Mbaʼépepa rekambiavaʼerã nderekoporãve hag̃ua?

PETEĨ polisía Filipinasgua oporandu peteĩ prekursórape: “Mbaʼéiko rejapo pe karai okambia hag̃ua peichaite peve?”. Pe polisía ningo oreko atýra kuatia peteĩ eskritório ári, ha omaʼẽvo umívare heʼi: “Reikuaáiko mbaʼépa hína umi kuatia? Umíva hína umi sentencia judicial osẽmava chupe. Upévare rejapo iporãva ko puévlo rehehápe”. Upe karai ningo ikaʼu ha oporoaprovlemávonte voi oiko. Péro Ñandejára Ñeʼẽ tuichaiterei okambia chupe.

Oparupigua ñande rapicha ojapo apóstol Pablo heʼíva: ‘Peheja penderekotuja ha anive peiko yma guaréicha, ha pemoñepyrũ penderekopyahu Ñandejára ojapovaʼekue ijoguaháramo’ (Efe. 4:​22-24). Upéicharõ jaservi hag̃ua Ñandejárape ñambopyahuvaʼerã ñande rekove.

Jajevautisa hag̃ua heta ñakambiavaʼerã, péro upéva ñepyrũrãnte. Pór ehémplo, peteĩ tapicha ojevautisávo ojogua peteĩ pare ojelihapa ramóvape oñepinta hag̃ua. Opyta porã hag̃ua ojelihavaʼerã heta vése. Péicha avei pe ojevautisáva ojapóma heta mbaʼe Ñandejára oipotáva. Péro osegivaʼerã okambia ombopyahu hag̃ua hekove.

Apóstol Pablo jepe ohechakuaavaʼekue osegivaʼerãha okambia. Haʼe heʼi: ‘Che ajuhu che pype ko mbaʼe kóva, ajapose jave pe iporãva, pe mbaʼe vai chemyaña myaña mbaʼe vai gotyo’ (Rom. 7:​21, ÑÑB). Pablo ningo hekoporãse vaʼekue ha upévare ohechakuaa okambiavaʼerãha. Ñande avei jajepyʼamongetavaʼerã haʼe ojapo haguéicha ha ñañeporandu: “Mbaʼépa ajapo vai aína? Mbaʼéichapa aikoʼaína, ha mbaʼépa ikatu ajapo cherekoporãve hag̃ua?”.

Mbaʼépa ajapo vai aína?

Oĩ ningo opintánteva peteĩ óga tujakue ha heʼi omyatyrõmaha upéicha. Péro ñapintánteramo umi mbaʼe oñembyaipámava,  amo gotyove hetave ñambaʼapóta hese. Upeichaite avei oikóta ñande ñakambiáramo michĩmínte ñande lája. Jajepyʼamongeta porã vaʼerã jaikuaa hag̃ua mbaʼépa jajapo vai ñaína, péro ndajajapóiramo upéicha ñasẽ vaíta katuete. Upévare iñimportánte jajepyʼamongeta (2 Cor. 13:5). Ha jahechakuaáramo mbaʼépepa ñakambiavaʼerã, Jehová katuete ñanepytyvõta.

Apóstol Pablo ohai: ‘Ñandejára ñeʼẽ oikove ha ipuʼaka, ha hakuave kyse puku haimbe jováivagui, oike oikytĩ meve ñane ánga, ñande espíritu, umi ñane kangue juajuha, ñande karakukua peve, ha ohechauka ñandéve umi ñande pyʼapypegua ha umi ñande pyʼapy rembipota’ (Heb. 4:​12, BNP). Péicha jahecha Ñandejára Ñeʼẽ tuicha ombaʼapoha ñanderehe. Og̃uahẽ ningo ñande pyʼapy ruguaite peve. Ñanepytyvõ jaikuaa hag̃ua mbaʼeichaguápa ñande, iporãpa hína pe ñapensáva ha jarekóva ñande pyʼapýpe. Ha upéva ikatu ojoavy ñande rapichakuéra opensávagui térã ñande voi ñaimoʼãvagui. Upévare la Biblia tuichaiterei ñanepytyvõ jaikuaa hag̃ua mbaʼépepa tekotevẽ ñakambia.

Ñamyatyrõ hag̃ua peteĩ óga tujakue ñakambiavaʼerã opa mbaʼe oñembyaíva, péro tekotevẽ jaikuaa avei mbaʼérepa oñembyaíraʼe. Upéicharõmante noñembyaimoʼãvéima. Ñande avei jaikuaa rire mbaʼépepa tekotevẽ ñakambia, jahechavaʼerã mbaʼérepa jajapo vai raʼe peteĩ mbaʼe ha mbaʼérepa ñag̃uahẽ upévape. Upéicharõ ndahasyivéta ñandepuʼaka hag̃ua umi mbaʼe vaíre. Ñande ningo ñadepende heta mbaʼére, pór ehémplo mbaʼéichapa ñanemongakuaáraʼe ñande tuvakuéra, mávapa ñane amígo, mbaʼe rrelihiónpa jareko, ñanemboriahu térã ñandeplátapa, ha mbaʼeichahápepa jaiko. Ombaʼapo avei ñanderehe umi prográma ha pelíkula jahecháva télepe. Upévare, jaikuaáramo mbaʼépa ojapo vai ñanderehe, ndahasyivéta ñakambia hag̃ua.

Jaikuaávo mbaʼépa jajapo vai ñaína ikatu jaʼe: “Che ningo péichante voi”. Péro upéva jaʼe reiete. Jahechamína mbaʼépa yma Pablo ohai umi Corintoygua ikaʼu ha hekovai vaʼekuépe: ‘Oĩ pende apytépe upéicha guaréva, opáichavo peñemopotĩma Ñandejára espíritupe’ (1 Cor. 6:​9-11, JMP). Ha ñandéve avei ñanepytyvõta Jehová espíritu sánto ñakambia hag̃ua oimeraẽ mbaʼe ñaikotevẽva.

