Reñeʼẽ vaípa raʼe espíritu sántore?

“Oĩ tembiapo vai ogueraháva ñemanóme.” (1 JUAN 5:16.)

1, 2. Mbaʼéichapa jaikuaa ikatuha japeka espíritu sántore?

 “AJEPYʼAPYETEREI oiméramo g̃uarã apekáraʼe espíritu sántore”, heʼi peteĩ kristiána Alemaniaygua. Nañaimoʼãi upéicha heʼiha peteĩ oservíva Ñandejárape. Ikatúpa peteĩ kristiáno opeka espíritu sántore, pe Ñandejára puʼakáre?

² Ñandejára Ñeʼẽ ohechauka ikatuha oiko upéva. Jesucristo heʼi: “Haʼe peẽme, ikatuha oñeperdona yvyporakuérape opaichagua pekádo ha ñeʼẽ vai heʼíva; upe oñeʼẽ vaíva Espíritu Sánto rehe katu noñeperdonaichéne” (Mateo 12:​31, BNP). La Biblia heʼi avei ñandéve: “Japekáramo japekaséguinte jaikuaa rire pe añetegua, ndaiporivéima sakrifísio pekádo rehe, oñehaʼarõvaʼerã uvei pe huísio pohyiete” (Hebreos 10:​26, 27, BNP). Ha pe apóstol Juan heʼi: “Oĩ tembiapo vai ogueraháva ñemanóme” (1 Juan 5:16). Upéicharamo jepe, ikatúpa peteĩ tapicha opeka vaíva odesidi haʼe voi opekahague pe espíritu sántore, ha upévare noñeperdonamoʼãiha chupe?

Ñañembyasýramo ikatu ñañeperdona

3. Mbaʼépa ikatu ohechauka jajepyʼapyetereíramo peteĩ mbaʼe vai jajapovaʼekuére?

³ Jehová añoite ikatu ohusga umi hembiapo vaívape. Upeichaite, enterovete ñaiméta Jehová renondépe, ha jaikuaa haʼe ndojavyiha (Génesis 18:25; Romanos 14:12). Jehová añoite oikuaa oñeperdonátapa peteĩ pekádo, ha avei oipeʼátapa ñandehegui ijespíritu (Salmo 51:11). Upéicha avei, iporã ñanemanduʼa jajepyʼapyetereíramo japekahaguére, upéva ikatu heʼise ñañembyasyha añetehápe. Mbaʼéichapa jahechauka ñañembyasy añeteha?

4. a) Mbaʼépa heʼise ñañembyasy? b) Mbaʼéichapa ñanembopyʼaguapy Salmo 103:​10-14?

⁴ Jahechauka ñañembyasyha jahechakuaáramo naiporãiha pe mbaʼe vai jajapovaʼekue térã jajaposéva. Ha jahechauka upéva jahejaitévo pe tembiapo vai. Oiméramo jajapóraʼe peteĩ mbaʼe ivaíva ha koʼág̃a jahechauka ñañembyasy añeteha, ñanembopyʼaguapýta pe salmísta heʼivaʼekue: “[Jehová] nomyengoviái ñandéve ñane rembiapo vaikue, ha ndojapói ñanderehe ojapo hag̃uáicha. Yvága oĩ mombyryháicha yvýgui, upeichaite tuicha imborayhu umi hese ojeroviávare. Kuarahy resẽ mombyryháicha kuarahy reikégui, upéicha omomombyry ñandehegui ñane rembiapo vaikue. Túva omokunuʼũháicha taʼyrakuérape, upéicha avei Ñandejára umi chupe omombaʼéva ndive. Haʼe oikuaa mbaʼéguipa ñandeaporakaʼe, oikuaa porã yvynteha voi ñande” (Salmo 103:​10-14).

5, 6. Emombeʼumi mbaʼépa heʼi 1 Juan 3:​19-22, ha emyesakãmi mbaʼépa heʼise.

