Aníkena jajepyʼapyeterei ñandejehe

‘Ehayhu Ñandejárape nde pyʼaite guive, ne arandukue ha opa ne mbaretekue reheve.’ (MAR. 12:30.)

1. Maʼerãpa Jehová ojapovaʼekue Adán ha Évape?

 JEHOVÁ ningo ndojapoivaʼekue Adán ha Évape hasy ha omano hag̃ua orekópe 70 térã 80 áño. Ojapo guei chupekuéra oiko hag̃ua opa ára g̃uarã hardín de Edénpe, ovyʼa ha oñangareko hag̃ua hese (Gén. 2:​8, 15, nóta; Sal. 90:10). Iñeʼẽrendúrire Jehovápe ha oñemoĩ ipoguýpe, ndahasyivaʼerãmoʼã hikuái ha omano.

2, 3. a) Mbaʼépa heʼi Eclesiastés 12-pe umi ijedámavare? b) Máva rembiapokuépa ñemano ha mbaʼéichapa oñemyatyrõta?

² Eclesiastés kapítulo 12-pe heʼi porã mbaʼéichapa umi ijedáva ‘ohasa asy’ (jaleemína Eclesiastés 12:​1-7). Haʼekuéra ningo iñakãrague morotĩmbáma ha upéva oñembojoja almendro potýre. Hetymakuéra katu ikarẽmba ha oryryipa. Hesakuéra oñembojoja mokõi kuñakaraíre omañáva ventána rupi ha ndohechavéimava. Hãinguéra katu oñepyrũma hoʼa, upévare oñembojoja ‘peteĩ molíno nomonguʼivéimavare’.

³ Ñandejára nañandeʼapoivaʼekue japyta hag̃ua ñane rãiʼỹre, ndajahechaporãvéi ha jaryryipa hag̃ua. Koʼãva ha ñemano ‘Satanás rembiapokue’, Adán ombohasavaʼekue ñandéve. Ha Ñandejára Raʼy omyatyrõmbaitéta irréino rupive. Upévare, apóstol Juan ohai: ‘Ñandejára Raʼy ouvaʼekue ombyai hag̃ua voi pe Satanás rembiapokue’ (1 Juan 3:​8, BNP).

Ndaivaíriko jajepyʼapy ñandejehe

4. Mbaʼérepa jajepyʼapy ha ñañangareko ñandejehe, péro mbaʼépa jahechakuaavaʼerã?

⁴ Opavavete ningo ñandetuja térã ñaneg̃uaig̃uívo, ñanderasypáma. Upévare ndaivaíri jajepyʼapy ha ñañangareko ñandejehe ñaneresãi hag̃ua. Ñande ningo jaiporuse ñane mbarete jaservi hag̃ua Jehovápe (Mar. 12:30). Ñande nañanderasyséi, péro jahechakuaavaʼerã saʼi ikatuha jajapo ani hag̃ua ñanderasy, ñandetuja térã ñaneg̃uaig̃ui.

5. Máva mávapa heʼi la Biblia ombohovái hague imbaʼasy?

⁵ Heta Ñandejára siervokuéra ningo ombohovái opaichagua mbaʼasy. Umíva apytépe oĩ Epafrodito (Fili. 2:​25-27). Ha Timoteo katu pyʼỹi ipyʼahasyvaʼekue. Upévare apóstol Pablo heʼi chupe hoʼu hag̃ua víno michĩmi (1 Tim. 5:23). Apóstol Pablo voi heʼivaʼekue “areko che retére peteĩ ñuatĩ chekutúva”, oiméne ndohechaporãvéi térã ojagarra chupe peteĩ  mbaʼasy ndaikatúiva oñemonguera upe tiémpope (2 Cor. 12:7; Gál. 4:15; 6:11). Ha akóinte ojerure Ñandejárape oipeʼamínte hag̃ua upe ombohasa asýva chupe (jaleemína 2 Corintios 12:​8-10). Jehová oipeʼarangue chugui, oipytyvõ guei Páblope ogueropuʼaka hag̃ua imbaʼasy. Ijespíritu sánto rupive omombarete Páblope ogueropuʼaka hag̃ua upe omokangýva chupe. Mbaʼépa ñanemboʼe apóstol Páblore oikovaʼekue?

Aníkena jajepyʼapyeterei ñandejehe

6, 7. Mbaʼérepa naiporãi jajepyʼapyeterei ñandejehe?

