Umi hekojojáva omombaʼeguasúta Ñandejárape opa árare

‘Hekojojáva ndojechavaichéne, opa ára oikóne hese manduʼa. Hekojoja opa ára.’ (SAL. 112:​6, 9.)

1. a) Mbaʼépa ohaʼarõ umi hekojojávape? b) Mbaʼépa tekotevẽ ñañeporandumi?

 AJÉPA hetaite mbaʼe porã ohaʼarõ umi hekojojávape! Opa árare oguerohorýta umi mbaʼe porã Jehová ojapóva ha vyʼápe omombaʼeguasúta oikuaavévo hembiapokue. Salmo 112 omyesakã pe múndo pyahúpe iñimportantetereitaha pe tekojoja. Upévare, ñañeporandumi: Mbaʼéicha piko Jehová pe imarangatu ha hekojojaitéva heʼíta ñanderehe ñanderekojojaha? Jaikuaa ningo ñañehaʼãramo jepe jajapo iporãva, jasegiha gueteri jajavy, ha sapyʼánte tuicha voi jajavy (Rom. 3:23; Sant. 3:2).

2. Mbaʼe mokõi milágropa ojapovaʼekue Jehová ñanderayhúgui?

² Jehová ningo ñanderayhúgui osolusionáma upéva. Upearã peteĩ milágro rupive ombohasa Itaʼýra rekove María retepýpe. Péicha onase peteĩ yvypóra perfékto (Luc. 1:​30-35). Upéi Jesúspe ojejuka rire, Jehová ojapo jey ótro milágro ijojahaʼỹva: omoingove jey chupe peteĩ espírituicha (1 Ped. 3:18).

3. Mbaʼérepa Jehová omeʼẽse Itaʼýrape peteĩ tekove noñehundimoʼãiva arakaʼeve?

³ Jehová ningo omeʼẽ Jesúspe yvágape peteĩ mbaʼe ndohupytyivaʼekue onase  mboyve ko yvy ape ári: peteĩ tekove noñehundimoʼãiva arakaʼeve (Heb. 7:​15-17, 28). Haʼe ningo omeʼẽse Itaʼýrape upéva, iñeʼẽrendúgui chupe ohasa asyvéramo jepe. Péicha Jesús ohechauka Satanás ijapuha heʼírõ guare yvypóra oserviha Ñandejárape openságui ijehénte ha ndahaʼéi ohayhúgui Jehovápe (Pro. 27:11).

4. a) Mbaʼépa ojapovaʼekue Jesús oho riréma yvágape, ha mbaʼépa ojapo ñande Ru yvagapegua? b) Mbaʼéichapa reñeñandu rejepyʼamongetávo Jehová ha Jesús ojapovaʼekuére ñanderehehápe?

⁴ Jesús oho riréma yvágape, ‘oike Ñandejára renondépe ñanderehehápe’ ha omeʼẽ ‘huguy repykue’. Ha ñande Ru yvagapegua katu, oguerohory Jesús omeʼẽva chupe sakrifísioramo “ojeheja rei hag̃ua ñandéve ñane rembiapo vaikue”. Upéicha rupi, ñande ikatu pyʼaguapýpe ‘jaservi Ñandejárape’. Upévare, katuete ñande jaʼéta avei heʼíva oñepyrũvo Salmo 112-pe: ‘Ñamombaʼeguasúkena Jehovápe!’ (Sal. 112:​1-10; Heb. 9:​12-14, 24, BNP; 1 Juan 2:2).

5. a) Mbaʼépa jajapovaʼerã akóinte ñaime porã hag̃ua Ñandejára ndive? b) Mbaʼépa ikatu jaʼe Salmo 111 ha 112 rehe?

