Ñaneñeʼẽrendúramo ñambovyʼáta Jehovápe

“Nearandúke, che raʼy, upéva chembovyʼa, ha ikatúta ambohovái cherehe ojahéivape.” (PRO. 27:11.)

1, 2. a) Mbaʼéichapa Satanás omoñepyrũ peteĩ provléma ohupytýva enterove yvypórape? b) Mbaʼérepa jaʼe Satanás osegiha otaky Jehováre?

 JEHOVÁ oheja Satanás ombohasa asy Jóbpe. Heʼi voi hese naiñeʼẽrendumoʼãiha Ñandejárape. Upévare, Jóbgui omanomba hymbakuéra, ifamiliakuéra ha ojagarra chupe peteĩ mbaʼasy vai. Péro Satanás ndahaʼéi hesénte oñeʼẽ vaíva, haʼe ningo heʼi voi: “Yvypóra oĩ omeʼẽ hag̃uáicha oimeraẽ mbaʼe oikove hag̃ua rehehápe”. Péicha Satanás omoñepyrũ peteĩ provléma ohupytýva enterove yvypórape, ha upéva neʼĩra gueteri oñesolusiona (Job 2:4).

² Ohasa rire seiscientos áño rupi, Salomón heʼi: “Nearandúke, che raʼy, upéva chembovyʼa, ha ikatúta ambohovái cherehe ojahéivape” (Pro. 27:11). Péicha jahechakuaa Salomón tiémpope Satanás osegínte hague otaky Jehováre. Upéi Jehová ohechauka apóstol Juánpe mbaʼéichapa Satanás okopínte oikóvo isiervokuérare. Ha upéva ojapo oñemosẽ rire chupe yvágagui 1914-pe, Ñandejára Rréino oñepyrũrõ guare oisãmbyhy yvágape. Ha koʼýte ko ára pahápe Satanás heʼínte oikóvo ndajajeroviaiha Ñandejárare ñande pyʼaite guive (Rev. 12:10).

3. Mbaʼe mbaʼépa ñanemboʼéta pe lívro de Job?

 ³ Ko artíkulope ñahesaʼỹijóta mbohapy mbaʼe ñanemboʼéva pe lívro de Job. Primero, Satanás haʼeha pe ndaijaʼeietéva yvyporakuérare ha pe ojapoukáva heta mbaʼe vai Ñandejára rembiguaikuérare. Segundo, Jehová ñaneamigoitéramo jagueropuʼakáta opa mbaʼe jahasáva ha ñaneñeʼẽrendúta chupe. Ha tercero, Ñandejára oipytyvõ haguéicha Jóbpe, ñandéve avei ñanepytyvõta koʼág̃a rupi. Upéva ojapóta la Biblia, iñorganisasión ha ijespíritu sánto rupive.

Aníkena ñanderesarái mávapa hína pe ndaijaʼeietéva ñanderehe

4. Mávapa pe ojapoukáva hetaite mbaʼe vai ko múndope?

⁴ Heta ningo oĩ ojepyʼapýva umi mbaʼe vai oikóvare ko múndope. Péro ndoikuaái hikuái mbaʼérepa oiko. Upéicha ningo haʼekuéra ndogueroviáigui Satanás oĩha, ha haʼe ojapoukaha umi mbaʼe vaieta oikóva ko múndope. Oĩ avei umi provléma yvypórante omoñepyrũva. Yma Adán ha Eva naiñeʼẽrenduvéi guive Ñandejárape, yvyporakuéra ojapónte oikóvo ivaíva. Péro Satanás voi ningo ombotavyvaʼekue Évape ha upéicha rupi opuʼã avei Ñandejárare. Satanás poguýpe ningo oĩ ko múndo, upévare ojeiko asy ha ivaipave ohóvo la situasión. Satanás ningo “ko múndo ruvicha”, ha umi hénte haʼéicha avei oñemombaʼeguasu, ojodiskuti térã oñorairõsénte voi, iñenvidíoso, ipokarẽ ha oiko iñakãre (2 Cor. 4:​4, BNP; jaleemína Santiago 3:​14, 15). Upéicha rupi umi polítiko ha rrelihionkuéra omoakãva oñorairõmba, heta oĩ ndaijaʼéiva hapicháre, ojapóva ivaíva ha itaryrýiva. Koʼã mbaʼe ningo ombohasa asyvéntema enterovépe (1 Tim. 2:14; 3:6).