⁶ Ñande testigos de Jehová ningo jaheja umi doktór ñanepohano, jasegi avei opaichagua tratamiénto, ha jaagradese chupekuéra ñanepytyvõ haguére. Rrevísta ¡Despertad! oñeʼẽ avei heta mbaʼasýre, ndeʼíriramo jepe mbaʼe tratamiéntopa jasegivaʼerã. Jaikuaa ningo ñaneimperfékto rupi ñanderasytanteha voi, upévare naiporãi jajepyʼapyeterei ñandejehe. Ñande nañapensaivaʼerã ko múndope oñepensaháicha, haʼekuéra ningo nohaʼarõi mbaʼeve iporãva. Ha okueraségui heta vése osegi oimehaichagua tratamiénto (Efe. 2:​2, 12). Ñande katu, ndajasegimoʼãi umi tratamiénto Jehovápe g̃uarã naiporãiva nañamanoséigui rei. Jaikuaa porã ningo ñaneñeʼẽrendúramo Jehovápe jaikovetaha opa ára g̃uarã imúndo pyahúpe, haʼe voi opromete haguéicha ñandéve (1 Tim. 6:​12, 19; 2 Ped. 3:13).

⁷ Avei naiporãi jajepyʼapyeterei ñandejehe ani hag̃ua ñapensa ñandejehéntema. Upévare apóstol Pablo oavisa porã umi Filisteayguápe ani hag̃ua oheka ‘chupekuérante ou porãva, oheka hag̃ua guei ou porãva hapichakuérape’ (Fili. 2:4). Ndaivaíri ningo ñañangareko ñandejehe ñaneresãi hag̃ua, péro jajepyʼapýramo ñane ermanokuéra ha ñande rapichakuérare ndajajepyʼapyetereimoʼãi ñandejehe (Mat. 24:14).

8. Mbaʼépa ikatu oiko jajepyʼapyetereíramo ñandejehe ani hag̃ua ñanderasy?

⁸ Péro ikatu voi ñambotapykue Jehová servísio jajepyʼapyetereígui ñandejehe ani hag̃ua ñanderasy. Ha jajepyʼapyetereíramo ikatu voi jaʼese ñande rapichápe mbaʼeichagua diéta térã tratamiéntopa ojapo porãvéta hese. Péro, jahechami apóstol Pablo ohaivaʼekue: ‘Peikuaákena mbaʼépa iñimportanteve, peguata hekopete ha ani peporomoñepysãnga og̃uahẽ meve Jesucristo ou jeyha ára’ (Fili. 1:​10, JMP).

Mbaʼépa iñimportanteve?

9. Mbaʼépa iñimportanteve Ñandejára siervokuérape g̃uarã, ha mbaʼérepa?

⁹ Koʼág̃a rupi Ñandejára siervokuérape g̃uarã iñimportanteve oikuaauka marandu porã oparupiete, ha omboʼe Ñandejára Ñeʼẽ. Péicha oipytyvõ hapichakuérape ha upéva ojapo porã avei hesekuéra (Pro. 17:22; 1 Tim. 4:​15, 16). Heta vése umi rrevísta Ñemañaha ha ¡Despertad! omombeʼu mbaʼéichapa ñane ermanokuéra ogueropuʼaka opaichagua mbaʼasy vai. Haʼekuéra ani hag̃ua opensaiterei ijehe, oipytyvõ hapichakuérape oikuaa hag̃ua Jehovápe ha umi mbaʼe oprometevaʼekue. *

10. Mbaʼérepa iñimportánte jaiporavo porã mbaʼe tratamiéntopa jasegíta?

¹⁰ Káda uno ningo jadesidivaʼerã mbaʼe tratamiéntopa jasegíta, jaikuaágui jajechataha ñane ‘rembiapo vaikuére’ (Gál. 6:​5, JMP). Péro ñanemanduʼavaʼerã avei  Jehová ojepyʼapyha umi mbaʼe jadesidívare. Pór ehémplo, ñande jarrespeta rupi Ñandejára heʼíva ndajaiporúi tuguy. Upéicha avei ndovaléi jasegi umi tratamiénto ombopochýtava Jehovápe (Hech. 15:20). Pór ehémplo, oĩ ohóva médiko espiritísta rendápe oikuaa hag̃ua mbaʼépa oreko ha osegíva hendive tratamiénto. Yma ningo Jehová ndoguerohorýi umi Israelgua apóstatape oiporúrõ guare máhia ha espiritísmo. Jehová heʼi: ‘Anive pegueru chéve kuaveʼẽmby tovamokõi reheve, pene insiénso ryakuã nahetũséi. Pende arete jasy raʼy ha sábado chemonguerái’ peiporu rupi máhia pe aty guasúpe (Isa. 1:​13, ÑÑB). Ñanderasy jave ningo ñaikotevẽterei Jehováre, ha ivaietéta piko ndaikatuvéiramo ni ñañemboʼe chupe (Lam. 3:44).