⁵ Akóinte ñaime porã hag̃ua Ñandejára ndive, jajeroviavaʼerã pe sakrifísio Jesús ojapovaʼekuére. Koʼẽ koʼẽrekena jaagradese Jehovápe ñanderayhueterei haguére (Juan 3:16). Jastudia meme vaʼerã avei la Biblia ha ñañehaʼãmbaite jaiko upépe heʼiháicha. Salmo 112-pe jatopa heta konsého ñanepytyvõtava ñaime porã hag̃ua Ñandejárandi. Ko salmo ningo ombojoapyhína Salmo 111-pe heʼíva. Mokõive oñepyrũvo heʼi “Alaben a Jah!”, térã “Alelúja!”. Ha umi veintidós línea oĩva upe rire omoñepyrũ peteĩ létra evréo. *

Mbaʼérepa javyʼa

6. Mbaʼépa Salmo 112 heʼi pe kuimbaʼe omombaʼévare Ñandejárape?

⁶ ‘Ovyʼa pe kuimbaʼe omombaʼéva Ñandejárape, ha ipyʼarory ojapóvo hembipota. Iñemoñare imbareténe ko yvy ári, umi hekopotĩva raʼykuéra ojehovasáne.’ (Sal. 112:​1, 2.) Jahechakuaa oñepyrũvo pe salmísta oñeʼẽha peteĩrente ha upéi opakuetévo pe versíkulo 2 katu oñeʼẽma hetáre heʼívo ‘umi hekopotĩva’. Apóstol Pablo oiporu avei Salmo 112:9 oñeʼẽ hag̃ua Ñandejára ojapovaʼekuére umi kristiáno ypykue rehehápe (jaleemína 2 Corintios 9:​8, 9). Ajépa ko salmo ohechauka porãite mbaʼéichapa ikatu ovyʼa Jesucristo remimboʼekuéra koʼag̃agua!

7. Mbaʼe ojapo hag̃uápa okyhyje umi kristiáno tee? Ha mbaʼépa ojapovaʼerã hikuái upévare?

⁷ Heʼiháicha Salmo112:1 umi kristiáno tee ningo ovyʼaiterei ‘omombaʼe rupi Ñandejárape’. Haʼekuéra okyhyjégui ombopochýrõ g̃uarã Jehovápe ipuʼaka ko múndo  añáre. Ovyʼa ningo hikuái ohesaʼỹijóvo Ñandejára Ñeʼẽ ha iñeʼẽrendúvo chupe. Upévare opredika hikuái opárupi. Haʼekuéra ningo oñehaʼã avei omboʼe Ñandejára rembipota oparupigua tapichápe, ha umi iñañávape katu heʼi hiag̃uimaha Ñandejára oporohustaha ára (Eze. 3:​17, 18; Mat. 28:​19, 20).

8. a) Mbaʼépa oiko Ñandejára siervokuéra opredika haguére? b) Mbaʼépa opromete Ñandejára isiervokuérape?

⁸ Ñandejára siervokuéra opredika haguére oĩma hikuái siete millones rupi ko yvy ape ári. Ajéiko hetaitéma oĩ oservíva Jehovápe! (Juan 10:16; Rev. 7:​9, 14.) Ha hetaiteve mbaʼe porã Ñandejára omeʼẽta chupekuéra okumpli vove oprometevaʼekue! Pe jehasa asy guasu aja oñangarekóta avei hesekuéra. Upéicha oikóta hikuái tekojojápe. Umi ohasávape Armagedón ningo ‘oñevendesíta’. Koʼýte ojotopa jey vove hapichakuéra oñemoingove jeýva ndive. Ajéiko tuichaite mbaʼe upéva! Upe rire, umi ‘ipyʼarorýva ojapóvo Ñandejára rembipota’, ohupytýta perfeksión ha liverta ijojahaʼỹva (2 Ped. 3:13; Rom. 8:21).

Jaiporu porãkena umi mbaʼe jarekóva

9, 10. Mbaʼépa ojapo umi ohótava yvágape? Mbaʼérepa predikasión ojokoséva osẽ vaíta katuete?