5. Mbaʼépa ñande jajapovaʼerã umi mbaʼe jaikuaávagui?

⁵ Péro ñande jaservíva Jehovápe javyʼaiterei jaikuaágui Satanás ojapoukaha umi mbaʼe vaieta oikóva ko múndope. Upévare ñamombeʼuvaʼerã koʼã mbaʼe ñande rapichakuérape predikasiónpe. Javyʼaiterei ningo ñadefende haguére Ñandejára réra ha ñamombeʼu haguére ñande rapichakuérape Jehová koʼẽrõitéma ohunditaha Satanáspe ha opa mbaʼe ñanembohasa asýva.

6, 7. a) Mávapa pe hetápe omopuʼãva Ñandejára siervokuérare? b) Mbaʼéichapa ikatu jajapo Elihú ojapo haguéicha?

⁶ Satanás ningo ojapouka heta mbaʼe vai ko múndope ha oiporu avei umi héntepe opuʼã hag̃ua Ñandejára siervokuérare. Haʼe ningo katuete ñanembohasa asýta avei. Upévare Jesucristo heʼivaʼekue apóstol Pédrope: “Nde Simón, emaʼẽke. Satanás ojeruréma penderehe pendetyvyro hag̃ua,  ku trígo oñemboveveramoguáicha” (Luc. 22:31). Upéicha avei ñande ñañehaʼãva jaguata Jesús pyporére, Satanás ñandejopýta katuete. Ndareíri apóstol Pedro heʼirakaʼe Satanás rehe ojoguaha peteĩ ‘león pochýpe’, ohekavahína hoʼuvaʼerã. Apóstol Pablo avei heʼi: “Opaite ojeroviáva guive Jesucristo rehe ningo ojepersegivaʼerã” (1 Ped. 5:8; 2 Tim. 3:​12, ÑÑB).

⁷ Mbaʼépa ikatu jajapo peteĩ ermánope ojere vaipa jave? Ñañemomombyryrangue ñane ermánogui, jatratáta chupe ñane amigoitéicha pe Elihú ojapo haguéicha Job rehe. Ha ñaipytyvõta chupe ombohovái hag̃ua Satanáspe, ha nañanderesaraimoʼãi haʼeha pe ndaijaʼeietéva ñanderehe (Pro. 3:27; 1 Tes. 5:25). Ñande ningo ñaipytyvõse ñane ermanokuérape akóinte iñeʼẽrendu hag̃ua Jehovápe ijetuʼuvéramo jepe upe ohasáva. Upéicharõmante ningo ñambovyʼáta Jehovápe.

8. Mbaʼépa Satanás ojapo Job rehe anive hag̃ua omombaʼeguasu Jehovápe?

⁸ Satanás oñepyrũ hag̃ua ombohasa asy Jóbpe ojukapaite chugui hymbakuéra. Haʼéngo oiméne koʼãvare oñemantenéraʼe. Job oiporuvaʼekue avei hymbakuéra ojapo hag̃ua sakrifísio Jehovápe. Job 1:​5-pe heʼi: ‘Job opuʼã pyharevete oikuaveʼẽ hag̃ua sakrifísio peteĩteĩvare omopotĩ hag̃ua chupekuéra hembiapo vaikuégui. Ha upéicha haʼe ojapómi sapyʼa rei oiméramo g̃uarã umi itaʼýra hembiapo vaíraʼe térã ojahéi Ñandejárare ipyʼapýpe’. Péro Satanás oñepyrũrõ guare ombohasa asy Jóbpe, ohundipaite chugui ‘opa mbaʼe orekóva’ ha oiporúva jepi omombaʼeguasu hag̃ua Jehovápe (Pro. 3:9). Upéicharamo jepe, haʼe osegi omombaʼeguasu chupe heʼíva rupive.