Jahechakuaákena mbaʼépa iporã ha ivai

11, 12. Mbaʼérepa tekotevẽ ñanearandu ha ñaneakãguapy jaiporavo hag̃ua mbaʼe tratamiéntopa jasegíta?

¹¹ Ñande ningo ndaikatúi ñahaʼarõ Jehová ñanemonguera peteĩ milágro rupive, péro ikatu jajerure chupe arandu jaiporavo porã hag̃ua mbaʼe tratamiéntopa jasegíta. Jadesidi mboyve jahechavaʼerã mbaʼépa heʼi Ñandejára Ñeʼẽ, upéicha jahechakuaáta iporãva ha ivaíva. Ha oiméramo jareko peteĩ mbaʼasy vai iporãta ñahendu avei mbaʼépa heʼi ótro doktór upe mbaʼasýre. Proverbios 15:​22-pe heʼi voi: “Ndaiporihápe ñemongeta mbaʼeve nosẽporãi”, oĩramo heta oñemoñeʼẽva katu osẽ porãmbáta. Apóstol Pablo heʼi avei iñermanokuérape ‘oiko hag̃ua akãguapýpe, hustísiape ha ñeʼẽrendúpe ko ára pahápe’ (Tito 2:​12, ÑÑB).

¹² Heta oĩ ñande rapicha ohasa asýva peteĩ kuña ohasa asy haguéicha Jesús tiémpope. Marcos 5:​25, 26-pe heʼi: “Oĩ peteĩ kuña hasýva ojapóma doce áño ha huguymantéva. Heta ohasa asy vaʼekue ha oiporupa opa oguerekóva okueraségui, ha ndaipóri pohanohára ikatúva omonguera chupe”. Jesús katu oiporiahuvereko upe kuñáme ha omonguera (Mar. 5:​27-34). Ha koʼág̃a rupi heta kristiáno ohasa asy, péro okueraségui osegi umi tratamiénto ombopochýva Jehovápe.

13, 14. a) Mbaʼépa Satanás oiporu ñanemoñuhã hag̃ua? b) Mbaʼérepa ñamboykevaʼerã ojejapóva guive espiritísmo rupive?

¹³ Satanás oiporu opaichagua ñuhã ñanemokangy ha jaheja hag̃ua Jehovápe. Upearã oiporu jepi tekovai, platapota ha umi tratamiénto espiritísta. Ñande ningo akóinte jajerure Jehovápe ñandepeʼa hag̃ua ‘ivaívagui’ ha Satanás poguýgui. Upévare ndajahaivaʼerã umi espiritísta  rendápe, pórke jajapóramo upéicha ñaimétama Satanás poguýpe (Mat. 6:13; Tito 2:14).

¹⁴ Jehová heʼi porã vaʼekue umi Israelguápe ani hag̃ua oiporu máhia ha adivinación (Deu. 18:​10-12). Apóstol Pablo heʼivaʼekue ‘umi mbaʼe ñande rete oipotáva’ apytépe oĩha avei ‘espiritísmo’ (Gál. 5:​19, 20). La Biblia heʼi umi espiritísta ndohasamoʼãiha Ñandejára múndo pyahúpe (Rev. 21:8). Jahechaháicha tahaʼe haʼéva ojejapóva guive espiritísmo rupive ombojeguaru Jehovápe.

‘Opavave toikuaa peneakãguapyha’

15, 16. a) Mbaʼérepa tekotevẽ ñanearandu jaiporavo hag̃ua mbaʼe tratamiéntopa jasegíta? b) Mbaʼépa pe Cuerpo Gobernante heʼi umi kristiáno ypykuépe ojapo hag̃ua?

¹⁵ Ha oiméramo jakyhyje jasegi hag̃ua peteĩ tratamiénto ikatúgui ombopochy Jehovápe, iporãvéta ñamboykete. Péro ndajaikuaaporãiramo mbaʼéichapa ojejapo peteĩ tratamiénto ndeʼiséi ojejapoha espiritísmo rupive. Upévare tekotevẽ ñanearandu, jahechakuaa iporãva ha ivaíva ñañangareko porã hag̃ua ñandejehe Jehová oipotaháicha. Proverbios kapítulo 3-pe heʼi: ‘Ejerovia Ñandejárare nde pyʼaite guive, ha ani ndejehénte. Eikuaáke haʼe oĩha opárupi, ha haʼe omyesakãtaha ndéve nde rape. Rejepyʼamongetákena ha nearandu. Upéicharõ reikovéta’ (Pro. 3:​5, 6, 21, 22).