⁵ Avei ñanembopyʼaguapy apóstol Juan heʼivaʼekue: “Kóva rehe ikatu jaikuaa pe añete reheguaha ñande, ha ñandepyʼaguapyvaʼerã [...] Ñandejára renondépe; pe ñandepyʼapy oñandukáramo ñandéve oimeraẽva mbaʼe, [...] Ñandejára tuichave mbaʼe pe ñandepyʼapýgui ha oikuaapa opa mbaʼe. Upéicha rupi che ryvykuéra pohayhuetéva, ñandepyʼapy noñandukáiramo ñandéve mbaʼeve jajeroviakuaa [...] Ñandejára rehe; ha omeʼẽvaʼerã ñandéve upe jajeruréva ichupe, jajapógui [haʼe heʼíva] ha umi mbaʼe ichupe ombovyʼáva” (1 Juan 3:​19-22, BNP).

⁶ Jaikuaa “añete reheguaha ñande” jahayhúgui ñane ermanokuérape ha nañañemeʼẽigui mbaʼe vai apópe (Salmo 119:11). Ñañeñandu vaíramo ñaimoʼãgui jajapohague peteĩ mbaʼe  ivaíva, ñanemanduʼavaʼerã ‘Ñandejára tuichaveha ñandepyʼapýgui ha oikuaaha opa mbaʼe’. Haʼe oikuaa japorohayhuha “tovamokõiʼỹ reheve”, nañañemeʼẽiha pe mbaʼe vaípe ha ñañehaʼãha jajapo haʼe oipotáva, ha upévare haʼe ñandeporiahuvereko (1 Pedro 1:​22, BNP). Jajeroviávo Jehováre, japorohayhúvo ha nañañemeʼẽivo pe mbaʼe vai apópe, ñaime porãta ñandepyʼapýpe. Upéicha avei ndajakyhyjemoʼãi ñañemboʼe hag̃ua Ñandejárape. Ha haʼe ohendúta ñane ñemboʼe ñaneñeʼẽrenduhaguére chupe.

Umi opekavaʼekue espíritu sántore

7. Mbaʼépa pe iñimportantevéva jaikuaa hag̃ua oñeperdonátapa peteĩ pekádo?

⁷ Mbaʼeichagua pekádopa ndaikatúi oñeperdona? Ñambohovaimi ko porandu jahechávo umi ehémplo oĩva la Bíbliape. Koʼãva ñanembopyʼaguapýta oiméramo tuicha jajavýraʼe, ha ñañembyasýramo jepe ikatu jajepyʼapyeterei gueteri. Jahecháta iñimportanteveha pe ñañandúva, pe oĩva ñandepyʼapýpe ha mbaʼérepa jajapo, ndahaʼéi katuete pe mbaʼe vai jajapovaʼekue.

8. Mbaʼéichapa opeka Ñandejára espíritu sántore umi omoakãva hudiokuéra rrelihión?

⁸ Pe síglo primérope, umi omoakãva hudiokuéra rrelihión oñemoĩ mbarete vaʼekue Jesucrístore ha opeka pe espíritu sántore. Haʼekuéra ohecha umi milágro ojapóva Jesús Ñandejára espíritu rupive omombaʼeguasuha Jehovápe. Upéicharamo jepe, heʼi hikuái haʼe  ojapoha umi mbaʼe Satanás rupive. Heʼihaguéicha Jesús, umi péicha oñeʼẽ vaíva Ñandejára espíritu sántore “noñeperdonaichéne, ko yvy ári, térã upe rire” (Mateo 12:​22-32, BNP).

9. Mbaʼéichapa ikatu ñañeʼẽ vai Ñandejárare, ha mbaʼépa heʼi Jesús upéva rehe?

⁹ Ikatu oñeñeʼẽ vai térã oñeñeʼẽ pohýi Ñandejárare, hembijokuái térã umi mbaʼe haʼe oiporúvare. Pe espíritu sánto ningo ou Ñandejáragui, upévare oñeñeʼẽ vaívo hese oñeñeʼẽ vai hína Ñandejárare. Umi ojapóva upéicha ha noñembyasýiva, noñeperdonamoʼãi. Upe Jesús heʼivaʼekue upeichagua pekádore, ohechauka haʼe oñeʼẽha umi oñemoĩvare Ñandejára espíriture, ohecháramo jepe hikuái mbaʼéichapa ombaʼapo. Jehová espíritu ombaʼapo Jesús rupive, péro umi oñemoĩva hese katu heʼi ouha Satanásgui. Upéicha, opeka hikuái pe espíritu sántore oñeʼẽ vaívo hese. Jesús heʼivaʼekue: “Oimeraẽva oñeʼẽ vaíva Espíritu Sánto rehe katu ndoguerekoichéne perdón mbaʼeveichavéramo; oñehundivaʼerã tapia g̃uarã” (Marcos 3:​20-29, BNP).

