína opa ha pe yvága opyta hovy”.

¿Mbaʼe órdenpepa oñeforma umi mbaʼe oikovéva ko yvy ape ári?

Asegún Génesis 1:20-27 umi mbaʼe oikovéva oñepyrũ oñeforma ko órdenpe: opaichagua pira,  opaichagua guyra, umi animál oikóva yvy apére ha ipahápe yvyporakuéra. ¿Mbaʼépa heʼi umi sientífiko? Haʼekuéra heʼi umi pira raẽ oexisti hague umi ótro animálgui, ha heta tiémpo rire ae oexisti hague yvyporakuéra.

Oĩ opensáva la Biblia okontradesiha umi deskuvrimiénto sientífiko, péro heta vése oñepensa upéicha noñentendeporãi rupínte la Biblia heʼíva.

La Biblia ndeʼíri ko univérso ha ñane planéta orekoha 6.000 áño. Upéva rangue heʼínte ko univérso ha ñane planéta ojejapo hague iñepyrũme (Génesis 1:1). La Biblia ndeʼíri arakaʼetépa oiko kuri upéva.

La Biblia ndeʼíri pe vída ojekrea hague ko yvy ape ári 6 día de 24 órape. Pe palávra día ojepuru jepi oñeñeʼẽ hag̃ua hetave tiémpore. Por ehémplo Génesis 2:4-pe omombeʼu “pe día Ñandejára Jehová a ojapórõ guare pe yvága ha yvy”. Koʼápe ojerreferi hína pe tiémpo ojekreárõ guare ñane planéta ha umi mbaʼe oikovéva. Upépe oikéma umi 6 día oñemensionáva Génesispe Ñandejára opreparárõ guare ko yvy ha opa mbaʼe oikovéva pype. Upéicharõ, káda uno umi 6 día kreatívo oñeñeʼẽha Génesispe oduráne raʼe hetaiterei áño.

La Biblia ndeʼíri umi ser vívo kon el tiémpo ndaikatuiha okambiaʼimi. Lívro de Génesis heʼi umi animálpe ojekrea hague asegún ikláse (Génesis 1:24, 25). La Bíbliape ojepurúvo pe fráse asegún ikláse heʼise hína oñeñeʼẽha heta variedáre. Upévare una klásepe ikatu oike hína heta varieda, upéva heʼise ke kon el tiémpo peteĩ kláse de animál ikatu okambia ha ivariadove.

 ¿Mbaʼépa nde repensa?

La Biblia omombeʼu mbaʼéichapa oñeforma vaʼekue pe univérso, mbaʼéichapa vaʼekue ñane planéta iñepyrũme ha mbaʼéichapa oñepyrũ la vída. La Biblia heʼíva koʼã témare isensilloiterei ha ijexákto. Upéicharõ, ¿ndaikatumoʼãi piko omombeʼu ñandéve mávapa okrea vaʼekue entéro mbaʼe? Pe Encyclopædia Britannica heʼi: “Oiméramo la vída oñepyrũ peteĩ milágro rupive, en fórma henerál upéva nokontradesíri umi sientífiko oikuaávape koʼág̃a peve”. b