Ñañemoag̃uivékena Jehováre

9. Mbaʼépa ñande ñamombaʼeterei?

⁹ Ñanemboriahu, ñandetuja térã ñanderasykatúramo jepe, ikatu ñañemoag̃ui Jehováre ñane amígoramo. Upéva ningo ñande ñamombaʼeterei, ñanepytyvõ rupi ñaneñeʼẽrendu ha ñambovyʼa hag̃ua Jehovápe, jahasáramo jepe opaichagua situasión ijetuʼúva. Upéicha rupi umi oikuaa ramóva Jehovápe jepe ipyʼaguasu ha ojerovia hese.

10, 11. a) Mbaʼéichapa Valentina Garnovskaya ombohovái opaichagua jehasa asy? b) Mbaʼépa ohechauka ko ermána rembiasakue?

¹⁰ Jahechamína Valentina Garnovskaya rembiasakue. Haʼe ningo peteĩ ermána Rusiaygua ha ojeroviavaʼekue Jehováre Job ojapo haguéicha. Orekórõ guare veinte áño, 1945-pe peteĩ ermáno opredika chupe. Péro tres vésente oho jey vaʼekue hendápe oñeʼẽve hag̃ua hendive la Bíbliare. Upéicharõ jepe, Valentina oñepyrũma opredika ivesinokuérape. Upévare ojegueraha chupe préso ha osẽ chupe ocho áño ombaʼapo pohýi hag̃ua peteĩ campo de concentraciónpe. Upéi 1953-pe ojepoi chugui  ha oñepyrũ jeýma opredika. Péro ojejagarra jey ha koʼág̃a katu osẽma chupe diez áño. Aremi rire, ojeguerova Valentínape ótro campo de concentraciónpe ha upépe umi ermána oreko peteĩ Biblia. Upéi peteĩ árape ohechauka chupe hikuái, ha haʼe ovyʼaiterei hasýpe ohecha jey haguére la Biblia. Haʼéanga ningo pe ermáno opredikárõ guare chupénte 1945-pe ohechavaʼekue la Biblia.

¹¹ Valentínagui ojepoi áño 1967-pe ha upérõ raẽ ojevautisa ohechauka hag̃ua oñemeʼẽma hague Jehovápe. Ha iliverta ipópema, oñemoĩ kyreʼỹme opredika. Péro 1969-pe ojejagarra jey Valentínape ha osẽ chupe tres áño de kársel. Upéicharõ jepe haʼe akóinte osegi opredika. Haʼe oipytyvõvaʼekue 44 hapichápe oservi hag̃ua Jehovápe ha omano 2001-pe. Valentina ohasa veintiún áño campo de concentración ha karselha rupi. Haʼe ningo ohejapaite orekomíva, iliverta jepe oheja ojapo hag̃ua Jehová rembipota. Omano mboyvemi, heʼi: “Chéngo ni ndacherógai, ha umi mbaʼe arekomíva katu ijapáma peteĩ volsónpe, péro avyʼaiterei aservi haguére Jehovápe”. Ko ermána rembiasakue ohechauka porã Satanás ijapuha. Satanás ningo oimoʼã jahejataha Jehovápe jahasa asýramo (Job 1:​9-11). Jehechakuaa Valentina ombovyʼa hague Jehovápe. Ha oimevaʼerã omoingovesetereíma chupe umi isiervokuéra iñeʼẽrendúva ndive (Job 14:15).