⁹ ‘Hógape opa mbaʼe oguereko, ha hekojoja opa árape. Pytũguýpe jepe ohesape hekopotĩvape, Haʼe ipyʼaporã, oporoporiahuvereko ha hekojoja.’ (Sal. 112:​3, 4.) Yma ningo Ñandejára siervokuéra apytépe oĩvaʼekue irríkova. Ha umi oĩ porãva Ñandejára ndive añetehápe irríko ndorekóiramo jepe heta mbaʼe. Umi Ñandejára siervokuéra apytépe hetave voi oĩ imboriahúva. Ikatu voi ojeapoʼi chupekuéra upévare Jesús tiémpope guaréicha (Luc. 4:18; 7:22; Juan 7:49). Péro ñanderríko térã ñanemboriahúramo jepe, enterove ikatu ñaime porã Ñandejára ndive  (Mat. 6:20; 1 Tim. 6:​18, 19; jaleemína Santiago 2:5).

¹⁰ Umi ohótava yvágape ha umi ‘ambue ovechakuéra’ ningo noñomĩri hapichakuéragui oikuaáva Ñandejáragui. Ohesape guei hikuái ko múndo añáme, oĩvahína pytũguýpe. Haʼete voi ‘peteĩ lámpara umi hekojojávape g̃uarã’. Mbaʼéichapa ojapo hikuái upéva? Omombeʼúvo hapichakuérape umi mbaʼe omoarandútava ha oipytyvõtava chupekuéra oikuaa porãve hag̃ua Ñandejárape. Umi ojokoséva predikasión osẽ vaíta katuete. Jaikuaa ningo umi mbaʼe ojehupytýva predikasión rupive ndopamoʼãiha arakaʼeve. Upévare, Ñandejára siervokuéra iñeʼẽrendu ohasa asýramo jepe, oikuaágui ikatuha oiko opa árare.

11, 12. Maʼerãpa Ñandejára siervokuéra omeʼẽ umi mbaʼe orekóva?

¹¹ Umi ungido ha umi oĩva pe ‘aty guasúpe’ ningo ipojeraiterei. Salmo 112:9 heʼi: “Imbaʼévagui omeʼẽ imboriahúvape, ha ipojera opa ára”. Koʼág̃a rupi Ñandejára siervokuéra omeʼẽ avei umi mbaʼe orekóva umi ermáno oikotevẽvape ha ivesinokuérape. Oipytyvõ avei hikuái hetápe oiko jave sarambi: yvyryrýi, ama guasu térã yvytu atã. Ha Jesús heʼi haguéicha, upéva ombovyʼa avei chupekuéra (jaleemína Hechos 20:35 ha 2 Corintios 9:7).

¹² Ñapensamíntena mboýpa ojegastahína ojejapo hag̃ua ko rrevísta 172 idiómape, ha umi idióma oñeʼẽva apytépe heta oĩ imboriahúva. Ko rrevísta ningo ojejapo avei umi lenguaje de séñaspe, oñepytyvõ hag̃ua umi ohenduʼỹvape ha ojejapo avei bráillepe umi ohechaʼỹvape g̃uarã.