10. Mbaʼérepa Jesús heʼi Judas rehe ‘oñehundímante vaʼerãha’?

¹⁰ Jahechami avei Judas Iscariote ojapovaʼekue. Haʼe omonda meme pe viru oñemeʼẽvaʼekue chupe oñangareko hag̃ua (Juan 12:​5, 6). Amo ipahápe, oñemoĩ peteĩ ñeʼẽme umi mburuvichakuéra ndive ontrega hag̃ua Jesúspe 30 monéda de pláta rehe. Oipyʼapýramo jepe chupe upe rire pe ojapovaʼekue, noñembyasýi hembiapo vaikuére. Upéicha rupi, Judas ndaikatúi oñemoingove jey, ha upévare Jesús heʼi hese ‘oñehundímante vaʼerãha’ (Juan 17:​12, BNP; Mateo 26:​14-16).

Umi ndopekaivaʼekue espíritu sántore

11-13. Mbaʼe pekádopepa hoʼa David ohecha rire Bat-sébape ojahuhápe, ha mbaʼérepa ñanembopyʼaguapy jaikuaávo mbaʼépa ojapo Jehová?

¹¹ Sapyʼánte peteĩ kristiáno omombeʼu peteĩ pekádo vai ojapovaʼekue, ha umi ansiáno oñeʼẽma hendive oipytyvõ hag̃ua chupe. Upéicharamo jepe, oipyʼapyeterei gueteri chupe upe ojapovaʼekue (Santiago5:14). Upéicha ojehúramo ñandéve, iporãta jahecha jey mbaʼépa heʼi la Biblia umi tapicha ojavyvaʼekuére ha oñeperdona jey.

¹² Jahecha raẽta pe mbaʼe vaiete rréi David ojapovaʼekue Urías rembireko ndive, hérava Bat-seba. David ohecha ko kuña iporãitéva ojahu jave ha ogueruka pe palásiope oñeno hag̃ua hendive. Oikuaárõ guare Bat-seba hyeguasuha, David ohenoika Uríaspe oñeno hag̃ua hembireko ndive, ani hag̃ua ojekuaa omoakãratĩhague iménape. Péro upéva osẽ vai chupe, ha upémaramo omondo Uríaspe omano hag̃ua gerrahápe. Upéi, David omenda Bat-seba rehe, ha oguereko hikuái peteĩ mitã omanovaʼekue upe riremi (2 Samuel 11: 1-27).

¹³ Jahechami mbaʼépa ojapo Jehová David ha Bat-seba rembiapo vaikuére. Ñandejára operdona Davídpe, oiméne ohechágui oñembyasyha ha avei pe goviérno chupe oprometevaʼekuére (2 Samuel 7:​11-16; 12:​7-14). Ha Bat-seba oiméne oñembyasy avei hembiapo vaikuére, ha upévare imemby Salomóngui oiko rréi, ha oiko avei chugui Jesucristo ypykue (Mateo 1:​1, 6, 16). Upévare, oiméramo jajavýraʼe ñanemanduʼavaʼerã Jehová omombaʼeha ñañembyasýramo.