12. Mbaʼérepa ikatu ñañemoag̃uive Jehováre?

¹² Ñande ningo ñañemoag̃ui Jehováre jahayhúgui chupe. Jaguerohoryeterei umi mbaʼe porã ojapóva ha ñañehaʼãmbaite jaiko haʼe oipotaháicha. Ndahaʼeietehína Satanás heʼiháicha, ñande ningo jahayhu Jehovápe tahaʼe iporã térã ivai jave ñane situasión. Ha upéva ñanemombarete ha ñanepytyvõ jajerovia hag̃ua hese ñande pyʼaite guive jahasa asyvéramo jepe. Jehová katuete, ‘oñangarekóta umi hese ojeroviávare’ (Pro. 2:8; Sal. 97:10).

13. Mbaʼéichapa Jehová ohecha opa mbaʼe jajapóva chupe g̃uarã?

¹³ Ndaikatúiramo jepe jajapo hetave mbaʼe ñamombaʼeguasu hag̃ua Ñandejárape, jajapoñaína opa mbaʼe jahayhúgui chupe. Jehová ningo ñandepyʼakuaa ha nañanemboykemoʼãi ndaikatúi haguére jajapo heta mbaʼe. Haʼe omombaʼe opa mbaʼe jajapóva chupe g̃uarã, ha koʼýte omombaʼe ohechávo jahayhúgui chupe jajapoha. Job oñeñandu vaietereíramo jepe opa mbaʼe ohasavaʼekuére, heʼi porã umi iñamígo guaʼúpe mbaʼeichaitépa haʼe omombaʼe Jehová rembipota (jaleemína Job 10:12; 28:28). Pe lívro de Job opakuetévoma Ñandejára heʼi Elifaz, Bildad ha Zofárpe ipochyetereiha hendivekuéra ijapu haguére. Péro heʼi oguerohoryha Jóbpe, cuatro vése voi ohenói chupe “che rembiguái”. Ha ojerure Jóbpe oñemboʼemi hag̃ua umi iñamígo guaʼu rehehápe (Job 42:​7-9). Jajapókena avei upéicha Jehová ñandeguerohory hag̃ua.

Jehová oipytyvõ isiervokuérape

14. Mbaʼéichapa Jehová oipytyvõ Jóbpe okambia hag̃ua?

¹⁴ Job iñimperféktoramo jepe, iñeʼẽrendu Ñandejárape. Haʼe ningo ojavy avei ojejopy vaietérõ guare. Pór ehémplo heʼi Jehovápe: ‘Ajerure ndéve Ñandejára chepytyvõ hag̃ua ha nde reñemokirirĩ. Rekaguai cherehe pochýpe’.  Job ningo oñedefendeseterei, ha heʼi voi: ‘Ndacherekokyʼái’ ha ‘arakaʼeve ndajapói avavére ivaíva, ha ipotĩ che ñemboʼe’ (Job 10:​7, ÑÑB; 16:17; 30:​20, 21). Upéicharõ jepe Jehová oipytyvõ Jóbpe ha imbaʼeporã hendive. Oporandu chupe heta mbaʼe ha upéva oipytyvõ Jóbpe anive hag̃ua opensa ijehénte ha ohechakuaa hag̃ua Ñandejára ipoderosoitereiha ha yvypóra ndahaʼeieteha voi mbaʼeve henondépe. Job ohendu ojeʼéva chupe ha okambia (jaleemína Job 40:8; 42:​2, 6).

15, 16. Mbaʼépa Jehová ojapo ñanepytyvõ hag̃ua koʼág̃a rupi?

¹⁵ Koʼág̃a peve Jehová ñanepytyvõ ñasẽ porã hag̃ua opa mbaʼépe. Pór ehémplo, Jesucristo omano ñanderehehápe. Upéicha rupi Ñandejára ikatu ñaneperdona ñane rembiapo vaikuére ha ñañemoag̃ui hese (Sant. 4:8; 1 Juan 2:1). Ha jajeruréramo chupe, ikatu avei omeʼẽ ñandéve ijespíritu sánto ñambohovái hag̃ua ñane provléma. Ñandejára ningo omeʼẽ avei ñandéve la Biblia. Jalee ha jajepyʼamongetáramo heʼívare, ñaiméta ñambohovái hag̃uáicha oimeraẽ mbaʼe. Ñahesaʼỹijóramo hesakãvéta ñandéve mbaʼérepa Jehová oreko derécho oisãmbyhývo opa mbaʼe. Avei mbaʼérepa ñaneñeʼẽrenduvaʼerã chupe ha jajerovia hese ñande pyʼaite guive.