Imbaʼeporã ha hekojoja

13. Máva mávapa ehémplo ñandéve g̃uarã? Ha mbaʼéichapa ñande ikatu avei ñaipytyvõ ñande rapichakuérape?

¹³ ‘Imbaʼeporã pe kuimbaʼe oikóva pyʼaporãme, ha oiporukáva.’ (Sal. 112:​5, S.) Oimevaʼerã jaikuaáma oĩha umi nomeʼẽiva pyʼaporãme. Oĩ umi omeʼẽva ojechauka hag̃uánte ha oĩ avei umi ijopyetereíva voi. Ha ndaigustoiʼimi ningo ñanepytyvõramo peteĩ ñandeapoʼíva térã ohechaukáva ñandéve ñamolestahañaína. Péro ajépa javyaʼite ñanepytyvõramo peteĩ ipyʼaporãva! Upévape Jehová peteĩ ehémplo ñandéve g̃uarã, haʼe ningo ovyʼa ñanepytyvõ jave (1 Tim. 1:11; Sant. 1:​5, 17). Ha Jesucristo ohechaukavaʼekue ipyʼaporãha Ituvaichaite (Mar. 1:​40-42). Ñande ñaime porãséramo Ñandejára ndive, vyʼapópe ha pyʼaporãme ñaipytyvõvaʼerã ñande rapichakuérape. Koʼýte japredika jave ñane vesinokuérape.

14. Mbaʼérepa enterove jajapovaʼerã tekojojápe opa mbaʼe?

¹⁴ ‘Opa oguerekóva ogueroguata tekojojápe.’ (Sal. 112:5.) Ojeʼéma haguéicha pe tembiguái jeroviaha oñangareko Jehová heʼiháicha umi mbaʼe ipoguýpe oĩvare (jaleemína Lucas 12:​42-44). Upéva jahechakuaa la Biblia heʼívare ansianokuérape ojapo hag̃ua oĩ jave hembiapo vaietereíva kongregasiónpe. Pe tembiguái jeroviaha ningo hekojojahína. Upévare oiporu hikuái Ñandejára Ñeʼẽ opa mbaʼe ojejapo hag̃ua hekopete kongregasiónpe, hogar misional ha sukursalkuérape. Péro, enterove jajapovaʼerã tekojojápe opa mbaʼe ñane ermanokuéra ha ñande rapichakuéra ndive, ndahaʼéi umi ansiáno añónte. Ha koʼýte ñañeʼẽtaramo pláta rehe (jaleemína Miqueas 6:​8-11).

Hekojojáva ohupytýta heta mbaʼe porã

15, 16. a) Mbaʼéichapa umi hekojojáva ogueropuʼaka umi notísia vaiete? b) Mbaʼépa akóinte ojapovaʼerã Ñandejára siervokuéra?

¹⁵ “Hekojojáva ndojechavaichéne, opa ára oikóne hese manduʼa. Haʼe ndokyhyjéi  oñehendukáramo g̃uarã chupe ivaíva, haʼe ojerovia mbarete Ñandejára rehe. Ndaipyʼamokõiri ha mbaʼevégui ndokyhyjéi, ha oikuaa porã umi hese ijaʼeʼỹva oñehunditaha.” (Sal. 112:​6-8.) Koʼág̃a rupi ningo hetaitereive notísia vai ñahendu. Pyʼỹinte jaikuaa oikoha gérra, mbaʼépa ojapo umi terrorísta, oĩha mbaʼasy pyahu ha umi mbaʼasy tuja oñepyrũ jeyha, avei hetaveha umi mbaʼe vai apoha, imboriahúva ha omongyʼáva ko yvy. Umi hekojojáva ningo oiko koʼã mbaʼe vaiete apytépe, péro ndokyhyjéi hikuái. ‘Haʼekuéra ojerovia mbarete Ñandejára rehe’ ha “ndaipyʼamokõiri”. Ojerovia hikuái koʼẽrõitéma Ñandejára omoĩtaha peteĩ múndo pyahu. Ha oikóramo peteĩ sarambi guasu oĩ porãve hikuái hetágui, ojerovia rupi Jehováre. Haʼe ningo katuete oipytyvõta chupekuéra ‘ojecha vai jave’, omombaretéta chupekuéra ogueropuʼaka hag̃ua oimeraẽ mbaʼe (Fili. 4:13).

