Mitãrusu ha mitãkuñanguéra pembovyʼákena pende tuvakuérape

“NDAIPÓRI mbaʼeve chembovyʼavéva kóvagui ahendúramo che raʼykuéra oikoha pe añetépe”, péicha heʼivaʼekue apóstol Juan ituja rire (3 Juan 4, BNP). Koʼápe Juan noñeʼẽi itaʼýra teére; haʼe oñeʼẽ Jesús remimboʼekuérare. Oiméne heta sy ha túva oservíva Ñandejárape oñeñandu Juan oñeñanduhaguéicha. Tuvakuéra ningo tuicha mbaʼe itaʼyrakuérape g̃uarã, upéicha avei taʼyrakuéra ikatu ojapo heta mbaʼe ituvakuérare.

Rréi Salomón Israelgua ohechakuaavaʼekue mbaʼeichaitépa taʼyrakuéra ojapóva opoko ituvakuérare. Haʼe heʼi: “Mitã iñarandúva ombovyʼa itúvape, itavýva katu omoñembyasy isýpe” (Proverbios 10:1). Iporã ñanemanduʼa ñandetuicha rire jepe, umi mbaʼe jajapóva ikatuha ombovyʼa térã omoñembyasy ñande tuvakuérape. Mbaʼérepa jaʼe upéva?

Epensamína mbaʼeichaitépa nde sy ha nde ru oñehaʼã nemongakuaa porã. Renase mboyve jepe haʼekuéra ojepyʼapy ha oñemboʼéma nderehe. Ha renase rire katu nderayhueterei hikuái. Katuete oagradese Ñandejárape omeʼẽhaguére chupekuéra ko tembiapo iporãitéva. Oñangarekovaʼerã peteĩ mitãraʼymíre, ha oservi rupi hikuái Jehovápe, ojapo porãse ko mbaʼe.

Ikatu hag̃uáicha nemongakuaa porã, nde sy ha nde ru ohecha mbaʼépa heʼi Ñandejára Ñeʼẽ ha umi puvlikasionkuéra. Avei ojerure konsého ótro tuvakuérape. Ha oñemboʼe Ñandejárape oipytyvõ hag̃ua chupekuéra (Jueces 13:8). Rekakuaávo rehóvo, nde sy ha nde túva ohechakuaa mbaʼépa rejapo porã ha mbaʼépepa rejavy (Job 1:5). Upéi nemitãrusúvo pehasa heta mbaʼe ijetuʼúvare. Oiméne nerehenduséi jepi nde tuvakuérape. Haʼekuéra katu oñemboʼe Ñandejárape, olee Iñeʼẽ ha ojepyʼamongetave nepytyvõ hag̃ua. Ndoipotáiningo hikuái remboyke Jehovápe.

Rekakuaapa rire jepe nde sy ha nde ru ojepyʼapýta nderehe. Haʼekuéra oipota neresãi, revyʼa ha reime porã Ñandejára renondépe. Upéicharõ jepe, oikuaa hikuái nde redesidivaʼerãha mbaʼépa rejapóta.

Jahechamahaguéicha ‘ndaipóri ombovyʼavéva’ tuvakuérape ko mbaʼégui: ohecha hikuái itaʼyrakuéra “oikoha pe añetépe”. Ñapensamíntena upéicharõ, mbaʼéichapa oñeñandúta hikuái ñamboykéramo Jehovápe. Umi taʼýra ojapóva ivaíva ombohasa asy ituvakuérape. Salomón heʼivaʼekue: “Taʼýra tavy ombopochy itúvape ha isýpe ogueru vyʼaʼỹ” (Proverbios 17:25). Mbaʼeichaitépa ombyasy ha oñeñandu vai tuvakuéra itaʼýra omboykéramo Ñandejárape!

Upéicharõ, umi mbaʼe rejapóva ikatu ombovyʼa térã omoñembyasy nde tuvakuéra ha umi ndekuaávape. Haʼekuéra ningo ojepyʼapyeterei nderehe. Rehejáramo Jehovápe, nde sy ha nde ru ombyasyetereíta. Neñeʼẽrendúramo Jehovápe ha rejapóramo haʼe heʼíva haʼekuéra oñeñandu porãta. Eñehaʼãkena tovyʼa hikuái ndereheve! Haʼekuéra ningo nerekomboʼe, nderayhu ha oñangareko nderehe. Mbaʼérepa nereñehaʼãi rembovyʼa chupekuéra?