14. Mbaʼeichaitépa Jehová ikatu oporoperdona, jahechaháicha Manasés ojapovaʼekuére?

¹⁴ Pe rréi Manasés ojapovaʼekuére avei jahechakuaa mbaʼeichaitépa Jehová ikatu oporoperdona. Ko rréi ojapo hetaiterei mbaʼe vai Jehová renondépe. Omopuʼã heta altár Baálpe g̃uarã, omombaʼeguasu opa mbaʼe yvágape oĩva, ha Ñandejára róga korapýpe jepe ojapo altár oadora hag̃ua umi ñandejára guaʼúpe. Ohapyka itaʼyrakuérape, omotenonde pe espiritísmo ha umi tapichakuérape oĩva Judá ha Jerusalénpe “ojapouka [...] heta mbaʼe ivaietevéva pe ojejapóvagui umi tetã rupi Ñandejára ohundivaʼekue Israelgua renondépe”. Umi Ñandejára proféta heʼivaʼekue avave nohendúi. Amo ipahápe, pe rréi Asiriaygua ogueraha préso Manaséspe.  Péro oĩ aja upéicha, oñembyasyeterei ha oñemboʼe jey jey Ñandejárape. Upévare, Jehová operdona ha omoĩ jey chupe ogoverna hag̃ua Jerusalénpe. Ha upégui oporomokyreʼỹ ojeadora hag̃ua Ñandejárape (2 Crónicas 33:​2-17).

15. Mbaʼépa ojapovaʼekue apóstol Pedro ohechaukáva Jehová ‘oheja reiha ñane rembiapo vaikue’?

¹⁵ Heta tiémpo upe rire, apóstol Pedro ojavy tuichaiterei avei heʼírõ guare ndoikuaaiha Jesúspe (Marcos 14:​30, 66-72). Upéicharõ jepe, Jehová operdona chupe ‘oheja reívo pe hembiapo vaikue’ (Isaías 55:7). Mbaʼérepa ojapo upéva? Pedro oñembyasýgui ipyʼaite guive (Lucas 22:62). Ohasa rire cincuenta día, Pentecostés jave, Ñandejára oiporu chupe oñeʼẽ hag̃ua Jesucrístore umi tapichápe. Upéicha hesakã porã Ñandejára operdonahague chupe (Hechos 2:​14-36). Ha jaikuaágui Jehová operdonahague Pédrope, mbaʼérepa noperdonamoʼãi avei umi kristiáno ipyʼaite guive oñembyasývape? Upévare pe salmísta opuraheivaʼekue Ñandejárape: “Nemanduʼátarõ ore rembiapo vaikue rehe, máva piko oñemoĩta nerenondépe? Nde katu reheja rei oréve ore rembiapo vaikue” (Salmo 130:​3, 4).

Mbaʼépa ikatu jajapo ani hag̃ua jakyhyje oiméramo g̃uarã japekáraʼe

16. Mbaʼépa jajapovaʼerã Ñandejára ñaneperdona hag̃ua?

¹⁶ Oimérõ jakyhyje japekáramo g̃uarã pe espíritu sántore, umi mbaʼe jahechavaʼekue ñanembopyʼaguapýta. Umíva ohechauka Jehová operdonaha umi oñembyasývape. Upearã tekotevẽ ñañemboʼe ñande pyʼaite guive Ñandejárape. Oiméramo japekáraʼe, jajerurevaʼerã chupe tohechakuaa ñaneimperfektoha ha taimanduʼa umi mbaʼe porã jajapovaʼekuére jaservívo chupe. Avei tañaneperdona Jesucristo sakrifísio rupive ha tañandeporiahuvereko. Jaikuaágui Ñandejára ipyʼaporãha, jajerurekuaa chupe tañaneperdona ha katuete ojapóta upéva (Efesios 1:7).

17. Mbaʼépa ojapovaʼerã pe kristiáno opekavaʼekue ha oikotevẽva oñepytyvõ chupe?

¹⁷ Ha mbaʼépa ikatu ojapo umi opekavaʼekue ha ndaikatúiva oñemboʼe ombohasýgui chupe hembiapo vaikue? Pe disípulo Santiagoheʼi koichagua kristiánore: “Tohenoiuka umi [ansiánope oĩva kongregasiónpe], oñemboʼe ha omona hag̃ua hese aséite Ñandejára rérape. Ha pe orasión ojejapóva jerovia reheve, omongueravaʼerã pe hasývape ha Ñandejára omopuʼãvaʼerã ichupe. Ha [oimérõ hembiapo vai raʼe], oñeperdonavaʼerã ichupe” (Santiago 5:​14, 15, BNP).