¹⁶ Tuichaiterei mbaʼe ningo ñandéve g̃uarã jaservi Jehovápe oñondivepa. Haʼe ningo oñangareko ñanderehe pe “tembiguái jeroviaha ha iñarandúva” rupive (Mat. 24:​45-47). Umi 100.000 kongregasión oĩvape opárupi ojejapo umi rreunión ñanerekomboʼéva ñambohovái hag̃ua heta mbaʼe ijetuʼúva. Upéva ohechaukáta ñandéve peteĩ mitãkuña Alemaniaygua ohasavaʼekue.

17. Emombeʼumi peteĩ mbaʼe oikovaʼekue ohechaukáva iñimportanteha jajapo ojeʼéva rreunionhápe.

¹⁷ Upe mitãkuña ningo héra Sheila, ha omombeʼu mbaʼépa oiko hese eskuélape. Heʼi: “Peteĩ árape ore profesór osẽ aja klásegui che kompañerokuéra oguenohẽ peteĩ tabla ouija. Ahechávo mbaʼépa ojapóta hikuái, asẽ ahapa hese upégui. Upe riréma aikuaa oĩ hague opilláva umi demónio ouha chupekuéra, ha tuichaiterei oñemondýi hikuái, upévare osẽ odiparapa upégui”. Ajéiko ojapo porãitéraʼe Sheila osẽvo upégui! Péro mbaʼépa oipytyvõraʼe chupe ojedesidi pyaʼete hag̃ua? Sheila heʼi: “Upe mboyvemi peteĩ rreuniónpe ojeʼékuri ivaiha ojeporu pe tabla ouija. Upévare aikuaáma mbaʼépa ajapovaʼerã. Ha ambovyʼase avei Jehovápe heʼiháicha Proverbios 27:11”. Ajépa ojapo porãite Sheila oho haguére upe rreuniónpe ha ojapysaka porã upépe ojeʼévare.

18. Mbaʼépa nde rejapóta?

¹⁸ Jajapo memékena Jehová organisasión heʼiháicha. Aníkena jafalta ni peteĩ rreuniónpe, jalee la Biblia ha ñahesaʼỹijo umi lívro, rrevísta ha folléto. Péicha Jehová ohechaukáta ñandéve mbaʼépa jajapovaʼerã ha omeʼẽta ñandéve ñaikotevẽva. Ñañemboʼe meme vaʼerã avei ha jajeheʼa umi ermáno ojerovia mbaretévare Jehováre. Jehová ningo oipota ñasẽ porã, ha ojerovia ñanderehe ñaneñeʼẽrendutaha chupe. Tuichaiterei mbaʼe ningo ñandéve g̃uarã ñamombaʼeguasu Jehovápe, jajerovia hese ñande pyʼaite guive ha ñambovyʼa chupe.

Nemanduʼápa koʼã mbaʼére?

• Mbaʼépa ojapo Satanás?

• Mbaʼépa ñandéve g̃uarã pe iñimportantevéva?

• Mbaʼépa jajapovaʼerã ñañemoag̃uive hag̃ua Jehováre?

• Mbaʼéichapa Jehová ñanepytyvõ koʼág̃a rupi?

[Porandu ñahesaʼỹijóva]

[Nóta oĩva taʼanga ndive páhina 8]

Ndépa remombeʼuse umi mbaʼe porãite reikuaáva?

[Nóta oĩva taʼanga ndive páhina 9]

Ñaipytyvõkuaa ningo ñane ermanokuérape akóinte iñeʼẽrendu hag̃ua

[Nóta oĩva taʼanga ndive páhina 10]

Valentina ohejapaite orekomíva ijerovia rehehápe