¹⁶ Umi hekojojávare oĩ avei heta ndaijaʼéiva ha heʼíva japu. Péro koʼãva nomokirirĩri chupekuéra ni ndojapomoʼãi voi katu. Ñandejára siervokuéra akóinte ojapo pe tembiapo oñemeʼẽvaʼekue chupekuéra: omombeʼu pe marandu porã Ñandejára Rréino rehegua ha oipytyvõ umi ipyʼaporãvape oservi hag̃ua Jehovápe. Katuete ningo oñepuʼãvéta hesekuéra og̃uahẽ mbotávo huʼãme pe ára paha, koʼýte ág̃a Gog de Magog térã Satanás ohundise vove enterovépe. Upépe jahecháta mbaʼéichapa oñehundi umi ijaʼeʼỹva ñanderehe. Jahecháta mbaʼéichapa Jehová omopotĩ héra. Ajépa tuichaite mbaʼéta upéva! (Eze. 38:​18, 22, 23.)

‘Tuicha ha ojekuaa opárupi’

17. Mbaʼéichapa umi hekojojáva ‘tuicha ha ojekuaáta opárupi’?

¹⁷ Ajéiko javyʼaitéta ñamombaʼeguasu vove Jehovápe oñondivepa, ha Satanás ha imúndo ndaiporivéi vove! Péicha ovyʼáta opa ára g̃uarã umi akóinte hekojojáva Ñandejára renondépe. Noñemotĩmoʼãi hikuái, Jehová heʼígui umi hekojojáva ‘tuicha ha ojekuaataha opárupi’ (Sal. 112:9). Haʼekuéra ovyʼaitereíta Jehová ohundipa vove umi opuʼãvape hese.

18. Mbaʼéichapa oñekumplipáta Salmo 112:​10-pe heʼíva?

¹⁸ “Upe tekove ñaña ohecháramo upéva ipochyetereíta, omopururũta hãinguéra ha ikusuguepáta. Umi tekove ñaña rembipota katuete opa rei vaʼerã.” (Sal. 112:​10, ÑÑB.) Koʼẽrõite umi otakyvahína Ñandejára siervokuérare “ikusuguepáta”. Umi ndaijaʼéiva ñanderehe ha ojokoséva ñane rembiapo ningo oñehundipáta pe ‘jehasa asy guasúpe’ (Mat. 24:21).

19. Mbaʼépa ikatu rehaʼarõ?

¹⁹ Ndépa rehecháne Jehová ojapo vove upéva? Ha remano mbaʼéramo upe mboyve tahaʼe nderasykatu térã ndetujágui, reĩtapa umi oñemoingove jeýva apytépe? (Hech. 24:15.) Upéichata ningo akóinte rejeroviáramo Jesús sakrifísiore ha reñehaʼãramo rejapo opa mbaʼe Jehová oipotaháicha. Upéicha ojapo umi tapicha Salmo 112-pe orrepresentáva pe kuimbaʼe hekojojáva (jaleemína Efesios 5:​1, 2). Upéicharõ ikatu rehaʼarõ Jehová imanduʼataha umi mbaʼe porã rejapóvare ha omombaʼetaha opa árare (Sal. 112:​3, 6, 9).

[Nóta]

Jajepyʼamongetamína koʼã mbaʼére

• Mbaʼérepa ikatu jaʼe “Alelúja!”?

• Mbaʼépa ombovyʼa koʼág̃a rupi pe ‘tembiguái jeroviaha ha iñarandúvape’?

• Mbaʼéichapa ñaporopytyvõvaʼerã Jehová ñandeguerohory hag̃ua?

[Porandu ñahesaʼỹijóva]

[Nóta oĩva taʼanga ndive páhina 25]

Ñanderekojoja hag̃ua jajeroviavaʼerã pe sakrifísio Jesús ojapovaʼekuére

[Nóta oĩva taʼanga ndive páhina 26]

Umi mbaʼe ñameʼẽva ñande pyʼaite guive, ojeporu oñepytyvõ hag̃ua oiko jave yvyryrýi, ama guasu ha ojejapo hag̃ua lívro, rrevísta, folléto ha hetave mbaʼe