18. Mbaʼérepa umi oñemosẽva kongregasióngui ndeʼiséi katuete opekahague pe espíritu sántore?

¹⁸ Ikatu avei oĩ ojapóva mbaʼe vai ha oñemosẽva kongregasióngui noñembyasyihaguére. Upéicharõ jepe, upéva ndeʼiséi katuete opekahague espíritu sántore. Apóstol Pablo oñeʼẽrõ guare peteĩ kristiánore ohaʼarõvaʼekue oho yvágape péro oñemosẽvaʼekue, heʼi: “Iporãma pe ñemongavaju heta jurúgui ohenduvaʼekue. Upévare tekotevẽ peheja rei chupe hembiapo vaikue ha peipytyvõ chupe, ani hag̃ua ipyʼatarova ojepyʼapyetereígui” (2 Corintios 2:​6-8; 1 Corintios 5:​1-5). Upéicharamo jepe, imbarete jey hag̃ua pe tapicha opekavaʼekue ojapovaʼerã umi ansianokuéra heʼíva chupe, ha ohechauka oñembyasy añeteha. Ojapóva rupive ‘ojekuaavaʼerã oñearrepentiha’ (Lucas 3:​8, BNP).

19. Mbaʼépa jajapovaʼerã ‘ñaneresãi hag̃ua ñande jeroviápe’?

¹⁹ Mbaʼérepa ikatu ñaimoʼã japekahague espíritu sántore? Ikatu ojehu upéva  jajejopyetereíramo ha nañameʼẽvéi, térã ñahaʼarõiterei ñandejehegui voi. Oiméramo upéicha, iporã japytuʼuve ha ñañemboʼe Jehovápe. Ndajahejaivaʼerã Satanás ñanemokangy, ha upéi ndajaservivéi Ñandejárape. Jehová ndoipotáiramo omano peteĩ iñañáva, koʼýte ndoipotamoʼãi omano peteĩ oservíva chupe. Upévare, oimérõ jakyhyje japekáramo g̃uarã pe espíritu sántore, jalee meme vaʼerã Ñandejára Ñeʼẽ, ha upéva apytépe umi Salmo tuichaiterei ñanembopyʼaguapýta. Tekotevẽ avei jaha meme rreunionhápe ha jepredika ñande rapichakuérape. Upéicha jajapóramo, ‘ñaneresãita ñande jeroviápe’ ha ndajajepyʼapymoʼãi japekáramo g̃uarã espíritu sántore (Tito 2:2).

20. Mbaʼépa ikatu ñañeporandu jahecha hag̃ua ndajapekaihague pe espíritu sántore?

²⁰ Oĩrõ okyhyjéva oiméramo g̃uarã opekáraʼe pe espíritu sántore, iporã vaʼerã oñeporandumi: “Añeʼẽ vaípa raʼe pe espíritu sántore? Añembyasýparaʼe che pyʼaite guive apekahaguére? Ajeroviápa Ñandejára oporoperdonaha? Oikópa chehegui peteĩ apóstata omboykéva Ñandejára heʼíva?”. Ñañeporandúramo koʼã mbaʼe, ikatúta jahechakuaa nañañeʼẽvairihague espíritu sántore ha nañamboykeihague Ñandejárape. Ñañembyasy ha jajeroviáramo Ñandejára oporoperdonaha, heʼise ndajapekaihague Jehová espíritu sántore.

21. Mbaʼépa oñembohováita pe artíkulo oúvape?

²¹ Tuichaitépa ñanembopyʼaguapy jaikuaa porãvo ndajapekaihague Ñandejára espíritu sántore! Upéicharamo jepe, oĩ gueteri umi mbaʼe ikatúva ñañeporandu espíritu sántore, ha koʼãva ñambohováita pe artíkulo oúvape. Umíva apytépe oĩ: “Aikópa Ñandejára espíritu sánto oipotaháicha? Ojehechápa upéva cherehe?”.

Mbaʼépa ñambohováita?

• Mbaʼérepa jaʼekuaa ikatuha japeka pe espíritu sántore?

• Mbaʼépa heʼise ñañembyasy?

• Mávapa opekavaʼekue Ñandejára espíriture Jesús oĩrõ guare ko Yvy ape ári?

• Mbaʼépa ñanembopyʼaguapýta oimérõ jakyhyje japekáramo g̃uarã espíritu sántore?

[Porandu ñahesaʼỹijóva]

[Nóta oĩva taʼanga ndive páhina 11]

Umi heʼivaʼekue Jesús ojapoha milágro Satanás rupive opeka Ñandejára espíritu sántore