¹⁶ Ñanderasy, ñaneg̃uaig̃ui térã ñandetujávo ñañangarekovaʼerã ñandejehe ñaneresãi hag̃ua, péro ñañatendevaʼerã avei ani hag̃ua japyta vai Ñandejárandi. Opa mbaʼe jajapóvape ñaneñeʼẽrenduvaʼerã Ñandejárape. Upéicha ‘opavave oikuaáta ñaneakãguapyha’ (Fili. 4:5). Umi kristiáno ypykuépe pe Cuerpo Gobernante omondo peteĩ kárta. Ha heʼi chupekuéra ani hag̃ua oiporu tuguy, omombaʼeguasu taʼangakuéra ha hekovai. Upe rire heʼi avei: “Peñeñangarekóramo koʼã mbaʼégui, pejapo porãta” (Hech. 15:​28, 29, BNP). Mbaʼérepa ojapo porãta iñeʼẽrendúramo hikuái koʼã mbaʼépe?

Koʼág̃a voi ikatu ñaneresãi ha Ñandejára Rréino poguýpe katu nañanderasymoʼãvéima

17. Mbaʼérepa jajapo rupi Ñandejára heʼíva ñaneresãive?

¹⁷ Káda uno iporã ñañeporandu: “Ahechakuaápa ajapo porãha cheñeʼẽrendúgui Ñandejára Ñeʼẽme amboykévo tekovai ha ndaiporúivo tuguy?”. Ñapensavaʼerã avei ñaneresãiveha ‘ñanepotĩ rupi opa mbaʼe vaígui omongyʼáva ñande rete ha ñande espíritu’ (2 Cor. 7:1). Ñanepotĩramo Ñandejára Ñeʼẽ heʼiháicha nañanderasymoʼãi oimeháicha rei. Ha jajapo porã avei ndajapitái ha ndajaiporúiramo dróga ha petỹ, koʼãva ningo ikatu ñanembyai ha japyta vai Ñandejárandi. Upéicha avei ndajakarurasái ha ndajaʼurasái rupi vevída ñaneresãive (jaleemína Proverbios 23:20 ha Tito 2:​2, 3.) Iporãta avei jajapóramo ehersísio ha japytuʼu  porã, péro jajapo rupi Ñandejára heʼíva ñaneresãive ha ñaime porã hendive.

18. a) Mbaʼépa iñimportantevevaʼerã ñandéve g̃uarã? b) Mbaʼépa hiʼãite ñandéve oñekumpli?

¹⁸ Upéicha jahechakuaa iñimportanteveha ñaime porã Jehovándi ha ñañangareko ani hag̃ua ikangy ñande jerovia. Haʼe opromete ñandéve koʼág̃a voi jaiko porãtaha ha imúndo pyahúpe katu jaiko porãvétantema (1 Tim. 4:8; Sal. 36:9). Jesús omeʼẽ rupi hekove ñanderehehápe, ogoverna vove nañanderasymoʼãvéima ha ñaime porãta Jehovándi. Péicha Jesucristo rupive jahupytýta jeikove opaveʼỹva, ha Ñandejára oipeʼapáta umi ñanembohasa asýva (Rev. 7:​14-17; 22:​1, 2). Hiʼãite ningo jahecha oñekumplírõ proféta Isaías ohaivaʼekue: ‘Avave ndeʼimoʼãvéima: “cherasyʼaína”’ (Isa. 33:24).

19. Mbaʼérepa ikatu jajerovia ñanderasýramo jepe?

¹⁹ Ñande ningo jajeroviaiterei Jehová koʼẽrõitéma ñandesalvataha ha oipeʼáta ñemano ha opaichagua mbaʼasy. Upe ára og̃uahẽ meve, ikatu jajerovia Jehová ñanepytyvõtaha ñaaguanta hag̃ua opaichagua mbaʼasy, haʼe ningo ojepyʼapy ñanderehe (1 Ped. 5:7). Ñañangarekókena ñandejehe ñaneresãi hag̃ua, péro jajapókena opa mbaʼe Ñandejára Ñeʼẽ heʼiháicha.

Ñambohovaimi koʼã porandu

• Máva rembiapokuépa ñemano ha mbaʼéichapa oñemyatyrõta?

• Ndaivaíriramo jepe jajepyʼapy ñandejehe, mbaʼépa naiporãi jajapo?

• Mbaʼérepa jaiporavo porã vaʼerã umi tratamiénto jasegítava?

• Mbaʼérepa jajapo rupi Ñandejára heʼíva ñaneresãive?

[Nóta]

[Porandu ñahesaʼỹijóva]

[Nóta oĩva taʼanga ndive páhina 23]

Jehová nañandeʼapoivaʼekue ñanderasy, ñandetuja térã ñaneg̃uaig̃ui hag̃ua

[Nóta oĩva taʼanga ndive páhina 25]

Ñanderasýramo jepe, javyʼaiterei jaservi haguére Jehovápe