Jahechami Marcos * ohasavaʼekue. Haʼe ningo oiko Filipínaspe ha omombeʼu: “Chemichĩ guive ógape roikóva jejaʼo ha ñorairõme. Upévare arekópe 19 áño apuʼã che tuvakuérare”. Enterove oikuaa Marcos ihugadór ha imondaha. Haʼe ningo isosiokuérandi osekuestrasemoʼã peteĩ avión péro ndojapojepéi hikuái. Marcos omenda rire jepe osegi oiko péicha, ha upéi operdepaite huegohápe orekomíva guive. Upérõ hembireko ostudiáma la Biblia testigos de Jehovándi, ha upe riremínte haʼe ostudia avei hendivekuéra. Ñepyrũrã haʼe oimoʼã nomereseiha oiko chugui Jesús remimboʼe. Péro oaprendévo heta mbaʼe, oñepyrũma okambia ha oho rreunionhápe.  Upéva oipytyvõ chupe oheja hag̃ua hembiapo vai. Koʼág̃a g̃uarã Marcos ojevautisáma ha omboʼe hapichakuérape mbaʼéichapa ikatu oheja avei hembiapo vai.

Mbaʼépepa rekambiavaʼerã nderekoporãve hag̃ua?

Mbaʼépepa ñakambiavaʼerã ñanderekoporãve hag̃ua? Apóstol Pablo ningo heʼi: ‘Pehejapa opa koʼã mbaʼe: pochy, ñaña, jejaʼo, ñeʼẽ kyʼa. Ani pendejapu. Peẽ niko pejeimavaʼekue penderekotujágui, ha pemondevaʼekue pe teko ipyahúva, upe ojoguáva Ñandejára rekópe, ha hembiapokuéva voi’ (Col. 3:​8-10, BNP).

Ñande ningo ñambopyahuse ñande rekove. Ha mbaʼépa ñaikotevẽ upearã? Apóstol Pablo heʼi: ‘Pemonde pe poriahuvereko pende pyʼaite guive, pyʼaporã, jejapoʼỹ, pochykuaaʼỹ ha pasiénsia. Penepasiénsiakena ojuehe ha peñoperdona oiméramo ipochýva ambue ndive. Jehová peneperdona haguéicha, peporoperdona avei peẽ. Hiʼariete, tapenerenyhẽ mborayhúgui, upe ombojoajúva ha omoporãmbáva opaite mbaʼe’ (Col. 3:​12-14, BNP). Ñañehaʼãramo jajapo koʼã mbaʼe, ñanembaʼeporãvéta ha ñandeguerohorýta Jehová ha ñande rapichakuéra (1 Sam. 2:26). Jesús oĩrõ guare yvy ape ári, ojapopaite koʼã mbaʼe. Upévare ñahesaʼỹijóramo Jesús ojapovaʼekue ñanepytyvõta jajapo hag̃ua haʼe ha Itúva ojapo haguéicha (Efe. 5:​1, 2).

Ñanepytyvõta avei ñakambia hag̃ua ñahesaʼỹijóramo la Bíbliape mbaʼeichaguápa rakaʼe umi tapicha yma oservivaʼekue Jehovápe. Péicha jahecháta mbaʼépa ojapo porã ha mbaʼépa ojapo vai hikuái. Pór ehémplo, jahechamína mbaʼépa ojapovaʼekue Jacob raʼy José. Haʼe ohasáramo jepe heta mbaʼe vai naikangýi, osegi guei ojapo iporãva (Gén. 45:​1-15). Ñanemanduʼakuaa avei David raʼy Absalón rehe. Haʼe ningo iporã ha ojeguerohory chupe, haʼetévaicha voi ojepyʼapyetereíva hapichakuérare. Péro amo ipahápe haʼe oporotraisiona ha oporojuka (2 Sam. 13:​28, 29; 14:25; 15:​1-12). Upéicharõ, ndaikatúi jaʼe peteĩ tapicha hekoporãha ojeguerohory térã ipínta porã haguérente.

Ikatu ningo ñakambia

Ñanderekoporãsevéramo ha jaipotáramo Jehová ñandeguerohory, ñañatendevaʼerã ñande pyʼapýpe jarekóvare (1 Ped. 3:​3, 4). Jaikuaáma ningo ñakambia hag̃ua tekotevẽha jahechakuaa mbaʼépa jajapo vai, ha mbaʼéicha rupípa upéva. Avei ñañehaʼãvaʼerã jajapo umi mbaʼe Jehová oguerohorýva. Upéicha jajapóramo ñanderekoporãvéta katuete.

Jehová ningo ñanepytyvõta ñakambia hag̃ua. Pe salmístaicha ikatu jajerure: ‘Ejapomína che pype Ñandejára peteĩ pyʼa ipotĩva, ha embopyahu che pype peteĩ espíritu imbaretéva’ (Sal. 51:​10, ÑÑB). Jajerurékena Jehovápe ijespíritu ñanepytyvõ ha ñanemombarete hag̃ua koʼẽ koʼẽre jajapóvo hembipota. Upéicharõ ikatu ñakambia ha ñanderekoporãve Jehová ñandeguerohoryve hag̃ua káda día.

[Nóta]

[Nóta oĩva taʼanga ndive páhina 4]

Peteĩ torménta ombyaipáramo peteĩ óga, ikatúpa jaʼe ñapintánteramo ñamyatyrõ jeymaha?

[Nóta oĩva taʼanga ndive páhina 5]

Rejoguápa Jesucrístope?